Tala I Vaifanua

Portland, OREGON - MOTUTAMA N. SIPELII

- ULUAI TAMA A’OGA SAMOA PERESETENE FANAU A’OGA IUNIVESITE PORTLAND STATE:

Ua fa’ailoa mai ua manuia foi le taumafaiga a se tasi o alo o Amerika Samoa o lo’o sailia fo’i lona faailoga fa’afoma’i Galuega Fa’asaeanisi e Sailia ai Togafitiga ma Afuaga o gasegase eseese, ma ua a’oga nei i le Iunivesite o Portland State.

O lea tauvaga sa auai ai ona sa ia manatu e avea ma Peresetene o le Asosi a Tamaiti A’oga uma i lea Iunivesite, ma ua fa’amanuiaina lana taumafaiga, o le fa’afetai lea ua ia fa’ailoa mai i lo tatou atunuu ae maise aiga ona o le tapua’iga mau mo ia ae maise fo’i isi alo uma o tausinio i atunuu i fafo e saili le atamai.

E le gata la ia te ia ua avea nei ma peresetene ae ua ia fa’afetaia fo’i i le tula’i mai o Victor Chavez e avea ma ona sui peresetene, ma i latou na fesoasoani malosi lava i lana taumafaiga, o nisi o ana uo mamae i le latou Iunivesite.

“Ou te muamua lava ona fa’afetaia le Atua ona o le auai i lou fa’amoemoe ua mafua ai ona a’e malo faiva. Ou te iloa e matua tau leai ni alo o Samoa i le matou nei Iunivesite, peita’i ona o lou auai i le tele o gaoioiga fai ma galuega fa’atino a le Kalapu a le EXITO, o se polokalama na amata ou auai i ai o se totino mai le taimi o a’oga i le Kolisi Tuufa’atasi o Amerika Samoa, ua ou mafaia ai ona tauva ma manumalo i lenei taumafaiga.” O se tala fa’afetai lea a Sipelii e tusa o lana taumafaiga.

O Motutama Nogotau Sipelii o se alo tausi o le susuga le Fa’afeagaiga Pr. Enesi ma Seleima Enesi o Utulei ma Leone. Peitai o lo’o tele fo’i le tapuaiga mai si ona tina o Sialevene Lutali ma lona Uncle Toko ma Semalama Sipelii ma lona tina matua fo’i o Amui Sipelii.

Na amata ana a’oga i le South Pacific International Christian School [SPICC] i Fatumafuti, ma ulufale ai i le Samoana High School ma fa’au’u mai ai i le tausaga e 2015. Ulufale i le Kolisi Tuufa’atasi ma fa’auu mai ai i le tausaga e 2017, a’o iina fo’i na avea ai o ia ma se tasi o totino o le Polokalama o le EXITO. Na fa’aauau lava ona tau’avea o ia ma se tasi o lea polokalama i totonu o le Iunivesite o Portland i ana sailiga mo lana kosi o tau’avea - Health Science & Biology Major.

“O lenei taumafaiga na amata mai lava i le Kolisi ona fa’amoemoe ia mae’a lelei, o mea uma fo’i sa mafai ona faia i le tatou Kolisi, o lea fo’i ua gafatia ona fa’ataunuu i le Iunivesite, e tumau lava le fa’anaunauta’iga, ia toe fo’i atu ma se ‘ai e fia tautua le atunuu i se aso o i luma, alofa tele atu i aiga, le matou nuu o Utulei ma le Ekalesia ae maise i nai ou matua tausi, Pr Enesi ma Seleima ma le tatou aiga atoa, fa’afetai mo le tapua’iga ma tatalo siitia i le Atua ina ia manuia o matou ala uma.”

O Sipelii sa avea fo’i ma Peresetene o le ASCC-SGA a’o a’oga ai i le Kolisi.

LIPOTI LATA MAI TAU LE CORONAVIRUS I AMERIKA SAMOA:

I  le tauaofiaga a le Komiti Fa’afoe o le Coronavirus ma le afioga le Kovana Sili ua maua mai ai le fa’amaumauga, ua atoa le 77 suega ua faia i le atunuu e sailia ai se tasi o maua i le Coronavirus, ae leai ma se suiga ua tali mai ua maua se tasi. O lona uiga e le o i ai lava le coronavirus i Amerika Samoa.

I le vaiaso nei ua filifili ai le Matagaluega o le Soifua Maloloina o le a faia loa a latou suega mo i latou o lo’o galulue ta’imua mai e tautuaina le atunuu i suesuega ma le puipuiga o le mamalu lautele mai le Coronavirus.

O i latou nei e aofia uma ai le vasega o Leoleo, o ali’i ma tamaita’i tausima’i ma foma’i, o le aufaigaluega uma fo’i a le Matagaluega o le Soifua Maloloina lea e faia lea tautua, ae maise o le aufaigaluega a le EOC ma latou ta’imua i galuega suesue mo le Coronavirus.

Ua fa’ailoa mai e le ta’ita’ifono o le Komiti Fa’afoe o le COVID-19, Iulogologo Pereira, “Ua mae’a sailia se finagalo fa’aalia o le FEMA e tusa o se ioega mai ia i latou e fa’atautaia ai nei suega o le ma’i pipisi, ae fa’ailoa mai e Holly Fuller, e le mana’omia se latou ioega mo lea galuega lelei, e ao ina fa’atautaia aua e mautinoa ai pe ua i Amerika Samoa le coronavirus pe leai. Peita’i e sapaia e i latou lea fa’amoemoe ina ia fa’ataunuuina.”

Ua saunoa fo’i Fuller e tusa o le sapalai o suega i le teritori, “Ona ua matau atu e utiuti le aofaiga o suega e fa’aaoga i le suesuega o tagata pe maua i le coronavirus, o le mafuaga lea na toe mana’omia ai le ioega mai a le FEMA i lea galuega tele, ina ia lava ma totoe tapena le fa’amoemoe a’o le’i lutia i tatou i le fa’amai pipisi.” O ose saunoaga lea a Iulogologo.

Ua matauina ua fiafia fo’i lenei aufaigaluega a le USArmy Corp e o mai i Amerika Samoa e tautuaina o tatou tagata lautele, ma fa’aoo mai se latou foi pito la’au ina ia fa’ailoa mai, e le o manana’o i latou maua Amerika Samoa i lenei fa’amai pipisi.

Ua faailoa mai e Kovana Lolo Moliga, “O le isi lea vala o le talanoaga ma le ali’i Fa’atonu o le FEMA mo le sone le susuga Robert Fenton, ae ese ai fo’i le isi vaega mai Texas o le a o mai fo’i e fesoasoani lava ia i tatou.”

I le amataga fo’i o lea lava fonotaga a le Komiti fa’afoe ma le Kovana sa muamua lava tuuina mai e le taitaifono sina taimi e tatalo le leoa ai le au usufono e manatua le tautua a i nisi o malu o le Malo, vaega a le Tinei Afi ua maliliu a’o fa’atino galuega lavea’i. “O nei galuega uma e faia i aso ta’itasi ua manatu mama i ai le to’atele, ae o i latou o fa’atinoa, o lo’o faia ae lama le toe fili o lenei olaga, le oti e matuitui ona o’oo’oga. Fa’afetaia le auaunaga a nei ali’i ua amia fa’afuase’i o la’ua ola, ae tu’ua o la’ua pelega i lenei olaga, fa’afetai tautua Capt. Velega ma Capt. Tipoti.”

Na saunoa fo’i le Kovana e tusa o le matuia ua oo i aiga ona o le avea o pelega, ae le’i taitai o la’ua soifua ma mafutaga mamae ma pele i totonu o le li’o o le aiga. “E leai se mea e mafai ona avatu, pe taui atu ai e le Malo e mafai ona faatumua le avanoa ua i ai nei i totonu o aiga, ma e fa’amaulalo atu fo’i le malo i se lape i le auaunaga ale Malo, i ala e fa’atino ai galuega e tautua ai le atunuu.”

Ua fa’amanino fo’i i lea lava fonotaga, o le to’atasi o le to’alua na fa’asaoina la’ua soifua i lenei fa’alavelave, ua auina atu nei i Honolulu ae le o Niu Sila. Peitai o le auaunaga a le falema’i Niu SIla lea sa malilie mai e latou te mafaia ona fa’ao’o le ali’i Kapeteni mo togafitiga i Honolulu. Ua i nei o ia i le Queens Hospital mo ona togafitiga ma o ia lea o Tinei Fonoigafo.

Peita’i o Mathew Paopao, ua te’a i tua mai le falema’i ua manuia o ia.

15 TAMAITI FA’AU’U MAI LE KOSI A LE SILVER LINING INC I LE ASCC: 

Ua fa’ailoa mai e to’a 15 le aofai o tamaiti sa tau’avea kosi fa’atekonolosi ma feso’ota’iga fa’aneionap e fa’aaoiga ai Komipiuta, a le Silver Lining Inc. o le a maua fa’ailoga i lenei fa’auuga o le ASCC.

O le susuga Chris Magalei, o se tasi o faia’oga na ia fa’ailoa maia lea fo’i matati’a ua maua e nei alo ma fanau a le atunuu. O le latou ulua’i kosi lea ua fa’afoea i le ASCC ma ua fa’afetaia lea to’a 15 ua ausia togi e fa’auu ai.

“O le fanau lenei ua mafai nei ona agava’a mo ni avanoa e faigaluega ai i nisi o kamupani i fafo ae ua fa’atulaga o latou Ofisa autu i le tatou nei malo. O se la’asaga fou lea ua mafai ona ofoina mo nei fanau e 15.”

Peita’i mo le afa tausaga lea na fa’amae’a nei ia Aperila 19, e to’a 45 le aofai o le fanau a’oga o lo’o tauavea lava lea kosi, ma e to’atele fo’i fanau ua latou manana’o e avea vasega nei, ae ua mae’a faigaluega i latou i vaega eseese o le Malo.

O le pili o lea vasega e $500. i le afa tausaga, ma ua leai se tasi o fa’atuai ona totogia o latou pili ona o le naunau e fia maua lea fo’i tomai.

E toe amatalia le isi vasega  mo le afa tausaga o soso’o mai ia Setema 2020.