Tala I Vaifanua

FA’ASEA KOVANA TAGATA KAMUPANI VA’ALELE CARGO

Fa’aalia e Kovana Lolo Moliga e le tatau ona tuuina mai tagata faigaluega a le Cargo mai va’alele e o mai i lalo mai latou va’alele, ma ua tatau ai ona faia latou suega i taimi uma e tulaueleele ai latou va’alele i le atunuu.

E 6 suega ua mae’a faia i le auva’a o va’alele a lua a le Cargo na tulaueleele i le aso Faraile ua te’a, ma o se isi fo’i lea auala e iloa ai ma mautinoa o loo tumau le saogalemu pea o le atunuu mai le fa’ama’i Coronavirus.

“O loo taumafai ona sefe pea le tele o nei suega o le Coronavirus mo tatou tagata. Ua tatau ai lava la ona tatala femalaga’iga i le faiga lea e i ai nei,” o se tala lea a le kovana.

Faailoa e le Matagaluega o Malaeva’alele ma Uafu, ua toe malaga ese atu nei le va’alele na fa’aletonu a le Cargo ina ua mae’a ona faia galuega lipea na mana’omia ona faia. O le mafuaga na lua ai va’alele a le Cargo i le malaeva’alele ona ua matauina le fa’aletonu ma toe sau ai le isi latou va’alele ma le totoga e mana’omia. Ua mae’a fo’i ona faia le suega ina ua tulaueleele,ma ua kilia fo’i.”

Ua fa’apena fo’i ona fautua mai le ali’i foma’i Dr Saleapaga ma le CEO o le falema’i Faumuina John Faumuina ina ia matua mataituina le aufaigaluega uma i va’a i’a e ulufale mai, o va’alele e ulufale mai atoa ai le aufaigaluega a Kamupani Va’a o lo’o feso’ota’i ma i latou nei i le taimi e taula mai ai i le Uafu ma tulaueleele va’alele i le Malae va’alele i Tafuna.

TAUALOA TAUSIMA’I FAAFAILELE LALOLAGI IA SOIFUA MALOLOINA

O le vaiaso lenei o lo ua fa’ataua ai le auaunaga a le vasega o Tausima’i uma i le Iunaite Setete e aofia ai ma Amerika Samoa. I tausaga ua mavae e matele ina faatulaga polokalama matagofie mo Tausima’i i le Falema’i o le LBJ ma le Matagaluega o le Soifua Maloloina (DoH) mo a latou foi Tausima’i.

I lenei tausaga ona o le Coronavitus, ua fa’aitiitia le polokalama ua fa’atulaga e le DOH, ma le LBJ - lea fa’ato’a amatalia se polokalama i le aso Lulu e o’o i le aso Faraile.

I le DoH sa amatalia le polokalama i le aso Gafua. Mo Tausimai uma lava o Tausima’i Laisene e laeia le toniga Lanumoana malosi atoa, ae o tausima’i CNA e la’eia le tonuga Mumu Pa’auli. O le a tufatufaina fo’i mea taumafa o le aouli.

Aso Lua ua alausu i latou uma i toniga atofa mai e le Komiti o le fa’amoemoe o lenei tausaga. Ma ua fa’asolo fo’i lea fa’amoemoe  i le aso Lulu i le toniga Piniki ua fa’avasega mo Tausima’i uma e le komiti.

O le aso Tofi ua fa’atulaga ai o le aso o le Parataiso mo Tausima’i uma, ma ua le fa’atulagaina se  toniga mo lea aso, ae ua pule lava le tausima’i ia i lana toniga. Peitai o le toe aso o le vaiaso faapitoa o le a faia ai se sauniga puupuu lava e taua’aoina ai fa’ailoga i tausima’i ua agava’a mo nei fa’ailoga. O le a faia fo’i le taumafataga e pei ona fa’asolo mai i le vaiaso atoa, ma o lo i ai sui lautogia e fa’atupea nei ‘aiga o le aoauli.

“O le fa’ataua lea ua faia, ua le solituina ai le fa’amoemoe o i ai nei, ina ia taofia le fa’atasitasi ma le vavalalata o tagata e toatele. Peita’i ua faia lenei fa’amoemoe, i ala e tusa o le fa’asa, aua o i matou fo’i o lo’o taimua mai e fa’amalosia lenei taofiga i le mamalu o le atunuu,” o se tala lea a le tamaita’i tausima’i o Kone Alailefaleula.

“O lo ua matou o atu e kiliva mea tausami, ina ia le fa’apotopoto i matou, ae maua le agaga o le fa’amalosia e fa’atino galuega e pei ona vala’auina ai. Peita’i ua le fa’aitiitia la le fa’amoemoe i lenei tausaga, ae ua atili ona fa’amalosia ai, ma ua una’ia lagona ina ia fa’aauau le galuega lelei o lo’o faia,” o se tala lea a le tamaita’i o Suitupe o le PHNA.

“O le auau fo’i o lenei tausaga, ua matua fa’amalosia ai agaga o tausimai uma i le lalolagi, aua ua lutia le kelope i lenei fa’ama’i pipisi, ae na muamua atu foi le Misela, o lo ua le utuva ona soloa’i mai fa’ama’i faigata, ae o le tulaga o le Tausma’i, ia tu i matagiolo, ia faia le galuega ma le fa’amaoni, fa’afailele le soifua ma’ale’ale o le mamalu lautele o le atunuu o galue ai. O le aotelega pe a tuufa’atasia lenei galuega faifaipea, ua saogalemu le soifua laulelei o le lalolagi,” o se tala lea a le tamaita’i Peresetene PHNA Fesili Maui.

SIAKI TA’I $2,000 TOTINO KOMITI FA’AFOE & KOMITI GALUE COVID-19

Na matua vevesi lagona o tagata lautele o le atunuu o lo’o tatalia lava le taimi e tufatufa mai ai ia le tai $1,200 a le tagata faigaluega mai le malo tele i lalo o le stimulus check ina ua fa’ailoa atu e le ‘au fa’asalalau ua tufatufa le ta’i $2,000. i sui totino uma o le Komiti Fa’afoe ma le Komiti Galulue a le Coronavirus.

O le tele fo’i o nei totino o aofia i nei komiti e lua, o sui lava o le Kapeneta a le Kovana.

O le fa’amalamalamaga na tuuina aloaia mai ua fa’ailoa mai ai, “Ona o le Komiti Fa’afoe e le maua ni o latou Ovataimi i a latou galuega o le Coronavirus o lea ua filifili ai o ia e taua’aoina ia i latou le ta’i $1,000 i le masina. O siaki e ta’i $2,000 sa maua i le lua vaiaso talu ai, ua mo o le masina o Mati ma Aperila.

Peita’i, na toe talanoaina fo’i lea mataupu tau le Ovataimi mo tagata faigaluega e maualuga atu i le $50,000 i le fonotaga i le Aso Sa ua te’a a le Komiti Fa’afoe o le COVID-19 ma le Kovana, ma ua fa’ailoa manino ai e le Kovana, “Ua mae’a tuuina atu i le sui Loia Sili ina ia saunia mai le fuafuaga lelei e fa’atautaia ai ovataimi. O i latou uma e $50,000 ma aga’i i lalo le totogi e maua ovataimi, a’o isi uma e leai se mea e maua. E agava’a i latou i le comtime, po’o taimi fa’aputu e pei o livi, e mafai ona maua pe a mae’a le tausaga.”

“Ua le tatau ona totogia se tasi i ni ovataimi, e tatau lava ona fa’amaonia ma saini e fa’atonu ta’itasi o matagaluega eseese ovataimi o latou tagata faigaluega e oo lava i le sui fa’atonu. Ma le isi, e le tatau ona tusia o ni ovataimi le galuega o loo fa’atino i le 8 itula e tatau ai ona faigaluega le tagata i aso ta’itasi.”

Ua ia fa’amanino fo’i, “O le afuaga lea o tuuina atu i meaalofa nei mo fa’atonu, aua e le o totogia i latou ae o loo faia le galuega i le tele o taimi e vala’auina ai fonotaga nei i aso malolo, o aso o loo nonofo ai i le fale le aufaigaluega a le Malo, ma itula o le afiafi ua manava ai galuega.”