TALA I VAIFANUA

Pago Pago, AMERIKA SAMOA

TOLU ASO FA’ATINO GALUEGA TAUALOA TAUTUA MO I LATOU I AI MANAOGA FAAPITOA

O le masina lenei o Mati, sa fa’alauiloaina ai fa’alauaitele i se poloaiga a le taitai o le tatou malo, e faataua ai tautua uma o lo ua fa’atautaia e le malo mo i latou ua le atoatoa le malosi o le tino, poo le Developmental Disability Awareness. Ona o lea fa’ataua, ua fa’asaga ai le Matagaluega o Tupulaga Talavou ma Tina a le Malo, e fa’aaoga le tolu aso e taualoa ai tautua uma o lo ua ofoina mo I latou ua a’afia le soifua i nei a’afiaga o le tino poo le mafaufau. O polokalama ua mafai ona fa’atutu e tautua lea vaega o le mamalu lautele ole atunuu e aofia ai le Special Eduacation i totonu o A’oga, Tautua mo Fanau a le Atunuu i le Matagaluega o Tautua Lautele mo Tagata Lautele, Voc Rehab, OPAD ma isi fa’alapotopotoga tumaoti.

Mo le tolu o aso, sa amata mai i le aso Gafua, e faatautaia ai fa’alauiloaga eseese e nei vaega uma ma sa tofu sao i ai le vasega o A’oga lea e fa’atautaia ai le Special Education. Sa fa’asolo a latou polokalama fa’ataoto ma ua iloga lava ona latou fa’ataua a latou auaunaga o lo’o fa’atino I taimi uma mo i latou ua soifua ma a’afiaga tumau o le tino poo le mafaufau.

“O le matou mau ua tauavea fa’atasi. Ina ia faailoa atu le tele o matou polokalama o lo’o tautuaina ai lea vaega o le atunuu e mai lava i le amataga o le soifua a’o laiti mai se’ia oo ina avea ma tagata matutua ma ua tatau ona mafai e i latou ona soifua tuto’atasi ma tausaili e ia lava lona soifua tumaoti, e faigaluega ma salli lona tamaoaiga tausi ma ia soifua ma le fiafia, e pei lava o e o lo’o atoatoa le malosi o le tino ma le mafaufau,”o se tala lea mai le sui o le DYWA sa fesiligia ona o lea fa’amoemoe ua va’aia le tinou o le matagaluega e fa’atino.

TAOFIA E KOVANA TOE FESUIAI AUFAIGALUEGA A LE MALO

Ua fa’asalalau fa’alaua’itele e Kovana Lemanu P. Mauga lona taofiga aloaia o le toe fesuia’i o tagata faigaluega a le malo mai le isi matagaluega i le tasi matagaluega. O lea tusitusiga a le kovana i le aso 23 o Mati sa auina atu i lana kapineta ina ia “utagia mai lenei taofiga mai le fesi’ita’i o tagata faigaluega mai le isi matagaluega i le tasi matagaluega i le taimi nei.”

“Ua iloga mai, ua matele ina faia lea tulaga i le va o ta’ita’i o mataglauega ma Ofisa eseese o le malo, ma ua fa’atonuina nei, a’o le’i faia se fa’aiuga ina ia fesuia’i ai matagaluega poo ofisa o le malo e galue ai se tasi nai lo le matagaluega sa i ai muamua, e ao ona mua’i pasia atu e le Kovana lea tulaga.”

“E ao lava ina matua fa’amautu atoa pepa e fa’atutumu ma fa’atagaga mai taiulu o matagaluega o lo’o fia fesuia’i ai galuega a tagata faigaluega. Ua tatau foi ona silafia  lelei e tagata faigaluega o le latou avanoa faigaluega ma le fiafia i o latou olaga faigaluega i totonu o latou ofisa ua mua’i maua ai latou avanoa e tautua ai i le Malo, o le fa’amuamua lava lea a le tatou nei faigamalo.E le mafai ona ausia e tatou mea uma ua tatou mae’a fa’atulagaina e tautua ai tagata lautele o le atunuu, pe afai e faia mea uma i lumamea ma ia usita’ia aiaiga uma ua mae’a fa’ataoto mo na suiga i galuega.”

“Ou te talosagaina tagata faigaluega uma ina ia galulue punoua’i ma fa’aleleia atili le auaunaga ua fa’atulaga e te fa’atinoa i lou avanoa ua e faigaluega ai.E ese mai lea, ia taumafai foi taitai o matagaluega uma ina ia sologa manuia ma fa’aleleia atili le aga’i i luma o le auaunaga ia lelei fa’atino tiute o le malo i lona aotelega. O le tumau ai o tagata faigaluega o le a aoga tele lea e atina’e ai le auaunaga a le aufalgaluega uma a le malo.”

UA SIITIA PEA LE TELE O TAUTUA E FAGAINA AI LE ATUNUU

Ua fa’ailoa e le tatou Faipule I le Konekeresi, “E fa’ateleina atili le isi fa’aopoopoga o le a fa’auia mai i le polokalama tau Mea taumafa o le a sasa’a mai I le atunuu e le o toe mamao, ma e toina mai lava mai le matagaluega o Fa’ato’aga a le malo tele.”

Ua faailoa mai o le aofaiga o lea fesoasoani o le a fa’atulaga sa’o lava e le Failautusi o le USDA Tom Vilsack, ma e tauau ina maua e Amerika Samoa le aotelega e $20 miliona mo le polokalama o le ASNAP poo le Food Stamp mai lea pili ua mae’a fa’aulu nei.

O le pili lea ua fa’atulaga ai le siitaga o le ASNAP e tusa ma le $1.9 turiliona mo le Iunaite Setete atoa, poo le 15% e siitia ai mai le aofai o lea fesoasoani o i ai i le taimi nei.

Mo atumotu lava latou ua faailoa mai e $1piliona lea ua tu’u ese e faasoa mo i latou. Ua fa’ailoa mai e Vilsack i le Senate i lea fonotaga ma le sui mamalu o le USDA, “Aisea e tuu ai?”

“O le $1 piliona o lea fesoasoani o le a fa’asoa mo atumotu o Amerika, o le a siitia atili ai le tatou polokalama o le Food Stamp ma ua faaauau ai pea ona fa’ateleina lea fesoasoani e oo fo’i i lenei tausaga ua savalia,”o se tala fiafia lea a Uifaatali Aumua Amata, e tusa o le isi fo’i siitaga o fa’aolioli mai mo le atunuu.

“E ese mai le $511miliona o tatalia, ua toe siitia atu fo’I lea alamanuia e fa’asoa e atumotu o Amerika, le $1piliona. O isi mea uma ua loma ona maua e le atunuu e aofia ai le $1,400. O le stimulus, tupe mo e ua vaea mai galuega ona o le fa’ama’I Covid-19 ma ona fa’asa, vaega tupe mo nogatupe a pisinisi laiti ma tupe toina e fesoasoani I pisinisi laiti, vaega tupe e fesoaosani i vaega eseese o le Malo ma le $150miliona mo le fa’aleleia o a’oga ma isi alagatupe mo Amerika Samoa.

TULAI FANAU A’OGA “PSY150” SAILITUPE FESOASOANI I TAUTUA ESEESE:

Ua tula’i fanau a’oga i le tatou kolisi Tuufa’atasi i le vasega o lo’o Public Service Learning ina ia faia so latou aoga i le tele o auaunaga mo le mamalu lautele o le atunu’u o lo ua iloga le a’afia i a’afiaga eseese. O nisi i sauaga, o nisi o a’afiaga i gasegase tuga ma le fita, ma ua avea ma faauilavea i lo latou soifua fiafia.

Ona o lenei aoaoga fa’apitoa o latou tau’aveae le fanau a’oga e fa’atatau lea i lo latou iloa lelei ona fa’atino auaunaga e tautua ai le mamalu lautele, o lea ua latou fa’asifo ai le latou taumafiga ina ia aoga ai i le Amerika Samoa Community Cancer Coalition, fa’apea fo’i le Family Resource Center, Noafoaga e lua ua tausia faapitoa ai tina ma fanauiti ua sauaina i lotoifale o latou aiga, Le vaega o Tautua Lautele mo Fanau lea e va’aia e le Matagaluega o Alagamanuia mo Tagata Lautele, ma o i latou na o lo’o taumafai enafa ma le mana’omia o lo’o a’afia ai soifuaga o nisi o le atunuu.

O lo’o mana’omia fo’i i le latou Kosi o le Mataupu Tau Foma’i o le Mafaufau lea e tauavea e le vasega lenei, se fa’atinoga faapea e ao ina faia ele vasega lea PSY150, ma ua alagatatau ai ia i latou ona faia le feasoaoni mo nei vaega o le tautua lautele.

I le amataga o lenei masina, ua matauina ai le fanau a’oga ua latou faia ni foa’i mo nei sosaiete ma fa’alapotopotoga galulue, ma ua faia e i latou foa’i tau tupe ma mea’ai, o mea sa latou sailia lava i o latou taimi e fa’atino ai le latou tautua mo le mamalu lautele.

O galuega sa fa’atino e le fanau, ua aofia ai le latou taoina lea o keke ma o e fa’atau atu mo se seleni e foa’I atu. O nisi sa faia latou savaliga ae totogi ma sa mafai ona latou tuufa’atasia e fa’atele atili ai le latou tinoitupe e foa’i atu, ua faia latou pickathon ma latou ipu mea’ai e fa’atau atu.

O le foa’i lona lua sa fa’ao’o lea i le Amerika Samoa Community Cancer Coalition na oo atu le susuga le fa’atonu Va’a Tofaeono ma le sui fa’asalalau Ms Tracey Porotesano ina ia talia lea fo’i meaalofa taua. Sa la’ua taliaina ma le fa’afetai le meaalofa na taua’aoina, ma sa i ai foi se la’ua taua e fa’amatalatala ai le latou tautua, ma ala e fa’atino ma taua’aoina atu ai i e ua maua i le Kanesa, latou fesossoani.

O le vaega lona tolu sa faia i ai le foa’i a lea vasega o le vasega o nofoaga faapitoa e lua ua nofoia lea e tina ma fanau ua sauaina i a latou mafutaga fa’aleaiga. Na oo atu le tamaitai pule o lea tautua lautele a le DHSS, Sandra Furean ma le tamaitai pule o nofoaga e nonofo ai tina ma fanau sauaina, Tufanua Avegalio, ina ia fefa’asoa’i ma le fanau a’oga ma talia fo’i le foa’i ua saunia e i latou mo lea tautua lautele.

Ua fa’afofogaina e le fanau a’oga a le ASCC le tele o ituaiga a’afiaga o loo va’aia e nei sui i aso uma, ma e le o se va’aiga faigofie pe mana’omia lava fo’i e se tasi ona fia va’ai i ai.