Tala I Vaifanua

Pago Pago, AMERIKA SAMOA - 

SAUNIA LE MANU’ATELE 111 MALAGA I HAWAII MO GALUEGA LIPEA:

Ua fa’atulaga nei le aso e malaga ese atu ai le MV Manuatele lll e fa’aleleia mai ona totoga ua fa’aletonu na mafua ai ona le toe pasia e femalaga’i i le va o Tutuila ma Manu’a. 

Ua le mautinoa mai le mea toso va’a o le a fa’aleleia le MV Manu’atele, ae ua fa’ailoa manino mai e Chris King, sui fa’atonu o le Uafu ma Malaeva’alele, “E tatau muamua ona aumaia le fa’atagaga a le US Cpast Guard e tatau ai ona tu’uva’a ese atu le Manu’atele lll pe leai, ona fa’ato’a tu’uva’a atu lea.”

O le ala lea o le galuega o lo ua fa’atino nei e le Port Administration ina ia mafai ona pasia e le US Coast Guard le tuu va’a ese atu o le Manu’atele ll mo ana galuega lipea, ia toe pasia fo’i le femalag’ai ma fela’ua’i uta ma pasese i le va o Pago Pago ma atumotu o le Manu’atele.

Ona o lo’o fa’aauau pea fo’i talanoaga ma Mea Toso Va’a i Honolulu e mafai ona maua ai se avanoa e toe fa’aleleia ai le tatou va’a lea, ua le mafai ai ona fa’ailoa patino mai le igoa o le Mea Toso Va’a o le a toe fa’aleleia ai lenei aseta a le tatou Malo.

O nisi o tala na mua’i fa’asalalauina ua fa’ailoa ai le tau o lea galuega toe lipea mo le Manu’atele lll na fa’asalalauina e $200,000. Peita’i ua fa’ailoa mai e sili atu le tau o lo ua mana’omia aua o le a toe taga’i ai i latou i nisi a’afiaga o totoga o le va’a atoa ona o le luluga i le taimi na taua ai ma ua fa’atulaga ai e le DOI le $1.6 miliona mo galuega toe fa’aleleia a le tatou malo e fa’aagaaga mo lea galuega o le Manu’atele lll.

I le taimi nei, ua leai lava se isi va’a ua faimalaga i le va o Pago Pago ma le Manu’atele, ua na’o le va’a o Papali’i Lauli’i Alofa lea ua faia nei malaga i le va lea. Ua mafai ona la’u ai le pasese e to’a 10 ma uta. Peita’i e le mafai ona totogia uta uma lava, e ave fua, ona o lea va’a ua laiseneina o se va’a e alu ai malaga togipau tafafao e na’o le to’a 10 le pasese e malaga ai, ae le totogia ni uta e fela’ua’i ai, ona o aiaiga o lona lea laisene.

TOE FA’AAUAU ONA FA’ATAUNUU FA’AIPOIPOGA I LE FA’AMASINOGA 

Ua toe fa’aauau nei ona fa’ataunuu fa’aipoipoga i le tatou Ofisa o Fa’amasinoga i Fagatogo aua sa taofia talu mai ona fa’amalosia le fa’asa  mo le Coronavirus i le atou malo nei.

Fa’ailoa Fa’amasino Sili Michael Kruse, i le taimi na fa’alauiloa ai o le a i ai ni suiga fou i le fa’asa o loo fa’amamaluina ona o le fa’amai pipisi, sa taua’ao aloa’ia ai loa se tusi mai le Fa’amasino Sili i lea suiga fo’i o le tautua a le Vaega o Fa’amasinoga.

Ina ia mautinoa fo’i ua mautu atu fa’atonuga e tusa o le tatala teisi o le fa’asa e ala i auaunaga masani ona fa’atino e le Vaega o Fa’amasinoga, ua fa’ailoa atili ai, “Ua tatau ona silafia e matua fa’amamaluina uma isi aiaiga o le fa’asa e i ai le nonofo vavamamao, leai ni fa’afeila’iga feasogi, ma e le silia fo’i le faitauga o le pa’ia o aiga na lua e auai i lea sauniga mo i la’ua o le a tu’ufa’atasia i le fa’aipoipoga.”

Na taofi mai nei sauniga mamalu mai le fa’atinoga e le Fa’amasinoga talu mai Mati 17, 2020 ona o aiaiga o lo’o tamau i le Code Blue o le fa’asa mo le Coronavirus.