Tala I Vaifanua

LEAI SE CORONAVIRUS I AMERIKA SAMOA

Ona o le tele o tala fe’avea’i i feso’ota’iga fa’alaua’itele a le facebook ua matele ina feavea’ia ai tala o lo ua i ai nei le fafine ua mua’i maua i le Coronavirus ma ua taumafai ona togafitia lea i Leone.

Peita’i na fa’ailoa e le fa’atonu o le Soifua Maloloina, Motusa Tuileama Nua, “E leai ma se tasi ua i Amerika Samoa ua maua i le Coronavirus i le taimi nei. O i latou uma fo’i o lo’o taofia, e ao ina taofia ina ia mautinoa lelei, e le o ulufale mai i Amerika Samoa ma lea fo’i fa’ama’i.”

Ua fa’apea fo’i se saunoaga ua fa’ailoa mai e le Pule o le Aufaigaluega a le Falema’i i Faga’alu, Dr Iotamo Saleapaga, “O nei tala uma e fa’atupu ai le vevesi vale o mafaufau o le lautele o tatou tagata, ae ua mau fa’atuatuaina e le mamalu lautele o outou ta’ita’i lea e fa’ailoa atu, e leai ma se isi ua maua i le Coronavirus i Amerika Samoa nei e oo fo’i ia i latou o taofia, e le o i ai se isi ua foliga mai o maua i le Coronavirus.”

O le tina lea ua sese uma ai nisi, o se tasi sa malaga mai Hawaii ma sa taua’aoina ia te ia le pepa o fa’amaumauga tusitusia e tusa o le Coronavirus ma ua i tauaaoina mai i le falema’i, ma ia manatu pe maua ai sona suesuega, ona e le’i malamalama lelei o ia i le mea e ao ina fai, na toe fa’afo’ia o ia i lona aiga i le ta’avale a le Matagaluega o le Soifua Maloloina, ma ua manatu ai le to’atele sa i ai i lena aso, o se tasi o lo’o tau togafitia i le Coronavirus e le Soifua Maloloina.

O lo ua leai lava ni auga o le Coronavirus ua alia’i mai i lea tina, ma o lo’o fa’aauau pea lava a latou puipuigamalu o lona soifua maloloina se’ia mae’a le 14 aso.

“I le taimi nei, e le o i ai ni suesuega patino e iloa ai le Coronavirus ua fa’ao’o mai i Amerika Samoa, ma e le mautonun lava fo’i foma’i i le tele o taimi i nei suesuega e ao ina faia i tagata faimalaga mai, ma ua iloga ai, e faigata lava ona mautinoa tonu nei fa’amaumauga mo suesuega e auina atu i fafo, e le vave fo’i ona toe fa’afo’i mai fa’ai’uga, ae pau lea o le tatou ala e mautinoa ai lea tulaga.” O se tasi lea o atugaluga na fa’ailoa mai e le fa’auluuluga o le Soifua Maloloina.

TAPUNIA ASIASI LAUTELE HOPE HOUSE ONA O LE CORONAVIRUS

O le aso ananafi, Mati 17, sa amata ai le tapunia o le Hope House mo asiasiga faito’atele mo i latou e uma ua nofoia lea nofoaga. O le afuaga o lea fa’aiuga mai le afioga Epikopo Peter Brown, “Ona ua mautinoa e vave tele ona aafia i latou ua maua i gasegase  tumau tau le faaii ma le sela, ae ua tatou silafia fo’i o i latou o tausia fa’apitoa i le Hope House, o lo latou toe fa’amoemoega lea mo le soifua fa’aauau. Ua le gata i lea, o le agaga alofa ma le agaga foai o le mamalu lautele e le te’ena lea, ae o le a le mafai ona auina ane i latou uma nei e alaal i Hope House e feiloa’i ma i latou o le a asia i latou ma foa’i atu mo le latou tausiga lelei.”

“O lenei fa’ama’i pepesi ua leai sona tapula’a ma ua a’afia so’o se tasi e pa’i atu i ai i latou, o se taumafaiga sili lea ona taua mo i latou uma ua tausia ma togafitia i lenei nofoaga. Ona o le agaga alofa ma le tausiga lelei ia mautinoa a’ia’i, ua faia ai lenei fa’aiuga.” O se toe saunoaga lea a Epikopo Peter Brown.

Ua fautuaina le mamalu lautele ina ia fa’afeso’ota’i muamua le telefoni a le Hope House ae maise le Pule o le Hope House i le telefoni 731-8774 mo  se fesili.

O le tamaitai pule i le nofoaga Beatrice Mageo i lana lea telefoni e maua uma ai avanoa e tatala mo i latou e fia asia le nofoaga, ae o le a le va’aia i latou o tausia ai.

O le a le aofia le Fatuoaiga Day Care i lea fa’asa, fa’apea ma le Fatuoaiga Montessori School, e tatala pea lava ia nofoaga e lua mo le mamalu e o’o ane i ai. Ua talosagaina le mamalu lautele ina ia molia fo’i talosaga i le Atua ina ia fa’asaogalemuina pea lea nofoaga i ona a’ao alofa.