TALA I VAIFANUA

Pago Pago, AMERIKA SAMOA - 

STAFF SGT SETARIKI KORO VAKATURAGA – TOA SAMOA MALIU COVID-19 I SIAMANI

O se ali’i fitafita Amerika Samoa sa tiute i Baumholder, Siamani, ua faailoa mai e nisi o latou uso a fitafita tiute a Samoa i Siamani, fa’apea ma le nusipepa fa’asalalau a le Stars & Stripes, ua maliu ona o to’atuga i le Covid-19, ia Tesema 9, 2020.

O Setariki e 43 tausaga o lona soifua ma sa nofo va’ava’aia o ia i lona aiga, ina ua fa’amautu mai i ana su’ega ua maua i le Coronavirus.

Na maliu lea ali’i fitafita talavou ao galue i le 44th Expeditionary Signal Battalion, 2nd Theatre Signal Brigade I Baumholder, Germany.

Ua fa’ailoa mai fo’I, ua si’itia lona tofiga, o se SSG (Staff Sgt), ina ua maliu o ia.

E maliu lenei ali’i fitafita, a’o taumafai lona to’alua e fa’ao’o ane o ia mo ni togafitiga e fa’asao ai lona ola i le falema’i i le nofoaga a le Army o fa’amautu ai latou galuega.

Ua faamauina nei le maliu o Setariki, o se ulua’i fitafita o lo’o tiute ae ua maliu ona o a’afiaga o le Covid-19. Ina ua faamaonia ua maua o ia i le Covid-19, sa fa’atulaga o ia e nofova’ava’aia mai lona aiga, peita’i ua fa’atetele auga o le gasegase ma ua fa’amalosi ane lona to’alua e molita’i o ia i le falema’i, ae na maliu o ia i le ala.

O le Aso Tofi na te’a sa faia ai sauniga o lona maliu, ma e le’i faaalia lava e se tasi o le Vaega Au sa molimauina lona soifua.

O le ali’i Lutena sa ta’ita’ia lea vaega a le US Army Lt. Col Jason Kendzierski o le 44th Expeditionary Signal Battalion, sa ia molimauina le soifua galue ma le mafutaga ma lenei Toa o Samoa i lona toe sauniga.

“Ua fa’ate’ia i matou uma i le mea ua tupu mai, e le’i i ai se fuafuaga a i matou o le a motusia le mafutaga ma le ali’i Staff Sgt.O le lolofi mai fo’i o le to’atele e fa’amafanafana ma fesoasoani i taumafaiga uma mo lenei sauniga mamalu, ma ua tumutumu lava fo’i lona toe sauniga, o le fa’ailo sili lea o le alofagia ma le tele o fa’auoga a lenei ali’i satini. Ua matou misia o ia i le galuega, o se ali’i e galue fa’amaoni ma fa’atuatuaina i le galuega o lo’o matou o faatinoa i aso ta’itasi. Ia fa’amaise le Atua alofa i le tina ma le fanau ua tuua nei.”

TOAI TAUNUU MAI ULUAI VAILA’AU MO TUI PUIPUIA O LE COVID-19:

E tusa o le itula e 2:45 i le aoauli o le aso Toona’i, sa tulaueleele ai le va’alele a le Pacific Air Cargo sa aumaia fa’apitoa ai tui puipuia o le Pfizer, i le malae va’alele i Tafuna. 

Sa maimoaina e nisi o le au fa’asalalau a le atunu’u le fa’atinoga o galuega na faia, ia le sasi lava se mea e tasi, aua o nei tui uma e ao ina fa’atumauina le malulu e -70tikeri Celcius i taimi uma o fela’ua’i ai.

Mai le va’alele i ta’avale a le Matagaluega o le Soifua Maloloina, ona toe ave’esea lea e fa’aoo sa’o i le potu ua saunia fa’apitoa e teu ai ao fa’agasolo tuiga i le falema’i i Tafuna. Na leoina fo’i le malaga mai a le ta’avale ma nei tui e le vasega o ta’avale a leoleo ua fa’atulagaina.

O totonu o le Potu Suesue a le Falema’I Fa’aitumalo i Tafuna sa tatalia atu ai e Dr. Aifili John Tufa ma isi o le aufaigaluega lautogia, le to’ai taunuu mai o tui ina ia mautinoa ua teuina sa’o ma malupuipuia le ulua’i uta o le Pfizer mo le Covid-19.

O le potu ua teuina ai nei, o lo’o i ai coolers ua mae’a fa’atulaga le latou malulu i le mea o manaomia ona teuina ai. O i latou uma sa fa’aaogaina mo fela’ua’iga o lenei uta o pusa tui puipuia, sa latou fa’aaogaina pupuni fofoga ma totini lima, ina ia malu puipuia lo latou soifua maloloina.

Ua fa’ailoa mai e Dr Aifili Tufa, “O le aumalaga lea e fia malaga i le isi malaga o soso’o mai a le au si’ima’i i fafo, e tatau ona aofia i latou i le tuiga lea e faaaoga ai le uta muamua lenei o tui puipuia, a’o le’i malaga ese atu i latou mai le atunuu.”

Ua fa’ailoa mai fo’i e le tamaitai fa’atonu o le Medicaid Office, Sandra King Young, “O le aumalaga atoa o e saili togafitiga i fafo fa’atasi ma e ua latou malaga e fesoasoani ia i latou e tatau loa ona amata aga’i mai i le falema’i i Tafuna ina ia faia latou tui nei e puipuia mai ai le Covid-19 a’o lava le taimi e toe faia ai le isi tui lona lua ma atoa i ai latou togaifitiga e tete’e le Covid-19.”

O le tuiga lona lua mo i latou uma e malaga e tatau ona faia ia Ianuari 06, 2021, peita’i o lo ua toe tolopo atu nei ia Iunari 12, 2021 e fa’ato’a fa’ataunuu ai.

Ua fa’ailoa mai fo’i ua aoga fo’I le umi lea o tolopo le malaga mai a le va’alele e avatu le aumalaga, aua o lo ua i ai le avanoa e faia ai fo’I o latou tui ma fa’ai’u lelei ona fa’ato’a tu’ua lea e I latou le setete mo lea malaga togipau mai Amerika Samoa.

 MAUA FA’AIUGA O TUI SUESUE – TASI LE ALI’IVA’A O MAUA I LE COVID-19:

O le aso To’ona’i na te’a nei na fa’ato’a mautinoa ai e le au fa’asalalau ua I ai le va’a sa taula I le Uafu tele ua maua se tasi o lana aufaigaluega e to’a 20, I le Covid-19 e tusa o le fa’aiuga o lana suega sa faia e le Matagaluega o le Soifua Maloloina.

O le va’a lea o le “MV Coral Islander”, sa amata mai ana faigamalaga mai i Iapani, fa’asolo mai ai afea Niu Kaletonia, afea Solomona ma Fiti, fa’ato’a afea ai Tonga ma soso’o ai loa ma le malaga sa’o mai I Amerika Samoa nei.

Ua fa’ailoa mai nei e Dr Aifili John Tufa, o le ali’i Foma’i ma le Tausima’i sa fa’atautaia suega nei mo ali’i va’a uma, fa’atasi ai ma le pailate o le Coral Islander, ua taofia nei uma e nofo va’ava’aia ma ua fa’anofo esea mai latou aiga.

Na fa’aauau pea ona la’u ese mai le uta a lenei va’a, peita’i sad fa’asaina ona toe o ese mai le auva’a e 20 mai o latou potu. O Ie sui lea ua maua ane lana suega e fa’amaonia ua i a’afia I le Covid-19, ua fa’ailoa mai le le foliga mai o se tasi o ma’I ma vaaia ai auga o lenei fa’ama’i.

O fela’ua’iga o pusa oloa o lea va’a sa faia e le aufaigaluega a le Matagaluega o le Uafu ma le Samoa Pacific Shipping.

O le lua ai lenei o va’a oloa ua afea le atunuu ua maua ane ona tagata faigaluega o lo’o a’afia i le Covid-19.

FA’AILOA KOVANA LOLO MOLIGA - $8MILIONA O TOTOE I LE TBAS MO LE FAIGAMALO FOU:

I le fonotaga mulimuli a Kovana Lolo Moliga ma lana kapeneta faapea fo’i le Komiti Fa’afoe o le Coronavius ma Tuiga fa’asolo o le Covid-19, sa fa’ailoa manino ai e Lolo le aofai o le seleni o totoe nei i totonu o teugatupe a le malo, e tapena ai mo le faigamalo fou.

“Ao le’i mae’a le tatou faigamalo, e fa’afetaia lo outou lagolagosua ma lo outou fa’alogo ma fai o tou tiute e pei ona mana’omia ai outou uma lava. Ou te iloa o lenei nofoaiga sa matua iloga ona sousou, ae sa outou lagolagosua ma tatou taumafai fa’atasi le mea sili ia saogalemu le tatou folauga. Lea ua toe o se aga mae’a, o le agaga fa’afetai, e ma te tuuina atu ia te outou uma lava, sa tuu atu atoa ia te outou le faamoemoega, fa’afetai galulue.”

“Peita’i, o le tupe lava le mea sili ona taua i so’o se fuafuaga e fia fa’ataunuu. I so’o se suiga fo’i o faigamalo, o le tupe lava e tele ina le mailoa pe o fa’apefea mai. O le taimi lenei ou te fiafia e fa’ailoa atu, o lea o le a tu’ua le malo, ou te fa’ailoa atu o lo’o ua i ai nei i teugatupe a le malo le silia ma le $8milona e fesoasoani i le faigamalo o lo’o soso’o mai a Lemanu. E $6miliona o lo’o i ai i leteugatupe tele i le TBAS, ae $2 miliona teugatupe laiti o i ai uma i le tatou faletupe.”

“E ese mai lea itu, ae ua mae’a o’u toe fa’aopoopoina le ta’i tolu masina o konekarate e galulue ai pea le ali’i Teutupe a le Malo ma le Fa’atonu o le Soifua Maloloina, se’ia faia filifiliga a le Lemanu ma Talauega, ae o lo’o sologa lelei le fa’amatuu ese atu o la’ua tiute i nisi e tofia. Ona o lo’o tulaga fa’aolioli mai lava le ulufale mai o le Covid-19 i o tatou faitoto’a, o lea e tatau lava ona vaaia toto’a le galuega a le Matagaluega o le Soifua Maloloina o le atunuu. Ia onosa’i mai la oulua nei, ae fai le galuega ma mata’i le soifua laulelei o le atunuu e ala i tupe ia sa’o lelei ona puipuimalu ma fa’aalu, fa’apea fo’i le soifua o le atunu’u ia gafa taulima lelei.”

Sa faailoa fo’i e Lolo, “I le matou ulufale mai i le tausaga e 2013 e fa’aauau le folauga a le atunuu ma lona malo, sa tele mea ua iloga mai sa aitalafu ai le malo, ma e le’i leva ona tutula’i mai, ae amata loa ona mae’a totogia ese nei mea uma.”

Sa ia fa’atepa le atunuu i le tele o galuega o lo’o ua amata fausia, “O nisi ua mae’a ona fa’atula’ia ma ua fa’aaogaina, ae o nisi o le a fa’aauau pe ina ia tatala i le nofoaiga fou. O le taumafaiga lea a ou ta’ita’i ina ia mafai ona atina’e pea le atunuu tusa poo le a le tau fa’asoasoa o le seleni.”

Ina ua fesiligia le Sui Fesoasoani Fa’apitoa a le Kovana Iulogologo Perera e tusa o lea teugatupe ua saunoa i ai le Kovana, sa fa’amanino mai e ia, “O le teugatupe lea ua fa’atula’ia e aoina i ai le lafoga 2 sene mai le aotelega o lafoga o le tau o le suauu, ma ua fa’atula’ia e fa’atupe ai so’o se fa’afitauli e alia’i mai i le atunuu ae le’i fuafuaina ma atofa i ai se fa’atupega a le malo.”

E ese mai lea sa ia fa’alauiloa fo’i le tatalaga aloa’ia o le Fale Ta’alo fou i Tafuna mo le DYWA. O lea maota sa manatu lava o le a tuu ia e umusa e le faigamalo fou, peita’i ua fa’ailoa mai e le Konekarate, a o’o i le tausaga fou, ua mae’a le taimi atofa mo le latou Konekarate e galulue fa’amae’a lea galuega ma ua le talafeagai ai ona latou toe umusaina le galuega.”

Ona o lea ua malilie ai o le a fa’atino i le aso Lulu a sau nei, ma ua fa’aaogaina fo’i ina ia avea ma se ma’ua toe galuega ma le afioga le Kovana Filifilia e umusa fa’atasi. Ua manatu le Konekarate ina ia ma’ua auai fa’atasi ma Lemanu i lea fa’amoemoe.”

“O lea galuega o le a tatala nei, o se fa’amau fa’ailoga lea o le galulue fa’atasi o faigamalo, ae maise i le taimi o le fesuia’iga e leai lava se faigaofie o i ai i le ta’ita’i o lo’o fotua’i mai.” O le toe saunoaga lea a Kovana Lolo Moliga.