Tala I Vaifanua

Pago Pago, AMERIKA SAMOA

TAUA’AO EDA $1.5M TOE FA’ALELEI  LE MEA TOSO VA’A I SATALA

Fa’ailoa e le Failautusi o Fefa’ataua’iga a le Malo Tele, Wilbur Ross le ua fa’amatu’u maia le $1.5miliona mo le toe fa’aleleia o le masini o lo’o ua leaga ma ua taofia ai pea le toe fa’aaogaina o galuega a le tatou Mea Toso Va’a i Satala.

Ua le gata i lea ae ua fa’atulaga fo’i e mafai ona fa’atauina ai mea faigaluega uma e agava’a ai lea vaega o le tautua aoga i le malo o Amerika Samoa ina ia fa’aauau ma maua ai fo’i le tamaoaiga tausi o le tatou malo.

O mea faigaluega e ao ina fa’atauina mo lea tautua, e tatau ai ona si’itia le tautua i le isi la’asaga fou, ua aluga lelei ma lea matata e tautuaina ai va’a folau i le sami, ma ia sefe fo’i le soifua o i latou o galulue e fa’atino galuega toe fa’aleleia o va’a.

“Ua iloga mai o lenei tautua e mo’omia tele i le nofoaga o lo’o fa’atumau ai, ma ua iloga ona faigata galuega fa’atino uma tau fagotaga ma femalaga’iga i va’a pe afai e fa’aauau pea ona motusia lenei auaumaga a le Mea Toso Va’a. O le aoga fo’i o lenei auaunaga ona e tele se polofiti e maua ai e le Malo, e aoga i isi ana galuega atina’e,” o se tala lea a Ross. 

O Dana Gartzke, Failautusi Fesoasoani a le Commerce Economic Development a le Malo tele sa ia fa’ailoa, “Na tele se a’afiaga o galuega fa’atino mai lea tautua i Amerika Samoa talu ai mea totino aoga a le Malo na fa’aleagaina i le afa o Gita ia Fepuari 2018. Petia’i o lenei tinoitupe o le a aoga tele lea mo le  toe fa’atula’ia mai o le tele o le tamaoaiga na masani ona maua mai e le Malo mo lona tamaoaiga tausi, ae tainane fo’i le toe tapena lelei o tautua e talafeagai ma le tautuaina o va’a e taula ma aga’i atu i lea Uafu sili ona matagofie ma le sefe o le Iunaite Setete ma Teritori o Amerika.”

“O le tatou Mea Toso Va’a o se tasi o aseta sili ona taua a le tatou Malo, ma o le maua mai o lea fesoasoani taua mai le Trump Administration, o se fa’amanuiaga tele mo le Malo ma ona tagata, aua o le a toe so’o le fau ma le fau i le tautuaina o va’a uma e mafai ona tatou fa’aleleia tino ma totoga ua faaleagaina a’o folau ma afea mai i tatou. Ona o lea o le a toe fa’aleleia mea uma o taofia ai le toe fa’aauauga o galuega nei, o se fa’afetai tele lea i le EDA ma lona pulega i le fa’amatuu mai o lenei seleni mo i tatou,” o se saunoaga lea a le tatou faipule i le Konekeresi, Tali Aumua Amata.

MALAGA ESE ATU VA’ALELE TOGIPAU - TUMU LE PASESE

Ua pei fo’i ua fou i le mamalu o le atunuu le toe  tumutumu i le malae va’alele ina ia fuaina pauna ma fa’asolo ia mae’a tapenaga mo le malaga atu i le va’alele togipau ua fa’atulaga e le Medicaid mo i latou ua agava’a mo talavai ma togafitiga i fafo, le fanau aoga ia o atu mo le amataga o a’oga ae maise nisi o le fanau ua vala’auina mo le tautua i vaega au ma nisi o lo ia leva fo’i o tatou opea ai iinei ona o le faasa.

E to’a 274 i latou na malaga i le va’alele togipau. Na muamua manatu ina ia fa’asolo muamua i latou o e ua gasegase ma sa taumafai lava i ai le Ofisa o le Medicaid i lena tulaga i le malae va’alele.

Ona ua vave uma atu lava pasese sa va’aia ai le tumu o le laina mai le amataga se’ia oo lava ina te’a le lima i le afiafi, ma o se mea lea ua iloga ai le naunau uma o le aumalaga ina ia le misia lava le avanoa ua maua mo le malaga atu i fafo.

I le malae va’alele, e ui lava ina tumutumu ma fa’alogoina le tauvala’au o suafa o gasegase e faasolo muamua atu e kilia, ae na to’a lava le tai i le fanau talavou ma aiga, se’ia mae’a lelei le fa’asologa o le lisi ona fa’ato’a oo lea ia i latou le siakiga ma ua fa’amauina ai i latou uma o le a malaga ese atu i lea va’alele togipau.

Ua iloga mai nisi o mea sa fa’atuai ai le tolaulauina o isi suafa, ona sa toe tatalia le mae’a ai ona totogia o latou pasese e toe taliu mai e le falema’i LBJ, lea lava sa i’u ina maua atu ma to’afilemu ai le agaga o nisi na fa’atumauina suafa i le lisi lea. O atopa’u e lua a le sui malaga sa fa’atulaga le ta’i 50pauna, afai e sili e toe ave’esea lava mea ina ia atoa lelei pauna pe itiiti ane fo’i.

O le to’atele na umi o tutu pea lava i le laina, o le fanau a’oga lea o fia malaga, ona ua vave i latou i le malae va’alele ae ua fa’asolo pea le laina o e ua mae’a lisia o gasegase e fia malaga mo talavai i fafo.

Ua fa’ailoa fo’i i le lisi o mea e taumafa i luga o lea malaga ua na’o mea’ai mama o sanuisi ma vaiinu suamalie ma vaiauli, lea sa fautuaina ai le mamalu o le pasese ia lelei se tausiga afiafi a’o le’i o atu e gasolo i le va’alele.

I le taumafaiga lava ina ia le so’ona tumu tele le malaeva’alele i le anoanoa’i o aiga e o atu e fa’amavae  i nai a latou pelega o le malaga ese atu, o lea ua limiti ai lava le aofai o i latou e o atu e momoli atu fanau ma e gasegase o liga ina ia tu’uva’a ese atu, ia fa’amavae uma ma pelega i aiga. 

I le taumafaiga atoa ina ia usita’ia nei taumafaiga uma, sa i ai lava ali’i leoleo o le malae va’alele ina ia fa’ato’ato’a fo’i le mamalu lautele sa aufia i le malaeva’alele i taimi uma. O le fa’amalo fo’i aua sa faatutaia lava galuega ma tiute ma le ava e tatau ai i le pa’ia o aiga ma e uma sa oo atu ona o le fia fa’atofa i pelega ua malaga ese atu.

TUU I LALO FALETELEFONI TUAI - FA’ATU AI FALE FA’AMASINOGA FOU

O le aso Gafua i le vaiaso lenei sa amata ai galuega o le ave i lalo o le fale telefoni tuai i Fagatogo ma le fa’ameomoe o le malo e fa’atuina ai le fale fa’amasino fou. 

Sa manatu ina ia siitia atu le Fa’amasinoga Fa’aitumalo ina ia fa’atautaia i lea lava fale i lona fogafalelua, peita’i o le fautuaga a le Matagaluega o Galuega Lautele a le malo, e le sefe lea fale. Ma o le mafuaaga foi lea ua ave ai i lalo. 

Fa’ailoa e Kovana Lolo Matalasi Moliga i le fonotaga a le kapineta i le vaiaso ua te’a,  “O le fale fou a fausia nei o le a fa’asaga sa’o i le afio’aga, ae le o le tuafale i le afio’aga, e pei ona i ai le fale o le a tala nei i lalo.” 

Na amata va’aia le mamalu o tagata faigaluega ua amata ona ave’esea e i latou totoga o lelei pea o le fogafalelua o le fale lea, e tapena ai mo le tuuina i lalo i le amataga o lenei vaiaso. Ua fa’ailoa o le poloketi mulimuli lenei a le faigamalo o le a amatalia ona tuu lea ina ia fa’ato’a mae’a ae ua tu’ua e i latou le ofisa o le fa’auluuluga o le tatou Malo ia Tesema 2020.