TALA I VAIFANUA

Pago Pago, AMERIKA SAMOA

FA’AOPOOPO SUI O TOTINO - KOMITI O LE COVID-19

Ina ia mafai ona mautu lelei le auaunaga a le Komiti Fa’afoe tofia a le Kovana mo le Covid -19, ua manatu ai le afioga Kovana Lemanu Mauga ina ia toe fa’aopoopo atu isi sui iloga o le Komiti Fa’afoe, ae maise ia i latou o lo’o puipuimalu i le vasega o le atunuu o lo’o tausia fa’apitoa.

O sui fou la nei ua tofia mai: Matautu Peter Tinitali – Sui Faatonu o le Protection & Advocacy; Evelyn Lili’o Satele- Sui Fa’atonu o le TAOA; Blanche Lulu Barber, Fa’atonu Sili, American Samoa Economic Development Authority; Faraitoafa Utu, Sui Fa’atonu o le Soifua Maloloina;  Dr. Aifili Tufa Fomai o Gasegase Pipisi – Matagaluega Soifua Maloloina;  Dr. Saipale Fuimaono – Matagaluega Soifua Maloloina; Dr. Cecilia Alailima – Matagaluega Soifua Maloloina; Dr. Ronald Yip – Matagaluega Soifua Maloloina; Dr. Monita Adip – Matagaluega Soifua Maloloina; Dr. Francine Amoa – Matagaluega Soifua Maloloina; ma  Jason Mitchell – Ofisa o le Kovana Sili.

MALAGA VA’ALELE IANUARI 29 -  E TOE FOI MA LE PASESE

Ua i ai le lisi o pasese e mafai ona tuuva’a ese atu i le malaga mai a le Va’alele Hawaiian Air ia Ianuari 29, 2021, e aumaia le pasese o e ua leva ona opea i fafo atu o le atunuu ona o le fa’asa o le Coronavirus.

Ua fa’ailoa mai fo’i e le Ofisa o le Medicaid o le faiga tuai lava o lo’o fa’agasolo ai le tuufa’atasia o lea pasese. O le atuu atu lava fo’i le fa’amuamua i e uma ua manatu ina ia fa’aauau talavai i fafo, tamaiti aoga mo kolisi ma iunivesite i fafo ma i latou e toe fia fo’i i aiga i soo se setete o Amerika.

O le a talia lava fo’i suafa o i latou uma e fia malaga atu e le Ofisa o le Medicaid, ma o le a i ai ma le lisi fa’atalitali mo nisi e fia malaga atu.

E ao ina umia e I latou e talosaga avanoa, o latou pepa fa’amaumau e agava’a ai mo le malaga ese atu ina ia mafai fo’I ona lisia ai lou suafa I le lisi fa’atalitali. Mo nisi fa’afesili e mafai ona vala’au sa’o I le 699-4777 mo ni tali e fa’amalieloto mo oe.

TOFIA TOFA SUALAUVI SU’A  AVEA MA SU’ETUSI & TAUSITUSI A LE MALO:

O le tofiga Tausitusi & Suetusi a le Malo, ua tofia i ai e Kovana Lemanu Peleti Mauga le susuga Sualauvi Tofa Su’a Hine, o se tasi fo’i ua loa ona tautua i Amerika Samoa i lea matata.

O le avanoa lenei sa le faatumuina e le faigamalo ua tuana’i, peita’i sa muta mai i le tausaga e 2012 ona galue ai se tasi, le susuga Robert Dantini, ae na tula’i ese e le’i uma le taimi atofa o lana tautua sa fa’akonekarate ai.

I le tusi ua taua’aoina atu a Kovana i le fono faitulafono, ua ia fa’ailoa atu ai lona mau faatuatuaina o Sualauvi mo le tofiga Tausitusi & Suetusi mo le malo.

“Sualauvi Su’a ua leva lana tautua ma le fa’amaoni i le atunuu e ala i ana galuega sa tula’i mai ai i nisi o matagaluega o le Malo ma pisinisi tua. Sa ia umia foi tofiga tau Taitai i lea matata i galuega sa i ai, ma ua mau fa’atuatuaina lava o ia. Ua tele fo’I tausaga o lana tautua i lea ituaiga o tomai fa’apitoa.”

O lenei tofiga e tofia e le Kovana lana sui e manatu ia tula’i ai, ae fa’amaonia mai e le fono faitulafono. Ua na’o le 4 tausaga e mafai ona tula’i ai e galue ona toe sailia lea o se isi sui mo lea tofiga. 

O Senatoa Togiola Tulafono o le ta’ita’ifono o le Komiti o le Malo & Lona Fa’afoega sa ia tuuina atu i le mamalu o lana komiti ina ia suesue toto’a i le talosaga ma le tofiga ua tuuina mai latou te fa’amaonia, e tatau ona fono ai i latou a’o loma le pasiga a le Maota Maualuga i lea sui tofia a le Kovana mo le tofiga Suetusi & Tausitusi a le malo.

TO’AI TAUNUU 7,800 TUI PFIZER – ASO TOONAI NEI:

Ua fa’ailoa mai e le fa’auluuluga o le Matagaluega o le Soifua Maloloina, o le a to’ai taunuu mai le 7,800 tui o le Pfizer i le malaga a le va’alele Cargo lea e taunuu mai i le aso Toona’i nei i Tafuna.

Ua manaomia nei tui ina ia mafai ona tuia uma le to’a tele o le a malaga ese atu i le aumalaga ua fa’atulaga mo Ianuari 29, 2021, aua o le to’atele lea sa tuia i le uluai ituaiga tui puipuia o le coronavirus na mua ua aumaia i le atunuu, le Pfizer.

Ua fa’ailoa mai e Dr Francine Amoa, le taitaifono o le Covid-19 Vaccination, “O lo ua i ai lona fa’amoemoe o le a amatalia ona tuia le vasega o fanau e 16 tausaga ma matutua atu,i le aso Faraile nei ma e faia lava tuiga uma i le Falema’i i Tafuna e pei ona amatalia ai.”

E ui ina o le a faia le suiga i le tuiga, aua foi nei taofia ai le 65 tausaga ma le matutua atu e gasolo mai pea e fai o latou ulua’i tui, ma faatulaga ai tui lona lua e mulimuli mai.

O loo fa’aauau pea lava tuiga o e matutua, ae fa’apena fo’i le vasega ua fa’ailoa mai e 16+ tausaga e afua atu i le aso Lulu o lenei vaiaso.

E ui lava ina i ai le aso Malolo o Martin Luther King ae sa le tuua ai le fa’agasologa pea o tui puipuia o le mamalu lautele. O le aofai o i latou ua mae’a ona tusia e oo mai i le aso Gafua na tea nei e 4,225 pe ua atoa le 12% o i latou e tatau ona tui i lea tui puipuia mo le Coronavirus.

O le aso Lua na faia ai tuiga mo I latou uma e galulue ma e o nonofo ma tausia lelei i le Fatuoaiga Hope House. Ua matua leai lava nisi o tau fesiligia le faiga o latou tui puipuia mo le Covid-19, ma ua fa’ailoa mai e tali tutusa lava ma le tui puipuia o le Misela sa fa’atautaia fo’i.

Peita’i ua fa’ailoa mai e le Foma’I o Fa’ama’I Pipisi, Dr Aifli John Tufa, o le faiga o le tuiga ua fai lava si faigata ona o le tui e ao ina usita’ia le vevela e fa’aaogaina ai, ae maise ai lava le Pfizer.

O le tui lenei e ao ina teuina i le -70 tikeri Celsius ma o lona uiga e le mafai ona avatua lea i fafo i le vevela lautele o nofoaga uma lava e faia ai tuiga. “E tatau lava ona fa’alatalata i tiami uma i le nofoaga o lo’o sa’o lona malulu e teu ai ma fa’atino ai tuiga, ina nei i ai se tasi e fete’ena’i lona tino ma lea ituaiga tui.” O se fa’apupulga lea a le alii foma’i.

O le isi mea e tatau ona usita’ia i lenei fo’i tuiga, ona e i ai le tui lona lua, e tatau ona agatonu lelei le aofai o tui muamua e faia ma tui lona lua e tatau ona toe tuia ai le aotelega muamua o e na tui. E tatau ona mataituina le taimi ma le umi e teuina ai le tui ia tusa ma lona aoga i e tuia ai.

Afai e faia tuiga muamua e tatau loa ona fa’aagaaga mai ai iina ma tui lona lua mo i latou uma ua tuia, ina ia le fa’aletonu le tuiga atoa. Aua o le a i ai fa’afitauli pe afai e le to’ai taunuu mai tui atofaina mo tagata lautele i le taimi tonu e faia ai tui lona lua.