Tala I Vaifanua

Pago Pago, AMERIKA SAMOA - 

ASI LE PALOLO PO ASO LULU – TOE TA I LE PO ASO TOFI

Ina ua fesiligia le Matagaluega o le Gataifale, Faigafaiva ma le Vaomatua i se tala mai o le Palolo 2020 I lona ulua’I tataga, ae fa’ailoa mai, “O le vave ao o le aso Lulu na asi ai le Palolo, peita’i ua to’atele na fa’ailoa mai e vaivai lava e le malosi e vave liusuavaia, lea la ua toe fa’ailoa i tagata toe asi loa i le afiafi a nanei, aso Tofi lea, e taau ona malosi ai le tataga o le Palolo i lenei tausaga aua ua fuga fo’i le moso’oi ma le laga’ali o le vaomatua.”

Mai le Manu’atele, ua vala’au atu fo’i i aiga pe a mai le asiga o le Palolo i le motusa, afai o tetele alolofa mai i le mata’ai o le tatou falesefulu. Peita’i o le tala lava e tasi ma le fa’asea a le motusa ua aumai, “Soia le vave o Ie tai ae le’i tapena leleia mo le sau o le I’a, mea na e vaivai ai le tataga ma sola mamao ai le I’a i le gataifale loloto. Ua faailoa mai e le Motusa, o le I’a lava latou e faitau i le masina, o le vaveao o le aso Faraile e talafeagai ai.”

Ua fai pesega ma faigasiva i le matafaga e tatalia ai le I’a ma fa’afiafia ai fo’i le au ta palolo ia le matamoe ae mataala i le taimi e sau le I’a i le vaveao. O taimi fo’i nei e Masani ona avavaga ai ma nisi o le au ta palolo, e tusa ai ma tu ma aga i vaitau o le pogisa o Samoa. Pau lea o le vaitau, ua le mafai ona eseese ai le taimi e ta ai le palolo i Samoa ma Amerika Samoa. 

Ua asia sa’o lava i le aso Lulu iinei a’o le aso Tofi i Samoa. Ua fa’atulaga le toe tataga mulimuli e ao ina asia ia Novema 7 poo Novema 8, 2020.

PACIFIC ROOTS OPEN MIC – TALAVOU SAUNOA MAI, E I AI LOU AVANOA

Na leai se avanoa e toe fa’atau ai se pepa e ulufale ai se tasi i le fa’aaliga o taleni a le fanau talavou, i le koneset a le “Tagata Pasefika: Saumoa Mau e i ai lou Avanoa!!” O le taumafaiga lenei sa tuufa’atasia lea e Tamiano Gurr ma Tracy Porotesano.

 Fa’ailoa e Gurr, “O lenei fa’amoemoe ua tapena lelei e fai ma se auala e fa’ailoa mai ai e talavou o aiga pasefika, o latou lagona i  soo se mea o fia fa’ailoa mai ai o latou manatu. O se taumafaiga ina ia le toe omia i latou, aua e le mafai ona fa’ailoa mai o latou manatu, ona o le olaga e masani ai ona tausia ma soifua mai i latou i totonu o latou aiga, i le va ma matua.”

“Ua aoaoina i tatou ia ola faaaloalo i matua, e ala mai ai manuia o le olaga nei, ua le tatau ia i matou le fanau ona tali atu i se fa’atonuga, e tatau ona matou fa’alogo ma usita’I e faia le fa’atonuga. O le ala fo’i lea sa aoa’ia mai ai matou matua e latou matua, ua fa’apea fo’i ona mulimulita’ia mai ai le a’oa’iga o i matou.” 

“O le ala lea ua matele ina fa’aaogaina e matua i lenei vaitau e aoai ai le fanau mai le laiti se’ia oo ina matutua ua leai se avanoa lelei e fa’ailoa atu ai e fanau talavou o latou lagona I se mea o manatu ai. O nisi o le fanau, ua le mafai ona tautala atu, ua fefe i latou i le fasi ma le otegia. O nisi fanau ua le ama’ia e i latou fa’atonuga a matua, ua ese le va’aiga a le mamalu lautele o le atunuu ma aiga i lena ituaiga o talavou. Ua maka i latou o nisi e le aoga ua fa’amalaiaina.” 

E 16 avanoa sa faamautu mo e sa fia fa’ailoa atu latou lagona, e ala Ii e pese, o le fa’atino o le tauloto ma faailoa fo’i sau solo. Ua I ai nisi ua tapena ta’ito’atasi, o nisi ua ta’ito’alua, ae o nisi ua iloga ona o mai fa’atasi e fa’atino o latou lagona e ala i pese.

I solo sa fa’afofogaina, sa manino lelei ona fa’amatalaloto lea ituaiga o lagona.  Ua le mafaufau fa’alua nisi, i le mea o le a ia faia e matua tiga ai le Atua e o na le ola na foa’ina mai ina ia tatou ola ma fa’atino ai galuega lelei. Ua fa’atino tauloto e nisi ma ua iloga ona o’oo’o i le agaga le fa’atinoga ma upu ua fa’ailoa ai lagona. O nisi o fanau ua latou fa’ailoa nei manatu uma o ta’utinoga i o latou lagona ootia sa i ai.

O le aufaipese sili ona to’atele sa taumafai mo se fa’ailoga, le Pacific Vocals, na fa’amauiaina i latou na i le faailoga muamua e $1,000. O le fa’ailoga lona lua na sola lea ma  fanau a le aiga Sa Matagi mai Fagatogo, le ali’i talavou o Sipili ma Naomi Matagi. E $700 le la’ua fa’ailoga.

O e fa’ailoga lona tolu, e $500, na maua lea e Audrey Seva’aetasi sa ia fa’atinoa ai lana solo matua saunia lelei. Ua ia fa’amatalaloto le mamafatu o lagona o se tasi ua ootia tele, ma ua fesoua’ina o latou fa’alogoina i taimi uma, ua le mautonui mea poo se filifiliga e ao ina faia. 

O le fa’ailoga lona fa, e $300, na maua e Lusia Maiava, sa ia fa’atinoa fo’i lana solo. O le toe fa’ailoga na maua lea e le alii talavou o Tootooali’i Anoa’i e $100.

“Malo le tima’i, e le o faigofie ona va’aia ma fa’alogoina fanau talavou ua talatala mai fa’apea o latou lagona. Peita’i o mea o lo’o tutupu ma ua alia’i le i’uga ua fa’atino e le fanau talavou, o se mea e fa’anoanoa uma ai aiga. Ua tutupu i latou ma ua malolosi, ua fa’apea fo’i ona malolosi ai o latou loto, e le o toe laiti i latou, e fa’afiafia gofie ma fa’ate’a gofie o latou ita poo ni lagona ootia i o latou mafaufau.Peita’i e le’i lava le utaga loloto ia i latou e onosa’ia ai mea uma e tutupu mai ma a’afia ai le mafutaga vavalalata ma matua, ma tete’e ai o latou loto i se fautuaga, po’o se fa’atonuga e tuuina atu ia faia,” o se tala lea a se tasi o matua sa maimoaina lenei fa’atinoga.

“O le isi mea ua mautinoa nei, ua i ai mafutaga ua amatalia e fanau talavou, Ua fai uo tama ma teine, ua i ai mea e fe’ese’esea’i ai lagona, ua musu le tasi e onosa’i ma fa’amagalo, ae manatu ia motusia loa le faigauo. O le isi ua manatu e fa’aalia lona alofa ma le tele o lona alofa i lona pule i lona soifua, oka oka se sese o lena mea. Oo atu i le aiga ae oso mai le ote a le tama po’o le tina, ua leva na tuua le aoga ae le sau sa’o i le fale e fai fe’au Masani. O mea nei e le o iloa o lo’o pagatia fo’i le tamaititi mai le mafutaga ua motusia. Tele mea e mamafa i le mafaufau, oso ai ma le faia o le mea sili ona sese.”

O le talanoa mai lea a se isi o tama, ina ua fa’alogoina, o le ote a le tama na mafua ai ona fa’aluafesasi le fa’aiuga a se tasi o talavou ma ia pule ai i lona soifua.

O le Pacific Vocals fo’i sa latou lagia se pese e fa’ailoa mai ai o latou lagona, pe a tutupu fe’ese’eseaiga o taofi i le va o matua ma fanau, o lagona na e fa’alogoina e i latou ma ua tele le fefina’ai o nei lagona i o latou loto talavou ma le ma’ale’ale.

“O se fe’au ua aumaia ma ua matua lelei ona kiliva mai ua lagona lava e loto o e uma na fa’afofogaina, ua tatau ona tula’i mai matua ma i tatou uma ia fai so tatou sao, fa’alogo i le augani mai o fanau, so’o se tasi e matau ane ua va’aia ai lagona ootia, ia a’apa atu ma fai sou vaega e fa’asaoina mai ai i latou. Feoasoani e toe fa’anofo filemu lagona o talavou, ia fiafia e fa’alogo i a’oaiga lelei e fa’aolaina ai o latou agaga. Ia aloese lava i le tagofia o fuala’au fa’asaina ma vaila’au oona aua e unaia ai i latou e fa’ataunu’u fa’alagona sese ma oo ai le agaga i le malaia,” o se tala lea a le  faipule i le Konekeresi a le Malo Tele, Aumua Amata.