Tala I Vaifanua

Pago Pago, AMERIKA SAMOA 

$4.6MILIONA TOINA MAI E LE MATAGALUEGA O LE INITERIA MO AMERIKA SAMOA:

Ua fa’ailoa mai e le faigamalo a Trump le fa’amatuu mai o se vaega tupe e $4,667,000 mo le malo o Amerika Samoa, tauala mai i le Matagaluega o le Initeria a le malo tele, e fa’atautaia ai galuega eseese mo le teritori.

O le vaevaega o le aotelega o le seleni ua fa’amatuu mai e le DOI::

·         Mo le Malo o Amerika Samoa ua toina mai ai le $2,530,000.

·         Mo le LBJ Tropical Medical Center e $1,750,000,

·         Kolisi Tuufa’atasi o Amerika Samoa e $300,000.

·         Vaega o Fa’amasinoga a le malo o Amerika Samoa $87,000.

Ina ua matuu mai lea vaega tupe ua fa’amauina ai le aotelega ua mafai ona pasia mai e le Konekeresi i le Malo o Amerika Samoa i le tausaga faaletupe 2020 ua maua mai ai le $23,665,000.

O le tinoitupe lea ua toina mai nei ua amatalia ai le aofai o le seleni ua tu’uina mai i le tausaga fa’aletupe 2021 mo le tatou malo

Ua faailoa mai fo’I e le sui fesoasoani a le Failautusi o le Initeria Douglas Domenech, “O le tiute fai o lenei Ofisa o le Initeria, o le mauaitnoa lea ua fa’auia vave atu so’o se vaega tupe e toina mai e le malo tele ua agava’a ai le tatou Malo fa’ateritori o Amerika Samoa, ina ia mautinoa lelei ua vave maua e fa’aaogaina e fa’aleleia ai le tautuaina o tagata lautele o le atunuu e le tatou Malo.”

“O polokalama sili ona fa’atauaina mo le soifua laulelei o le atunuu ua afua lea i le va’aia toto’a o le fa’aleleia o le tautua a falema’i, ona soso’o lea ma le fa’aleleia o le soifua aoaoina o fanau aua le lumanai o le atunuu, faasolo atu ai lea i a’oa’oga maualuluga i Kolisi ma aoga a le Malo ia fa’aleleia aua a’oa’oga lautele mo fanau talavou o le lumana’I o le atunuu ma le vaega o fa’amasinoga latou te fa’amalosia ona nonofo saogalemu le atunu’u.

”SAUNIA SEISI FAIGAMALAGA FAAPITOA MO GASEGASE I LE ASO FARAILE

Ua talia e Kovana Lolo M. Moliga le talosaga mai a le falema’i tele LBJ Medical Center, ina ia faia se isi malaga fa’apitoa a le Hawaiian Air mo le mamalu o le atunu'u ua mana’omia ona fa’ao’o atu i falema’i i fafo e fa’aauau ai latou togafitiga ma talavai.  O lenei faigamalaga, ua patino lava mo tagata o le atunu'u ua fia si'i gasegase atu i atunu'u i fafo ma o le a leai seisi e faimalaga mai mai atunu'u i fafo.

O lenei faigamalaga ua faatulagaina mo le Aso Faraile, Oketopa 23, 2020, ona ua i ai nisi o gasegase ua mana'omia ona fa’avave o'o atu mo togafitiga i falema’i i fafo, ona ua fai si umi ua le toe oo atu mo talavai masani i fafo, a’o le’i lutia le Iunaite Setete i le Covid-19 ma fa’asa ai ona femalaga’i le mamalu o le atunuu.

Ua iai le faamoemoe, o le a mafai ona maua se avanoa e faimalaga ai ma i latou o lo'o opea i totonu o le teritori ona o le taofiga o femalagaiga, i lenei faigamalaga, pe afai ae iai ni avanoa totoe mai i gasegase. O lenei fo'i faamanuiaga, o le a aofia ai ma sui o le Malo Tele, e aofia ai i latou i totonu o vaega'au faapea le aufaigaluega a le FEMA.

O i latou foi e pasia ona malaga i lea faigamalaga mo talavai ma togafitiga, o le a totogia latou pasese e le Medicaid ae o tagata faigaluega uma lava e malaga ai e le o nisi o malaga mo talavai, o le a i ai le latou pasese e totogia.

Ua fa’ailoa mai e pasia lelei foi ma iloiloina e le Medicaid le aupasese o le a malaga i lenei malaga togipau, ina ia mautinoa lelei ua usita’ia uma aiaiga o le pasese e malaga ai ma ua le sasi se mea ua fa’atulaga mo le aumalaga i o latou pepa mo talavai ma togafitiga fa’apea fo’i ma pasese lautele o le a malaga ai. .

O le aofaiga o e ua gasegase ua fa’atulaga e malaga i le malaga togipau lea ua tula’i mai i le 111 tagata. O lo ua fa’ataga ona malaga se tasi e tausimai faapitoa mo gasegase ua tatau ai, ae tatau ona atoa le 21 tausaga le matutua o nei tausima’i. O i latou na e tatau ona malosi le tino e fesoasoani i le tausiga ma le fesi’ita’iga o le sui o gasegase, ma o ia fo’i e tatau ona mafai ona faia faaiuga fa’aletulafono ma sainia pepa ma maliliega mo le gasegase ma ona togafitiga i fafo.

O fanau e le’i atoa tausaga e faia ai e i latou fa’aiuga mo latou togafitiga e ao ina i ai pepa ua mae’a tapena e fa’ailoa ai, ua mafai ona ave e se tasi e le o sona matua le tamaititi i fafo, ma sainia pepa mo togafitiga uma mo lea gasegase e malaga.

“Ia manino afai e i ai se tasi e te’ena mai lona malaga ona ua matauina e foma’i e a’afia ai nisi o le aumalaga i lou gasegase, ia outou silafia lelei, o le aumalaga lenei ua tigaina tele sui gasegase o malaga ai. E ao ina mautinoa o to’ai taunuu i latou i Honolulu ma falema’i o malaga e talavai ai, a’o tumau le malolosi. O le fa’aiuga lena e lafo atu I le vasega o foma’i latou te gafataulimaina mo le ‘au malaga", o se tasi lea o faamalamalamaga mai i le Vaega a le Medicaid.

TALOTALOGA FA’ATAUANAU A TAFUNA HIGH – TAOFIA LE ELEELE MO FANAU A'OGA:

E ui i le tetele o timuga, ae le’i taofia ai le fanau a’oga ma le Asosi a Matua ma Faia’oga, a le Aoga Maualuga a Tafuna, i lo latou laulaututu i le alatele ma latou fa’ailo ua mae’a tusia, ia fa’ailoa atu ai lo latou naunau ina ia taofia pea le laueleele pitoalalo o le latou Laumua, mo aoaoga a fanau.

“O lo matou leo ma manatu e ao ina amana’ia e le Faigamalo ma le Matagaluega o Aoga. E ao ina va’ai mamao i le lumana’i o le Laumua pito sili ona to’atele le fanau a’oga o lo’o a’o’oga ai. E tatau fo’i ona fausia nisi falea’oga aua e faateleina atili le aofai o fanau a’oga e gasolo mai i le Laumua o le Toa.” O le talatala mai lea a se tasi o matua o le PTA.

Na va’aia le i ai fa’atasi ma nisi o sui iloga o le  Malo i lea taumafaiga, e pei o le ali’i Faipule Larry Sanitoa, le peresetene o le PTA a Tafuna, William Spitzenberg ma le susuga Galu Satele, o se sui tauva mo le tofiga Lutena Kovana i le palotaga ia Novema 3, 2020.

Ua mae’a fo’i isi a latou taumafaiga na fa’aoo muamua I le faigamalo ma le matagaluega o a’oga, ae ua foliga mai e le o talileleia le latou mana’oga na fa’atagisia.

O nisi o fa’ailo sa maimoaina ua fa’alealea e le fanau mo le silasila a le atunuu na fegasoloa’i i le alatele i lea taeao e aofia ai “Toe fa’afo’i Laufanua o THS!” “Fa’asao le matou Lotoa, fa’asao mo le Lumana’i” “Tula’i mo Lou Laufanua!” “Taua Ola o le Fanau.”

“O le fa’amoemoe a’ia’i o lenei taumafaiga, ina ia amana’ia mai le matou taumafaiga e fa’asao lea vaega o le Laufanua o le a’oga maualuga i Tafuna, aua o lo ua tau fa’aofiofi lava le a’oga i le nofoaga ua si’itia atu nei i ai le JROTC, Vaega o Atisi ma Aoaoga Tau Matata Esese. Manatu i matou ua faia lea tulaga ina ia mafai ona toe fausia seisi falea’oga mo le fanau a’oga ma e mana’omia lava le laufanua sa i autafa o fale a’oga tuai ia e faia ai koleniga a le fanau o tau’avea le polokalama JROTC faapea fo’i mea e fai a le Atisi ma le Matata Eseese.” O se tala lea a se tasi o matua sa auai i lea fa’amoemoe.

Ua mae’a fo’i ona taua’aoina atu le pepa sa fa’asolo mo le sainia e le mamalu o le atunu'u e 3,000 i le afioga le Kovana Lolo M. Moliga mo sana faaiuga, pe na te talia le fanoga o le THS ma le latou PTA pe leai.

O nisi o fa’amaumauga ua mafai ona fa’ailoa atu i le Kovana e ala i lea tusi, ua fa’amanino atu ai le aofaiga o fanau a’oga ua i ai nei i le A’oga Maualuga a Tafuna ua silia ma le 1,100 ma e iloga mai e si’isi’i  lava lea faitauga i tausaga ta’itasi.

Ua talosagaina e le Laumua ma lana PTA, pe mafai ona fausia le Ofisa o le DOE i le nofoaga o lo’o i ai isi latou Ofisa i lea lava eleele e tuaoi lelei ma le a'oga, ae fa’aavanoa le eleele mo Tafuna e toe fausia ai se isi falea’oga mo alo ma fanau.