TALA I VAIFANUA

Pago Pago, AMERIKA SAMOA

TATALIA E LE ATUNUU SIAKI STIMULUS I LENEI VAIASO

O le ulu’i tala na fa’ailoa mai ai le tufatufaina o siaki stimulus i le mamalu o le atunuu, ua fa’amautu mai ai le vaega muamua o nei siaki e ao ina taua’aoina mo le vasega o lafoga na faia ia Ianuari 01, 2020 se’ia oo i lafoga na faila mai i le Ofisa o Lafoga ia Mati 04, 2020. O lafoga lea ua fa’atulaga mai ai le tufatufaina o siaki stimulus e ta’i $600 a le Matua ma le tamaititi o lo’o aofia i le failaga o lau lafoga. O i latou na o le a maua muamua latou stimulus i le aso Lulu, Fepuari 10, 2021.

O le tufatufaga o le a fa’auia lea i pusa melI ua mae’a fa’ailoa mai i lafoga. Afai e leai se pusa meli o le a maua mai i le Ofisa o le Disbursing. Ua fa’ailoa mai le aotelega o nei siaki o le a totogia mai e $10,084,825.

O lo ua fa’autagia mai, afai e uumi laina I le ofisa o lo’o tufatufaina ai siaki, e ao ina faia pupuni fofoga ma ia tutu fa’avavai mai le tasi sui o lo’o muamua ma mulimuli mai ia te oe i le laina.

O e na faila lafoga ia Mati 5 – Iuali 1,2 020, o le a maua a latou siaki ia Fepuari 17, 2021, ma ua fa’aalu ai le aotelega e $5,734,950.  Ae o Fepuari 24, 2021 ua fuafua e faai’u ai le tufatufaina o siaki o le stimulu, mo I latou sa faila lafoga I le va o Iulai 2 ma Tesema 30, 2020, mo le aofaiga e $1,625,105.

O le aotelega o le tupe na toina mai mo le Stimulus e le US Treasury mo Amerika Samoa e $17.4 miliona.

OSO SAMOA I LUGA O LE FUA – TAPENA ALAFUA E AVEA MA OFISA TUTOTONU O LE USP

Ona o ni fa’aletonu ua toe alia’i ane i Fiti ma ua se’ia fa’atopetope ese atu ai le sa Pule i le Iunivesite o le Pasefika i Suva Fiti, ua oso ai Samoa e tali le vala’au, ia tapena Alafua e fa’atula’ia ai le Ofisa Tutotonu o lea Iunivesite o atunuu uma o le Pasefika, USP.

O le Iunivesite lea sa i ai fo’i ni alo o Amerika Samoa sa aooga ai ma ua avea nei ma ni foma’i i le atunuu.

O se tasi o tama tuai o le susuga lea Dr. Tuiasina Laumoli o le Foma’i Nifo, Rev Limua’a Samuelu ae le’i avea ma fa’afeagaiga. Ae maise nisi o le vaega a le Potu Fa’ata o le falema’i tele i Faga’alu i le vaitau mulimuli o le 1970, Segafili Malae o le Matagaluega o le Soifua Maloloina ma isi.

Ua fa’ailoa mai o le ali’i Vice Chancellor Pal Ahluwalia ma lona to’alua o Sandy na fa’avave lava ona ave’esea mai le fale sa nonofo ai ma faigaluega ae fa’aoso i le va’alele e malaga tuusa’o ai i Brisbane e le vaega a le Immigration a le malo o Fiti.

Ona o tulaga o le vevesi o i ai le malo o Fiti ma le fa’atautaiga o le Iunivesite o lea ua tatau ai ona masii ese mai le fa’auluuluga o le Iunivesite i se isi atunuu o lo’o i ai fo’i lona sao i lea aseta fa’aleaoaoga. O le isi lala o lo ua iloga le tele ma e mafai ona latou faatautaia lea ofisa ulu, e tulata atu lava i ai Samoa, i lona lala i Alafua, ua leva ona fa’aaoga e le USP mo aoaoga fa’afa’ato’aga.

I le taimi nei ua taofia uma e le malo o Fiti a latou saoga uma e masani ona fa’aaoga e le Iunivesite, se’ia mae’a ona faia le suesuega atili i lea mataupu, ua tuuaia ai le Ofisa ulu o le USP ua fa’aaogaina le tatau tupe.

Ua fa’ailoa mai e le Minisita o Aoga a le Malo o Samoa, Loau Keneti Sio, ”O le masi’i mai o le Ofisa Tutotonu o le USP i Samoa, o le ulua’i mataupu lea o le a talanoaina nei e le Komiti Fa’afoe o le USP i le latou fonotaga na faia i le vaiaso ua te’a.

O le USP o lo’o fa’atupea i saoga eseese mai atunuu uma ua tofu sao e fa’atu ma fa’agaoioia le USP e aoaoina ai fanau a le atuvasa ia gafatia ona avea ma ta’ita’i iloga o latou malo pe a o’o ina maua’a latou tomai. I Samoa lava latou ua iloga ona tula’i mai le fanau a’oga sa a’otauina i le USP i tofiga taiulu o matagaluega ma fa’atuina fo’i pisnisi i totonu o le atunuu.

E i ai nisi o mataupu e ao ina va’ai toto’a i ai Samoa pe a oo ina fa’atuina le pulega o le Iunivesite, peita’i e tele atu mea e ofoina atu e Samoa, e aofia I lea o le tulaga o le fevesia’I o le Malo ma le pulega o le USP. E tatau lava ona maoti eseese mea e lua.” O se tala mai lea a le Minisita o A’oga Loau Keneti Sio.