Tala I Vaifanua

PETTY OFFICER 1ST CLASS JAMES SUANI - VETERENI NAVY, 20 TAUSAGA TAUTUA

O se tasi o fitafita ua atoa nei le 86 o tausaga o le soifua, o le ali’i na tautua i le Fuava’a a le Malo tele, USNavy mo le 20 tausaga i le vaitau o le taua i Vietnam ma Korea.

O ia lea o Petty Officer 1st Class, James Suani mai Malaeloa. Na soifua a’e o ia i ona matua o Suani Save ma Ianeta Save o Malaeloa ma Leone, ia Ianuari 10, 1933.

Na aoaoina o ia i le aoga a le Felela i Atu’u, ma fa’asolo mai ai ana a’oga sailia lona malaga ese atu i le US Navy ia Aperila 7, 1954, ae fa’ato’a tula’i ese mai ia Ianuari 02, 1974.

I sana fa’amatalaga, o lana tautua, sa ia faia a’o i ai i le Fuava’a, e le faigofie aua o ia sa i le vaega a le Sapalai. “E i ai mea e te va’aia e te le toe fia talanoa i ai, ona e le faigofie taimi o taua ma fevaevaea’iga i se maimoa a se tasi e alu atu i le tatou atunu’u e taua tele ai le so’otaga ma aiga, e mausali le alofa fa’aleuso ma fa’aleaiga i le mafutaga mafana o le aiga. A e va’aia mea e tutupu fa’apenei, e te va’aia i le maumau o le soifua ma le toto masa’a.”

I le 20 o tausaga o tautua i le USNavy e tele atunuu sa afea i ana malaga a’o taumafai e feso’ota’i atu i vaega au ina ia fa’ao’o atu sapalai o so’o se ituaiga ae maise o mea’ai ma meatau. Ua o’o so’o o ia i Hong Kong, Iapani, Sigapore, Korea ma isi malo e feso’ota’i ma le taumafaiga e fa’ao’o atu sapalai i vaega au a le Malo Tele.

“I le taimi nei, ua fifilemu le mafaufau, ma toe fa’asolosolo atu le mafaufau i na vaitau o le pisi ma le vevesi i le galuega. Sa fa’aaoga tatau le malosi, ina ia saogalemu le Malo tele ma ona tagatanu’u e aofia ai ma i tatou. O le fa’afetai i le Atua ona o le avanoa sa maua, e faia ai le tautua a’o maua le malosi, ae o lenei vaitau, ua na’o le taotooto lava ma fa’asolosolo nai alagamanuia ua maia mai i lena vaitau na tautua ai,” o se tala fiafia lea a le tama matua, ma ua fa’afetaia le avanoa na ia tautua ai.

“SOU” & OREGON NATIONAL GUARD - PA’AGA FA’AOFI FANAU AOGA

O le aumalaga a le Iunivesite i Southern Oregon (SOU) ma le Oregon Army National Guard sa taunu’u i e vaiaso ua te’a e fa’aulu fanau a’oga maualuluga i le SOU ae ua mae’a aiaia e leai se pili totogia mo a latou a’oga uma lava, pe agava’a i latou o le a filifilia.

O le pa’aga a le SOU ma le Oregon Army National Guard e mafua mai ona o le loto o le Pulega Iunivesite ina ia fa’afaigofie le taumafaiga a fanau a Amerika Samoa i ala e totogia ai latou pili, ma i’u ane ai latou a’oga ua maua fa’ailoga, ae o lo’o leai ni o latou pili e tau totogia, ua avea uma lea pili talu ai ua ulufale o lea alo e tautua i le National Guard a lea setete.

Mo le taumafaiga ina ia agava’a i le National Guard, ua i ai le tama’ita’i ia SFC Sheri Hoodle, o ia lea o le a faufautua ma fesoasoani i le fanau e fia ulufale i le Oregon National Guard, ma o le a ave uma ai le pili o a’oga a nei alo o le a ausia togi 31 ma aga’i i luga i le su’ega ASVAB.

“Pe afai ae malaga le isi vaega lea o le matou aumalaga, ou te nofo mo le isi afa o le vaiaso atoa, ina ia fetufa’i lava ma fanau a’oga ma latou matua e fia maua nei avanoa e fa’aauau a’oa’oga maualuluga, sailia o latou fa’ailoga ae avea le latou ulufale i le Oregon National Guard e fai ma vaega o le polokalama e totogia ai latou pili uma mo tausaga o le a a’oga ai i le SOU,” o se tala lea a Hoddle.

O se po nanei e tuua ai e le isi vaega o le au malaga ia le teritori.

I lea Iunivesite ua atoa nei le lima tausaga o gasolo mai lava i latou e fa’aofi atu nisi o tatou fanau i lea Iunivesite, ma ua fa’ailoa mai ua atoa le 38 o alo o Amerika Samoa i le SOU i le taimi nei.

O kosi eseese i le SOU e aofia ai fa’ailoga Bachelors ma Master ma o lo’o aofia ai i nei kosi e mafai ona sailia ai fa’ailoga i le Information Technology & Computer Science.

I le SOU o lo’o fa’atautaia ai fo’i ma le Polokalama a le ROTC, ma o se tasi lea o vaega o lo’o aoga i ai le Oregon National Guard.

O le polokalama lea ua fa’aigoaina o le American Samoa & International Western Undergraduate Program, ma e fa’aitiitia lava le pili o loo ua agava’a i ai le fanau a’oga nei e totogia mo latou kosi e tauavea mo ni fa’ailoga BA po’o MA.

O le taeao nei e asia ai e le au malaga nisi o aoga maualuluga. O lo’o nonofo i latou i le Sadies by the Sea hotel ma e mafai ona maua Hoddle i le Emeli: [email protected] - ma e tuua e Hoddle le teritori i le po o le aso Tofi.

Ua i ai fo’i fesoasoani fa’atulaga e le SOU e fesoasoani mo fanau mai Amerika Samoa.

“O le taumafaiga lenei ua matou malaga mai ai ma le tama’ita’i Samoa o Soteria Moli Galo mai Leone. O ia lea o lo’o i ai fo’i ma nai ona matua ae maise o le Ekalesia Samoa i Oregon, e fai ma ni to’omaga o le fanau e auai ane i ai, pe afai o le a sofa’i mai lagona o le toe fia fo’i mai i aiga ma misia tele matua ma le mafutaga,” o se tala lea a Neil Woolf o le Sui Peresetene o Tautua mo le Fanau A’oga ma le Ofisa e fa’aulu ai Fanau i le SOU.

Ua fa’ailoa e Galo, “E le o faia lenei galuega ina ia maua ai nisi e lolotu i le matou ekalesia, e leai ua ala ona fai, ona o le agaga e fia fesaosaoni lava i uso ma tuagane talavou ua tu’ua aiga ona o le naunau ia sailia se manuia mo matua ma aiga ae maise ekalesia ma le malo  ua tu’ua nei. Afai ae manuia latou taumafaiga, o se fiafiaga sili lea o le agaga, ma o le a maua lava lea so’otaga e fa’ailoa mai ai fo’i ni tala e fa’ailoa atu i le mamalu lautele o le atunu’u ae maise aiga o le fanau a’oga, e pei ona i ai nei.”

O Galo ua na’o se sooupu lava i le va o le SOU ma le fanau aoga.

MAE’A SEMINA MEA TAUMAFA PALENI, FA’ALALO LE SUKA & TOTO MAUALUGA

O le aso Faraile na te’a le toe aso na o’o atu ai le vaega a le TAOA ina ia lapata’ia fa’aleleia mai e le vasega o e na fa’atulaga mo folasaga e fa’atatau i Me’ai Paleni e tausia ai le soifua Maloloina: Soifua ae ua gafataulima lou ma’i Suka ma le Toto Maualuga; Aisea ua o’o ai oe i le Fa’amama o le Toto, ma ia lava lau fa’amalositino.

O le vasega na fa’atulaga mo folasaga e aofia ai Foma’i Faapitoa o le Fatuga’o; foma’i fa’apitoa o mea’ai; foma’i fa’apitoa o le tino ma le Mafaufau; foma’i faapitoa o ituaiga fa’amalositino aoga mo le tino ma le soifua maloloina.

O le ali’i foma’i mai le Hope Dialysis, Dr Letarte, sa avea ma foa’i e talanoa i le mafuaga ua e o’o ai i le tulaga fa’amama o le toto. Aisea ua le toe gafatia ai e le fatuga’o ona faia lana galuega, aua ua leva ma umi tausaga talu ona fa’amama e le fatuga’o le tele o le lapisi o so’o se ituaiga e o’ona i lea fo’i totoga, ma ua fa’afaula’ia nei lapisi, ma ua avea ma mea ua le toe aoga ai fatuga’o e fa’atino ona tiute mo lou soifua maloloina.

I le vasega o foma’i fa’apitoa o le soifua, ua ia saunoa fa’apitoa i afuaga o le mama’i o i tatou. E mafua lava mai le amataga ua tatou le usita’ia tulafono o mea’ai, mea e tatau ona ‘ai ma mea e le tatau ona ‘ai.

O ala e mafai ai ona fa’aumiumi pea ona soifua i tatou ma o tatou gasegase suka ma le toto ua i ai, ia tausisia lau ‘aiga paleni ia fa’aumiumi ai le soifua.