Tala I Vaifanua

LEAI NI SUEGA MA ISI MEA MO’OMIA E SAILIA AI LE CORONAVIRUS

Ina ua saunoa mai le ali’i pule o foma’i uma i le LBJ Medical Center e le’i o’o mai lava ni mea na fa’atalosagaina e fa’atautaia ai suesuega o le fa’ama’i o le Coronavirus i Amerika Samoa nei, ua fa’aosofia ai le popolega i tagata lautele ona o lea fo’i faaaliga a foma’i ua fa’ailoa mai.

Fa’ailoa e le fa’atonu sili o le Soifua Maloloina, Motusa Tuileama Nua, “O le tau togafitiga lea e faia nei e foma’i mo le gasegase pipisi lea, o le va’ai toto’a i auga o le tale tele, maua le fiva ma le tau le au le manava. Afai e aofia uma mea nei i se gasegase o lona uiga ua atagia mai o lo’o maua ai, ma e faia lava suesuega toto’a ma auina atu i fafo mo le sailiga lea ua faia i Hawaii ma isi nofoaga o le CDC lea ua fa’atulaga mai mo tatou suesuega uma i le Covid-19.”

O le afuaga tonu ua le aumaia ai fo’i ni tatou suega mo le Coronavirus, ona e faia e foma’i ae i ai le masini e ao ina i ai fa’atasi e faia ai lenei suesuega ma fa’ailoa mai le tali. O le a le aoga lava le aumaia o nei suesuega e fa’atino iinei, ae le uma loa ma tu’u atu i totonu o le masini mo lona fa’amaoniga, poo maua le sui na sailia i le ma’i pe leai.

O le talosaga a le tatou Matagaluega o le Soifua Maloloina mo nei suega e fia aumaia mo i tatou, o lo’o fa’aulu atu i le Matagaluega o le Health & Human Services i Honolulu, ma sa faia fo’i lea talosaga i le vaitau o le Misela.

TAOFI ASDOE FA’ATASIGA & POLOKALAMA FA’ATAUVA A FANAU AOGA

O le aso Gafua na fa’ailoa ai e 17 ituaiga o fa’atasiga ua fa’ailoa me e  le Matagaluega o A’oga o le a taofia i le taimi nei, ona o atugaluga ina ne’i avea ma ala e faatetele ai le pipisi fa’asoloatoa o le Coronavirus i le mamalu o fanau a’oga i le atunuu pe afai ae fa’ataunuuina pea.

O fa’atasiga nei e aofia ai fa’atasiga i va o a’oga uma a le Malo ma a’oga fa’atautaia i pulega tumaoti i le atunuu, ae maise fo’i o fa’atasiga lava a le a’oga lava ia o le a aofia fa’atasi i ai ni fanau a’oga e silia ma le to’a sefulu.

Ua lisia mai le 17 nei o fa’atasiga e aofia ai: Tauva Numera mo vasega 8-12; Tavauga a le HOSA; Tauvaga Lauga Fa’aperetania; Tauvaga Musika; Tauvaga Tu’uga Tamoe ma Afeleti; TauvagaTala Fa’asolopito; Tavauga Tusiga Tala Fa’asamoa; ROV Solar Sprint Competition; CTE Island Wide; STEAM Summit; Isi Fa’atasiga uma i le tu’ua ai o A’oga i aso Ta’itasi e tapena mo Polokalama Eseese; Geography Bee Sate Test; Suega a le SBA; Siva Tele a Vasega Fa’aiuaso & le Vaega a le Militeri; Sauniga Fa’aulu Sui Fou i le Natonal Honor Society; Fa’atasiga uma Tau Ta’aloga a le ASHSAA.

TAOFIA AOGA I LE SOUTH PACIFIC ACADEMY

I se fonotaga na fa’atautaia a le Komiti Fa’afoe o le South Pacific Academy ma le Pule A’oga, ua fa’ailoa o le a taofia le fanau mai le usu mai i le falea’oga ma le lotoa a le a’oga, mo le lua vaiaso atoatoa.

Peita’i o le a fa’atautaia pea aoaoga e fa’aaogaina ai sootaga i le Initeneti ma o le a fa’auia atu ai a’oa’oga ma suesuega e ao ina faia a le fanau i nei so’otaga mo le fanau a’oga uma i vasega ta’itasi, fa’apea fo’i ma so’otaga o faia’oga ma le pulega o le a’oga.

O le toe aso la o a’oga i lea loto o le aso ananafi, ma ua fa’ata’ta’ia fo’i lea sootaga pe ua talafeagai atili pe a mae’a fo’i le lua vaiaso. E toe taga’i le Komiti Fa’afoe ma le Pulega o lea a’oga, pe a mai lea faiga pe soso’o ai fo’i pe a mae’a lea lua vaiaso, ae ao ina soalaupule i latou ma va’ai i ni a’afiaga o aoaoga a le fanau, lelei pe leai.

I le taimi nei ua na’o le South Pacific Academy lava lea ua tapunia a latou a’oga, ae fa’aauau i so’otaga fa’ainiteneti.