TALA I VAIFANUA

Pago Pago, AMERIKA SAMOA

FILIFILIA SUI O LE KOMITI O LE AUFAIGALUEGA A LE MALO: 

O le tusi fa’alauaitele a Kovana Lemanu Mauga e tusa o le toe fa’atula’ia maia o le Komiti Faufautua mo le Aufaigaluega a le Malo ma ua ia filifilia ai le vasega o e agava’a mo lea tofiga e aofia ai:

Malopao Dr Akenese Nikolao o le Taitaifono; Taitaifono Otineru; Lemala Thompson; Sereima Asifoa; Renee Leotele Togafau-Matautia; Martin Tufono ma Komiti Emmsley.

O i latou nei o le a nafa ma tiute uma ua lisia i le ASCA#7.0102 Pursuant  to ASCA #7.0110[2] ma le Fa’atonu o le Matagaluega o Tagata Faigaluega a le malo Lynn Pulou - Alaimalo, lea e avea ma Failautusi e tusa ai ma lona tulaga i lea matagaluega.

Ua fa’ailoa atu e le afioga le Kovana, i matagaluega uma o le malo ina ia galulue faatasi ma lea Komiti Faufautua i tulaga uma tau tagata faigaluega ma totogi e agava’a ai, fa’apea ma si’itaga o totogi ua mae’a fa’atulaga fa’aletulafono.

SUIA MAI PULEGA FOMA’I MANU MAI LE MATAGALUEGA O FA’ATO’AGA - DOH

O le tala fiafia ua fa’alogoina e le mamalu o le aufaigaluega a le Foma’i o Manu, lea sa faatautaia mai e le Matagaluega o Fa’ato’aga, ina ua latou silafia, ua siitia atu i latou i lalo o le va’ava’aiga ma le fa’atautaiga a le Matagaluega o le Soifua Maloloina.

O se tala ua fa’amaonia mai i se tusi fa’asalalau fa’alauaitele a le afioga le Kovana Sili, Lemanu Peletii Mauga, tusia ia Mati 16, 2021 lea suiga lelei ma le aoga.

“Ona o le tulaga e matua feso’ota’i le mamalu o le atunuu ma latou fagafao tausi i totonu o le li’o tau le aiga, o le ala lea e matua ogaoga a’afiaga o le soifua maloloina o lea aiga pe afai o le a a’afia le meaola fa’afagafao, ae le faia i ai se togafitiga.” O se tala lea a se tasi ua loa lana tautua i lea fo’i matata, e tausia lelei le soifua maloloina o meaola i le atunuu, Tanya Tarasawa.

O le suiga lenei ua fa’ailoa mai i le tusi a Kovana Lemanu Mauga, “Ua alagatatau ona galulue fa’atasi le vasega o Fa’atonu o le matagaluega o Fa’ato’aga ma le Fa’atonu o le Matagaluega o le Soifua Maloloina, ina ia saogalemu ma sologa lelei le faauia atu o lea tautua aoga mo le lautele o meaola i le atunuu, ma ia mautinoa o lo’o tau’avea le tautua ma le fa’amaoni i taimi uma.”

E ese mai lea ua fa’ailoa atu fo’i i matagaluega uma e tofu sao mo lea fesuiaiga o le pulega, ina ia latou galulue fa’atasi, ia mautinoa ua leai se mea e fa’aletonu i tulaga o le pulega o tagata faigaluega, le tautuaina o meaola sa nafa ma lea ofisa, ae maise o le va fealoa’i lelei o tautua, ia taugalemu mea uma i le fa’amoemoe mo lea auaunaga ia fa’aauau pea.

O matagaluega ua lisia mai i le tusi fa’alaua’itele e aofia ai Matagaluega o le Soifua Maloloina, matagaluega o Fa’ato’aga, Matagaluega o Tagata Faigaluega a le Malo, ma le matagaluega o Oloa & Meatotino a le Malo.

Peita’i e ese mai lea, ua fa’ailoa mai, o le suiga o le pulega o le Falema’i o Manu o le a le fa’aititia pe ave’esea ai le tiute ma le sao o le Matagaluega o Fa’ato’aga i le tulafono Tumau Title 24, Chapter 6 o le Tusi Tulafono  o le Malo o Amerika Samoa ASCA: Chapter 3 o le American Samoa Administrative Code.

Ua fai si leva o fa’aletonu mai le tautuaina o Meaola fa’afagafao i totonu o le atunuu, ona o le sui sa fa’afaigaluegaina mai ele Matagaluega o Fa’ato’aga e le o se tasi na pasia mai lona tusi foma’i o Manu i se a’oga i totonu o le Iunaite Setete, ma sa le mafai ai ona ia okaina vaila’au ma fa’atino togafitiga mo Meaola i le tatou nei Teritori. O se tamau lea fa’aletulafono sa le mafai ona ia ausia e galue ai ma faia togafitiga o meaola fa’agafao i le atunuu.

Ona o lea ua mautu mai lenei suiga lelei o le auaunaga lea, o se fa’amama avega fo’i lea i le mamalu o le aufaigaluega, ua loa ona galulue ma tau mata’i pe tua ma ni a le latou fanoga mo nei masina e tele sa savalia mai ma fita, o le le mafai ona fa’atino auaunaga ona o vaila’au moomia sa le mafai ona  maua mai mo le togafitiga o gasegase.