TALA I VAIFANUA

Pago Pago, AMERIKA SAMOA

TATALA I TUA LE AUMALAGA LONA LUA - MAE’A LE NOFOVA’AVA’AIA.

Ua mae’a ma le manuia le nofova’ava’aia a le aumalaga lona lua a le tatou malo na toe fa’afo’ia mai ai o tatou tagata sa opea i fafo, ma sa uia mai Hawaii, ua tatala ai nei i latou sa nonofo i le faletalimalo o le Tradewinds e o i latou aiga.

Ua atoa i ai le 12 aso talu ona fa’anofova’ava’aia i latou, ma o le aso ananafi sa mafai ai loa ona mafuta i latou ma o latou aiga, o se mea fiafia fo’i lea ua sauni i ai aiga uma na malaga mai o latou pelega.

Mai le 188 o i latou uma na malaga mai, ua fa’amaonia e le o maua i latou i le Coronavirus ina ua mae’a le latou tui mulimuli o le suega pe o maua i latou i le Covid-19 ae fa’ailoa mai e leai ma se tasi na fa’amaonia o maua i lea gasegase.

Peita’i e to’atasi sa ave i le falema’i i le vaiaso ua te’a ua tau fa’aletonu lana manava.

O le aso Faraile ua te’a sa faia ai suega o le Koviti ae o le aso na sosoo ai sa faia ai tui puipuiga o le koviti mo le au malaga. 

“O le puipuiga lava ia mautu ma ia iloa lelei, e le o sau se tasi o tatou aiga ma e ua i le atunuu, ma aumai le fa’ama’i ina nei a’afia lava se tasi, ma faigata ai loa ona toe malupuipuia le atunuu,” se tala lea a le tamaitai o Dr. Fiona Trail o le DOH.

O i latou ua tatala nei i tua, sa amata ona nofova’ava’aia ina ua to’ai taunuu mai ia Mati 10, 2021.

O le aso 15 o Aperila ua fa’atulaga ai le malaga lona tolu - repatriation - mai Hawaii. Ma e i le va o le 200-220 i latou e malaga mai ai, ma e tatau ona nofoia e i latou le nofova’ava’aia i Hawaii ia Aperila 2, 2021.

Ua fa’atulaga fo’i le Waikiki Ohana East Hotel mo lea fa’amoemoe e nonofova’ava’aia atoa ai le aumalaga e masi’i mai ia Aperila 15, ae amata nofoia e i latou lea faletalimalo ia Aperila 02, 2021.

O le tulaga sa i ai e totogi auauai mai e le aumalaga mai le ta’i $500 mo le latou siea o le nofova’ava’aia, ua tauau e le toe mafai ona faia lea fesoasoani, ona ua matauina e le o totogia lava e le to’atele ua mae’a malaga mai le latou lea vaega o le nofovaavaaia lelei i faletalimalo, ma lo latou tausiga lelei fo’i mo le 14 aso muamua a’o le’i malaga mai, ma le 14 ua to’ai taunuu mai ai.

MALIU LE FAIFE’AU SAMOA O LE MILITERI - RET CHAPLAIN MENISE SASA

I se lipoti mai le setete o Texas ua fa’ailoa ai o sauniga mo le susuga le Faife’au Samoa sa tautua i le Militeri i lona lava lea tofiga, ma o le a faia lea i le tuatusi ua tuuina mai: 69 Copperas Cove, Texas ia, Mati 27, 2021. E faia lea sauniga i le itula e 9:00 i le taeao i taimi a Texas, ma e soso’o ai lava ma lona falelauasiga i lona Oliolisaga Tumau i Copperas Cove Cemetery, Texas lava.

O Rev. Sasa na maliu o ia ia Mati 13, 2021 i Killeen Texas. Na soifua mai o ia ia Oketopa 28, 1951 i Afonotele, Amerika Samoa. O nai ona matua sa avea ma Faife’au i lea afio’aga i lea vaitau, le susuga le Faife’au Samoa Rev. Sasa Panapa mai Sato’alepai  ma Avao i Savaii ma si ona tina o Nanavale Ta’ase Sasa o Aoa ma Amouli, Amerika Samoa.

I le toe talavou ai o lenei ali’i Faife’au o Fitafita na toe siitia ai lona soifuaga ina ua siitina ona matua e galulue i Saipipi Savaii, peita’i na toe fo’i mai lona olaga e togafitia lona fa’ataga gasegage ao itiiti ma fa’atamafai ai o ia e le uso o lona tina Aunti Ianeta ma Saroa Matalo lea sa galulue e avea ma Faifea’u i Papauta College i Tanugamanono, i Upolu.

Sa ola a’e lenei ali’i Faife’au a’o ola fa’atasi ma ona tausoga e to’atele o nonofo fa’atasi ma tausia e Faife’au. Ona o le a’oga foi i Papauta sa matele ina latalata i Moto’otua i le falema’i tele i Samoa, o lea sa maua ai le to’omaga i lona gasegase a’o itiiti ma ua to’atele lava ona uso ma tuafafine, ona o ona tausoga sa tausia fa’atasi i latou e matua fa’aleagaga, o lona aiga lava.

O Sasa sa iloga mai e le’i faigofie lona talavou, ona sa le mae’a ana a’oga ma i’u ai ona taumafai e tausaili i tulaga fa’apitinisi laiti sona lumana’i. O ia lea sa ia tatalaina se Faleoloa e fa’atau atu ai le avamalosi i luga o le matafaga, i se tasi o nuu maotua i Savaii, ma sa ia taumafai fo’i e fa’atau atu le tele o mea e mana’omia e aiga o loo nonofo maotua mai le a’ai i Savaii lava.

Ina ua maea lona olaga o se faipisinisi lauiloa i nofoaga maotua o le motu tele i Salafai, sa ia toe manatu loa e toe tausailia ia mae’a lana aoga. Na toe fo’i mai le tama Afono i lona motu ma o iina na toe ulufale ai i Samoana ma toe fa’au’u ai. 

Ina ua mae’a lana aoga lea sa faigaluega loa i le Inercontinental Hotel, lea na fa’aigoaina mulimuli mai o le Rainmaker Hotel i Utulei, ma sa avea o ia ma se tasi e tausia tusi a le Faletalimalo i le afiafi. O iina sa masani ai o ia ma le tamaitai lalelei o Fa’avaefou Sunia. E alu atu le tamaitai ma avatu uma ana uo e to’atele e talimalo ai, ae a mae’a ona tuu lea o le pili e totogia e le ali’i Tausi Tusi. Sa ia faia lea faiva ma le onosa’i, aua na avea lava le tamaitai lalelei ma ana manamea mo le 37 tausaga o le la’ua mafutaga i le alofa ma le fa’amaoni.

I le 23 ai o tausaga o Sasa na vala’auina ai o ia e tautua i le galuega a le Atua, o se mana’oga tupito o lona tama Faife’au ma sa ulufale ai loa o ia i Malua Theological College i Samoa.

O se tasi lea o vasega sili ona faigata i le Aoga fa’afaife’au i Malua, peita’i o le alofa ma le agalelei o le Atua ma mafai ai ona i’u lelei ana a’oga ma fa’au’u mai ai i Malua. Peita’i na toe vala’auina e fa’aauau ana a’oga i le Aoga Fa’afaife’au i Fiti Pacific Theologial College  i Suva, Fiti.

O lona auai i a’oa’oga i fafo ina ua tu’ua aiga ae malaga mo lona lea taumafaiga, sa avea ma se mea sa manatu tele ai le ali’i Faife’au i tulaga o le malaga e asiasi i isi atunuu.

Ina ua fa’ai’u manuia mai aoaoga Fa’afaife’au i Fiti sa toe fo’i mai i lona aiga i Fagatogo, lea sa alaala ai Rev. Fiti ma Savali Sunia, ma Fa’avaefou le manamea, ma avea loa ma Faife’au Fesoasoani EFKAS.

Na le’i leva lea auaunaga ae siitia i la’ua i Hawaii ma galue ai o se tagata leipa. O iina loa na o’o ai i lona manatu o le a ulufale i le Militeri ma ia oo ai ina avea ma fitafita i le USArmy ae ua atoa le 30 o ona tausaga, peita’i sa ia fa’ailoa mai, “O isi fitafita sa latou vala’auina a’u o Papa.”

O le susuga le Fitafita sa avea ma Sui Faife’au i Fort Bliss, El Paso  a’o ia ia taumafai ina ia avea nisi o fitafita tiute ma Faife’au i totonu o le vaega au a le Army. O lona fa’apotopotoga Kerisiano sa avea ma ana mau e tau’avea ai lea tofiga. O lea sa ia fa’avaeina ai le Samoan Congregational Christian Church i El Paso, ma avea ai o ia ma Faife’au.

Na iu ina manuia lona soifua finau ma ua fa’amauina ai ma lesitala le SCCC e le USArmy i le tausaga e 1983 ma ua fa’apea fo’i ona siitia ai ma le tofiga o Rev Sasa e avea ma Faife’au o lea lava nofoaga. O lona tulaga ua si’itia mai le Corporal i le 2LT ma ua avea o ia ma Faife’au i le nofoaga a le USArmy i Fort Campbell KY.

Na matua fa’afiafiaina o ia ina ua fa’ae’e ia te ia le tofiga, o le Ulua’i Faife’au Samoa i le Vaega Au USArmy a le Malo tele, ma ua avea lea ma se avanoa lelei mo nisi o alo o le atunu e soloai atu i lea foi ituaiga o tofiga i le USArmy.

E avea o ia ma se fa’ala’eiau i alo uma o le atunuu ae maise tatou tama fanau o lo’o tautua i le militeri lea e aofia ai Fort Bliss i El Paso, Fort Campbell i Kenturky, Schfield Barracks Hawaii, Camp Casey i Korea, Fort Dix i New Jersey, Fort Myers DC, ma Panama fo’i.

Na siitia e Rev. Sasa lona aiga i Fort Hood, Texas lea sa ia fa’atuina ai loa le Ekalesia -EFKAS i Fort Hood, lea sa i’u ina fa’amanuiaina e Toeaiiba o le EFKAS mai Amerika Samoa ia Setema 25, 1993. O le Ekalesia lea sa iu ina fa’aigoaina e le toatele o “Samoa i Texas”  ona ua le gata ina o atu i ai na’o Samoa lotu taiti ae ua tele isi o lotu eseese ua gasolo uma i ai mo tapua’iga i le Aso Sa taitasi, ma ua matua fa’atautaia sauniga i le gagana Samoa.

E 28 tausaga o lo’o tauavea lava e Rev Sasa le Upu a le Atua i lena setete ma ua fa’alautele e ia le fe’au fa’ata’alelei a le Atua i lena setete tele, ua mafana fo’i le mafutaga a tagata Samoa uma sa latou fa’atasi ai ma tapua’i.

I le tausaga e 2010 na fa’amavae ai le laua mafuta mafana ma Fa’avaefou Sunia le manamea ona faia lava lea e ia le galuega mo le fa tausaga ae tuu i le Atua se tasi na te toe tofia mo le galuega. I le tausaga e 2014 na tali ai le Atua ma ua fa’aipoipo atu o ia i le tamaitai o Mali Neru o Anchorage Alaska. O iina na toe fa’afouina ai le malosi i le galuega ma fa’aiuina ai ona faiva i le galuiega mo le 7 o tausaga ae fa’ato’a malolo ai le auauna a le Atua.