TALA I VAIFANUA

Pago Pago, AMERIKA SAMOA

TOE TOFIA KOVANA LOLO MOLIGA – SUI KOMITI FA’AFOE O LE ASTCA

O le aso Tofi o le vaiaso na te’a na fa’ailoa ai e Kovana Lolo Matalasi Moliga le toe tofia o sui totino e latou te fa’afoea le ASTCA ma ua toe va’aia ai le toe fa’aulu maia o le to’afa o sui tuai: Taiulagi Ausega, Omar Shalhout, Alofagia Nomura ma Iulogologo Pereira.

“O i latou nei e to’afa ua mae’a tautuaina le atunuu e ala i nei tiute sa feagai ai i latou ma le ta’ita’iga o le Matagaluega o Feso’ota’iga o le tatou Malo po’o le ASTCA, i tausaga ua mavae, ma ua alagatatau ona latou fa’aauau pea lava latou tiute ina ia tautuaina le atunuu ma le malo o Amerika Samoa, aua ua latou iloa patino ala e mafai ai ona aga’i pea i luma le auaunaga ale ASTCA,” o le tala lea a le afioga le kovana.

Ua ia fa’atulaga fo’I le ta’ita’ifono e tumau lea ia Iulogologo Joseph Pereira. O le Komiti Fa’afoe ua ia tofia nei e le tau fa’atalitalia se pasiga fa’apitoa mai a le Fono Faitulafono.

O Iulogologo J. Pereira, o le taitaifono ma o le a fa’ato’a toe suia lea tofiga ia Teseam 2022. O Taiulagi Asuega o le sui mai le vasega o tagata Faipisinisi o le atunuu ma e fa’ato’a mae’a lenei tofiga ia Tesema 2022. O Alofagia Nomura sui o le mamalu lautele o le atunuu e fa’ato’a mae’a lea tofiga ia Tesema 2022. Omar Shalhout sui mai le aufaipisinisi o le atunuu ma e fa’ato’a mae’a lea tofiga ia Tesema 22, 2022.

O Solip Hong, sui tofia mai le mamalu lautele o le atunuu ma e fa’amae’a lona tofiga iaNovema 2021. O Dr. Tupulu Bone Ta’ase, sui mai le mamalu lautele o le atunuu ma e maea lona tofiga lea ia Novema 2021. O Ben V. Sauvao sui mai le mamalu o le au Faipisinisi ma e fa’ato’a mae’a lona lea tofiga ia Iuni 2022.

TATALA NOFOAGA UA MAE’A TAPENA E  FIAFIA AI TAGATA UMA I AMERIKA SAMOA

O le aso Toona’i na tatala aloa’ia ai e le Malo o Amerika Samoa le latou Atugafale ma le Maota Samoa tele o lo’o ua mae’a fa’afouina lona soso’oga ma le atugafale ua mae’a fa’afouina atoatoa mo le fa’aaogaina e le atunuu.

O le malae  i le Suigaula o le Atuvasa, ua fa’alauiloa mai nei ua fa’aigoaina ai le Maota o tula’i ai ma ua i ai ni suiga fou ua faia i ai ina ia fa’aleleia atili le fausaga o lona soso’oga ina ia fa’afaigofie fa’afiafiaga uma e fa’atino ai. Ua ese i lena, ua mae’a fa’afouina le atufalega sa i ai ma ua fa’atula’ia fo’I teuteuga ma la’au kerisimasi ina ia mafai ona fa’aaogaina e le mamalu o le atunuu e fa’afiafiaina ai latou fanau ma aiga atoa. Ua mafai ona fa’aaoga e i latou e pu’eina ai latou ata ma auina atu i fafo e fa’ailoa ai foliga fiafia o le tatou atunuu i lenei vaitau fiafia o le tausaga.

O lea ua i ai nei  le igoa o le Maota ina ia fa’amanatuina ai pea le sao o se tasi o tama o le atunuu, ma lona naunau i le fa’amalosia peea o le Fa’asamoa i tupulaga faia’e o le atunuu, e ala i le fausia pea o maota e fa’amauina ai fausaga o Maota Samoa. O le afioga Tufele Li’amatua ua fa’asuafaina ai nei le Maota.

I le lumafale o le ASPA i Tafuna ua tofu sao fo’i le vasega o Pisinisi uma ua iai ma latou teuteuina le solo lea o la’au Kerisimasii laiti i moli kerisimasi ma ua mae’a fa’amumuina moli ina ia maimoaina le matagofie i le afiafi o le aso Sa. O le la’au Kerisimasi  Tele ua mae’a fa’atuina fo’i ua maea fa’amumuina ona moli emoemo ma ua matagofie fo’i le alatele i Tafuna latou. Peita’i i le ogatotonu o le alatele mai Fagatogo i Tafuna, ua mae’a fa’amumuina fo’i le laina o La’au Kerisimasi uma ua mae’a fa’atulaia e le EFKAS Matu’u ma le latou Fa’afeaiga ma le faletua., fa’apea ma le latou afiafi o pesepesega fiafia o le Kerisimasi na fa’atautaia i le sauniga fa’apitoa e fa’amumu ai latou Moli uma o le Kerisimasi i Winterland.

Peitai, e le’i fa’alauiloa maia le atumauga o Aoloau ma Aasu po’o a fea o le a fa’amumu mai ai moli i tumutumu mauga ma fa’aatoa ai loa lea fo’i matagofie o le atunuu atoa i lenei vaitau fiafia i le lalolagi. “Ia manuia le Kerisimasi ma le tausaga fou.”

2 FA’ATONU FA’AKONEKARATE ULUA’I FA MASINA O LE NOFOAIGA FOU

I le fonotaga a Kovana Lolo Moliga ma le Kovana fa’aolioli a le atunuu Lemanu Peleti Mauga ma lana soa Talauega Ale, sa fa’ailoa manino ane ai e Kovana Lolo Moliga ia i la’ua, “Ua ou soso’oa le Konekerate a le to’alua o a’u fa’atonu, le Teutupe a le Malo Ueligitone Tonumaipe’a, ma le fa’atonu o le Soifua Maloloina Motusa Tuileama Nua, mo le ta’i 4 masina. O le fa’amoemoe, ina ia mautinoa o lo’o sologa lelei mea uma i le fesuiaiga o foe o le folauga a le atunuu I le lua fo’i taimi e tula’i mai ai o taitai o le tatou Malo.”

Ua talileleia lea fo’I faiga e le suiga fou o ta’ita’i ma ua iloga ai fo’i le naunau o Kovana Lolo Moliga, ina ia le fa’atamala o ia i le tulaga o le tupe a le Malo e fa’atautaia ai pea galuega ua mae’a sua le eleele mo le amatalia, o isi fo’i galuega o le a fotuai mai le isi faigamalo fou e fa’atino, ae maise ai le aofai o le toega o tupe a le Covid-19 lea na toina mai e fa’aaoga mo le tapenaga a le tatou atunuu e feagai ma lea fa’ama’i pipisi.

Mo le silafia a le mamalu lautele, na faalauiloa lava fo’i e le Komesina o Leoleo, i le taimi o le fa’au’uga o le Vasega o Leoleo Fa’au’u #28, o i latou uma nei o lo’o fa’aauau ona totogia i le ta’i $8.00 I le itula se’ia oo ina uma lea vaega tupe ia Aperila 202. E le gata i leoleo nei 72 i latou ae ua i ai ma leoleo o le Falepuipui e 42 i latou na fa’afaigaluega fo’i ona o le Covid-19, o lo’o aofia i lea alamanuia.

Peita’i, pe a mae’a loa ona fa’atupe e le Covid -19 latou totogi ona fa’atoa toe se’e mai lea I le totogi amata ua mae’a fa’atulaga mo leoleo fa’ato’a amata e $16,000 i le tausaga. Mo le silafia e tele atu le totogi o ofoina mai e le Covid-19 nai lo le totogi amata o lo’o tautua ai nei fanau leoleo.

E le gata i le vasega o leoleo, ae ua totogia fo’i  ele Covid-19 le vasega e to’atele o tagata fesoasoani mo faia’oga i le potu a’oga i a’oga uma i le teritori, fa’apea fo’i ma le aega a le au fufulu potu a’oga lea fo’I e fa’afaigaluega ai le isi to’atele, e motusia fo’i lea ituaiga o konekarate i le masina o Aperila 2021.

Ua fa’apena foi le taua tele o le tofiga o lo’o tula’i ai le fa’atonu o le Matagaluega o le Soifua Maloloina, aua o i latou nei e nafa ma le saogalemu atoa o le atunuu mai le luitia mai fafo. Ona o le fa’atautaiga atoa o le saogalemu mai lea fa’ama’I o le Covid-19 o lo’o nafa lea ma le matagaluega lea, ua filifili ai fo’i e soso’o lana konekarate mo le 4 masina.