Tala I Vaifanua

tusia: Leua Aiono Frost

FA’AAUAU LE FA’ATAUA DOH TOBACCO DIABETES - TAOFIA LE ULAULA:

Talu mai Me 31, 2020 ma le fa’asa fo’i o le fa’ama’i pipisi, na tolopoina ai le fa’ataunuuina o le fa’ataua a le vaega a le DOH Tobacco Diabetes o le aso e autasi i ai tima’iga ma le fa’asa o le Ulaula Tapa’a ma isi mea uma i le Iunaite Setete ma le Lalolagi atoa.

O lea fa’amoemoe ua mafai ona fa’ataunuuina i le aso Faraile na te’a nei, ma sa amata mai lava le fa’amanatuina o lea aso fa’apitoa,  i le talotaloga na faia mai le 6:00 i le taeao po, se’ia oo i le taimi ua mae’a ai latou ta’aloga na fa’atasia uma i ai le mamalu o le matagaluega o le Soifua Maloloina, ia i latou na malolo e le’i tiute, e fai ma sui o latou vaega ta’itasi i lea fa’atasiga taua.

I le fa’amoemoe sa fa’atautaia ua toe auaufa’atasi ai vaega ta’itasi o le Matagaluega o le Soifua Maloloina ae maise i o latou fa’auluuluga, e oo lava i foma’i tiute, ae ua fa’aavanoa lava sina taimi e oo ane ai e sapaia le fa’amoemoe o lea fo’i vaega o tautua mo le lautele a le Matagaluega.

Ua avea fo’i le aso na fa’amanatuina e avea o se malologa itiiti mo le vasega o le aufaigaluega atoa sa auai a le DOH, ua fai ai ta’aloga ma ina ua mae’a vaevaeina i latou i vaega e tolu e fa’atautaia ai. O ta’aloga sa faatautaia o pasiga polo e fa’aaoga ai ie e avea ma neti ma e ta’ito’alua i paga e u’u le ie ma fepasia’i ai le polo mai le isi paga i le tasi o soso’o mai.

O le ta’aloga na soso’o ai o le ta’aloga o nofoa e ta le pese ae su’e sou nofoa. O le faiga fou na iloga mai e su’e muamua se mea e te sau ma oe fa’ato’a e nofo ai i le nofoa pe a pe le pese.

O ala fo’i ia ua latou fa’ailoa i le mamalu lautele e ao ina faia i aso uma, e fa’aafu ai le tino ma le vave ai ona maua i ma’i, o le ta’alo, faia galuega i fa’ato’aga ma ia savavali, e le faigofie ai ona po’ia i gasegase.

O le ta’aloga mulimuli na fa’atino o le Volleyball ma le Faase’e, o ta’aloga sa o mai fa’atasi ma isi tautua sa fa’aaogaina i le aso lea mai le Sky View i Aua.

I le Volleyball o se ta’aloga na iloga ai ona fiafia le vasega o i latou uma sa auai ma e ui ina uma le taimi na fa’atulaga mo ta’aloga, ae ua fa’aauau lava ona faia ta’aloga i le la i lea aso, aua ua masani ai talavou o le atunuu i le ta’a’alo i lea fa’agatama.

O fa’ailoga ma meaalofa uma na tapena e le DOH Tobacco Diabetes mo le fa’amoemoe na fa’afiafiaina atili ai uma i latou na auai, mai ta’ita’i seia oo i le vasega o le aufaigaluega a le DOH i ona lala eseese. Sa auai fo’i nisi sa avanoa maI le vasega o le aufaigaluega e tiute i le Malaevaalele, le vaega i luga o le Uafu ma luga o va’a e taula mai, le aufaigaluega i talavai eseese i falema’i fa’aitumalo, ae maise fo’i o isi vaega uma o le matagaluega.

Na fa’atasi atu le Fa’atonu Motusa Tuileama Nua, ina ia avatu se upu fa’amalo ma fa’amalosia atili lana aufaigaluega, e tapena ai mo faiva eseese a’o i o latou a’ao le soifua maloloina o le atunuu.

“Fa’afetai i le tou auai mai, e ui fo’i ina tele tiute o lo’o feagai ma i tatou, ae ua le galo ai ia i tatou le mau, ia tatou galulue fa’atasi e fa’atino tiute aua le puipuiga malu o le atunuu lautele.”

“O lenei aso ua tatou maua ai sina avanoa tatou te fiafia fa’atasi ai. Ua tau le maua lea tulaga i faiga fa’apenei i lenei vaitau, aua o lo’o aga atu i tatou ma tiute taua e puipuia le saogalemu o le mamalu lautele mai fa’ama’i pipisi. Fa’afetai mo outou loto ma agaga i tiute, ae aua ne’i galo, ia faia galuega uma ma le fiafia.”

Sa fa’afetaia fo’i e Nua le DOH Tobacco Diabetes i le tamaita’i fa’atonu se’ia o’o foi i lana aufaigaluega ma le Komiti Fa’afoe Tofia, lea fo’i ua fa’auluulu le fa’afoega a’ia’i o lea vaega a le DOH i le sui fa’atonu, Farah Malaepule Utu.

O galuega o lo ua soso’o mai nei a le DOH Tobacco e aofia ai le fa’atautaia o feutaga’iga ma le mamalu lautele i Aunuu, soso’o ai ma le latou Fa’aaliga Tele, e fa’aalia ai fa’aeleeleaga a le mamalu o faifa’ato’aga fuala’au ‘aina ma Faigafaiva a le Aufaifaiva e fa’atino lea i le aso Faraile a sau nei, pe a tusa ai ma le tau.

O a’oga e amata mai i le aso Lua a sau nei, ae fa’ato’a fa’amae’a i le aso Tofi i Aunuu lava. Ona fa’ato’a faia ai lea o le faaaliga a le aufaifa’ato’aga ma le aufaifaiva i le aso Faraile e pei ona tapena ai fo’i fa’ailoga matagofie  le DOH Tobacco Diabetes mo lea fa’amoemoe.

O le fonotaga a le Komkti Fa’afoe e faia lea i le aso 21 o Aukuso, 2020 a’o le’i malaga i latou i Ofu ma Olosega o le tele fo’i o latou Aoaoga e fa’atautaia i le latou lea lala mo aso e tolu. O nei fa’amoemoega uma sa tolopoina fo’i ona o le tetele o matagi malolosi sa aafia ai le teritori mai le masina o Fepuari 2020, ma ua oo mai lava ina faatautaia le fa’asa o le Coronavirus, ua atili ai ona faigata fo’i ona fa’aauau lea fa’amoemoe, peita’i o le a le taofia lava lea tulaga, e fa’ataunuuina lava.

MAUA LE FA’ATUPEGA MO LE - POLOKALAMA DIAL A RIDE:

Ua fa’ailoa mai e le Matagaluega o Galuega Lautele a le atunuu, ua toe maua mai se tinoitupe na toina mai e fa’aauau ai le polokalama o le “Dia A Ride” aua ua matauina, ua matua aoga tele lea tautua mo le mamalu lautele o tagata matutua ma e mama’i ina ia fa’ao’o latou i a latou talavai ma toe fa’afo’i i aiga.

O le tinoitupe ua maua nei mo lea polokalama ua toina mai le CARES Act, ma o le aofai e $1,1miliona mai le Federal Transit Administration, o se vaega o le USDOT.

Ua mae’a fa’ailoa mai e le FTA i le tatou Faipule i le Konekeresi Tali Aumua Amata, ua faamautu mai nei lea fa’atupega i le matagaluega o galuega lautele ina ia latou fa’aaogaina mo le Polokalama o le “Dial a Ride.” O le aofaiga sa’o lava o le seleni. mo lea fa’amoemoe e $1,105,059.00.

O le fa’aaogaina tatau o lea vaega tupe e fa’aleleia ai ta’avale o mo feoa’iga tatau ua mae’a faia e le polokalama mo le mamalu o le atunuu, utu ai le kesi ma toe fa’atau ai mea faigaluega e puipuia ai le aufaigaluega galulue,  ma ia mautinoa lava o lo’o fa’aauau lenei polokalama aoga mo le fela’ua’iga o gasegase ae maise i taimi o lo’o a fa’atautaia ai galuega fa’aola mo e maua i le covid-19, fa’atasi ai ma i latou e nofoia nofoaga fa’apitoa mo suesuega masalomia o le Coronavirus.

Ua fa’amalo atu fo’i le tatou Sui i le Konekeresii le tamaitai o Fiatuiga Faoa Danielson, le fa’atonu o lea polokalama fa’apea ma le fa’atonu o galuega lautele a le malo, Faleosina Faiai Voigt, ona ua mafai ona talileleia mai le fa’atupega sa talosagaina ma le fa’amoemoe e fa’aauau ai lenei tautua aoga mo le lautele.