TALA I VAIFANUA

Pago Pago, AMERIKA SAMOA

1,154 PALOTA UA FAITAULIA I PALOTA MAI FAFO:

A’o tatou i ai nei i le toe aso o’o i le aso atofa mo le palotaga lautele a le atunuu, ua fa’ailoa mai le aotelega o palota ua faia mai sui o lo’o opea i fafo fa’atasi ai ma fanau tautua i  vaega au ma i latou o nofo a’o’oga i fafo, ua maua ai le faitauga e 1,154 palota.

O i latou ua faia mai fafo latou palota ona e alaala tumau lava i fafo e 461 palota, lea ua aofia ai ma sui na malaga i fafo ona o galuega fagota i va’a I’a e 137, 252 o palota a i latou ua i ai a’afiaga tumau o le tino, ma le 72 o sui faigaluega i le fa’atautaiga o le palota i le aso a taeao.

O le aotelega lava latou o palota ua faia mai fafo e 693, ma ua lisia mai e 522 o i latou ua opea ona o le fa’asa o le Covid-19, 150 i latou o fanau i le militeri, 15 o fanau o a’o’oga ma le to’aono (6) o tagata faigaluega a le Malo o Amerika Samoa o lo’o galulue I atunu’u I fafo.

O nei (Aso Gafua) o le a maua ai le meli i nisi palota o lo’o aumaia e le tatou va’alele o le meli, a’o loma pea lava le palotaga.  O lo o ua fuafua e i ai fo’i se suiga e fa’amau mai i le aotelega o palota ua mae’a faia ao le’i oo i le aso o le palota, Novema 3, 2020.

O sui uma nei e opea i fafo ona o le covid-19, ua fa’auia mai a latou palota i feso’ota’iga tau inieneti ae o isi uma palota ua fa’auia mai i le meli.

Ua fa’ailoa mai sa faigaluega le aufaigaluega a le Ofisa o Palota ina ia lolomia uma pepa palota ma fa’atutumu ai pusa ma tufatufaina atu i nofoaga taitasi e tapena ai mo le aso fa’amauina mo le palota a le atunuu. E aotelega uma ne nofoaga e 41 iManu’a, Aunuu ma Tutuila.

O le a fa’aauau pea lava ona aoina mai palota a i latou e maua mai le meli ma laina fesootai o le initeneti mai le aso Sa ma le aso Gafua se’ia tapunia lava galuega i le aso Gafua.

6 SUI TAUVA O LO’O OPEA I FAFO ONA O LE TAPUNIA O MALAE VA’ALELE I PUIPUIGA I LE COVID-19

E to’aono ni sui tauva ua maitauina o lo’o opea i fafo ona o le fa’asa ona femalagai o nisi i le vaitau lenei o le Covid-19 ma o le a fa’ataunuuina lava le palota e aofia ai o latou sui a’o i ai i latou i fafo.Ua aofia fo’i i latou i le aofai e 500 ma ona tupu o sui na malaga i fafo ma le fa’amoemoe e toe taliu mai i le atunuu a’o le’i faia le palota, peita’i ua taofia e oo mai lava i lenei vaitau feoa’iga.

Ua aofia i le to’aono lea o sui Faipule mo le itumalo o Vaifanua, Shaun Va’a, o le sui tauva mo le Ituau o Logoitu’au Mark Atafua. Ua aofia ai fo’i ma isi sui tauva ua toe taumafai mai i nofoa o latou itumalo e ulufale ai i le maota o Sui: Fialupe Fiaui Lutu; Fa’alae Lauatua’a Tunupopo lea e tauva mai i le itumalo numera 5 Sua Numera 1 ma Vui Florence Saulo mo le itumalo o le Tualauta.

O le tamaitai foi o tauva mo le tofi Faipule i le Konekeresi o Meleagi Suitonu Chapman o lo’o aofia ai fo’i i o tatou tagata o lo’o tatalia le taimi e fa’ataga ai ona toe fo’i mai i le atunuu.

Ua matele ina fa’aaogaina mai e i latou feso’ota’iga tau initeneti i le Facebook ina ia fa’auia mai ai a latou fa’asalalauga, fa’atasi ai leitio ma Nusipepa e fa’aoo mai ai se latou fanoga i o latou itumalo, ina ia fa’ailoa mai ni o latou manatu i so’o se mea o a’afia ai latou itumalo, ae maise o galuega ua latou manatu ina ia faauia i o latou itumalo pe afai e fa’amanuiaina o latou taumafaiga i lenei palotaga.

Ua le gata i lea, ua fa’aaogaina e i latou nai o latou aiga ma uo mamae iinei e faia a latou kemupeni i le va ai ma le itumalo ma le ‘au palota, ae maise le Ofisa o Palota a le tatou Malo.

Ua mae’a fo’I ona fa’asalalauina e le Ofisa Televise a le KVZK-TV a latou saunoaga, aua o latou o latou fa’amoemoe mo le palotaga 2020, sei vagana ai Fa’alae Lauatua’a Tunupopo, ua le ausia e ia le taimi atofa e fa’ao’o ane ai lana saunoaga.

O le afioga Vui Florence Saulo, e tolu nofoaiga a le fono faitulafono sa ia se’ei ai, lea sa ia fa’ailoa mai lo latou naunau e fia oo mai i o latou itumalo, “O le fa’amoemoe lava latou e le mafai ona le tuuina atu i talosaga ia mafai lava ona maua se avanoa e oo atu ai i le atunuu ma le itumalo faapea aiga, a’o le’i oo i le aso o le fa’amoemoe. Ae o le tulaga foi o taumafai le malo ia fa’amautinoa, ia le po’ia ai le atunuu i le faama’i pipisi tele, e iloa ai fo’i, le taua o tatou tagata ma lo latou soifua laulelei, i o tatou ta’ita’i.”

“Pau o le mea, tau ina ia manatua nai o matou tagata fa’atauva’a ma lo matou fanoga e matou itumalo, e i latou e palotaina i matou o tauva i nofoa o matou itumalo i le Maota o Sui o le fono faitulafono.

E to’a 51 sui tauva o lo’o tausinio nofoa e 20 a le Maota o Sui, aua o le lona 21 o nofoa lea ua mae’a filifilia ai ona toe tofia le susuga Su’a Alexander Jennings e avea ma sui o le Swains Island. O le lona 8 ai lea o tausaga o lana nofoaiga.

Ole tofiga Faipule i Uosigitone o lo ua tauva ai nei le to’atolu o sui tamaitai lea e aofia ai Uifa’atali Aumua Amata, Meleagi Suitonu Chapman ma Oreta Mapu Crichton.

E fa paga o lo ua tauva nei mo le tofiga Kovana ma le Sui Kovana e taita’ia le faigamalo a Amerika Samoa: Gaoteote Palie Tofau/Faiivae Alex Iuli,  I’aulualo Faafetai Talia /Tapaau Daniel Mageo Aga,  Lemanu Peleti Palepoi Sialega Mauga/Talauega Eleasalo Ale ma Nuanuaolefeagaiga Saouluaga Nua/Tapumania Galu Satele Jr.

Ua fa’amauina nei le aotelega o tagata palota ua mae’a lesitalaina mo le palotaga o lenei tausaga  e 16,343 tagata.

FA’ATAUA TAUTUA A VETERENI MILITERI – LITAEA MA FITAFITA O TIUTE PEA:

O se fe’au fa’amalo ma le fa’afetai i le tautua matavela a ali’i fitafita tuai uma o taua i le setete o Hawaii fa’apea fo’i  ma le Post 3391 a le VFW i Amerika Samoa nei, lea e fa’amalumalu mai fo’i e le Ofisa o le Commander a le VFW i Honolulu. Ua fa’ailoa mai e le ali’i Retired Marine Ronald Lockwood o le Ta’ita’I ‘au o le Post 3391, “Ona ua le maua se tatou mafutaga I lenei tausaga talu ai le fa’asa o le Covid-19, o lea ua fa’aaoga ai nei ala e fa’ao’o atu ai lenei fa’afetai ma le fa’amalo ona o la outou auaunaga matavela sa fa’asaogalemuina ai le soifua o tatou tagata ma lo tatou malo i vaitau o taua sa outou tu malosi mai ai e puipui.”

Ua toe fa’amanatu mai fo’i e lea ta’ita’i, “Pe tatou te fa’atasi pe leai, ae o lea ua i ai le tatou aso fa’amanatuina ia Novema i tausaga ta’itasi e fa’amanatuina ai i tagata uma la tatou tautua ma lo tatou sao i le tatou saogalemu.”

 Ua fa’apea fo’i ona fa’ailoa mai le agaga fa’amalo o le tamaitai Post Commander a le VFW mo Amerika Samoa, Igafo Matia Va’a Brown, “Aua ua tatou iloa lelei, o le tautua lava na tatou tauto ai e fa’atino, o lea tatou te tutu fa’atasi ai e faia le faiva o le tautua. Ua tatou a’e manumalo mai taua sa fa’atino ai la tatou auaunaga, ae o manuia o le Atua lea ua fa’aifo ia i tatou ma ua fa’aauau ai pea mafutaga ma e pele ia i tatou, i o tatou aiga ma o tatou atunuu. O la tatou tautua mai tafaotaua ua fa’amae’aina, ae o lo’o fa’aauau pea ona tatou fa’atasi i le tatou auaunaga fa’avetereni, ua iloga ai o lo’o i ai pea le tatou sao e tautua tatou pelega ma aiga, ma le malo.”

Na fa’ailoa mai fo’i le agaga fa’afetai o le Ofisa o lo’o tautuaina o tatou vetereni uma mai Hawaii ona o le tumau ona soofa’atasi atu o le vaega o fitafita o taua uma o lo’o opea iinei, i le latou Ofisa autu i Honolulu, i mataupu eseese e ala mai ai alamanuia ua agava’a ai i latou ona o le tautua ua mae’a fa’atino i vaitau a’o tiute i latou, lea ua litaea, ma ua  tautuaina ai i latou e le latou Ofisa autu Post 3391 i Honolulu. “E tutusa lelei a tatou aia tatau i alagamanuia ua tali mai ai le Malo tele ia i tatou ona o le tatou auaunaga a’o tatou tiute i tafa o taua, o le mea lea, na fa’atuina ai le tatou Ofisa nei, ua au atu le auaunaga i so’o se vetereni o loo soifua pea ma fa’aauau lana auaunaga i lona aiga ma lona setete po’o le teritori o alaala tumau ai. O le tautua o le iomata lea o le fitafita i taimi o tiute ai se’ia oo mai ina avea ma veterni, e tumau lava na faiva.”

Ua fa’ailoa mai fo’i, ua i ai le fa’asalalauga faalauaitele a Peresetene Trump e fa’ailoa mai ai i vetereni uma, “Lona agaga fa’afetai e tusa o le tautua sa latou fa’atinoa a’o tiute i tafaotaua, ma ua oo mai lava ina avea i latou ma fitafita tuai, ma ua talitali nai manuia ua toina mai e le Malo tele mo i tatou ma nai o tatou aiga. O la outou tautua ma le afutoto sa fa’atino, e mamala ma ua outou tali fo’i i manuia ua toina mo outou ma a outou pelega i lenei vaitau o le soifua o vetereni. Fa’afetai mo la outou tautua.”