TALA I VAIFANUA

Pago Pago, AMERIKA SAMOA

FA’ATAUA LE ASO FA’APITO AUGAFA MO FITAFITA TUAI E LE TATOU MALO:

E ui i le malosi o timuga i le taeao o le aso Lulu na te’a,  ae na usu po lava le vasega o fitafita tuai, o tama tuai o le Maligi, le Army ma le Eafosi e inu le malu taeao i le taeao po, a’o loma le amatalia o le latou talotalosaga i le mamalu o le atunuu o lo’o femaliua’i i le alatele, mai le magatolu i lumafale o le US Army Reserve tuai.

Ua iloga ona latou tutu faatasi e talotalo ma fa’amanatu atu i le mamalu fegasoloa’i lo latou aso o fa’ataua ai le latou tautua. Ua fa’ailoa atu lo latou fiafia ina ua aulia mai fo’i le latou aso fa’ailogaina, a’o o lo’o tumau pea le soifua.  Na fa’atautaia lea talotaloga mo le itula ma le afa, ona soso’o loa lea ma le gasolo mai o i latou uma sa auai i le talotaloga i le latou malae ma le nofoaga o le ma’a fa’amanatu faapea ma le latou Ofisa Autu o Tautua Eseese mo Fitafita Tuai.

O le sauniga faapitoa e amatalia ai lea fa’amoemoe na ta’ita’ia lea e Rev. Faoliu, ma soso’o ai ma le tolaulauina o le Poloa’iga fa’alaua’itele a le afioga Kovana Lolo Moliga ina ia fa’atauaina e tagata uma i Amerika Samoa, le tautua sa faatino e Fitafita Tuai uma o le vaega au a le malo tele. O le avanoa sa tuuina mo e saunoaga a Kovana Lolo Moliga sa ia fa’afetaia ai le tautua iloga a le vasega o Vetereni uma o le atunuu. E le gata ia i latou uma ua mae’a ona tautua ma litaea mai ma ua nofoia le atunuu atoa, ae ua fa’apea fo’i ia i latou uma o suli o Amerika Samoa sa tautua, peita’i o lo’o alaala tumau i isi setete ma terirori o le Iunaite Setete.

“Ua iloga lo outou sao i le puipuiga o le saogalemu ole Iunaite Setete o Amerika. Ua outou faia se tautua ua amana’ia ai Amerika Samoa i le va ma le Malo tele o lo ua fa’amalumalu mai ia i tatou i so’o se mea. Ua le gata la ia te outou o tatou mafuta i lo tatou nei malo, ae maise fo’i isi vetereni uma o lo’o alaala i fafo ma i latou sa fia auai mai i le tatou atunuu, peita’i, ua opea ai i Hawaii ma isi setete ona o le fa’asa o le Covid-19.  O outou o vetereni ona o le tautua i vaega au, ae o a’u fo’i ua na’o se vetereni o le aganuu ma le taumafaiga e taofiofi mai a tatou measina ia le mou ese atu mai le olaga o tatou tagata ae maise i a tatou fanau, o le lumana’i o le atunuu.”

O le sao o vetereni i le tautua i le malo e ala i le tamaoaiga masa’a mai i le atunuu, e le o fesiligia fo’i e le taitai o le tatou Malo, “Aua ua o le lelei lava o le tausiga e le Malo tele o vetereni, o le fa’aopoopoga atili lea o le tamaoaiga e fa’auia mai i le atunuu, e ala i a latou penefiti ma isi mea ua agava’a i ai. Ona o le to’atele o tatou alo o lo ua tauto mo tiute eseese i le Militeri, o lo latou lumana’i o le a le fesiligia fo’i lo latou tausiga lelei.”

E le’i galo fo’i i le Kovana sili ona ia fa’afetaia le tautua a i latou, o fitafita tuai ua fai i lagi le latou folauga, o lo latou sao ua tausia ai pea tina ma fanau ma o so latou sao lava lea, ua tu’ua mo latou aiga ma le Malo o Amerika Samoa.  “O i latou na e oo mai lava i nisi ua fa’ato’a tuua le mafutaga i ni nai aso e le’i mamao atu, oua saunia e le fa’amalo le pale fuagala’au manogi, e fa’ailoa ai le agaga fa’afetai i lo latou sao i malo, ua malolo mai tiga i latou, ae ua fa’aauau ona soifua ai aiga ma le malo o Amerika Samoa, fa’afetai.”

O le faletua o Cynthia Malala Moliga, sa avea ma sui mamalu o le faigamalo e na te taua’aoina le pale e fa’atulaga i luma mai o le ma’a fa’amanatu mo fitafita uma ua maliliu, lea o lo’o lumafale i ai le Ofisa Autu o le VA i Tafuna. E ui ina loloto timuga i lea taimi, ae sa fa’ataunuu lea faiva e le fa’atina o le atunuu ma le fiafia, ma sa faapapaina fo’i fana ma ilia le pu fa’ailo ona ole auaunaga a fitafita fuai ua faiilagi. O la auaunaga sa fa’atino lea e le vasega o fanau uma o lo’o aofia i le tatou USArmy Reserve i Tafuna ma le latou fo’i pulega.

O le sauniga lava lea sa sisia lea o tagavai uma o tautua eseese sa galulue mai ai alo o le atunuu, ma sa amatalia lava ile tagavai a le Malo tele, soso’o ai ma le fu’a a le tatou teritori ma fa’asolo atu ai loa i tautua eseese a le USMarines, USArmy, USNavy, USAirforce, USA Goast Guard, ma e mulimuli lava i le fu’a mo i latou o Fitafita uma o e na maliliu ona ua fa’anofo falepuipuia i atunuu sa auai ai i taua na fevesia’iga, ma o le to’atele lea, e le o maua mai o latou tino ina ia fa’afo’ia mai i fanua ma aiga.

Ao fa’asoloa taina fo’i nei vi’i o vaega ta’itasi o le vaega au, ua fa’apea fo’i ona tutula’i i latou sa tautua ai, ma sa va’aia e to’atele ai lava le vaega a le Maligi ma le Army, i sui sa auai i lenei fa’atasiga i lenei fo’i tausaga. Ia manuia le aso mo fitafita tuai uma a le Iunaite Setete o Amerika.

TAULA LE  “MV FESNO ASKOLD” MO LE 7 ASO E FELA’UA’I PUSA OLOA – AUMAI MA AVATU I FAFO:

E ui ina nofo popole le atunuu i lenei va’a oloa ua ulufale mai ae to’atolu o lana auva’a ua a’afia i le Covid-19, ae ua matua nofouta le mamalu o le pulega ma taupulega a le Matagaluega o Uafu ma le Matagaluega o le Soifua Maloloina i a latou vaega e ao ina faia, ia le lutia lava se tasi o le atunuu ia i latou ua i luga o lea va’a oloa, lea ua maua i le faamai pipisi.

Ua le toe to’atele fo’i nisi o tiute i le taimi nei, e tautuaina lenei va’a, aua ua fa’atulaga e le matagaluega o le soifua maloloina ma le Uafu fo’i ina ia fa’aaogaina mai tagata a le va’a, e lauina maia i lalo uta nei i se vaega o le uafu, ma fa’asolo ona fa’amamaina e le Kamupani ua mae’a fa’atulaga e le pulega a le Uafu nei pusa oloa uma, ia le aumaia ai le Covid 19 i nisi o le aufaigaluega galulue a le Uafu tele.

“E le o mama i le va’aiga a matou matagaluega nei e lua le taumafaiga lava ina ia le oo atu se tasi o le atunuu i luga o le va’a oloa. Ua fa’aaoga mai ai latou tagata faigaluega e la’u maia i lalo le uta. Ua le mafai fo’i ona te’ena le va’a lea e le la’uina mai lana uta oloa, aua o lo’o mana’omia e le atunuu nei oloa uma, ua oo mai vaitau o le Kerisimasi ma le tausaga fou, e le tatau ai ona te’ena uta o lo’o ua aumaia. Lona lua o le uta fo’i o pusa apa I’a a le Star Kist Samoa e ao ina fa’ao’o atu i maketi i setete eseese o le Iunaite Setete. O le tamaoaiga tausi lea o le atunuu, aua a le o fo’i i fafo nei oloa, ua motusia fo’i  le faigaluega a le aufaigaluega e faitau afe ma afe a le atunuu ma pisinisi ta’itasi o feso’ota’i ai.”

O aiaiga uma nei  na avea ma mataupu sa fetufa’i ai finagalo o ta’ita’i o le Malo o Amerika Samoa ma le Komiti Fa’afoe o le Covid-19, ina ia mautinoa ua fa’aalia ma ia faia i ai se fa’aiuga tatau ma le saogalemu, ia le lutia lava Amerika Samoa i le fa’ama’i pipisi mata’utia o lo’o feagai nei ma atunuu o le lalolagi atoa.

O lo ua iloga ua i ai le fa’atulagaga o galuega uma e faia i le Uafu tele a’o taula mai ma fela’ua’i oloa a le Fesno Askold i le uafu. E mana’omia ona tausisi le mamalu lautele i tulafono fa’atulaga o le Covid 19 Code Blue i le tatou malo. Aua fo’i nei toe asiasi so’o ane i le Uafu i lenei  vaitau, ae tuu se’i mae’a lelei ona la’u uta a lenei va’a, ma tu’uva’a ese atu, ona faato’a faasolo lea o fuafuaga uma e avatu ese ai pusa oloa mai le Uafu.

Ona o lo ua to’agaogao i latou e fa’atinoa le fela’ua’iga o Oloa mai le va’a i le uafu ma le toe avatu mai le Uafu i le va’a, o lea ua fai ai si tuai ona fa’amae’a o lenei faiva, e masani ona fa’atino mo le tasi i le lua aso mo uta tetele fa’apea.

Ia tapuaia faiva o le aufaigaluega ma le taumafaiga o lo ua fa’atulaga ia le maua ai lava se tasi o le tatou malo i lenei fa’ama’I, aua e alu le va’a ae tuu mai ia i tatou lea fa’amai oti. Peita’i e mana’omia lava le tatalo atu i le Atua ia faaauau lana puipuigamalu e fesoasoani i ala uma ua tapena e le matagaluega o le soifua maloloina, ia faamautuina lo tatou saogalemu.

Ua fa’ailoa mai fo’i, “O ai lava e fesoota’i ma le va’a lea o le atunuu, mai a matou matagaluega e lua o galulue nei, o le a nofo va’ava’aia loa ma faia ona tui fa’ailo poo maua i le covid pe leai. O i latou uma e to’a 11 na feso’ota’I ma le faiga o tui ma suesuega i luga o le va’a lenei, ua nofoia pea e i latou le nofoaga o suesuega faapitoa mo le Covid-19, ma o lo’o sologa lelei mea uma, e le o alia’i mai se tasi o maua i auga o lenei ma’i , ao latou suega fo’i o lo’o faia i aso ta’itasi, o lo’o fa’amaonia lava e le o maua i latoui i le Covid-19.” O se tala fiafia lea mai le fa’atonu o le Soifua Maloloina, Motusa Tuileama Nua.