TALA I VAIFANUA

Pago Pago, AMERIKA SAMOA

TULAFONO FA’ATAOTO MALAGA  MO TAGATA AMERIKA SAMOA TOE FOI MAI AMERIKA

Ua saunoa le afioga le Kovana Sili, Lemanu Peleti Mauga i lana lauga i le tatalaga o le Nofoaiga lona 37 o le Fono Faitulafono ia Ianuari 11, 2021, ua fa’atulaga le ulua’i malaga mai o nisi o lo’o opea i fafo i le atunuu, o Ianuari 29, 2021. 

Ua i ai fo’i tamau mo lau taumafaiga ia mautinoa e te malaga mai. Ua mafai ona e maua uma nei fa’amaumauga i le Upega Tafailagi americansamoapublichealth.com

Ua mae’a fa’ailoa atu i se fa’asalalauga mai le Komiti Fa’afoe o le Coronavirus i Amerika Samoa, afai e fia malaga mai nisi ma aumai nisi o latou aiga i le faigamalaga, e tasi lava le talosaga mai le tou aiga, ae lisia mai ai sui uma e fia malaga mai.

O i latou uma ua fia malaga mai e ao ina usita’ia uma aiaiga o le toe taliu mai i fanua ua mae’a lisia atu e le matagaluega o le soifua maloloina a Amerika Samoa, a i ai se mea e le usita’ia o ia aiaiga, o le a leai sou avanoa e te malaga mai ai.

O nisi o le a le mafai ona malaga mai ona ua le usita’ia nisi o aiaiga ua fa’atulaga, pe e lei mae’a tapena nei mea uma o le a lisia, o le a avea fo’i ma nisi e lisia mo nisi malaga mulimuli mai pe a mae’a tapena lelei mea ua fa’atulagaina mo le taliu mai i aiga.

O le a aofia ia i latou e va’ai toto’a i ai le Komiti Fa’afoe o le Coronavirus, nisi o fia malaga mai ae tatau ona fa’amama le toto, pe faia fo’i nisi togafitiga moomia i fafo atu o le nofoaga e nofova’ava’aia ai, i lo latou to’ai taunuu mai mo le 14 aso.

O mea la nei e ao ina usita’ia uma e i latou o le a malaga mai i lea ulua’i malaga taliu mai i fanua ma aiga: 

• E tatau ona avea oe ma se tagatanuu e aumau lelei i Amerika Samoa. 

• O se tasi ua toe taliu mai i fanua, ae sa malaga atu o se tasi o gasegase mo talavai fa’aauau i fafo. 

• Ia lisia lou suafa i le lisi a le DOH Website o e malaga mai i lenei va’alele. 

• Mae’a na nofova’ava’aia i Honolulu mo le 10 aso ma faia suega o le Covid-19. • Malie lelei e nofo va’ava’aia i Amerika Samoa mo le 14 aso i le taunuu ai i Amerika Samoa ma faia nisi suega o le Coronavirus.

O le malaga lea a le va’alele ua fa’atulaga e sau ma lea aumalaga, o le a toe taliu ma le isi aumalaga o e ua mana’omia ona o atu i Hawaii mo a latou talavai ma togafitiga fo’i o gasegase o maua ai i latou, ina ua mae’a fa’atulaga ma talia ai e ali’i fomai o le LBJ Medical Center ma le Ofisa o le Medicaid ina ia malaga atu, ae maise o tui sa mo’omia ona faia e puipuia ai i latou mai le Coronavirus ma latou suega o le Covid-19.

Ua fa’atulaga fo’i le matagaluega o le Soifua Maloloina latou te fa’atulaga ma pasia uma le malaga mai Hawaii e oo fo’i i le taimi e a to’ai mai i fanua.

O le Ofisa o le Medicaid e latou te faatulaga ma feutaga’ia le malaga mo Honolulu Hawaii, e pei lava o isi malaga uma ua mae’a faia i Hawaii. Pe afai o le a i ai nisi suiga o mea uma e ao ina fa’ataunuu e i latou o le a malaga, e mafai lava ona fa’ailoa atu a’o le’i toe 24 itula malaga ese atu lenei aumalaga.

Pe afai lava ei ai nisi mea o fa’anenefu i le aumalaga o le a maua ni tali mautu i le emeli [email protected] or call 633-5871. Faitau i le aiaiga atoa o le malaga i le emeli psa-repatriation-jan.29-and-doh-medicaid.v2

ULUAI LAUGA TULAGA MALO & AGA’I I LUMA - KOVANA LEMANU PELETI S. MAUGA

I le ulua’i lauga fa’alauaitele a Kovana Lemanu Mauga, sa ia fa’ailoa ai nisi o mea tau le tupe fa’asoa mo le malo.  Ua ia fa’ailoa o lo’o fa’atautaia pea le malo i le tulafono o le tupe fa’asoa mo le tausaga 2020, e le’i pasia lava le paketi fa’asoa mo le malo 2021.

O le tupe fa’asaoa a le malo sa tatau ona maua I le tasuga 2020 na fa’atulaga e $103 miliona peita’i o le aofai o tupe na aoina e 106.7 miliona. O le aofai o le tupe faaalu mo le tausaga 2020 na fa’aalu ai na’o le $95.3 miliona ma ua totoe ai le $7.7miliona. O lea ua maua ai le toega e $11.3 miliona i le fa’aiuga o le Tausaga fa’aletupe FY2020.

Na fa’afetaia e Lemanu le faigamalo talu ai, ona o lea toega aua ua mafai ai ona fa’atupe lenei amataga o le tausaga fa’aletupe e oo mai i lona kuata lona lua lenei ua amatalia. Peita’i e le lava mo lea fa’amoemoe i kuata atoatoa uma e lua.

Na faailoa e ia i le mamalu o le atunuu e faafetaia foi le toe pasiga o le stimulus ua mae’a toina mai mo le coronavirus e le konekeresi aua ua toeititi fo’i ona maua lea e tagata o le tatou atunuu lea fa’amanuiaga e tai $600. mo matua ta’ito’atasi ma le fanau fo’i o lo’o aofia i le laufoga faila mo aiga ta’itasi.

I kopi o le lauga sa tufatufaina mai i e uma na auai i lea sauniga mamalu, sa fa’ailoa ai ua amatalia nei feutaga’iga i le va o le sui teutupe a le Malo ma le Ofisa o Lafoga ina ia aiaia fo’i lafoga totogi a le fanau mo le tausaga ua te’a, ma o lo’o ua pisi lelei ai i latou, aua o ituaiga pisi na e mafai ona maua ai ni tupe e matua ma aiga.

Ua faamautu mai fo’i e le Kovana o lo’o ua alia’i mai e i ai fo’i se soso’oga o le CARES Act e toe maua mai e le malo. O lo ua suesueina nei le vaega tupe muamua na toina mai mo le Coronavirus e le vasega o au suetusi a le Ofisa o le OIG a le US Treasury e tusa ole fa’aaogaina o tupe na toina mai for COVID-19.

FA’AILOA  PERESETENE O LE SENATE – MANA’OGA O LE FONO FAITULAFONO:

O lauga tali a le afioga le Peresetene o le Senate, Tuaolo Manaia Fruean, i le lauga a Kovana Lemanu Peleti Mauga, sa ia fa’ailoa ai nisi o mea e ao ina fa’amanatu aloa’ia i le faigamalo ua tula’i mai, e ao ina fa’aauau se’ia mae’a lelei.

“Ia manatua lava e lau susuga le Kovana, o le lua faigamalo ua tuana’i nei ma Kovana Lolo Moliga, na oulua fuafua e fa’atula’ia le Maota Fono fou, e le’i mamao atu fo’i i le fa’aiuga o le tausaga ua te’a, sa mae’a suaina ai le eleele mo le Maota Fa’amasino fou, lea la e le’i amatalia lava. O lo ua fa’atulaga o nisi nei o galuega e matua fa’amatalgofie ma fa’aatoatoa ai le suiga o le va’aiga lautele i le taulaga o le atunuu. Ua mana’omia lava ona galulue mai le Fono Faitulafono ma le Vaega o Fa’amasinoga i nei maota fou, ia matua lelei a’ia’i ai le fa’atinoga o latou tiute tau’ave.”

“Pe afai e fa’afesaga’i nei maota e lua i Fagatogo, o le atoaga lea o se va’aiga matagofie i le talafatai o le taulaga. A mae’a ona oulua va’ava’ai ane lea ua tatau ona fausia se falema’i fou. Ia lua mafaia ona fa’aleleia le auaunaga lea, aua o se tasi o taimi na ma’ua asia ai nisi o aiga, ae ua iloga ai, ua fa’ailoa mai, ana latalata mai le falema’i i le fale sa aumaia ai lea gasegase, e le maliu, e soifua pea le ma’i. O lona uiga, toe fausia se isi falema’i, e maua lava tupe ae ua faia se suiga taua i le auaunaga lea.”

Na fesiligia fo’i e ia le tulaga ua i ai le litaea o tagata faigaluega a le malo. Ua ia manatu ina ia faia se si’itaga o le saofaga a le Malo e totogia mo tagata faigaluega uma ua aofia i le litaea.

Ua ia fa’ailoa mai, “Ua leva tele ona tumau mai le saoga a le Malo i le 8% ma le saoga a le tagata faigaluega i le na’o le 3% ua avatu ai i le fa’aputuga oa mo le litaea. Peita’i a fa’atusalia atu i le aotelega o le seleni o lo ua fa’aalu atu mo i latou e litaea mai lea tausaga ma le tausaga, ai ua toeititi mae’a le fa’aputuga oa, ma ua le talafeagai mo ni litaea e tatau ona maua mo tagata faigaluega taito’atasi pe a malolo mai galuega sa fai i le tele o tausaga.”

“Aua le fefefe e faia faaiuga faigata ma le alagatatau mo suiga e tatau ona faia i le soifuaga o le atunuu.Ua na’o le pau lava lea o se penefiti e mafai ona maua e tagata e aoga i latou aiga, sa tautiga mai i tausaga e tele e faaputu, ia aoga ia i latou ma o latou aiga. Na fa’atula’ia mai lenei litaea i le taimi sa na’o le $500 i le $600. i masina ta’itasi, peita’i o lea ua aga’i atu ina maua e le tgata faigaluega le tai $1000+ i le $2,000. i le masina.

“O le galuega e ao ina fa’atino o le fa’atula’ia lea o se Komisi e toe iloiloina le ituaiga Litaea o totogia nei e le aufaigaluega a le malo ma aiaiga uma ina ia mafai ona feololo se tupe maua e le tagata faigaluega ua litaea mai tiute.”

O le toe mana’oga o le tulaga lea i tagata o lo ua fia malaga mai fafo i le atunuu. Ua ia toe fautuaina lava le faigamalo, e toe taga’i toto’a i le suiga ua i ai nei le fa’ama’i i fafo.”Ua faalogo atu ua i ai le isi siitaga o le malosi o le fa’ama’i ua pepesi mai nei, ua i ai i Hawaii, ma  ua sili ona itagia Faumuina, Motusa ma Dr Iotamo i le taimi nei, aua e manatu lava i latou e le sau le malaga lenei. Peita’i, o lo’o tatou saogalemu lava e lei ulufale mai lava le coronavirus i le atunuu ona o le latou lea faiva.”