Tala I Vaifanua

Pago Pago, AMERIKA SAMOA - 

FA’AMAUMAU TUPE MAUA MA TUPE FA’AALU E FA’AO’O OFISA O PALOTA

O le toe timai fa’amanatu mai a le Ofisa o Palota I le vasega uma o i latou o loo tauva mo tofiga uma o itumalo ta’itasi, le tofi faipule mo le Konekeresi, le tofiga Kovana ma le Lutena Kovana o le tatou Malo, e ao ina mataituina a outou tupe maua e fa’aaogaina mo la outou taumafaiga I nei tofi, tupe maua ma tupe fa’aalu mo le fa’amoemoe. O lipoti nei ua mae’a fa’atulafonoina lea I le tusi Tulafono e fa’atautaia ai le Malo fa’ateritori o Amerika Samoa – Tulafono mo Palotaga – Title 6 Chapter 17 – e fa’aulu uma nei lipoti mo le silafia o suesuega ma fa’amaumauga fo’i a le Ofisa o Palota e fa’amautu ai le Lipoti o Tupe Fa’aalu mo Fa’alauiloaga o Tofiga i le atunuu 2020. E fa lelei lipoti nei e fa’amautuina e le Ofisa o Palota e aoga I ai nei fa’amaumauga Lipoti o Tupe Fa’aalu, Lipoti Muamua e le’i tamau; Lipoti Fa’amau ua Mautu; Lipoti Fa’aopoopo.

Ua maea ona taua’aoina uma tusi taulima mo so’o se sui tauva mai le Ofisa o Palota a le tatou malo mo le palota 2020. E ese mai lea ua mae’a taua’ao fa’atasi atu ai ma isi pepa e faila fa’atasi mai ai.

O lo ua toe fa’amanatu atu la mea nei e ao ina faila mai e sui tauva ta’itasi, Tupe Fa’aalu i lau Kemupeni; E tolu au Organization Reports: Lipoti muamua lea e faia ia Setema 1, 2020, ae le’i taina le 4:30 I lea lava aso, ma e tatau ona oo ia Setema 18, 2020 ua mae’a faila mai le lipoti lona lua lea.

Lipoti lona lua o le e ao ina faila mai a’o loma le 45 aso oo i le aso fa’atulaga o le Palota 2020. Lipoti mulimuli e ao ina faila mai a’o le’I mae’a le 10 aso talu ona uma le palotaga 2020. Manatua o tatou faiva uma ia faia ma le tonu ia usita’ia fo’i aiaiga uma o le Tulafono tau palotaga a le tatou Malo.

TALOSAGA FALEMA’I MALAGA VA’ALELE – FA’AIUGA I LE KOVANA SILI

Ua oo atu le talosaga a le Falema’i Tele i Faga’alu i le fa’atonu o le Medicaid Program Sandra King Young ina ia faia se isi malaga mo le vasega o tagata ua tatau lava ona togafitia i falema’i i fafo, e uia ai Hawaii. O lo ua sailiilia fo’i e le tamaitai fa’atonu poo a mail ana paketi fa’asoa mo lenei vaitau o le tausaga faaletupe pe o a mai mo lea fa’amoemoe ua laga mai e le LBJ Med Center.

Ua fa’ailoa mai e King-Young, “O lo ua iloga le toatele na’ua o i latou o mana’omia ona malaga i fafo mo a latou talavai fa’aauau, ma ua fa’atupula’ia lea faitau aofai, aua ua umi o tapunia pea tatou femalaga’iga ona o le Covid-19. 

E ui o lea tulaga, ae ua fa’ailoa fo’I e King-Young, “O le ioega lava ia mo le fa’ataunu’u pe leai o se malaga lea e avea ai i latou i fafo mo talavai, e tuu atu lava i le fa’aiuga a Kovana Lolo Moliga.”

Ina ua toe fesiligis i le tulaga o le aumaia ai o nisi Iea va’alele e ave ai i fafo gasegase mo talavai, ae fa’ailoa mai fo’i e Sandra Young, “O le matafaioi a le Medicaid Office o le tapena o le aumalaga e masii atu i fafo mo talavai, ae o le aumalaga e sau ma le va’alele lava lea, e le oo la i ai se matou fa’aiuga. O le pitola’au tausi lava lea a le Kovana sili o Amerika Samoa.”

E na’o le tasi lava le malaga faapenei sa faia muamua talu mai ona taofia femalaga’iga ia Mati 2020. I lena malaga na sau lava e va’alele a le Hawaiian Air e leai ma se pasese ua na’o le Cargo na fa’auia mai ai. O lea foi la ua toe afuafua le isi malaga e le Medicaid, ae tuu pea i le Kovana le fa’aiuga lea, pe aumai nisi pe leai. 

PASIA MAI E LE USEPA LE FA’ATUPEGA MO LE ASEPA

Ua fa’ailoa mai e le tatou faipule i le Konekeresi a le Malo Tele, Aumua Amata o lo’o ua mae’a nei ona fa’aoo mai le tala fiafia i le tatou matagaluega o le ASEPA, ua maua fo’I se isi vaega tupe e mafai ona latou fa’aaogaina i o latou faiva e $436,368.

O le vaega tupe lea e Masani ona fa’auia mai i le ASEPA e fa’aigoaina o le Consolidated Environmental Management Program.

E aoga lea e fa’aaogaina e fa’aleleia atili ai le suavai taumafa ma isi fo’ galuega suesue o le suavai mamama le saogalemu i matafaga, le fa’aleleia atili o fa’atanoa vai, fa’aleleia o auvai ma tafega o vai i vaitau timuga, puipuigamalu o le fa’aaogaina o vaila’au e fa’apepe ai manu fa’alafua, ae maise lava o le fa’atautaiga a’oa’oga ma tima’iga lautele i nei mea uma. Ua aofia ai fo’i ma le fa’amautinoaina ua mama le ea o manavaina e le lautele.

O le vaega tupe lea o se vaega ua fa’amatuu mai le aotelega o le tinoitupe e $12,682,100 lea ua fa’atulaga mo le ASEPA o se latou paketi fa’asoa mai le tausaga e 2019-2023.

Ia iuni 01, 2020 na fa’afetaia ai fo’i e le tatou faipule i le Konekeresi le toina mai o le $1,976,100. mo le va’aiga atoa uma fo’i o nei polokalama uma a le ASEPA, peita’i o lea foi ua toe to’ia fo’i le laulau a le ASEPA i le toe masina o lenei tausaga fa’aletupe.

“Fa’amalo atu i le susuga le Fa’atonu  Fa’amao Asalele ona o le mata’alia i faiva e fa’atino ina ia mautu mai pea fa’atupega mo matata fa’atino uma a le tatou Matagaluega o lo’o mataituina le saogalemu ma le lelei o le tatou Siomaga i lona aotelega, Eleele Sami ma le Ea.O fa’atupega nei a le malo tele, e ao lava ina mataituina, ia mautinoa ua tatou aeae manuia e mafai ona fa’aleleia atili ai le tatou siomaga, le suavai manino mama e taumafa ma le eleele ma lona sosia mo mea toto a le atunuu, ae maise o le Ea ia mama mo le manavaina e o tatou tagata. O le Sami fo’i ia le fa’apunafanau ai lapisi e tele ina ia lelei le ola o I’a, figota ma mea uma o i ai aua le tatou fofoga taumafa o le atunuu fa’apea le Kamupani I’a ua avea ma to’omaga o le tatou malo i le tamaoaiga tausi o aiga.”

“O se poloketi sili ona taua, o le fa’atupega lea mo le suavai taumafa mama o ta’ia atu I maota ma laoa o aiga ta’itasi, ia fa’atumauina le mama ma ia saogalemu le soifua maloloina o tagata uma o le atunuu.” O se toe fa’amalo lea a Aumua Amata I lea matagaluega ama lona fa’auluuluga.