Tala I Vaifanua

Pago Pago, AMERIKA SAMOA

MAUA FA’AILOGA SMSGT JACINTA MIGO BUCKHALTER – FLORIDA

Ua faailoa e le Command Control Battle Management le latou fa’ailoga fa’apitoa fa’aletausaga ua mauaina e le tamaitai Amerika Samoa o Jacinta Migo Buckhalter mai Nuuuli ma Hurlburt, Florida.

O le fa’ailoga nei na mafai ona maua e lenei tamaitai lo’o fa’aauau lava lana tautua i le US Air Force, ma na taua’aoina lea ia Aukuso 7, 2020 ina ua mae’a le su’ega na fa’atautaia e le 505th Command & Control Wing i le nofoaga fa’apitoa a le Vaega Au i Hurlburt, Florida. O le fa’ailoga lea ua fa’alauiloa o le MAJCOM.

I se saunoaga a le ali’i ta’ita’i o le pule i le vaega o lo’o galue ai Jacinta Migo, Colonel Richard Dickens o le 505th Command & Control Wings saia fa’ailoa ai lona fiafia tele ua malo ane se tasi o lana vaega i lenei fa’ailoga.

“E pau la’u tala e fa’ailoa atu, o le fa’amalo ma le agaga fiafia ona ua maua le fa’ailoga MAJCOM e se tasi o lo’o i la’u va’ava’aiga. Peita’i, sa ou talitonu lava e o Jacinta o se tasi e galuega malosi ma o se tasi e faigaluega fa’amaoni ma maumaua’i i ona tiute faatino.”

O le galuega ua tuutoina i ai le tautua a lenei alo o le atunuu, o le matau ma va’ava’aia toto’a le saogalemu o vaega ‘au a le malo tele ina ia saogalemu i latou i taimi o taua.

“O Jacinta o se NCO e matua iloga lona agava’a o se taitai o lana vaega e le ma e naunau I le galuega ae le tele ni upu e tautala ai. Ou te le o te’i ina ua maua e ia le fa’ailoga lenei,” o se isi lea tala Colonel Dickens.

O le vaega a le Command & Control po’o le C2 Battle Management Operations o i latou nei latou te va’aia toto’a masini va’ai mamao o lo’o mataituina le itulaga o lo’o ua fa’atulaga e ono sofa’i mai ai le saogalemu o le Iunaite Setete e nisi malo o lo’o fete’ena’i ma Amerika.

O Jacinta Migo Buckhalter, na fa’au’u mai le Fa’asao high School i le tausaga 1988. Ua atoa le 21 ai lenei o tausaga o lana auaunaga i le USAir Force. O ia o se alo tamaitai o le susuga Leo Migo ma Fa’atamali’I Vaiuli Seui – Migo o Nuuuli.

VASEGA CARE GIVERS - TAOA POLOKALAMA AUFA’ATASI MA LE ASCC

O le polokalama na talosagaina e le Matagaluega o le TAOA, ua fa’atulaga ina ia a’oa’oina ai nisi i le Kolisi Tuufa’atasi a Amerika Samoa (ASCC) ina ia agava’a e tausia lelei matua matutua o lo’o aofia i le polokalama a le TAOA. Ua fa’aiu manuia nei le ulua’i vasega sa a’otauina ai le to’a 13 mai le amataga o le vasega sa fa’atautaia mo le 10 vaiaso.

O aoaoga ua aofia ai le a’oa’oga i potu aoga e tusitusia, ae maise o le tele o ituaiga aoaoga e tausia fa’apitoa ai tagata matutua i tua i latou aiga, poo nofoaga fo’I ua tausia fa’apitoa ai i latou.

“Ua a’otauina i latou uma nei ina ia mautinoa ia latou fa’amasani i nai matua matutua, ia le fa’amaina i latou a’o tausia e i latou Aputiputi lelei lagona o i latou ina ne’i ootia, aua e le fiafia ai i latou i lau tausiga, tusa lava poo le a le lelei o lau taumafaiga ia fa’amama avega i o latou tiga o le avea ma tagata matua poo ni vaega fo’I o latou tino atoa ua tiga,” o se tala lea a se tasi o tamaitai faia’oga Fenumia’i Iosia, o lea Kosi i le ASCC.

I le sauniga na fa’atautaia i le afiafi o le aso Faraile na te’a nei ina ia tufatufaina ai tusi pasi ma fa’ailoga fa’apitoa mo lea vasega, sa na’o le vasega lava na fa’ai’uina latou aoaoga fa’apitoa, ma ni sui o le Pulega o le Kolisi Tuufa’atasi, ma faia’oga loa sa fa’atuataia le vasega lea mo le TAOA ma le Kolisi.

Na amata lava le faamoemoe i le sauniga lot una tapena iai le tamaitai o Elisapeta Fa’alafi Jones, o se tasi o tamaitai a’oga na tau’avea lea kosi mo le 10 vaiaso. Ona soso’o loa lea ma le fa’afetai a le tamaitai Fa’auluulu i ai le aoaoga fa’atausima’i i le Kolisi, Lele Ah Mu, o ia fo’i lea o lo’o fa’amatuu i ai lea polokalama ia a’oa’oina lelei ai nisi o le atunuu.

Ina ua taua’aoina tusi pasi sa iloga fo’i o lo ua i ai nisi o le vasega lenei, ua manatu ina ia fa’aauau latou a’oaoga fa’apitoa i kosi fa’atausima’i i le vasega a le CNA. Mai le amataga e to’a 13 i latou na auai, peita’i ua fa’ai’u ane nei, ua toe 10 i latou ua fa’amauina o latou agava’a i lea fo’i matata aoga, e tausia faapitoa matua matutua.

O le fa’ailoga faapitoa lea sa taua’aoina, na fa’apito augafa lea i le tamaitai o Ilisapeci Marama, o lo ua  mae’a fa’amautu lana fa’ai’uga e soloa’i atu ana taumafaiga ina ia tauavea kosi fa’atausima’i i le Kolisi lava i le amataga o le tausaga a’oga fou.

O i latou na aoaoina lea vasega mai le amataga se’ia oo i lona fa’aiuga e aofia ai le to’atolu o faia’oga a le Itu o Aoga Fa’atausima’i a le ASCC.

O le to’a 10 ua maua tusi pasi: Elisapeta Fa’alafi Jones, Amuula Gase, Glory Princess Leupolu, Salvation Leupolu, Ilisapeci Marama, Bandora Polito, Maria Sunia, Anuilagi Tatupu, Isaac Taulealo ma Mareta Fa’atu’uala.

Ua taua’aoina fo’i ma latou card e fa’ailoa ai, ua mae’a pasia e i latou kosi e toe fa’aola mai ai nisi ua matapogia po’o le CPR i latou tufatufaga fo’i o tusi pasi.

O le isis vaega fa’auaua ia Setema 14 ma e na’o le 15 lava le fanau a’oga ua mana’omia mo lenei vasega, ma ua fa’ailoa mai e Ah Mu, “E fuafua toto’a lava i le aotelega o fanau a’oga e mafai ona aoaoina i potu aoga ma mea ua mae’a fa’atulaga e faia ai a’oga fa’apitoa i le tausiga fa’apitoa o tagata matutua i aiga po’o nofoaga o fa’amautu i ai i latou.”

“O le aoaoga lenei ua fa’atino lea i le tiinoitupe na talosagaina e le TAOA ma ua i ai lona vaega lea e tatau ona aoa’oina lelei ai nisi i tomai faapitoa e tausia lelei ai matua matutua i tua i aiga ma nofoaga ua fa’amautu i ai i latou. Peita’i o le fa’afetai e ao ina fa’auia fo’i i le tamaitai fa’atonu o Evelyn Satele ona o lea fo’I fesoasoani e fa’alautele ai tomai o fanau o tausia matua matutua i tua i aiga. O I latou tonu na e mafai ona ulufale mai e tau’avea nei vasega. Sa asia fo’i e le tamaitai Fa’atonu o le TAOA le vasega i lona toe aso, ma sa ia tu’ufesili fo’i i talavou ua maua nei o latou tusi pasi i so latou iloa ua mautu ona o lenei taumafaiga,” o se tala fiafia lea a Ah Mu.