Tala I Vaifanua

FA’AAUAU FOA’I SOFIAS FANAU TAOFIA I LE PEDIATRIC WARD

I le vaitau e fa’atino ai le agaga foa’i o fa’alapotopotoga, Kamupani ma Sosaiete eseese i le atunu’u, ma ua fa’asaga ane fo’i le Sosaiete O Fa’afafine i Amerika Samoa (SOFIAS) e fa’atino le latou alofa tula’i ina ia fa’afiafiaina le fanauiti o lo’o taofia i le Pediatric Ward i le LBJ Medical Center.

O nisi o totino o le SOFIAS na auai fa’atasi ma le latou Tausala o lo’o tulai mai i le taimi nei, Venessa Ta’amu Simanu, ina ia latou fa’ataunu’u le foai o meaalofa mo le fanau e toa 13 o lo’o taofia i le aso Lua na te’a nei i le Pediartic Ward. Ua le gata la ina latou foa’i nisi o meaalofa, peita’i ua latou faia se suiga taua i le latou foa’i o lenei tausaga. Ua latou fa’aopoopo i ai teuteuina o le Pediatric Ward, ma ua teuteuina lea e pei o se “Nofoaga ua fa’aso’o atoa i le Kiona” ma ua matua ilaila matagofie mea uma i le va’aiga a le fanauiti.

O le amataga o lea fa’atasiga ma le pulega o tama’ita’i Tausima’i o le LBJ, , le Tina o Tofiga Tufele ma le Foma’i Pule i le Pediatric, sa latou fa’amumuina ai le moli o le la’au Kerisimasi.

O lenei foa’i, e faia i tausaga ta’itasi i lenei lava vaitau e faimeaalofa ai le toatele i e o lo’o i ai le manaomia.

O le Peresetene o le Sosaiete a Tamaita’i Tausima’i i Amerika Samoa, Tofiga Tufele, sa ia fa’afetaia ai le foa’i atoa ma le fa’amoemoega e faaauau pea e i latou nei galuega lelei.

SAUNI LE TAOA E SI’ITIA I TAFUNA TUAOI MA LE TO’ESE:

O se isi mea na fa’ailoa mai e le afioga le Kovana sili i le fonotaga a le kapineta, o le fuafuaga e si’itia le Ofisa o Tagata Matutua agai i Tafuna e tuaoi ma le toese. O le fa’amoemole ina ia fa’ataunuuina i le masina o Fepuari 2020.

Saunoa le faatonu o le TAOA, “o le nofoaga lea ua fa’atulaga mo le nofoaga o le TAOA lea o lo’o avea ma eleele e taofia ai ta’avale o lo’o avea fa’amalosi e le vasega o leoleo a le Malo. O lea eleele ia matauina ua mae’a galueaina ai le fale ua fa’asino mai e fa’amautu i ai le TAOA i le tausaga fou.”

FA’AMUMU MOLI KERISIMASI A MATUU MA FAGANEANEA EFKAS

O le ulua’i aso o Tesema 2019, i lona itula e 7:00 i le afiafi, na faia ai se sauniga i tafaala o le afioaga o Matuu ma Faganeanea ina ia fa’amumu o latou moli o atugala’au Kerisimasi ua maea fa’atutu ai. O le tausaga lona lua lenei o lea polokalama.

O le fa’atina o le atunu’u, Cynthia Malala Moliga sa avea ma malo fa’aaloalogia i lea afiafi na te fa’amumuina moli o le laina o la’au Kerisimasi uma lava i le afio’aga.

O le susuga le Fa’afeagaiga Rev Fouvale Asiata sa avea ma taitai o le sauniga mamalu, ma sa ia fa’aalia, “O lenei taumafaiga ua mafuli i ai le ekalesia atoa, ina ia fa’afiafiaina le mamalu lautele o le atunu’u ae maise o se fa’afetai fo’i i ona ta’ita’i o tutula’i mai, ona o galuega lelei ua mae’a fa’atino mo le atunuu ma tagata lautele.”

Ua avea lea fo’i sauniga ma se toe fa’atepa a fanau uma o lo’o tautua i vaega au a le Malo Tele ma io lo’o mamao ma aiga ma matua, i lenei lava vaitau fiafia o le tausaga.

“Mo i latou uma o lo’o tautua, ia maua mai e outou lenei fa’atinoga o se matou fa’amalo, ma le matou fe’au taua e molimoli atu i pesega ma lenei fa’atinoga e fa’aalia ai ma fa’amanatu pea le vaitau o le saogalemu, le vaitau fiafia o le tausaga, ina ia tumau ia te outou le fiafia ma le agalelei o le tatou Atua. Fa’afetai mo la outou tautua o lo’o feagai ai ma outou i nofoaga o vevesi ma fevaevaeaiga, ia outou maua pea lava le filemu o le Atua!”

E le gata i lea, ae ua ia molitai fo’i se fe’au fiafia mo alo uma o Matuu ma Faganeanea, o lo’o alaala i fafo, ina ia latou maua se Kerisimasi fiafia ma le manuia.