TALA I VAIFANUA

Pago Pago, AMERIKA SAMOA

FAASAINA TA’ELEGA I LE ASO SA I LE AFIO’AGA O NU'UULI:

Ua faamamaluina nei le faasa a le afioaga o Nuuuli, lea ua taofia ai le toe ta’e’ele nisi i le sami.  E ese mai lea ua taofia fo’i ma le toe saoasaoa o ta’avale i totonu o le afioaga. Ua fa’atulaga le 5 maila le saoasaoa o taavale. 

Ua faia nei fa’asa ma o le a leoleoina tele e le mamalu o le afio’aga.

O lenei fa’asa ua pasia e alii ma faipule o le alaalafaga ma e mataituina e le aumaga ma le afio’aga atoa, tainane foi pulenuu ma leoleo tofia.

“O le mafuaga tonu lea ua faia ai lenei fa’asa, ina mautinoa le saogalemu o tagata uma. E ese mai ia mea e lua, ua matua fa’asa fo’i nei toe fa’alogoina le fa’apapa fana pe fa’aaogaina o la’au malosi i totonu o le afio’aga. Ese mai la’au malosi ae ua aofia ai ma fana ofe lea e masani le atunuu ona fa’aaogaina i vaitau fiafia o le tausaga, e foliga mai o ni fa’ailo o le tausaga fou.”

E le i aofia i lenei fa’aaliga ni fa’asalaga fa’atulagaina mo nei soligatulafono.

O le afioga le Ma’opu Soliai Tuipine sa fa’amaonia mai lenei fa’asa ina ia mautinoa ua tonu ona fa’alauiloa atu i le mamalu lautele o le atunuu fa’apea le afioaga i so’o se tasi e le’i silafia.

FAASALALAU FA’ALAUAITELE LE ‘AMU SILI ONA TELE I LE LALOLAGI – GATAIFALE AMERIKA SAMOA:

Ua mitamita faia’e le agaga o le tamaitai faipule o Amerika Samoa i le Konekeresi, Uifaatali Aumua Amata, ina ua fa’auia atu fa’asalalauga fa’alaua’itele o le “Amu sili ona tele i le lalolagi, ua i ai lea i le gataifale o lona malo o Amerika Samoa.”

O lea sailiga na fa’atino e le NOAA ma o i latou foi na fa’atinoa fa’asalalauga fa’alaua’itele matagofie ua maimoaina e le mamalu lautele ma Sui o le Konekeresi.

Sa fa’afetaia e Uifa’atali Aumua Amata le vasega atoa o ali’i ma tamaitai Suesue fa’asaeanisi a le NOAA, lea sa latou galulue, sailiili ma fa’amaumau mea ua fa’amatalatala auiliilia i le ata fa’asolo ua fa’alauiloa ai lea mata’aga i lo tatou gataifale.

Ona o ia fo’i sa latou auaufa’atasi ina ia fa’amautu ma fa’alauiloa lea mata’aga, o ia lea sa to’alima i ai sui na amata mea i lea fa’amoemoe lelei, ina ia latou fa’atula’ia le pili H.R. 160 e toe fa’amalosia ai le Coral Reef Conservaton Act o le 2000 ma fa’avae ai le Komiti Fafa’afoe o le Iunaite Setete o Amerika, lea ua tino mai le latou galuega, ua fa’alauiloa mai ai lea mata’aga i le tatou gataifale.

“O le galuega fa’atino i fa’amaumauga ma suesuega ua mae’a aofia i le fa’alauiloaga ole ata fa’asolo o le mata’aga lenei, se galuega na matua matagofie lona tuufa’atasia ma ma ua mitamita fai a’e le agaga matamata atu ae fa’ailoa mai a tatou measina o le gataifale, ae o mea o lo’o tatou ola ma silafia lelei i lo tatou atunuu pele. Fa’afetai galulue, ma ou te fa’ailoa atu, e fa’aauau pea ona ou mataituina mea uma e mafai ai ona fa’asaoina ma fa’aleleia atili measina i le tatou gataifale ma le vaomatua. Ina ia mafai ona maua alamanuia e mafai ona fa’aleleia ma fa’atumauina ai lo latou matagofie ma olaola lelei, ia mautinoa e fa’aauau lava lenei polokalama.” O se tala fiafia lea a le tamaitai Sui i le Konekeresi a Amerika Samoa, Uifaatali Aumua Amata.

Ua aofia i lana fa’afetai le vasega o e suesue a le NOAA, le aufaigaluega atoa a le National Park ina ia mfai ona fa’asao mata’aga a le atunuu, ma le vasega fo’i o le aufaigaluega atoa a le National Marine Santuary poo le vaega o va’aia fa’asao o le tatou gataifale.

Na sapaia fo’i e Aumua Amata mea sa toe fa’aleleia ina ia sapaia atili e le Konekeresi le toe fa’alauteleina ma toe soso’o galuega a le Polokalama Fa’aauau a le Coral Reef Conservation leea na aiaia i le nofoaiga lona 115 a le Konekeresi.

TUUA LE MALO E LE ALI’I FUAFANUA I LE TATOU TERITORI – LAWRENCE FRENCH:

O Lawrence French, e le o se Samoa, o le uso sisina, peita’i o lana galuega fai, ua ia silafia ai le tafa o le tuasivi se’ia oo i le sami o lenei atunuu. O se tomai  e le to’atele nisi ua mafai ona latou gafataulima, peita’i, ua mafai ona ia fa’aa’oa’o I nisi o tama fanau a le atunuu, ma ua le vale tuulima ai lea fo’i taleni tau’ave.

Ua maliu o ia i le atoaga o lona 85 tausaga, ma ua fa’ailoa mai, o lo ua maliu nei o ia i Eagle River, Alaska I le aso Faraile 15 Ianuari, 2021.

O i la’ua ma lona faletua, Jane French, lea sa avea ma Fa’atonu o le SPEd, na o mai i Amerika Samoa i le tausaga e 1973 ma sa avea Amerika Samoa ma o la’ua nuu moni ma alaala ai lava se’ia oo ina toe o ese atu e mafuta ma lo la’ua alo o John French i Alaska, lea ua maliu ai nei le alii Fuafanua. E to’alua lava le la’ua fanau tama sa ola a’e iinei, o Lawrence Jr ma John French.

Ina ua fa’alogoina e Lawrence ua fa’agasegasea, ona sa faia sona ta’otoga o le fatu muamua, ona le toe galue ai lea, ae ua manatu ina ia la saili togaifitiga ma o ese atu ai i le tatou aumalaga muamua o e gasegase na tu’ua i tatou ia Iulai 2020. O le manatu ia saili togafitiga i Hawaii, peita’i ina ua mae’a sa o ai loa i lo la’ua alo o John French lea e nofo i Alaska ma ua maliu ai nei.

Na fa’atuina e French le pisinisi fuafanua o le LP French Professional Services i le amataga o le vaitausaga 1980. I lea auaunaga e matua tulitulia e tagata French, na te fuaina fanua o latou aiga ina ia fa’amaumau, ma le isi pe afai ua i ai ni fete’ena’iga i le tuaoi. Ua malamalama lelei fo’i lenei uso sisina i le taua tele o le sa’o lelei o le laina o le tuaoi, aua ua maimoa fo’i o ia i le taua tele o le eleele i aiga Samoa. “A sese ona fua le fanua, e tauau e lavea atu ai ma le fua fanua i le vevesi, ma o se mea lava e le fia oo i ai lo ta sui.” O sana tala ‘ata lea ina ua fesiligia o ia pe ua ia silafia le faigata o lana galuega i le aiga Samoa.

Ua tu’ua nei e ia le galuega, ae fa’afetai sa i ai nisi sa mulimulita’i i ona tulaga a’ao ile atunuu, ma latou tauavea le matata ua avea nei ma sui o Tuimavave i le taleni aoga tele.

Ua molimauina fo’i e le tamaitai o Isabel Steffany Hudson, “Ona o le tele fo’i o galuega a le tama o le aiga ma le Kamupani a le Fletcher e ao ina fai, na galulue feso’ota’i ai ma lenei tama i le tele o taimi. Ua iloga lona atamai e le faigofie lana matata. E le gata i lea ae o le nofoaga fo’i o ma’ua nonofo ai i Fogagogo sa mana’omia fo’i ona toe fa’atulaga ma sailia ona tuaoi. O se va’aiga i lona sao i nei poloketi uma e leai se faigofie, ae matua lava lona tomai i lana foi matata ma ia faia mai ai fa’aiuga tonu e nofo lelei ai mafaufau ma aiga tuaoi. Ua mau fa’atuatuaina e a’u lava ia lona fa’amaoni i nei faiva.”

Ina ua fesiligia e le tusitala o ia, i se taimi mulimuli na va’ai ai I le tama ua matua, “O e fuaina lava fanua o le atunuu?” O lana tali, “Pe afai ou te alu i le malaga lenei ma ou le toe fo’i mai i Amerika Samoa le teritori ua avea nei ma ou nuu, ua mae’a tuulima atu le taleni i nisi o le fanau a Amerika Samoa sa ou aoaoina lelei, ia tonu lo latou faia o le galuega e tautua ai aiga ma le malo o Amerika Samoa.” Sa ia lisia mai suafa o i latou ua faia nei pisinisi fuafanua i le teritpri.

O le fa’aiuga a Frech sa aoga tele i le vaega o Fa’amasinoga a le tatou Malo. E ese mai lena ua fa’amoemoe i ai le Zoning Board a le Malo, e faia fa’aiuga o le fa’atulagaga o pisinisi, falenofo ma i si uma mea e fa’atutu ma fausia i le atunuu ae maise fo’i o alatele aua feoa’iga i le atunuu atoa.

O i la’ua o nisi e le misia ona auai i tapua’iga a le Ekalesia Katoliko Roma ma o totino nei o le Ekalesia Fa’avaomalo i lea tapua’iga.

Ua fa’ailoa mai e Epikopo Peter Brown, “O i la’ua nei e matua naunauta’i ina ia faia ma tuufa’atasia ni saoga lelei ma le tele ina ia taua’aoina atu i aiga o lo’o i ai le mana’omia i le vaitau o le Aso Fa’afetai ma le Kerisimasi i tausaga ta’itasi. Ua misia i la’ua i le fa’aiuga o le 2020 i nei aso iloga. E matua saunia lelei meaalofa ma fa’amomoli mo nei aiga ma ua iloga le misia o i la’ua i le tapenaga o fa’amomoli i le 2020.”

E iloga foi lana tautua fa’amaoni i le Atua e ala i lana tapua’iga ma taulaga osi a’o alaala tumau i la’ua i Amerika Samoa nei.