TALA I VAIFANUA

Pago Pago, AMERIKA SAMOA

TUMATI’E TAUMAFAIGA A ALO O AMERIKA SAMOA I TOMAI & AGAVA’A O SAILIA:

CORY SAGAPOLUTELE SENE: o lo’o galue o ia i le Kamupani ale Blue Origin i le Setete o  Washington, lea ua ia fa’ailoa mai se tasi o masini fa’apitoa o le a fa’aaogaina e le NASA ina ia faimalaga atu e tulaueleele i lemasina e le o toe mamao nei. Ua faaigoaina lea masini o le Blue Moon ma o lo’o gaosia fa’apitoa o se tasi o latou masini ua fa’atulaga mai e le Polokalama o Artemis, lea e gaosia ai e le Blue Origin va’a o le vateatea e mafai ona tulaueleeele i le Masina ma le paneta o Mars, ina ia aofai mai ni fa’amaumauga aoga e mafai ai ona mautu a’ia’i faigamalaga ma le manuia i nei paneta ma le masina.

O Cory o le alo e fa’asino i le susuga Dennis Sene ma le tina o La Maulauulu Sagapolutele o Iliili, sa mua’i tautua o ia i le US Marines ma o iina sa maua ai e ia le avanoa e fa’alautele ai lona atamai ma faigaluega I lea Kamupani Gaosi va’alele ma Va’a o le Vateatea, le Blue Origin.

SERENA IONA – USAIR FORCE ACADEMY COLORADO SPRINGS

O se tasi nei o alo o le atunuu fa’aogaina ai le sootaga ma le Ofisa o le Komesina o Niu Sila, Samoa ma Amerika i le taumafiaga ina ia ulufale i le tausaga ua te’a, i le aoga fa’amiliteri a le US Air Force i Colorado Springs.  O le taimi fo’I ua fa’amamalu le taofia o femalaga’iga fa’avaomalo ma le tatou nei teritori.

A’o lea ua manuia mai taumafaiga a lenei tamafanau o le atunuu. Ua ausia e ia togi, tomai ma le malosi o se tasi o sui e fa’apjne ma faamau lona tomai i le sauniga o le Recognition Ceremony, lea e fa’apipi’ia ai ona Apa’au. O se fa’ailo ua ausia ma si’itia le isi tulaga i lona ulua’i tausaga i aoaoga ma koleniga fa’apitoa a le Militeri.

Ina ua fesiligia pe i ai nisi Samoa o lo’o latou fa’apine fa’atasi ai ma ia, ae fa’ailoa mai, “E to’alua isi tama Samoa afakasi lea e matou fa’apine fa’atasi ai. Peita’i e le o omai i la’ua mai Amerika Samoa, ae o mai i la’ua mai isi setete.”

Ua toetoe lava mae’a le ulua’i tausaga a lenei alo o le atunuu i ana aoaoga fa’amiliteri ma ua fa’ailoa e ia, “E le faigofie le ala i le manumalo i nei luiga ma a’oa’oga uma, ae le mapu ai i le taumafaiga, e ave i ai le fa’amuamua ma le fa’amalosi a’ia’i. Fa’afetai tele i matua ma aiga ae maise le atunuu atoa i le tapua’ia ma tatalo mai mo matou uma le fanau ma taumafaiga i so’o se ala ua matou taumafai i ai, aua se lumana’i manuia. Alofa tele atu.”

O Serena o se tasi o e na ausia togisilia i Leone High School ma fa’auu i le 2020.

AUDREY SEVA’AETASI  - MANUMALO TAUVAGA SOLO E FA’ALEO & FA’ATINO

O se ulua’i tauvaga a fanau a’oga maualuluga i le teritori i le fa’atinoga o solo e fa’aleo ma fa’atino fa’alaua’itele, ua manumalo ai nei Audrey Sevaaetasi mo le ulua’I tauvaga sa fa’atautaia i le tatou atunuu. O lenei taumafaiga sa fa’atautaia e le American Samoa Arts & Humanitis Coucil fa’atasi ai ma le National Endowment of the Arts.

O le sui sa fa’auluulu i ai lea vaega o le susuga lea Tasi Samuel Sunia o le Arts Council, ma sa amata ai lava i tua i a’oga maualuluga taitasi e faia latou tauvaga solo fa’aleo ma faitaga, maua le sui manumalo ua togisilia, ona fa’ato’a fa’aulu mai lea i le tauvaga a le Arts Council i le teritpri, lea la ua tulaga muamua ai le tamaitai o Audrey Sevaaetasi.

O le igoa o lana solo tusia ma faitauina o le “Blade Unplugged, tusia e Tim Seybiels.Ua manumalo nei Audrey i le fa’ailoga tupe e $200, mo ia lava, ma le tinoitupe e $500 mo lana a’oga maualuga o Samoana High.

Tulaga lua Ayjah Leo mai Kanana Fou, ma le fa’ailoga tupe e $200 mo ia lava, ae $200 mo lana aoga. Tulaga tolu o Makerita Unutoa mai Fagaitua High lea ua ia mauaina le $50.mai ia Tia Seloti, o ia lea sa faia ma fofoga o le Polokalama.

O fa’amasino sa aoafia ai Patricia Fuiava, Crystal Saelua Simanu ma Tamiano Gurr.

MAUA KOLUSE MUMU A FITI - $60,000 FOA’I ASOSI TAGATA FITI AMERIKA SAMOA

I se fa’asalalauga mai Fiti, ua fa’ailoa e le Koluse Mumu a le Malo o Fiti ua latou taulimaina le mea alofga mai le Asosi a tagata Fiti i Amerika Samoa fa’apea ma ai ma le foa’i mai le mamalu lautele o e na talia le vala’au e fia se foa’i alofa mo e pagatia i Fiti ona o afa tetele sa a’afia ai lea malo. O le aofai o le foa’Ii na fa’ailoa mai e $59,980.47 Tala Fiti.

O le susuga le fa’atonu o le Asosi a Tagata Fiti i Amerika Samoa, Ms Ilisapeci Rokotunidau sa ia fa’afetaia le asosi a Tagata Fiti i Amerika Samoa nei, ae maise lava le mamalu lautele o tagata uma o Amerika Samoa sa foa’i le tele o le seleni ma le vasega foi o Kamupani sa latou fa’aaogaina lea ala, e fa’ailoa ai le latou agalelei ma le alofa foa’i mo e na a’afia tele i le afa o Yasa ma Ana i Vanua Levu, Fiti.

Na fa’atautaia lava e le Asosi a Tagata Fiti i Amerika Samoa nei a latou sailiga tupe ma isi ituaiga oloa uma e fia fesoasoani ai i o latou tagatanuu o a’afia, ma sa iloga lava ona talileleia e le mamalu lautele o Amerika Samoa le latou taumafaiga ma foa’i ai. 

Ua faailoa e le Peresetene o le Koluse Mumu i Fiti, o lo’o tetele lava a’afiaga o lo’o feagai ai ma le tele o aiga na a’afia i nei afa tetele i Fiti, ma ua matua fa’afetaia ai le agalelei ma le alolofa, e lima foa’i ua fa’ailoa nei e Amerika Samoa.

“O le tinoitupe ua foa’ia nei, o le a i ai sona aoga tele lava i taumafaiga e toe fa’afo’ia se saogalemu ma se olaga fiafia i nisi e ito’atele o lea fo’i vaega atoa o le atunuu ua fa’atama’ia falenofo ma fa’ato’aga. O le a fa’aaoga foi nei tupe e le Koluse Mumu i mo a latou tautua lautele ia i latou ua a’afia i Fiti.

FA’AITIITIA MEA TAU FA’ALELEIA TAUNUU MAI O LE AUMALAGA LONA LUA:

Ina ua toe tepa i le fa’atinoga o le auaunaga mo le malaga lona lua ia Mati 10, ua iloga ai e itiiti lava mea na mataituina ele Komiti Fa’afoe sa tau toe faaleleia. O le tele o le fuafuaga fa’ataoto, sa aluga lelei mea uma ele tusa ai ma le uluai malaga ia Fepuari 3, 2021.

Na sologa lelei lava le to’ai taunuu mai o le malaga ma fa’agasolo mai le aumalaga e siakia lelei e le Matagaluega o le DOH, ma fa’asolo mai ai i pasi, ma o le fa’afetai lea sa fofogaina fo’i e le ta’itaifono o le Komiti Fa’afoe o le Covid-19, Talauega E. Ale.

O le aofai o le aumalaga ma malaga mai e na’o le 188 ma ua fa’ailoa mai fo’i le iuga o latou suega ma faia ia Mati 12, 2021 ua leai ma se tasi o i latou o maua i le coronavirus, e kilia uma lava o latou suega.

Peita’i e toe tasi le isi a latou suega e faia i le aso, 19 Mati, 2021 ma e tatalia fo’i o latou fa’aiuga pe a mai.

Ua fa’atulaga i latou o le a fa’ataga mai le nofoaga o lo’o nonofo va’ava’aia ai i le aso Gafua, 22 Mati, 2021 pe afai e kilia uma latou suega lona lua o le Covid-19.

Ua fa’amautu mai fo’i le va’alele lona tolu e fa’auia mai ai o tatou tagata o lo’o opea i fafo, ua tapena fo’i mo Aperila 15, 2021. Ma ua fa’ailoa mai o lo ua mae’a mautu le aofaiga e 200 i le 220 le pasese, e le matagaluega o le sofiau maloloina.

O lo ua tapena fo’i le Wakiki Ohana East Hotel e fa’amautu i ai le pasese lea e fia malaga mai, ma e oo ane i latou i lea nofoaga e le silia Aperila 02, 2021.

Ua toe fa’ailoa atu nei i le mamalu e fia malaga mai, e tatau ona mua’i totogia le $500. Lea e a ina totogia e sui malaga uma lava, o le latou siea o le totogi o le nofo va’ava’aia. E ese mai lea o lo’o latou sainia ai le feagaiga e totogi auaua’i ai lea vaega tupe.

Ua amata faia nei ona vala’auina i latou e fia malaga ina ia vave fa’afeso’ota’i le Ofisa o le Medicaid ia faaoo atu ma ia iloa e ao fo’i ina va’ai toto’a i aso e ao ina nofo va’ava’aia ai i Hawaii ma iinei.

Ua iloga foi o lo’o maua mai pea emeli ma tusi mai aiga o i latou o lo’o opea i fafo o latou aiga. Ua fa’ailoa mai o talosaga uma lava e fia fa’auia mai i le Kovana, e le mautu ai se avanoa o se tasi e fia malaga mai i nei malaga uma o faia nei. E fa’auia muamua le avanoa i le Matagaluega o le Soifua Maloloina ma le Medicaid mo nisi fa’amatalaga e latou te fa’ailoa atu lava ia te outou,” se isi lea fa’amalamalamaga mai.

Ua toe matauina foi o i latou na malaga i nei amalaga ua te’a atu I fafo, ua toe taumafai mai e toe taliu mai i le taimi nei. Ua le mafai ona talia lea ituaiga o mea, ua silafia lava afai e malaga, e le toe faigofie ona fo’i mai se’i vagana ua tatala femalaga’iga.