Tala I Vaifanua

Pago Pago, AMERIKA SAMOA - O le alii e 45 tausaga le matua lea na pu’e faapagota e Leoleo i le vaiaso na te’a nei, ona o tu’uaiga i lona fa’aoolima lea i lona to’alua, ua molia nei o ia i le moliaga mamafa o le umia faasolitulafono o fualaau fa’asaina o le mariuana.

Ina ua saili e Leoleo le tino o Siaosi Talaleu i le aso na pu’e faapagota ai o ia, na latou maua i ai sikaleti mariuana e 2 ua uma ona taai i totonu o le taga o lona ofu sa faia. O le aso 17 o Me na pu’e faapagota ai e Leoleo Talaleu i le fale o se tasi o ona tausoga, tusa lea ua silia i le 3 vaiaso talu ona tuana’i le fa’alavelave e pei ona tu’uaia ai o ia i lona faaoolima lea i lona to’alua.

E to’atele Leoleo na tali atu i le valaau ina ua talosagaina e se tama’ita’i e 17 tausaga se fesoasoani, ona o le ua molia ua ia faaoolima i lona to’alua. O le tama’ita’i na ia faafesootaia Leoleo, o le uso laititi lea o le to’alua a Talaleu e nonofo faatasi ai lava i le fale e tasi ma Talaleu ma lona to’alua ma le la fanau tama’ita’i e to’atolu.

E pei ona taua e Leoleo i le latou tagi e faapea, o le afiafi po o le aso 29 o Aperila o le tausaga nei na taunu’u ai se telefoni mai se tama’ita’i talavou i Tafeta, e talosagaina ai se fesoasoani mo lona uso matua o lo o fasi tigaina e lona to’alua. Na taunu’u Leoleo ma latou feiloa’i ma le tama’ita’i na ia talosagaina se fesoasoani, ma ia faailoa ai i Leoleo lona uso o loo i totonu o le fale o lo o manu’a lona tino e aofia ai lona ulu ma ona foliga.

Na aga’i atu Leoleo ma latou molimauina le Tina na aafia o loo saofa’i mai i totonu o le potu, o loo tagi ma foliga gatete lona tino i le fefe, ae o loo tafe mai le toto i lona ulu ma ona foliga. Na vave gaioiga a Leoleo ma mafai ai loa ona ofo atu le fesoasoani muamua mo ia, e faatali ai le taunu’u ane o le ta’avale Falema’i (EMS).

Na taua e le uso o le Tina na aafia ina ua fesiligia e Leoleo, lona vaaia o le ua molia o ia faaoolima i lona to’alua e ala i le toso solo o ia i luga o le sima ma tatu’i ona foliga. Sa ia vaaia fo’i le faaaoga e le ua molia o le au malo o le pulumu salu fale ma sasa ai le ulu ma le papatua o le na aafia, a o ta’atia le na aafia i lalo ma e e i lona fia maua o se fesoasoani.

Na taua e le tamaitai lea i Leoleo, na faasa e le ua molia o ia ma lana fanau laiti e to’atolu ona alu ese se isi ma le potu, peita’i na mafai lava ona ia sola mai i fafo o le potu ma ia vilia ai loa Leoleo mo se fesoasoani. O le taimi lava na iloa ai e le ua molia ua uma ona vili Leoleo, na ia sola ese ai loa mai le fale.

Na fesiligia e Leoleo le afafine matua a le ua molia e 13 tausaga, lea fo’i sa i ai i le taimi na tula’i mai ai le fa’alavelave. Na taua e le tama’ita’i lea lona vaai tino i le taimi na fasi ai e lona Tama lona Tina, e ala i le tu’i, kiki, faapea ai ma lona fa’aaoga o le au u’amea o le pulumu salu fale e sasa ai le tino o lona Tina. Sa ia lagonaina le ee o lona Tina i le tiga ma le fia maua o se fesoasoani, a o le taimi lea o lo o futi ai e le ua molia lona ulu ma toso solo o ia i totonu o le fale, amata mai i tua o le umukuka ma faasolo mai ai i le potu malolo.

Na taua e le afafine matua a le ua molia i Leoleo e fa’apea, sa i ai le taimi na ia lagonaina ai le ee leotele o lona Tina, ma ia manatu ai, atonu ua tupu se tulaga matuia ia te ia, peitai na musu e alu e fesoasoani ona o lona fefe i fasi atu ai ma ia e lona Tama.

Na taua e le afafine matua lona vaaia o gaioiga uma sa faia e lona Tama i lona Tina, e aofia ai le taimi na ia ta tu’i, ta kiki ma toso solo lona Tina i luga o le foloa sima, amata mai lava i tua i le umukuka seia oo mai i luma o le potu malolo. Sa folafola atu fo’i e lona Tama ia tei latou, na te fasia le tagata e oso atu i totonu o le potu, pe alu ese foi ma totonu o le fale. 

Na maua le avanoa e fesiligia ai e Leoleo le Tina na aafia e tusa ai o lenei fa’alavelave, ina ua mae’a ona togafitia o ia i le Falema’i ma ua tulaga manuia fo’i le malosi o lona Tino. 

Na taua e le Tina e faapea, na lelei lava mea uma i le la talanoaga ma lona to’alua i le afiafi na tula’i mai ai le fa’alavelave ina ua faatoa manava atu i le Fale. Sa ia fa’aaoga lea avanoa e fautua ma talanoa ai ia te ia e faatatau i le tele o tupe o loo ma’imau i le pia. Sa ia fai i ai, ana tuu lana pia atonu ua tele nisi mea aoga a lo latou aiga e mafai ona faatino i lona totogi. 

O le ua molia e pei ona taua e lona to’alua i Leoleo, e galue o se Kamuta i se tasi o Kamupani Fau Fale i le atunu’u mo le silia i le 5 tausaga. E $280 lona totogi e maua i le vaiaso e tasi, lea e talitonu le na aafia, e lava ma totoe lea tupe e faasoasoa i manaoga o le aiga. Ae o le faafitauli e pei ona taua e le Tina, o le afa o le totogi a lona to’alua e alu e faatau ai pia ma ana uo, ma ua aga’i atu fo’i le olaga o lona to’alua i lona tagofia lea o fualaau fa’asaina. 

A o faagasolo le la talanoaga, na faafuase’i ona ita lona to’alua i ana fautuaga sa avatu i ai, ma ia tula’i ai loa i luga ma kola lona ofu, sosoo atu ai ma le titina o lona ua, seia oo lava i lona tu’i o ona foliga ma una’i o ia i lalo. Na ia kiki lona tua ma toso solo o ia i totonu o le fale, ma faai’u ai loa i lona faaaoga o le au malo o le pulumu salu fale e sa ai lona ulu ma lona papatua, ma mafua ai loa ona manu’a lona ulu.

Na taua e le Tina lona fefe i lona saogalemu atoa ai ma le saogalemu a lana fanau, ma ua ia manatu ua tatau ona faia se faaiuga ina ia faaletulafono loa le la teteaga ma lona to’alua, pe afai ae mae’a ona faagasolo lana mataupu i luma o le Fa’amasinoga.

Na aga’i atu Leoleo i le fale o le tausoga a le ua molia i Tafuna ina ua latou maua se ripoti o iina o lo o nofo ai o ia. Na taunu’u Leoleo ma latou pu’e faapagota ai loa le ua molia ma auina atu i le Ofisa i Tafuna mo suesuega. A o le i auina atu o ia i le Ofisa i Tafuna, na muamua saili lona tino ma maua ai sikaleti mariuana e 2 i totonu o lana taga. 

Ina ua fesiligia e Leoleo le ua molia e uiga i lenei mataupu, na ia ioeina ai lona faaoolima i lona to’alua, e mafua mai i lona le fiafia i le tele atu o ana faamatalaga ia te ia. Sa ia taua fo’i e faapea, ua silia ma le 3 masina talu ona ia tagofia fualaau fa’asaina, pau lea o le auala na te maua ai le malosi e fa’atino ai galuega kamuta i le vevela o le la.

O sikaleti mariuana na maua ia Talaleu, sa ia taua i Leoleo e fa’apea, o sikaleti na ia faatau mai i se tasi o ana uo ave taxi i le $30.

O le vaiaso na te’a nei na tula’i ai Talaleu i luma o le Fa’amasinoga Faaitumalo mo lana ulua’i tula’i. Ua molia nei o ia i le moliaga o le umia faasolitulafono o vaega o le laau faasaina o le  mariuana; tasi le moliaga o le faaoolima i le tulaga 2, o le vaega D lea o solitulafono mamafa, faapea ai ma le moliaga mama e tasi o le faatupu vevesi i totonu o lona aiga. 

E $10,000 lea ua fa’atulaga e tatala ai i tua le ua molia.