Tala I Vaifanua

3 PEPE SOIFUIA MAI I LE TAUSAGA FOU IANUARI 01, 2020:

E toatolu pepe fou ua soifua mai ia Ianuari 01, 2020 ma ua avea i latou ma fa’amanuiaga amata o lenei tausaga fou mo Amerika Samoa ma aiga fo’i o lo’o soifua mai i ai nei alo tama’ita’i e toatolu.

O le tama’ita’i na mua’i soifua mai o Malua Alayna Makalio o le afio’aga o Nuuuli. O ia o se alo tama’ita’i mo le tama talavou o Iosefo Jr. Makailo ma lona faletua o Soffy Makalio o Nuuuli.  O le lona lua lea o la’ua alo.

O le pepe lona lua, na soifua mai lea i le itula e 1:00pm, o le tama’ita’i o Miracle Vaki mai le afio’aga o Malaeloa. O ia o se alo e fa’asino ia Peni Vaki ma Miracle Sene. Ua fa’afiafiaina fo’i i la’ua nei i le fanau mai o Baby Miracle i le ulua’i aso o le tausaga 2020.

“O le fa’afetai i le Atua ina ua tu’u eseeseina le tina ma Pepe. ua matua’i ou fiafia ua mafai ona ou si’i te ia ma le fiafia tele, o se meaalofa sili ua auina mai e le Atua mo i ma’ua, o se tofi fo’i ua sauni e fa’atino, lona tausiga ia soifua fiafia ma le manuia. “  O se tala fiafia lea a le ali’i Peni Vaki.

O le pepe lona tolu, o le tama’ita’i o lo’o ua soifua mai i le tina o Teagoi Mase ma lona ali’i. E le’i maua fo’i se igoa mo pepe, ae 81b 01oz lona mamafa ma na soifua a’e i le itula e 7:00 i le afiafi.

Mo nei pepe uma lava e to’atolu, ua faia fo’i le sao o le Kamupani loto foa’i a le Pacific International Distributors mai Fagaima, o le latou foa’i taua lea mo pepe e soifua mai le ulua’i aso o Tausaga Fou ma Kerisimasi o tausaga ta’itasi.

O le tama’ita’i o Malua Alayna Makalio o Nuuuli ua ia maua se meaalofa ua tu’ufa’atasia i ai le anoanoa’i o mea eseese e fa’aaogaina mo le tausiga lelei o pepe mai lo latou soifua mai se’ia o’o ina atoa le 5 tausaga le matutua. O na ituaiga o oloa ua fa’atau ma tufatufaina mai e lea Kamupani i le Faioloa o le atunu’u.

E le gata i lea, ae ua maua fo’i taga meaalofa o na ituaiga o oloa mo isi pepa e lua na soifua mai i le ulua’i aso o le tausaga fou, fa’atasi ai ma le taga o oloa fa’apitoa mo le tama ma le tina o le pepe ua mauaina lea meaalofa taua mai le Pacific International Didtributors Inc.

Fa’afetai tele fo’i i lenei Kamupani i le loto foa’i mo nei meaalofa tetele ua foa’ia ona o le agaalofa mo tagata lautele o le atunuu.

Ua fa’ailoa mai fo’i na faia fo’i lenei foa’i mo le pepe lava e tasi na soifua mai  ile aso Kerisimasi 2019 mai lea lava fo’i kamupani.

FAITIOGA ONA O LE TAOFIA PEA O LE PASIGA O PEMITA MO FEMALAGA’IGA:

I le fonotaga a Kovana Lolo Moliga ma lana Kapeneta i le vaiaso ua te’a, na saunoa ai Lolo e fa’ailoa mai lana tali aloa’ia i nisi sa fa’ailoa o latou lagona o’otia ona o aiaiga o Pemita e ulufale mai ai o latou aiga mai Samoa ma Tonga, lea o lo’o taofia pea.

“I le tiami nei, e na’o le lua lava pemita ua ou sainia ona o lo’o talosagaina le ulufale mai o nisi e faigaluega. O Tagata fa’apitoa nei o lo’o talosagaina mai e le Star Kist Samoa. E to’atasi o le  Tausitusi ma le tasi o le Inisinia mo lea lava Kamupani.”

O le taofiga o lo’o fa’amamalu pea lava, ona o lo’o pepesi pea lava le Misela i le va o nei malo e tolu., Samoa , Tonga ma Amerika Samoa nei. Talu mai ona taofia le tulaga o tagata fou e malaga mai i totonu o le atunu’u, ua matauina le tau leai o nisi e pesia i le Misela i Amerika Samoa nei.

Pe afai e talia se tasi e fia ulufale mai e asiasi i aiga, e ao ina i ai se mafuaga lelei, e pei o i latou e malaga mai Hawaii, Niu Sila ma Ausetalia. O nuu ia e le tau saunia ni latou pemita ae talosaga mai le Ok Board mai le Ofisa o le Loia Sili e mafai ai ona ulufale mai i Amerika Samoa.

O le fa’asea ua maua nei, ua fa’ailoa mai ai, “Ua uma lelei ona tapena mea uma, le fa’atagaga mai le Ofisa o le Loia Sili, toe o e saili le tagata mai le Ofisa o le Soifua Maloloina ma le ofisa o Femalaga’iga., ae o atu i le Ofisa o le Kovana ma le sainia o lea talsoaga, ua le taualoaina. E sili ai ona fa’ailoa mai i le mamalu lautele, e leai e le taliaina le toe faia o ni pemita i le taimi nei, ae fa’amalolo mai ai mai le tele o feoa’iga ma tupe fa’aalu e saili ai sui e sainia pemita nei.”

Ua le gata la i le faigata o le tulaga i femalaga’iga ma nei pemita e tapena, ae ua tele ai ma suiga nei e fa’ailoa mai e le Ofisa o Va’alele pe a o’o ina malaga atu e totogia pasese e malaga ai. O nei suiga uma e afua lava i le vavao o lo’o tamau mai ona o le pipisi tele o le Misela i Samoa, Tonga ma Fiti e pei ona lipotia mai nei.

I le taimi nei, ua le taliaina fo’i ma ni Ok Boards e ulufale mai ai nisi mai Ausetalia mo ni fa’atauga pe ua na’o na asiasi mai. O lo ua fa’apea fo’i ma Niu Sila. Ona o nei malo sa amata mai ai ona a’afia le fanauiti i le ma’i misela, ua mafua ai fo’i ona taofia mai le ulufale mai nei malo.

Ua le toe mafai nei ona talosagaina e nei pasese mai Ausetalia ma Niu Sila ni o latou OK boards e malaga mai ai i Amerika Samoa e pei ona masani ai, ae ua talosagaina e nisi mai iinei, ina ia le toe maumau ai le totogia o latou pasese, ae taofia latou malaga mai i Amerika Samoa nei. O suiga uma nei fa’ato’a  fa’amalosia i le taimi ua pepesi ai nei le Misela i le pasefika.

Ua fa’ailoa mai e le Ofisa o Turisi a le tatou Malo, ina ia taumafai e fai se faiga e maua ai se avanoa o nisi e asiasi mai i le atunu’u ina ia ulufale mai. O lea la le ofisa o lo ua nafa nei ma le taumafaiga ina ia talia pemita o i latou e asiasi mai mo fa’tauga ma toe fo’i i malo na ma,aga mai ai.

TATALA LE FA’ASA O MEA’AI MANU FASI:  VELA  &  MATA MAI SAMOA IANUARI 1, 2020:

Ua maea nei ona talia e le Malo Amerika Samoa le toe aumaia o mea’ai a’ano o manu fasi mai Samoa e ulufale mai i Amerika Samoa nei. O lea fa’asa ua fa’atulaga e tatala i le aso Ianuari 01, 2020.  Ma ua mafai ona aumai ua mae’a fa’avela, pe aumai fo’i a’o mata ae ua malupuipuia lelei ala e aumaia ai i luga o va’alele po’o le va’a la’u pasese.

Ua mafaia ona aumaia a’ano manu fasi pe afai e aumaia o ni mea e tausami e le aiga, po’o le fa’aaogaina fo’i i fa’alavelave.

Ua fai si leva talu mai ona taofia le aumaia o mea taumafa vela o a’ano o manu fasi i totonu o le atunu’u fa’apea fo’i ma a’ano o manu fasi e le’i fa’avelaina, e matele lava i manu papalagii e fa’aaogaina mo maliu tetele i le atunu’u, po’o fa’aulufalega ma isi fa’alvelave tetele fa’apea tau le malo, kamupani ma aiga.

O lenei tatalaga o le vavao lea, sa mua’i fa’alauiloa i Samoa, ae le’i i ai se tala aloa’ia mai le fa’atonu sili o le Matagaluega o Fa’ato’aga ma Lafu Manu i le tatou nei malo e fa’amaonia ai lenei mataupu, aua o lo’o taofia fo’i pemita e ulufale mai ai tagata mai Samoa ma Tonga i le taimi nei, una o le misela.

Mo so’o se tagata malaga mai i totonu o le atunu[u, ua le fa’atapula’aiona le tele o le a’ano manu fasi ua mae’a fa’avela na te aumaia, ae ua na’o le 100 pauna le mamafa o le mea’ai manu fasi mata e fa’ataga mo ia e fa’aulu mai.

O oloa ua matauina e naunau tele tagata e aumaia mai Samoa e aofia ai le fasi povi steak ma sosisi pua’a pe povi fo’i fa’atasi ai ma mea taumafa ole I’a mata ma fagu sea.

O oloa fo’i na ua matauina e fiafia tagata e fa’avela mai sosisi ma aumaia, faapea ma moa samoa vela, i’a ma figota.

O mea nei e ao ina usita’ia pe afai o naunau se tasi mai Samoa e ulufale mai ma oloa o manu fasi e fa’avela pe aumai mata fo’i:

I le 24 itula a’o le’i malaga mai le sui ma nei oloa o manu fasi fa’avela pe aumai mata, e ao ina talosagaina i le Ofisa o Fa’ato’aga  ma Faigafaiva i Samoa le fa’aasu ma pasia lelei mai ai lau pepa e taua’ao e fa’ailoa i sui o le Matagaluega o Fa’ato’aga ma le Soifua Maloloina i le Malae Va’a;lele po’o le Uafu i Amerika Samoa, a’o e ulufale mai.

O lea pepa e pasia ai lou aumaia o a’ano manu fasi e tapena mai lea e le Malo o Samoa. O le pepa fo’i lea e fa’amaonia ai ua mae’a fa’aasuina au a’ano manu fasi i Samoa  ma ua mae’a puipuia mai manu fa’alafua ma ua aoga fo’i i le tausiga lelei o le tino e ala i mea taumafa.

O lo ua mana’omia fo’i ona tapena e lou aiga iinei le pemita e fa’ataga ai le fa’aulufale mai ai nei oloa manu fasi ma fa’aaogaina e tausami e tagata iinei, ma ua fa’ailoa ai fo’i le tele o lo’o auina mai, ma le ituaiga aano manu fasi o aumaia.

Soo se uta e aumaia, e ao ina usita’ia le aofai ua mae’a fa’atulaga e le tatou malo mo sui malaga mai ta’ito’atasi.

TOE A’E AOGA UMA I LE ATUNUU - IANUARI 06, 2020:

O le fa’aaliga ua fa’alauiloa mai e le afioga le Fa’atonu o Aoga Ruth Matagi Tofiga, “Ua mae’a  sauni le matagaluega o aoga e a’e uma a’oga a le malo, e afua mai ECE, A’oga Tulaga Muamua ma A’oga Maualuluga uma i le atunu’u e a’e a’oga ia Ianuari 06, 2020.”

Ua tatau fo’i ona nofouta matua uma, o le a fa’aalia pepa tui o latou fanau i latou aoga i le taimi e toe a’e ai fanau i le a’oga, ia mautinoa ua fa’amalosia le atoatoa o tui puipuia o fanau uma i le taimi e a’e ai a’oga.

Ua toe fa’atulaga nei e le matagaluega o le Soifua Malolona le vaiaso lenei ina ia fa’amae’a lelei ai tuiga uma e puipuia ai fa au talavou ma fanau iti a’o le’i toe a’e aoga ia Ianuari 06, 2020.

O le vaiaso atoa lenei, ua na’o le tausaga fou lava e le’i tatalaina ai falema’i ma nofoaga e faia ai tuiga ina ia mautinoa ua faia e matua le latou tiute ua fa’atulaga, ia fa’amae’a tui o le fanau a’oga.

Ua i ai pea lava le nofoaga o tuiga i le Fale o Pisinisi Halecks i Tafuna; DWYA Center, Fagaitua High School Gym,  Leone Health Center,  Fagaalu Well Baby Clinic ma Tafuna Well Baby Clinic.

O lo ua fa’ailoa mai ua atoa lelei le masina o tapunia a’oga a le malo mai ia Tesema 6, 2019 se/ia o’o mai ia Ianuri 6, 2020 lenei ua toe a’e ai, talu ai le fa’asa ina ia malupuipuia mai le fanauiti ma fanau talavou mai le pepesi o le Misela i le atunuu.

Ua fa’ailoa mai ua nao le to’a 10 isi ma’i misela  na toe fa’aopoopo mai i le to’asefulu muamua, ae leai nisi na taofia i na gasegase, peita’i ua te’a uma fo’i i tua i latou na taufia muamua e leai se isi na maliu ona o le misela i Amerika Samoa i lenei tausaga.

Ua faia fo’i e a’oga le suesuega, ma ua iloga mai ua vala’au i latou i matua o fanau e le’i faia tui ina ia faia tuiga lona lua o le MMR a le fanau, a’o le’i ulufale i a’oga i le vaiaso fou. A leai se pepa tui e fa’ailoa mai i a’oga ua mae’a faia nei tui, o le a le toe a’e le fanau lea i le a’oga.

Ua faapea fo’i se lapata’iga ua fa’auia mai e le Pulega o A’oga a le Ekalesia Katoliko Roma, ina ia mataituina ua usita’ia lenei tamau o lo’o fa’amalosia mai e le matagaluega o le Puipuiga o le Soifua Maloloina ale tatou Malo. Ua aofia uma i le fa’asalalauga a le Pulega Samoa Pago Pago le aotelega o Aoga ECE i Montessori, Aoga Tulaga Miuamua uma ma A”oga Maualuluga fo’i a Marist Fa’asao High.