TALA I VAIFANUA

Pago Pago, AMERIKA SAMOA

TALANOAINA FA’ATAITAIGA O LE GALULOLO MA LESONA UA MAUA MAI AI

Ua aoga le taimi na sofa’i mai ai le fa’asalalauga fa’aiteite o le Galulolo o le a maua a’afia ai i tatou i le vaiaso na te’a, ua fa’ata’ita’ia ai le tatou fuafuaga fa’ataoto o le Tsunami, ua fai si leva o taumafai e tuufa’atasia mo vaega uma o le Malo, ma ua i ai fo’i la ma lesona ua mataituina e ao ina fa’aleleia atili, mo lea fuafuaga fa’ataoto tau galulolo a le tatou malo ua maua mai ai. 

I se lipoti a vaega fa’asalalau o lo’o fa’ailoa ai o le fonotaga a le vaega e taga’i toto’a i lea vaega ma mataituina lea fuafuaga fa’ataoto sa faia le latou fonotaga ma talanoaina ai nei mea uma ua iloga e ao ina fa’aleleia atili ai le tatou Emergency Plan mo Galulolo.

O lea fonotaga ua tima’ia uma ai lava i latou o loo aofia i galuega ta’imua mai e fesoasoani i tagata lautele ona o fa’alavelave fa’afuase’i fa’anatura pe fa’aosofia e le au terarisi, i soo se taimi e lutia ai le atunuu.

O i latou o lo’o faigaluega i le Matagaluega o le Saogalemu Fa’alotoifale o le Malo, le vasega o sui ta’itasi o matagaluega eseese o le Malo o lo’o avea ma sui e tiute i le Emergency Center, ma i si uma o lo’o aofia i le DPS, Fire, EMS, DPW ma le TEMCO sa fono ina ia toe tagai toto’a i le aluga o le aso na fa’ate’ite’i mai ai le fa’ailo o le Galulolo ma ni mea na lape ai le fuafuaga fa’ataoto a le Malo, ma ni mea fo’i sa le faia, ao nisi mea sa agatonu ai le fuafuaga fa’ataoto.

O nisi o mea na iloga mai e le’i fa’alogoina e le lautele, o sailini ua mae’a fa’apipi’ia, aisea ua le fa’alogoina ai ua fa’ae’e ma logo ai i tagata o le Galulolo ua fa’aolioli mai? Ua fa’ailoa ua elea uma le tele o sailini ma ua le aoga lea itu o le tautua. O lo ua toe faia nei i ai se galuega toe fa’aleleia o lena vaega.

Mai le fonotaga i le aso Sa na te'a, ta’ita’ifono ai le Lutena Kovana Talauega Eleasalo ma sa muamua lava tagai toto’a i tulaga o feso’ota’iga. Le fa’aaogaina o ala televavave e fa’ailoa atu ai ua oo mai se fa’aiteite o se fa’alavelave fa’afuase’i i le mamalu lautele. Ua iloga fo’i le uumi o poloka o ta’avale i luga o le alatele, e oo mai lava le galulolo ma a’afia ta’avale e le’i oo ta’avale i le fale i aiga.

Manaia fa’atinoga a nisi o aoga o lo’o tuafale i mauga, sa solo sa’o fa’anatinati lava i latou i luga o mauga ma nonofo lelei ai e tatalia pe oo mai le galulolo. O le fuafuaga fa’ataoto lena ua mautu a nei a’oga, e aofia ai Samoana ma Matafao. Peita’i e a’afia le solo a ta’avale femalaga’i pe afai e kolosi e fanau le alatele.

Mai lea fa’ata’ita’iga i le aso Tofi ua mau manatu ai le ta’ita’iga o le Malo, e tusa o le fa’atinoga o le fuafuaga fa’ataoto a le atunuu mo Galulolo, ma iloa ai, e le faigofie lava so’o se gaoioiga e faia i le atunuu pe a oo mai fa’alavelave tau galulolo, aua e so’ona vevesi le to’atele ma taumafai e fa’ae’e le aiga atoa i le ta’avale ma o ese mai le lotoifale o latou aiga, aga’i fa’avave atu i atumauga.

Peita’i ua iloa lelei ua mae’a fa’atutuina fa’ailo, lea e i ai nofoaga e ono a’afia i se galulolo, ma isi nofoaga e le o i ai nei fa’ailo, e le tatau fua ona feoa’i i latou na.

O isi ua foliga mai e fia oo i le tulaga sulufa’I, ae le tatau fua ona sulufa’i, o i latou na e fai ma ala e faatuai ai ona oo le to’atele i nofoaga e malutia ai mai le galulolo, ona ua tumu ai le laina ta’avale i luga o le alatele. Pe afai e le o fa’apipi’ia se faailo I lou afioa’ga e ono a’afia i le galulolo poo le Tsunami, aua le feoai fua aiga uma i lena afioaga, mau lava le toovae i aiga ma fa’atalitali pe tua ma ni a le fa’ailo ua sau.

Matua o Faigaluega i sone o lo’o ua iloga e aafia gofie i galulolo, fa’afeso’ota’i lou aiga i lautelefoni ma taumafai la oe lena e sefe lava oe, aua e te toe popole i lau fanau o a’oga, ua i ai le fuafuaga fa’ataoto a faia’oga ma a’oga ta’itasi mo le galulolo ua mae’a fa’atautaia, ae ete le tau alu fua i lau fanau e sefe mai. O le aotelega lena o le fuafuaga fa’ataoto atoa a le malo mo le Galulolo, aua ia lava le taimi e sulufa’i ai le mamalu atoa o le atunuu mai nofoaga maualalalo e ono a’afia gofie i galulolo i nofoaga maualuluga e malutia ai, a’o lava le taimi.

O lea ua toe fa’amalosia nei le fa’aaogaina o Fa’ailo nei i so’o se nofoaga e ono a’afia i galulolo, ma ua fautuaina aiga ma ofisa o lo’o tulata i na nofoaga, o i latou na e feoa’i, ae o afio’aga maualuluga ma e le o i ai ni faailo nei, tumau i le mea ua e i ai, e le so’ona tumu ai ma uumi laina ta’avale i le alatele.

I lena fonotaga ua toe fa’amanatu mai e le tamaitai pule o le Ofisa o le va’ai tau, Elinor Lutu – McMoore, “Ua i ai sailini e mafai ona fa’apipi’ia i totonu o outou maota e mafai ona fa’ae’e i taimi fa’apenei, pe afai o lo’o e alaala ma fa’atu lou fale i le nofoaga e ono a’afia i galulolo. E mafai ona e talosagaina se sailini mo lou aiga, e tausia lelei fo’i e lou aiga lena sailini ina ia umi ona aoga.”

E le gata i lea ae ua fa’ailoa mai fo’i ma leitio uaealesi e mafai ona fa’aaoga i nai ituaiga o taimi, ua i ai foi sailini i totonu o nei leitio.

O sailini o Leitio na e fa’aoso mai lava le sailini e le Ofisa o le Va’ai Tau pe afai e fa’aiteite mai se galulolo, ma e mafai ona logoina ai tagata o lo’o nonofo i aiga.

Ua mafai ona sootaga fo’i nisi fa’ailo a le Ofisa o le Va’ai Tau ma sailini i totonu o televise, Leitio ma Komipiuta pe afai o le a fa’aoso se feau fa’afuase’i a’o ola nei masini i ofisa ma aiga. O le avefe’au lea a le malo ua me’a fa’atulaga ma e fa’aigoaina o le EAS Emergency Alert System.

“Peita’i e i ai le lava le Logo e Ta e ali’I pulenuu i afio’aga ta’itasi. Pe afai e le o faigaluega i le Ofisa Pulenuu pe oo mai se fa’ailo fa’afuase’i ae le o malaga ese lea sui mai lona afioaga, e mafai ona fa’afofogaina le taina o le logo a le Pulenuu, ma leoleo o le afio’aga. O le mea tuai lava lea sa fa’aaogaina mai, ma o se mea fo’i e lagonaina e le to’atele o afio’aga ta’itasi. Ona e sau lea faailo ua amata galuega o le aso, e le’I fa’alogoina fo’i e le tele o afio’aga le taina o logo fa’ailo. Peitai e tasi le afioaga o le falelima i sasa’e sa fa’alogoina ua ta mai le latou logo fa’ailo lea e le latou pulenuu i le taeao o le aso Tofi ua te’a.”

O le logo lea, a fa’alogoina, ona silafia lea o le taimi ua tula’I ma alu atu i le atumauga e malutia ai.

“Peita’i, a silafia loa e le atunuu ua lulu tetele se mafuie ma ua toulu ai ni mea i totonu o lou maota, o le fa’ailo muamua lava lea, sola i atumauga e te malu ai, aua le fa’atali i se fa’ailo, e le umi le va o le mafuie ma le galulolo,” o se toe tima’I mai lea a le sui o le Ofisa o va’ai Tau.

189 LE AUMALAGA SA MALAGA MAI IA MATI 10, 2021

E 189 Tagata sa malaga i Amerika Samoa ia Mati 10. Mai le to’a 195 o i latou na nofova’ava’aia i le Ohana Waikiki East Hotel by Outrigger talu mai Fepuari 25, 2021. Peita’i ina ua mae’a suega mo le covid -19 i le vaiaso ua te’a, e to’a fa i latou na fa’amaonia a latou suega, ua maua i latou i le Coronavirus.

E toalua i la’ua na toe maua lava la’ua suega ua maua fo’i i le covid-19 ma ua toe ave’esea ai lava mai le aumalaga. Ua ave’esea I latou ma ua nonofo va’ava’aia nei e le Hawaii DOH.

O nisi o i latou ua fa’ailoa mai, ua atoa le tausaga atoa o fa’atali mo lea avanoa matagofie e toe taliu mai ai i fanua ma aiga.

E tusa ai ma le fesootaiga ma le Maagaluega o le Soifua Maloloina a le tatou malo ua sauni le toega o i latou e malaga uma mai i fanua ma aiga.

Sa tu’ua e i latou uma latou potu i le faletalimalo i le 4:00 i le vaveao ma tuua loa e pasi le faletalimalo mo le malaeva’alele ma siakia loa i latou mo le malaga mai. O le malaga lea na tuuva’a ese mai Honolulu i le itula e 8:00 i le taeao, ma sa taunuu i Amerika Samoa i le 12:40 i le aoauli.