Tala I Vaifanua

Pago Pago, AMERIKA SAMOA

FA’ATAUTAIA SSY GYMNASTICS FANAUITI 3 - 8 TAUSAGA

E le o nofonofo le vaega fa’amalositino a le Slim Stronger You i le latou fa’atautaia o se polokalama Ta’alo Tatafiti a le fanauiti ina ia mautinoa o lo’o fa’amalositino i latou i nei vaitau ua umi fo’i o tu’ua le a’oga.

O lo’o faia lenei polokalama matagofie mo le fanauiti i le latou faleta’alo ua i ai i autafa ane o le CSL i Tafuna.

O le polokalama lenei sa fa’afoe mo le 4 vaiaso se’ia oo mai i le toe aso ananafi, Iulai 30, 2020.

O le tamaitai faia’oga mo lea fa’amalositino a le fanau o June Maeva ma o se fiafiaga ia June o le agaga o le fanau e fa’ataunuu latou lesona ma fa’amalositino i aso ta’itasi.

“E ta’i tolu itula o le o le aso e faia ai matou fa’amalositino. A maea le itula ma fa’amalolo i latou ma toe fa’atautaia fo’i se’ia ma’ea matou fa’amalositino e tolu ta’i itula, ona fa’ato’a ta’ape fo’i lea o i matou se’ia oo i le aso e soso’o ai.” O se tala lea a le tamaitai o June Maeva.

O le tamaitai fa’atonu o le Slim Strong You, Sisi Loi-On Spitzenberg, e i ai fa’atasi i la’ua ma June Maeva e faatino nei ta’aloga a le fanauiti, ma ua fa’ailoa e ia, “O lenei polokalama ua fa’atino ina ia mafai ona fesoasoani lava i le fanauiti ia le so’ona puputa i latou ma fa’asolo atu ina maua i auga o ma’i fatu e pei ona taumafai nei le tatou matagaluega o le soifua maloloina e soloia mai le soifua o fanauiti. O le polokalama lava fo’i e tasi e taumafai ona fa’atino mo le vasega o tagata matutua ua so’ona mamafa o latou tino ma ua mafua ai ona a’afia i gasegase tuga o lo’o faigata lava ona soloia i lenei vaitau.”

$125,000 SUESUEGA FAASAEANISI TAU LE SOIFUA MALOLOINA

Ua fa’ailoa mai fo’i e le tatou Faipule i le Konekeresi Tali Aumua Amata ua mae’a maua fo’i e le Matagaluega o le Soifua Maloloina a le tatou Malo le tinoitupe e $125,000 ina ia fa’atautaia ai se suesuega fa’apitoa fa’asaeanisi tau le soifua maloloina o le atunuu.

O lea alagatupe ua toina mai le USDOH ma e fa’auia mai i le CDC ina ia mataituina fo’i ala uma e mafai ona puipuia ai le atunuu mai le tele o a’afiaga o le soifua maloloina e ala mai fa’ama’i eseese.

O le tinoitupe lea ua fa’amatuu mai le CDC/NCCDPH pe faia ai suesuega mautu o le afuaga o le maua o tagata o le tatou atunuu i fa’ama’i tau le fatu, lea ua va’aia ua aga’i pea i luga le aofai o tagata o le atou atunuu o lo’o ua aga’i ina maua ai, pe ua maua ai fo’i.

Ua fa’atulaga nei alagatupe ina ia fa’aaogaina tatau e fa’ailo ai  suesuega tau le American Samoa Behavioral Risk Factor Surveillance System [BRFSS] ma sa fa’aulu le talosaga mo lea fa’atupega e le ASDOH. O le suesuega lea e fa’asaeanisi ma e aofia ai ma suesuega ma talanoaga e faia i ala o feso’ota’iga tau telefoni.

“Ua fa’afetaia nei le tamaitai sui fa’atonu o Farah Utu ma le ali’i fa’atonu Motusa Tuileama Nua, ona o le mata’alia ma sogasoga ua mafai ai ona toina mai lenei  tinoitupe mo lea suesuega aoga tele i uiga ma aga e va’aia ia i latou ua atagia ma ua maua fo’i i gasegase nei. Ua fa’apea fo’i ona fa’afetaia le CDC mo lea fa’atupega ua toina mai mo le tatou matagaluega o le soifua maloloina.”

MALAGA ESE ATU DR LEDUA - TOE TALIU MAI

Ona o le fa’amavaega tele na alo i ai le pulega ma le falema’i ma le latou foma’i ua atoa le 18 tausaga o tautua i Amerika Samoa, sa manatu ai le to’atele o le atunuu ua tu’ua motu e Dr Ledua le atunuu, ma o le a le toe taliu mai i fanua.

Peita’i e tusa ai o le saunoaga aloaia a le ali’i foma’i, ua fa’amautuina fo’i e le pulega o le Potu o Talavai mo Gasegase Tau Ponaivi, o lea ua mautinoa ai, e toe taliu mai o ia i se taimi e toe tatala ai avanoa mo femalaga’iga.

O le afuaga o le malaga ese atu o ia, ina ia avea ma se foma’i e malaga fa’atasi ma le vasega o gasegase sa auina atu i fafo mo a latou talavai ma togafitiga i Hawaii ma isi lava setete o le Malo tele lea na fa’ataunuu ia Iulai 21, 2020. Ma le isi, e asiasi fo’i o ia i le setete o Alaska, ona o lo ua galue ai nei lona faletua i lena setete ma fa’amautu ai lana fanau.

“O Amerika Samoa ua pei lava o le matou nuu moni ia te a’u ma le aiga, aua ua i ai se ma’ua atali’i na soifua a’e i Amerika Samoa talu mai ona galulue iinei, ua fa’apena fo’i ona a’oa’oina uma ai le fanau. Ua le ta’u esea ai Amerika Samoa ia i matou, ua loa fo’i o galulue ma ua masani lelei i uiga tausa’afia ma le agaga moni o tatou tagata Samoa. O se fiafiaga lea ia i matou, e le avea le matou agaga o Amerika Samoa lava e toe fa’amautu mai i ai.”

E tele tofiga sa galue ai Dr Ledua a’o tautua i le LBJ Medical Center: Sa avea o ia o CMO Chief Medical, Pule o Foma’i Galulue, Sui Pule o Foma’i, Sui Pule o tagata faigaluega ma e tu’ua nei e ia le galuega i Faga’alu o loo avea ma Pule o Foma’i o Ponaivi po’o le Orthopedics o le tatou falemai tele i Faga’alu.

O se tasi o ana galuega mata’ina i le tatou falema’i, ona o ia sa lalamua i le taumafaiga e fa’atulaga se fonotaga tau togafitiga o gasegase i le tausaga 2013. Peita’i ona ona ua masii atu le tina ma le fanau i Anchorage Alaska, ua maua ai fo’i le galuega a le tina e avea ma Tausima’i Fa’apitoa mo le ICU, o lea ua malaga asiasi ai le ali’i foma’i, ma ua le mailoa se aso e toe taliu mai ai, ona o le tulaga o feoaiga i le taimi nei. Ua galue nei le tina i le falema’i Fairbanks Memorial Hospital i lea setete.

Ao le’i malaga ese atu, o lo’o tumau pea le fuafuaga a le ali’i foma’i ina ia toe taliu mai e fa’amae’a lelei lana auaunaga i Amerika Samoa, e le o mautinoa fo’i nisi ana fuafuaga aua e le’i oo atu i le tina ma le fanau.

I nisi o ana tautua i le atunuu, ua mataina ai lona tula’i mai o se A’oa’o Fesoasoani i le Ekaelsia Fiti ua fa’atuina i Ottoville, Community Christian Church, ma ua tele fo’i sona taimi ua fa’aaogaina mo lana tautua i le Atua e ala atu i lea ekalesia mai lona amataga mai. O lo’o avea fo’i o ia o le teutupe a lea ekalesia.

E ese mai lea, o se tasi e lelei tele i lona faiva i le fa’agatama o le Lakapi, ma ua tele taimi e fesoasoani ai o ia e a’oa’oina lea ta’aloga i le tatou nei malo, ma tu’ufa’atasia fo’i le ‘au sa masani ona maimoaina e le atunuu ua i ai nisi o ali’i mai Fiti o lo’o ta’a’alo ai.

“Pe matou te o ese atu ma Amerika Samoa, ae ua mautu i o matou agaga, o Amerika Samoa le matou nuu, e sisi pea le fa’amalama ma matau mai po’o le a se mea e mafai ona auauna mai ai mo Amerika Samoa, aua ua masani ma iloga fo’i ona mautu i le agaga, sa talisapaia ma le fiafia i matou i le oo mai ma galulue iinei,” o sana toe fa’amatalaga lea.