Tala I Vaifanua

Pago Pago, AMERIKA SAMOA

KONESETI O PESEGA – AUFAIPESE O FAAMOEMOEGA EKALESIA ASO FITU I AMERIKA SAMOA:

O le afiafi o le aso Tofi sa fa’atautaia ai e le Aufaipese a le Autalavou a le Ekalesia Aso Fitu i Amerika Samoa le koneseti o Viiga o le Atua ina ia fa’anofo filemu ai agaga ua ootia, ma o se fe’au e aoga mo le taumafaiga ina ia taofia ai le pule i le soifua I totonu o le atunuu. 

O vi’iga ma pesega e vi’ia ai le malosi ma le mata’utia o le Atua na fili faapitoa e le aufaipese a le Hope Choir.  O se tasi o aufaipese matagofie, o le autalavou mai Lepuapua “Alofa Tunoa”, ma le susuga Elijah Tavai ma sa ia usuina ai le vi’iga, “O A’u o le Palapala!” 

“O lea vi’iga sa ou tusia ma fatuina, e toe fa’amanatu ia te a’u, taimi fita sa ou savalia, sa ou feagai ai ma lo’u Atua, ma ua ou iloa ai lona matagofie ma lona alofa fa’amagalo, i lo’u tagata agasala ma le fa’atauva’a lava, pe a tu’ua e Ia a’u. O ia lava na toe a’apa mai ma fa’atonu ia te a’u ma ia toe fa’amalosi mai ia te a’u. Tau lava ina e fa’atuatua i lou Atua, e te mafaia mea uma lava!” O le ta’utinoga lea a Tavai.

O nisi pese sa fofogaina na aofia ai le “Jerusalem” mai I sui e to’atolu o le Hope Choir. O se tasi o pesega na sili ona tulaga ese sa peseina e ni alii talavou a le Hope Choir, “Pe a ou feagai ma le Mauga.”  O lea pese e matua talanoa I le o’oo’oga o faigata ua feagai ma le tagata soifua, ma ua manatu ua leai se fa’amoemoe, ae o le taimi lea, ua fa’atonu ai oe e le Atua, e te fo’i mai ia te Ia.

O le Koneseti sa tolaulauina le vasega o i latou na totogia latou laulau ta’i $1,000. ma sa tautuaina lelei fo’i i latou i lea afiafi e le Ekalesia. E lua ni pesega ta’ito’atasi (solo) na fa’aalia I luga o ‘power point’, ma sa faatatau I amioga e afua ai ona leai se fa’amoemoe ma I’u ina fa’aumatia ai e se tasi lona lava soifua.

 “Peita’i o le tali o nei mea uma, o le fa’atuatua i le alofa lautele o le Atua, e tuana’i tiga, e le toe lagona fo’i le tigaina, ae sau taimi e te olioli ai i lou ola tu’utoina i lou Atua, na e maua ai le ola.”

FA’AUUGA O LE AU KOLENI MO LE TINO LELEI & LUSI PAUNA I LE 6 VAIASO

O le aso Toona’I, Oketopa 24, 2020, i le itula e 6:00 i le taeao na faataunuu ai se fa’au’uga a nisi na silia ma le 300, sa auai I se tauvaga faamalosi tino a le SSY, lea sa latou koleni faatasi I le ono (6) vaiaso ua tuana’i.

O koleniga e matua faigata ma ua fa’atulaga ina ia fa’apae’e atili ai i latou, fa’amalosia atili o latou tino ma o se fa’aafu fo’i e sili ona aoga mo i latou i aso ta’itasi, ina ia le vave maua i le suka ma le toto maualuga.

“E tusa lava pe le toe pae’e lelei e pei o le mea na i ai le tino talavou, ae e le o le fa’amoemoe lena sa mafua ai ona auai i le taumafaiga lenei, o le taumafaiga lea e fa’amalosi ai le tino ia mafai ona fa’aumiumi le soifua laulelei, ma ia le lutia fo’i le ola tautua i ni ma’i tumau ona o taumafa ma le le fa’amalositino. Lea ua taumafai ai pe a mai lea taumafaiga, ae ua uma ane, o se mea sili ua auai e fa’amae’a lelei ma ua lagona le eseesega tele ua i ai le malosi.” O se tala lea a le Faipule o Amerika Samoa i le Konekeresi, Aumua Amata, sa aofia i le lenei au koleni.

Ae e le’I tapunia aloa’ia le ono vaiaso o toleniga ma faataunuu ai loa le latou fa’au’uga, sa faia ni fa’aaliga o siva e faatino ai a latou toleniga sa faia I aso taitasi, I lea ono vaiaso.  Ma o le ‘au sa toniga I le lanu mumu sa manumalo I lea tauvaga.  Sa aofia ai foi ma ni tauvaga tau taaloga, lea sa fetogia’I ai le manumalo ae na ese le tumati’e fo’I o taumafaiga a le au lanu Uliuli.

I le mae’a ai o lenei fa’au’uga, ua toe aga’I atu foi seisi toleniga fou mo le isi ono vaiaso pe a mae’a le vaiaso o lumana’I nei, se’ia o’o lava I le Kerisimasi.

Ua masani fo’i i latou uma i faaupuga ma le mafuaaga e ala ai ona faigata ona lusi pauna ma fa’aitiitia ai le mamafa o le tino, le mamafa e le o mana’omia ina ia maua le mataala ma le malosi e fa’atino ai galuega ma faiva o galulue ai. 

“E tasi lava le mafuaga o lea fa’aletonu. O le mea’ai!” O se tala lea e fa’amanatu mai pea e William Spitzenberg, le pule o le SSY,  i taimi uma o koleniga.

MALAGA ATU SAMOA AIRWAYS INA IA TALOSAGA MO VISAS AMERIKA:

E to’avalu i latou ua malaga atu nei i Samoa ina ia talosagaina o latou Visa e malaga ai i Amerika mai le Ofisa o le Emepasa a le Iunaite Setete I Samoa.

Ma o i latou na o lo ua manatu o le a auai i le aumalaga o lo ua mae’a fa’aagaaga avanoa e malaga ai i le va’alele togipau mo e gasegase ma i latou e toe fo’i i o latou aiga i isi vaega uma o le Iunaite Setete o Amerika.

Ua faailoa mai fo’i e le Fa’atonu o le Matagaluega o le Soifua Maloloina, Motusa Tuileama Nua, “O le aumalaga lea, ua malaga i Samoa ina talosaga visas nei mo i latou ae a mae’a e toe fo’i mai i le isi aso e soso’o ai, ao le’i malaga le va’alele togipau lea ua fuafua e malaga ai i latou.”

“Peita’i, a taliu mai le aumalaga lea, e toe nofo va’ava’aia i latou uma se’ia oo i le taimi e malaga ai i latou i Hawaii.”

I Hawaii lava ia, ua fa’ailoa mai o so’o se tasi e malaga atu mai Amerika Samoa, e le o toe nofova’ava’aia i latou, aua ua mautinoa e e le DOH a Hawaii e leai se tasi ua maua i le COVID-19 i Amerika Samoa ma Samoa. Pau o lea, ia o atu ae ua mae’a fa’amaonia i o latou tui suesue o le Covid-19, e le’o maua i lea ma’i pipisi. Ma e le’i mae’a le tolu aso talu ona faia lea tui.

41 NOFOAGA UA TAPENA MO LE PALOTA – TOTOGIA E LE VAEGA TUPE CARES ACT:

Ua fa’alauiloa mai e le Ofisa o Palota a le tatou Malo, le lisi o nofoaga taitasi ua mae’a fa’atulaga e faia ai palota a le mamalu lautele, ina ia vave ona tuufaatasia palota uma mo le faitauga tonu mo faaiuga tonu o le Palotaga 2020 a le tatou Malo ia Novema 03, 2020.

O nei nofoaga ua masani ai fo’i le atunuu, ua matele ina fa’aaogaina ai Maota o Galuega a Ekalesia, poo maota o Aiga i tototnu o afio’aga eseese ua masani ona faia ai palota i tausaga palota eseese. O lenei tausaga ua mafai ona totogia nei nofoaga eseese ona o le tinoitupe sa toina mai le Covid-19 o le Cares Act, o se vaega tupe mo le Ofisa o Palota a Amerika Samoa.

Ua agavaa ona faaaoga lea tinoitupe mo le totogia o nofoaga nei ona o lo ua fa’amamaina ia le pipisi o le fa’ama’i o le coronavirus I le mamalu lautele.

O nisi o tagata palota mo le Manu’atele i le Itumalo #1, lea e aofia ai Fitiuta Tau ma Falesao; fa’apea ma le Itumalo #2 lea e aofia ai Ofu, Olosega ma Sili i le Manu’atele, ua mafai ona fa’aavanoa fo’i le Gov. Rex Lee Auditorium i Utulei mo latou palota pe afai o le a oo atu ia Novema 03, 2020 o iinei pea i latou i Tutuila, ae le o le Manu’atele.

Peita’i i le taimi nei, o lo’o fa’atautaia lava a’oa’oga mo i latou uma o le a galulue fa’atasi mo le fa’amaoniga, faitauga ma le fa’atautaiga ma le filemu o le palotaga, e aofia ai foi ma le vasega o Pulenuu o afio’aga ta’itasi mo le leoleoina o le Palotaga.

Ua faailoa mai e le susuga Uiagalelei Lealofi, “Ua sauni lava le tatou Ofisa o palota mo latou faiva i le aso atofaina mo le palotaga a le teritori o Amerika Samoa. Ua sologa lelei fo’i mea uma lava.”