Tala I Vaifanua

LOTU TUUFA’ATASI PAGO PAGO - TALATALA LE TALA’AGA

O ni tala matagofie na fofogaina e Rev. Patolo Mageo o le CCJS i Pago Pago na ia tula’i ma talatala mai i le mamalu na aofia fa’atasi i le sauniga tuufa’atasi a Pago Pago atoa, le ituaiga tala’aga na lauiloa ai Pago Pago mai tausaga e tele ua tuana’i.

“I le vaitausaga o le 1840 i le 1841 na matua liliu ai Mauga, le afioga le Ma’oputasi i na vaitau, e talia le tala’iga o le fa’a-Kerisiano. Na fa’alogo i ai Tuitele i Leone  ae maise fo’i o le afioga le Tuimanu’a ma ua fa’apea ai ona latou faia fo’i, ae fa’ai’u ai ina talia e le tama fa’asausau a Sua ma le Vaifanua, le na autasi i ai  Sua ma Vaifanua, le afioga Le’iato. O ai na amata mea lelei i lena vaitau o tama ma tua’a o le atunuu, o le afioga le Ma’oputasi.”

“O le ulua’i misionare na fai lona loto ma tula’i e alu i galuega fa’amisionare i atunuu e le’i oo i ai le Talalelei, o le alo fo’i o Mauga Pulu, le ali’i talavou o Poumale Mauga Pulu, ma na alu i Vanuatu ma maliu ai lava i na eleele ona o le Talalelei a le Atua Soifua i le vaitausaga 1900.”

“Ua tuutuu mai i luma, o le ulua’i sui ma le alo o le atunuu o Amerika Samoa na tofia mai e avea ma Kovana o le faigamalo a Tutuila ma Manu’a, o le Pago Pago. Le susuga Tali Peter Coleman i le 1956. O ia lava lea e tasi, na toe tula’i manumalo i le ulua’i palotaga a Amerika Samoa e sailia ai sona Kovana Samoa i le tausaga e 1977.”

“O le ulua’i Patele Samoa na mafai ona fa’au’uina e avea ma Patele i le ekalesia Katoliko o le alo fo’i o le afio’aga, le susuga Patele Felise.”

“I le tausaga e 1942 na ulua’i fa’atuina ai le ekalesia CCJS po’o le Fa’apotopotoga a Iesu i Samoa, i le afio’aga i Pago Pago ma o lo’o i ai nei pea ma soloa’i atu ai lona lala i Fagatogo ma Naumati Tafuna i le taimi nei.”

“I le tausaga e 1976 na amata fa’atuina ai le Ekalesia Papatiso i Happy Valley i Pago Pago ma faato’a see atu ai i le nofoaga fou ua i ai nei i Happy Valley i Tafuna, ma o le afuaga fo’i lea o le fa’aigoaina o le Happy Valley, ona o le nofoaga na amatalia ai ona fa’amumu lea lamepa mo le Upu a le Atua. O se tasi fo’i o alo o le afio’aga na tula’i mo lea galuega, Viliamu Mageo.”

“O le ekalesia o le All People’s Pentecostal Church lea sa faatuina e se tasi o alo o le afioaga  Rev. Viiga ma Filigataula Leota Tarrant ma ua tutula’i mai i lona fa’atautaiga fou lava i se tasi o alo Faife’au o le afioaga, Pr Logofa’atasi Ae Jr. ma le faletua o California Tarrant Ae.  Lea ua tatou va’aia le tula’i mai o nei alo talavou o le afio’aga, e fa’aauau ona tutu mo le Upu a le Atua.”

“I le tu’uga va’a Fautasi o le 1989, na toe laga ai e le Aeto mai Pago Pago le to’ilalo o Sa uma o le teritori i a latou fa’agatama i le tai, ma toe se’i mai uma Ipu sa umia e le Tui Ha’apai ma le Tui Vava’u. Fa’afetai mo lea toe fa’afo’i mai o le agaga o le manumalo e ala i fa’agatama i le tai.”

“I lenei tausaga ua fa’ailoa mai ua toe tula’i mai se tasi o talavou mai le afio’aga i lona tulaga Togisilia i le vasega fa’aiuaso i le Laumua i le Fagaloa, le Samoana High, o ia lea o Esther Taufa’asau. Malo le fai o le faiva i potu a’oga. O i la’ua ma se tasi o sui o lea vasega o lo ua to’alua i ai i la’ua e togisilia.”

“I le taimi nei, o lo ua tula’i mai se tasi o alo o le afio’aga i le tofiga “Faipule o Amerika Samoa i le Konekeresi, le susuga Aumua Amata Coleman Radewagen.”

“O mea uma nei, ua ala ona fa’amauina i le tala fa’asolopito o le Malo, ma ekalesia ma aiga ae maise o le Afioaga, ina ia toe faailoa ia Pago Pago i le taimi nei, sa tele mea lelei na faia, ma ua faamautu mai mo i tatou i lenei vaitau, na gapatia ai o tatou tua’a i aso  ua mavae.”

“O le a sa tatou upu i nei mea? E tatau ona tatou soso’o le fau ma le fau, ia tatou toe lagalaga mea lelei ma toe taumafai ia toe lauiloa Pago Pago ma ana tama fanau i galuega lelei e atina’e ai le atunuu ma le Malo o Amerika Samoa,” o se toe tima’u lea a le susuga le Faife’au Patolo Mageo.

“Ua amata mea lelei fo’i i latou nei ua fa’amauina ma nisi e to’atele, ae ua lagona le leo, o nisi o i tatou ua amata mea i fa’aletonu i lenei vaitau, lea ua toe fafagu ai ni lagona lelei ia i tatou uma, ina ia taumafai i mea lelei e tauleleia ai le tatou afio’aga, a leai, o lo ua fa’atulaga sala e faia i totonu lava o le afio’aga, e ese mai le fa’amasinoga ma latou fa’asalaga.”

O se toe fa’amanatu lea mai le vasega o Tama fa’aleagaga i le afio’aga ina ia nofouta i ai le tupulaga, i latou lagalaga pea mea fa’aletonu i totonu o Pago Pago.

VAEGA LONA 3 SIAKI STIMULUS FUAFUA MO IULAI

Ua fa’ailoa e le sui teutupe a le malo, Keith Gebauer, “O siaki nei ua mae’a tufatufaina atu i pusa meli ma le Ofisa fo’i o le Disbursing a le tatou malo ia i latou ua agava’a ai, o le vaega lua lea o le tufatufaga, peita’i e i ai le vaega tolu, e faia lea I le masina o Iulai, 2020.” 

“O le vaega lona lua o siaki nei ua mae’a taua’aoina e le mamalu lautele o siaki na mo i latou ua maea faila mai latou lafoga se’ia oo mai ia Me 27,2020. Ua i ai nisi siaki e le tele, o i latou na faila mai ia Me 28 & 29, 2020, peita’i o le isi vaega uma o siaki na faila mai na aso e lua o le a aofia lea i le vaega tolu o siaki Stimulus ua fa’atulaga nei, e fa’auia atu i le lautele i le masina o Iulai 2020.”

“E ese mai lea vaega uma lava o siaki, fa’atasi ai ma nisi o lo’o i ai ni fa’aletonu i le failaina o lafoga, pe ua fa’ailoa atu o lo’o misi se mata’itusi o le igoa i lau lafoga, pe soo se mea lava ua le maua ai lau lafoga ma lau penefiti stimulus. O le a maua uma lava i le vaega tolu lenei o le tufatufaga ia Iulai. O le a oo atu i le aso ua fa’atulaga e fa’amuta ai le failaga o lafoga ia Iulai 15, 2020.”

“Ua le manatu le ofisa o lafoga pe aisea ua le failaina ai lau lafoga o le 2018 ma le 2019, ae o le a saunia lava le stimulus mo i latou na e tatau ona agava’a i siaki stimulus.”

“O le fa’afetai la ua maua se avanoa e maua ai e i matou nei alamanuia. Afai ua faailoa mai e maua lava ni matou siaki pe afai e le’i failaina mai matou lafoga ona o ni fa’aletonu na feagai ma i matou i tausaga ua mavae, ma ia fa’atalale ai lava e faila lafoga,” o se tala lea a se tasi o tina ua muta mai le failaina o lana lafoga i le 2017.

O le aofa’iga o siaki stimulus la o le a toe fa’auia mai ia Iulai 2020, ua fa’ailoa mai e maua ai le $2.8 miliona.

MAEA FAIA LE TAOTOGA O FALA LETINI MAUGA MAI MANU’A

Ua fa’ailoa i se lipoti mai Hawaii se tala fiafia e tusa o le taotoga o le ali’i o Fala Letini Mauga, lea sa malaga fa’apitoa ai i Hawaii se tasi o ona tuafafine talavou ina ia fesoasoani e avatua sosia o ona ivi ina ia fa’aaoga mo lea taotoga e faia lea i le Stanford Medical Center i Palto Alto, Kalefonia.

Fa’ailoa e Feleai Tau o le fesaosoani fa’apitoa a le Lutena Kovana o Hawaii, Josh Green, “Ua amata nei ona fa’asolosolo manuia le soifua o Fala Letini Mauga. Na fa’ataunuuina le taotoga o Fala Letini i le aso Lua na te’a nei, ma ua va’aia lava le sologa lelei o mea uma.”

Ua fa’ailoa fo’i o le tamaita’i o Fa’avela Mauga, le tuafafine la’ititi o Fala na taoto lona ivi e avatu ai sosia mo Fala Letini, o lo’o ua i ai pea o ia i Kalefonia e fa’atalia le toe taliu mai pe afai o le a talia le femalaga’i o va’alele i le va o i tatou ma Hawaii.

O le a taofia pea lava Fala Letini Mauga i lona falema’i i Stanford Medical Center e tatalia ai le taimi e malosi lelei ai, ma mautinoa e ona ali’i foma’i ua tatau ona te’a i tua ma mafuta ma aiga.