TALA I VAIFANUA

Pago Pago, AMERIKA SAMOA

TAOFIA PEA MALAGA A LE HAWAIIAN AIR SEIA OO IA TESEMA 30, 2020

Ua fa’ailoa mai ua faamautu mai aiaiga tamau lona 10 o le fa’asa o le Covid-19 ua ma’ea fofogaina e le afioga Kovana Lolo Moliga e fa’amamaluina e Amerika Samoa, ua fa’ailoa mai ai le taofia pea o faigamalaga a le Hawaiian Air se’ia oo atu ia Tesema 30, 2020.

E ui lava i nisi suiga o mana’omia e le to’atele, ae o lea le suiga sa tulituliaupu mai e le atunuu, ona o le fia malaga i fafo o nisi, ae ole fia malaga mai fo’i o nisi i aiga. Ua fa’ailoa mai fo’i, e tula’i mai, ua na’o le pau lea o se suiga ua matauina ua fa’amauina mai le fa’asa sa fa’amamaluina i le masina atoa ua te’a, o isi mea uma ua tumau. O le suiga fo’i ua suia na’o le masina ma aso, ae o le tamau lava ua leva ona fa’asa mai i tulaga o feoa’iga i le va o Hawaii ma Amerika Samoa ina ia le pesia le atunuu i le Coronavirus.

“Talu mai le amataga, sa fa’alogoina lava nisi o fai mai, e oo lava i le fa’aiuga o le tausaga o tamau nei lea fa’asa, peita’i sa i ai se lagona e o’o mai lava i lenei vaitau o le Kerisimasi o fa’apenei le fa’asa lea,”o se tala lea o tina e masani ona malaga asiasi i lana fanau, i vaitau lenei ia fa’atasia ai ma fanau ma aiga i fafo. A leai e malaga mai uma fanau e asiasi mai ia te ia.

Ua tumau le tulaga o pisinisi e tatala i le 5:00 i le vaveao ae tapunia i le itula e 9:00 i le po, ua o gatasi ai i lea fo’i fa’atulagaga ma feoa’iga a ta’avale la’u pasese, pasi ma ta’avale laiti, ae ua avea na’o le afa o le aotelega o pasese e masani ona tumu ai latou nofoa i taimi uma.

Ua tumau fo’i le fa’ataga na’o pasi la’u pasese ma pisinisi e tatala e sili atu i le 9:00 i le po a le Star Kist Samoa.

O loo fa’asaina fo’i femalaga’iga a va’alele a le Samoa Airways ma le Talofa Air i le va o Samoa ma Amerika Samoa, peita’i afai e i ai lava ni mea fa’afuase’i e mana’omia ai ona faia se malaga fa’apitoa i lea va, aua e le o i ai le Covid-19 i Samoa na lua, ua fa’atagaina mai lea e le Kovana po’o le sui Kovana lea tulaga.

O isi mea uma ua aiaia i le fa’atulagaga o le Code Blue, lona uiga e le’i oo mai lava le Covid-19 i o tatou laufanua ma a’afia ai o tatou tagata, ua tumau e pei ona fa’atulaga ai mai le amataga.

NOLAN TU’AMOHELOA – TA’ALO TA’AMILOSAGA LAKAPI WORLD 10 SERIES

Manatu e le o maimoaina e le mamalu lautele o le atunuu le ta’amilosaga Lakapi a le World Series lea e fa’atautaia i Hamilton, Bermuda, ae o lea o lo’o ta’alo ai se tasi o alo o Amerika Samoa, le ali’i na amata atu ana a’oga maualuga i le Nuuuli VocTech High ma siitia atu ai ana a’oga e fa’amae’a i Utah North Ridge High School ma fa’au’u ai ana a’oga maualuga.

O ia lenei o Nolan Keone Tu’amoheloa o Iliili. O se taule’ale’a agava’a i lea fo’i fa’agatama, aua o le Lakapi o se ta’aloga e fiafia lava tamaiti e ta’a’alo ai i Samoa nei, tusa pe leai se polo lakapi moni, ae fa’aaoga so’o se mea e mafai ona fepasia’i solo i a latou ta’aloga faasamasamanoa i so’o se malae e maua e le fanau talavou.

“A’o aoga ai Nolan Keone i Utah e fa’amae’a ai lana a’oga maualuga, na pili o ia e ta’alo mo le Utah Warriors i le Lakapi fa’aperetania. Lea la ua soloa’i ai lea ‘au ina auai i le Liki lea a le World Series ma faia ana ta’aloga i Hamilton Bermuda se’ia fa’ato’a mae’a ia Novema 8, 2020,” o  se tala lea a si ona tina, To’afaoali’i Leilani Tu’amoheloa o Iliili.

O faiva o Nolan e le o fa’atamala ai le tama matua o Simione Tu’amoheloa  Kolomotu’a Tonga ma Iliili, aua o ia lea na finau malosi ina ia auina fafo le atali’i e fa’ai’u ai a’oga maualuluga, ma fa’ama’ati atili ai taleni ta’alo a Nolan ia maua se avanoa e a’oa’oina lelei ai lana ta’alo e ni faia’oga lelei a’ia’i i soo se fa’agatama. O le soa a le tama matua e fesaga’i ma le televise e maimoaina nei ta’aloga, o si ona tama o Seniti Latu ma le tina o To’afaoali’i Leilani.

Ina ua feso’ota’i mai Nolan Keone e ala i le messenger mo sana fa’amatalaga e tusa o le ta’amilosaga i le taimi nei, sa ia fa’auia mai ai ata video o latou ta’aloga, ma aumaia ai ona alofa’aga i lona tama matua, Simione Tu’amoheloa ma nai ona matua, ae ua ia fa’ailoa manino mai, “O la’u taumafaiga lenei, e avea o se toe fa’amanatu ia te a’u o si ou tina matua o Falesoa Timu’iaiala Tu’amoheloa o Iliili, o ia lea e muamua I malae ma le misia so’o sa’u ta’aloga i so’o se ta’aloga sa tauva ai i Amerika Samoa lo’u nuu pele. O le a fo’i se ‘ai e maua i lenei fa’agatama, Amerika Samoa tau ina ia tamau i o outou agaga, sa ta’alo ai se tasi o au tama fanau. Fo’i le Atua le vi’iga, ae tumau le fa’atauva’a o le atali’i.”

Maimoa i ai i le “Rugby World 10 Series Hamiton Bermuda” na amata mai ia Oketopa 25 ae fa’ato’a ta’alo le ta’aloga o le siamupini ia Novema 07, 2020. O lona uiga, ua latalata ona e maimoaina ta’aloga matagofie o lea ta’amilosaga, ma e ao ina tapua’ia faiva o lea alo o le atunuu, sa soifua ma foalima e le tatou malo se’ia oo ina matua ma saili avanoa atu i fafo e fa’aleleia atili ai latou taleni i ta’aloga e tauva ai fa’avaomalo.

O lo’o ta’alo o ia i le tulaga o le uigi ma e ao ina saoasaoa so’o se tasi i lea tulaga i lana ‘au a le Utah Warriors, ma o lo’o milo fa’atasi ai ‘au fa’avaomalo e 9 i lea Ta’amilosaga Lakapi Taito’a 10.

Ua fa’ailoa mai sa i ai isi ‘au lakapi sa ta’alo muamua ai Nolan Keone, peita’i, o le filifilia o ia e ta’alo mo le Utah Warriors lea ua fai mautu ai lana konekarate i le taimi nei.

TAOFIA MO LE AOGA MAUALUGA TAFUNA LONA LAUELEELE

Ua mae’a toina mai le ‘auga o le Mau sa matua mafuli le a’oga maualuga a Tafuna, le Laumua o le Toa, e fa’atauanauina i le Matagaluega o Aoga ma le afioga le Kovana Sili Lolo Matalasi Moliga, “Ia taofia pea mo le latou A’oga le Laueleele ma tulaga o falea’oga sa fa’atautaia ai a’oga o le Arts ma le polokalama o le JROTC.”

Ua talileleia le latou fanoga, ma o le fa’afetai maualuga fo’i ua fa’auia i ta’ita’i o le Malo, ona o le fa’amalolo o le latou fuafuaga, ae toe tuu mai pea lea vaega o le eleele o le lotoa o le Laumua i Tafuna e fa’atautaia ai pea latou a’oga e pei ona masani ai.

Ua fa’ailoa fo’i e le peresetene o le PTA a Tafuna High, William Spitzenberg, “Ina ua mae’a taua’aoina aloa’ia ai i le afioga Kovana Lolo Moliga le pepa o le mau a matua ma fanau a’oga ua ame’a sainia e le silia ma le 3,000 o saini, ma fa’ailoa aloaia atu fo’i le fanoga o le Laumua ma Matua ina ia fa’aavanoa pea lea eleele mo aoga masani a fanau a’oga, aua o lo’o tuputupu pea le aofaiga o le fanau a’oga i lea Laumua, na talileleia ai loa e le afioga le Koavana lenei fanoga.”

Ua fa’aalia sa aofia fa’atasi Kovana Lolo Moliga ma le to’atele o lana Kapeneta i lea taimi na fa’aoo atu ai lea fanoga taua mo le latou silafia a’ia’i o lea mataupu.

O le mau lenei sa masii atu ai le PTA, fanau a’oga, o nisi o faia’oga ma sa fesoasoani mai fo’i iai PTA a isi a’oga ina ia talileleia mai le fanoga o le Laumua i Tafuna. Ua fa’afetaia mai e Spitzenberg le fesoasoani mai a nei matua ma sui mai isi a’oga i le latou savaliga, ae sa silisili ona ia fa’afetaia le afioga Kovana Lolo Moliga ma le Kapeneta ina ua suia le latou fuafuaga ma taualoa le latou mana’oga na fa’ao’o atu i se ala taualoa ma le fa’aaloalo tele i taitai o le Malo.