TALA I VAIFANUA

Pago Pago, AMERIKA SAMOA

TAUVA FANAU I AOGA TULAGA MUAMUA I POLOKETI FA’ASAEANISI

Ua alausu le i vasega amata o aoga tulaga muamua e fa’atino a latou poloketi fa’asaeanisi, ina ia fa’atauva ai mo fa’ailoga togisilia i vaega taitasi ua fa’atino mai ai latou galuega suesue fa’asaeanisi.

O le vaiaso atoa lenei ua tatala ai e le fanauiti le tauvaga lea o galuega fa’atino fa’asaeanisi, o e o i le vasega k5 se’ia oo i le Vasega 5, ona soso’o lea ma le Vasega 6 e oo i le vasega 8 i le aso a taeao.

Peita’i o aso ta’itasi lava o le a faia ma latou tufatufaga o fa’ailoga e afua mai le itula e 12:00 e aga’i i le 2:00 i le aoauli.

Ua fa’atulaga le tauvaga galuega fa’atino fa’asaeanisi a a’oga maualuluga e faia lea i le aso Lulu ma le aso Tofi o le vaiaso nei, ma e fa’atino i itula aoauli o aso ta’itasi ina ia le umi tele fo’i o fa’atali fa’aiuga o togi ua maua e le fanau tauva i lenei tausaga.

O le suiga lea ua faia nei, ua fa’aitiitia ai le taimi e fa’atali ai mo laugatogi ma fa’ailoga o le fa’aaliga lenei, ma ua tofu lava le aso o fa’atino ai nei fa’aaliga ma le tufatufaga o fa’ailoga o lo’o fa’atino ai.

Va’aia le fiafia o le fanau ina ua oo mai i le aso tuupoina mo le fa’amoemoe e fa’aalia ai se mea ua latou silafia e tusa ai o latou suesuega fa’apitoa i a latou poloketi na fa’atautaia.

Ua vaaia fo’i le auai mai o nai matua e tapua’ia faiva o le fanauiti fa’apea ma sui mai a’oga ta’itasi a le malo ma a’oga tumaoti fo’i. Sa va’aia lava le auai o fanau mai le Spouth Pacific Academy, e ui ina sa faia le solo tete’e a nisi o faia’oga i le vaiaso ua te’a a lenei Laumua.

O nisi o galuega fa’atino fa’asaeanisi a le fanau ua iloga ai ona oo suesuega a le fanau po’o a ituaiga o mea fufulu nifo e sili ona mama ai nisi pe afai e te fa’aaogaina. Ua tolu ituaiga ua fa’aaoga e lea saeanitisi talavou, o le Colgate, Aim ma le S&P, ituaiga lea e aumaia fa’apitoa mai fafo. Ua iloga e sili atu le S&P i nei ituaiga o mea fufulunifo ua masani ai lo tatou atunuu. O se mea lelei lea suesuega, aua o lea ua fa’atonu mai e le suesuega lea, e suia le mea fufulu nifo a tatou aiga i le S&P. O le galuega lena a le tamaitai o Olioli Tuialuuluu mai Fitiuta Elementary, Manu’atele.

Ua o i ai se isi o fanau ua fa’ailoa mai i lana suesuega fa’asaeanisi, le ituaiga o Coke e sili ona pupusa pe a oo ina ‘ai fa’atasi e oe ma le Mentos. Uma ane o le Diet Coke e sili ona tele le ea e pupusa mai pe a tausami fa’atasi ma le mentos. O lona uiga, e le tatau ona ‘aia fa’atasi nei ituaiga o lole ma inu le coke.

O le poloketi a le tamaitai o Constance Florido Level 5 o le Samoa Baptist ua ia tapena mai ai le poloketi e fa’ailoa ai le malosi’aga fa’aeletise e mafai ona maua mai le vai. O lo ua faailoa mai ua oo suesuega a le fanau i ala e mafai ai ona maua le eletise e fa’aaogaina ai le suavai.

Ua tele na’ua galuega ua va’aia ua fa’atino e le fanauiti, ae ua aoga fo’i ia i latou ona sailiili e afua i lenei vaitau, ina ia matutua ane i latou, ua masani e fa’atautaia suesuega e aoga mo i latou ma le lumana’i o tagata lautele o le tatou atunuu.

lo’o fa’atautaia lenei fa’aaliga o galuega fa’atino fa’asaeanisi a le fanau a’oga mai a’oga tulaga muamua se’ia o’o i a’oga maualuluga i lenei vaiaso atoa.

O le aso Tofi ua fa’atulaga e fa’amasinoina ai poloketi uma a aoga maualuluga ma faia ai ma le latou laugatogi i le itula e 2:00 i le aoauli, o lena lava aso.

21 AUFAIGALUEGA A LE NANA SECURITY UA MAUA TUSI PASI AOAOGA NA FAI

E to’a 21 o le aufaigaluega a le Nana’s Security Company ua ausia togi e pasia lelei ai le aoaoga fa’apitoa na fa’atautaia e le Matagaluega o le Puipuiga o le Saogalemu Lautele, e le tamaitai Malu o le Malo, Major Pou Su’a.

Ole aoga fa’apitoa lenei sa faia mo laso e fa o le vaiaso ua te’a, ma ua a’otauina ai nei ali’i Leoleo po ia nofouta i so’o se ituaiga o fa’alavelave fa’afuase’i e tutupu ane i nofoaga o lo’o latou puipuimaluina, ma ia le nofoa’i, ae ia silafia lelei mea e ao ina latou faia.

“O le ituaiga aoaoga lea na fai, ua mafai ai ona iloa lelei le mea e oso tatau e fai pe a lutia le nofoaga o matou o leoleoina i le po. Ua iloa lelei e le o toatele nisi o feoa’i i nei ituaiga o taimi ole po, ma e fa’atalitali fo’i le tele o osofa’iga i vaitau ua tau le mafai ona ma’ai le mafaufau aua ua tele ina ta’aligoligoa le po. Peita’i o le galuega ua tuuina mai e ao ina faia ma le fa’amaoni. A oo la ina va’aia ata fa’ata’ita’i pe o le foliga mai o mea o tau sofa’i mai, ia vave ona fa’afeso’ota’i le nofoaga ulu mo se fesoasoani ae maise fo’i o le vasega o leoleo a le matagaluega o le Puipuiga o le Saogalemu Lautele i so’o sona nofoaga o tulata mai i le mea o matou leoina,” o se tala lea a Eneliko Siliga.

Ona o le to’a 21 o i latou ua mautu i ai le aoaoga sa nafa ma le sui mamalu mai le DPS a le Malo, ua iloga fo’i ona lava tapena le Nana’s Security mo a latou tautua o le leoina lea o maota ma pisinisi o lo’o ua ame’a sainia latou Konekarate e fa’ataunuu ai le latou tautua.

O nisi o nei nofoaga ua leoleoina e i latou e aofia ai nofoaga e lua a le ANZ Amerika Samoa Bank o Fagatogo ma Tafuna. Nofoaga o le TBAS i Utulei; Ofisa o le DOE i le Polokalama  A le SLP poo mea’ai a le fanau A’oga.  Ua aofia ai fo’i ma le DHSS i lenei leoleoga malu a le Nana’s Security .

O le tamaitai Pule Lua o Sandra Fruean sa avea ma se fofoga taumolimoli o le Nana’s Security e na te saunoa ai e tusa o le siitaga o le atamai ua naunau le tina o le pisinisi Fiapaipai Tuaolo Fruean ina ia maua e ana tagata faigaluega.

“E le o mana’o le tatou tina o le galuega, e tatou te faia le galuega ma le vaivai, ae ua manatu ina ia fa’aauau ona fa’aaupegaina lana aufaigaluega lenei i tomai e mo’omia e fa’atino ai tiute fa’asekulati. O le mea lea e sogasoga ai lava ina ia aumaia pea tomai fou e fa’aofi i o tatou tagata faigaluega, ia le fa’apea ane outou, e le’i mafai ona faia aua e le’o silafia lea vaega o le tatou pitola’au tausi. Ua fa’afetai tele fo’i i le tatou faia’oga mo lona taimi ma lona tomai ua fa’asoa mai mo outou,” o se tala lea a Sandra Fruean e tusa o le aoaoga ma tusi pasi o le a taua’aoina.

Ua fa’ailoa fo’i e le tina o le Galuega, “O lo ua mae’a tuuina atu mea faigaluega na e faia ai le galuega, aua ne’i matou fa’alogo o fa’apea e le’i a’oa’oina ai outou, lea ua fa’amaonia i lou tusi pasi ua taua’aoina, ua outou agava’a mo nei ituaiga o leoleoga.

Ua mafai ona leoina fo’i e le Nana’s Security va’a ua toso e le malo, ma ua oo lava i le tulaga o fa’asa i nuu ma afio’aga o le atunuu.

O nisi o i latou ua maua tusi pasi ua lisia mai o latou suafa Anesi Talatau, Chester Vaoga, Dean Adam, Eneliko Siliga, Eneliko Valo, George Taito, Kuko Aiuta. Ioelu Seve, Isara Tonise, Konelio Isaia, Levi, Lesley Correa, Mario Correa, Nauma . Nepol, Pologa Peneturi, Tausaga Niue, Tavita A’afia, Tavita Niue. Timothy Johnson, Va’a Palu ma William Mailo.

TO’AFA UA TO’ESEA MAI LE AUMALAGA O MATI 10, 2021

O lo ua fa’ailoa mai ua toe maua fo’i le isi to’a 4 ua to’esea mai nei le aumalaga o lo’o nonofo va’ava’aia i Hawaii e tapena ai lo latou malaga mai i le faigamalaga a le va’alele togipau ia Mati 10, 2021.

O le to’afa lea ua fa’ailoa mai ua maua ane latou suega na faia ua fa’amaonia e maua i latou i le Covid-19 ma ua ‘ave’esea ai loa i latou mai le nofoaga o loo nofova’ava’aia ai, ae auina atu i le nfooaga fa’apitoa mo le Hawaii DOH o lo’o togafitia ai i latou i Honolulu, o e ua mautinoa a latou suega, ua maua i le coronavirus.

Pe afai ua ave’esea lenei to’a fa o le aumalaga e 195 na faanofoia le Waikiki East by Outrigger Hotel, o lona uiga ua totoe nei o le 191 o le a malaga mai i el aso Lulu nei.

O le isi a latou suega faapitoa e faia lea i le aso ananafi, ma e toe fa’atalitalia fo’i latou fa’aiuga pe i ai nisi ua a’afia pe leai.