TALA I VAIFANUA

Pago Pago, AMERIKA SAMOA

14 AU FA’AU’U KOSI TAUSIGA MATUA MATUTUA – TAOA & ASCC NURSING

O le aso Faraile i le vaiaso ua te’a, na fa’ataunuuina ai i le nofoaga fou o le TAOA i Tafuna na faia ai le sauniga mamalu e taua’aoina ai tusi pasi ua ausia e le to’a 14 o i latou sa tauavea mai latou aoaoga fa’apitoa mo le tausiga o matua matutua i tua i aiga po’o nofoaga fo’i o tausia fa’apitoa ai i latou.

I lea lava sauniga sa fa’ailo fo’i le latou manulauti “O le Agaga Fa’aosofia Pe Fai La’ei o Au Miti!” ma ua fa’atumauina ai le to’a 14 ua mae’a umia nei latou tusi pasi mo le 10 vaiaso ia fa’aatoatoa latou aoaoga fa’apitoa mo lea faiva taua.

O le fa’au’uga lona lua lenei, ma o i latou fo’i o lo ua umia nei tusi pasi ua agava’a i latou e tausia fa’apitoa tagata matutua ma iloa patino fo’i ala e fa’afaigofie ma fa’ataunuu ai latou tiute nei pe a fa’atino.

O le sauniga sa fa’atino sa auai uma sui mai le Kolisi Tuufa’atasi lea e aofia ai le ASCC Nursing lea ua fa’aaogaina le vaega tupe toina atu e le TAOA ina ia ‘ao’ao nisi ia agava’a i lea fo’i faiva. O le tamaitai Taiulu o Ituaiga Kosi o lo’o tau’avea i le Kolisi , Dr. Siamaua Eliapo Lopeti, sa ia avea ma sui e saunoa e tusa fo’i o lea taumafaiga ua fa’aiuina, o se galuega lelei, ma o le tiute fo’i e aoga tele i o tatou pelega uma lava i le atunuu, tama ma tina matutua.

O le 10 vaiaso sa fa’atautaia ai aoaoga tusitusi, ae maise lava o galuega e fa’atino ai le tausiga lelei o tagata matutua.

“Ona o le faiva ua outou agava’a ai nei o se tautua ma se tomai e matua aoga tele i tausiga o tatou matua matutua, o le fa’aaogaina tatau fo’i o le seleni ua fa’amatuu mai e le TAOA mo lea fa’amoemoe lenei, o se mea sili ona taua ua galulue fa’atasi i ai lea polokalama TAOA, ma le tatou  kolisi tuufa’atasi,” o se saunoaga lea a Lopeti.

Na i ai fo’i se upu faamalosi na tu’uina ia Ms. Ripley e fa’amalosi ai i lea vasega, ma sa ia fa’ailoa ai “O le tausiga o tatou matua matutua, o se faiva e auau i ai aiga ta’itasi uma lava ua i ai matua matutua. O le agaga moni lava lea e tatou te naunau ai i nei faiva, ia mautinoa ua agaga i tatou uma i le tausiga lelei o tatou matua matutua. Ia lava le fesoasoani ia maua e i latou le tausiga lelei o isi uma matua, ua mana’omia lea tausiga ae ua tau leai nisi o latou aiga e nonofo ma tausia lelei i latou. O le isi lea avanoa ua tatou maua mo nei tautua aoga e ofoina atu.”

O le au fa’au’u:  Bridgette Christina Aporosa; Akosita Dulacegu; Lilibeth Metisio Guarin; Nikasio Pio Edward Mana’o; Cherulmoanamarie E. A. Ripley; Letila Korovu Talayawa; Salote Tinaivesititayaca; Anania I.S. Tolanigadi; Tafa Filipo Tupuola; Kelera Tinaisalala Vadei; Tuiloma Gade Vaubula ma Nanise Davetawalu Voseci.

$31,326.AOFA’IGA TUPE-TAUVAGA TAUSALA A LE EFKAS MALAELOA:

I le tauvaga tausala a le EFKAS i Malaeloa sa saili tupe ai aua le fa’aeaina o le latou malumalu, sa fa’ataunuuina lea i le afiafi o le aso Faraile ua te’a, na matua galulue fa’atasi ai le ekalesia, ina ia lava ma totoe le latou sailiga mo lea fa’amoemoe.

Na vaevaeina le ekalesia i ona vaega e fa ma le Fa’afeagaiga Taulagi ma le Faletua na  atoa i ai le 5 o vaega o lea sailiga. O le aotelega o latou fa’afiafiaga uma sa aofia ai mauluulu matagofie ma le Taualuga e fa’aiu ai le fa’afiafiaga a vaega ta’itasi.

O le vaega a Kana sa iloga mai sa latou fa’aaogaina uma lava le vasega o le autalavou e fa’atino a latou fa’afiafiaga ma sa i ai lava fo’i ma le sao, o le tauvaga a manaia ina ia maua se perenise e fa’aipoipo ma le Purinisese lalelei. O se fa’atinoga sa fa’aaogaina ai le to’atele o talavou laiti se’ia oo i le vasega o talavou matutua i a latou fa’atinoga. Na tele fo’i le seleni sa aoina i luga o le fola mai nei fa’atinoga.

O le vaega na aoina mai ai le tinoitupe silia o le vaega lea a le fa’afeagaiga ma le faletua ma le fanau.

O le latou tu’ufa’atasiga na fa’aleo mai e $12.000+ na tuufa’atasia mai le taumafaiga a lea vaega, o le taumafiaga a Kana i le Faife’au Malolo Manumalo Emau ma le faletua ma le latou vaega atoa, sa tu’ufa’atasia mai ai se aofaiga le tumau e latalata i le $9,000.

O le vaega foi a le tina matua o Tua ma le latou vaega atoa na silia ma le $6,000.+, le vaega fo’i a se tasi o tina matua o le Ekalesia, na maua ai le $5,000.+ ma le vaega a Pula ma Ulutu lea sa maua ai le aotelega e $4,500.+.

O le fa’amoemoe o le Ekalesia ia mafai ona faia ni ea malulu mo le latou malumalu. Mai lenei saoga, ua iloga ai, ua lava ma totoe mo le fa’amoemoe lea aotelega ma o se fiafiaga lea ma le agaga fa’afetai tele sa fofogaina e le susuga le Fa’afeagaiga ona ole a’ao foa’i ma le loto o i latou uma i galuega fa’atino a le Ekalesia.

TAOFIA PEA MALAGA VA’ALELE & MV LADY NAOMI MAI SAMOA

E oo mai lava i le aso Gafua na te’a nei, o lo ua taofia pea lava so’o se malaga mai a va’alele fa’apea ma Va’a folau i le sami mai Samoa, ona o le tulaga ua lua a latou sui ua fa’amauina ma fa’amaonia ua maua ai verusi o le Coronavirus e tusa o suega sa faia.

Ua fa’ailoa mai e le komiti fa’afoe o le COVID-19 a Amerika Samoa “O lo ua tapunia pea femalaga’iga i le va o Samoa ma i tatou i le taimi nei, ua le mafai ai ona talia le taula mai o le MV Lady Naomi, ma va’alele fo’i e femalaga’i i le va o i tatou ma Samoa, se’ia toe maua atu se isi fa’aaliga e suia ai lea tamau.”

Ona o lo’o ua le mautinoa lelei lava e le fa’auluuluga o le Soifua Maloloina a Samoa pe mafai ona toe pesia se isi i sui e toalua ua maua i le Covid-19 i Samoa, o lo’o nofo va’ava’aia lava tagata uma e afua mai le pasese a le va’a na malaga mai ai nei sui, e oo fo’i i le aufaigaluega a le Malae Va’alele ma le Matagaluega o le soifua maloloina o lo’o va’ava’aia toto’a ma faia suega pe o pesia se tasi.

O lo ua fa’ailoa mai e Iulogologo, o lo ua tatalia pea lava isi suesuega ua avatua nei i Niu Sila, ona fa’ato’a maua lea o se isi suiga mo lea mataupu, ae maise lava le malaga a le va’a MV Lady Naomi.

O le tulaga masani fo’i e malaga tagata mai Samoa o faigaluega i le Star Kist Samoa, peita’i o le taofiga lenei o femalaga’iga, ua iloga mai o le a le mafai ai ona toe taunuu lea fa’amoemoe.

E tapunia galuega uma ia Tesema 18, 2020, peita’i ona o le tulaga ua i ai nei o i la’ua ua maua i le Coronavirus i Samoa, ua tapunia ai nei femalaga’iga i le taimi nei, ma ua le maua se taimi e toe tatala ai, ma o le a a’afia ai lea masani a tagata faigaluega e o i Samoa ma toe taliu mai i le amataga o le tausaga mo galuega.

“O le a faigata ona toe saogalemu i tatou iinei pe afai o le a tatala avanoa e o atu ai tatou tagata faigaluega ma toe fo’i mai mo galuega, o le a lamatia ai fo’i le saogalemu o tagata uma o le tatou teritori. E le gata i lea o le a umi atu taimi e nofoia ai e i latou uma e malaga nofoaga e nofova’ava’aia ai, faa’to’a fa’ataga ai e o i aiga ma galuega. I le taimi nei, o lo’o tapunia lava tatou femalaga’iga ma Samoa ma Hawaii,” o se fa’amatalaga lea a le Komit Fa’afoe o le Koviti 19.