Tala I Vaifanua

SUAINA ELE’ELE MO POLOKETI ELETISE A LE ASPA

O le aso Gafua na sua ai le eleele mo le amatalia o poloketi e lua a le ASPA i lona tauaofai e silia ma le $140 miliona. O le tasi o poloketi ua fa’atulaga e gaosia mai ai le eletise e fa’aaoga ai Panele e mitiia le malosi o le susulu mai o ave o le la, a’o le tasi vaega e fa’aaoga ai le malosi’aga o le Matagi fa’ata’avili ai pe’ape’a ma gaosia mai ai le malosi’aga mo le eletise e sapalaia le atunu’u. O nei poloketi e fa’atautaia fa’akonekarate mai e nisi o Faipisinisi mai fafo.

I lea lava aso sa fa’alauiloa ai e le puleaga a le ASPA, ua fa’aigoaina le fale a le ASPA i Tafuna o le “Utu Abe Malae Operations Center” e aloaia ai le tautua ma le taitaiga a Utu, lea ua tu’umalo, ae maise i le vaitau sa avea ai o ia ma pulesili o le ASPA.

O le tatalaina o le igoa o le Maota sa fa’atautaia lea e le tina o le atunu’u, Cynthia Moliga fa’apea ma le tuafafine o le afioga le Sa’o, Elisapeta Malae.

I le saunoaga a le afioga le Kovana Sili Lolo Moliga, sa ia toe fa’ailoa ai lona fa’afetaia o le olaga galue punoua’i o le afioga le Sa’o Utu, atoa ai ma lona loto i le atunu’u ina ia lelei ana tautua lautele, lea e pulea ma fa’atautaia e le ASPA.

O se saunoaga fo’i lea sa tulei i ai le susuga le Taitaifono o le Komiti Fa’afoe a le ASPA, Fonoti Perelini Perelini, lea sa ia fa’ailoa, “O Utu Abe Malae lava ia e le mapu lona tausaili i mea e fa’aleleia atili ai le auaunaga o le atunuu e ala i tautua lautele. Sa ia matua saili ala e fa’aleleia ma si’itia ai le tautuaina o tagata lautele. O ituaiga ala nei ua fa’atino i nisi malo ma setete o Amerika, lea fo’i ua matua galue malosi ina ia fa’atautaia fo’i i Amerika Samoa, aua e alu aso ae sau aso, e ono uma fo’i le tele o le suau’u o i ai i le eleele, ae ua mautu nei ala e tua i ai le atunuu.”

GAOSIA LE ELETISE MAI LE OTAOTA LAFOA’I - ASPA

Ua i ai le isi auala o lo’o totoe nei e ao fo’i ina fa’anofoia sona vaega i le fale fou ua fa’atula’ia nei i le lotoa a le ASPA i Tafuna, o le gaosia lea o le eletise mai le kasa e afua mai i le otaota lafoa’i.

E le gata i le otaota lafoa’i mai tane o le sua lea ua toe fa’atetele atili tane ma paipa e ta’ia mai ai i le tane i Utulei, ae fa’apea fo’i le Lapisi lafoa’i i le Fanua Fa’atafuna i Futiga.

O le poloketi lea ua fa’atulaga ai le $31miliona ina ia fa’atautaia ai, ma ua tofia fo’i le Maritech Solutions /Dynamics Energy i se maliliega e latou te fa’atautaia ai lea fo’i itu o le auaunaga lea tau eletise a le tatou malo.

O le kasa o’ona e afua mai le otaota lafoa’i mai ala paipa o le sewer, lea ua fa’aaogaina e ao ma ave e toe fa’auia mai ai le gaosiga o le eletise mo le atunu’u. E tusa o le fa tausaga talu ai, na o’o mai ai nisi o ali’i inisinia ma saeanisi suesue fa’apitoa i ala eseese latou te mafai ona gaosia ai le eletise, ma o se tasi lea o poloketi sa fa’auia fo’i ina ia talia e le afioga le Sa’o Utu Abe Malae lona fa’atautaia i le atunu’u.

Ona o le tele o le lapisi ua matauina e ao mai i falegaosi I’a Tu’uapa ma le lapisi mai laina o le Sewer, ua alagatatau ona lava ma totoe fo’i le kasa e gaosia ai le eletise mai lea poloketi.