Tala I Vaifanua

ULUA’I TAOTOGA O TULIVAE MUAMUA I LE LBJ MED. CENTER

O le aso ananafi sa amata ai e Foma’i Fa’apitoa o Ponaivi le ulua’i taotoga e suia ai le tulivae mo se tasi o le atunu’u, ma ua gafatia ona fa’atino lea taotoga, ona o feso’ota’iga i le va o le falema’i o le LBJ ma le Pulega o le  Ekalesia a Iesu Keriso o le Au Pa’ia o Aso e Gata Ai, e ala i fesootaiga ma Elder Vince Haleck.

O le ali’i foma’i fa’apitoa o ponaivi, Dr John Edwards, o lo’o fa’atautaia le taotoga lenei, o se fesoasoani misiona lea mai le Ekalesia a Iesu Keriso o le Au Pa’ia o Aso e Gata Ai. E tusa ma le 2,000 taotoga sa faia e Dr. Edwards talu mai ona avea o ia ma foma’i.

E o’o fo’i i mea faigaluega uma o lo ua mae’a to’ai taunu’u nei ina ia fa’aaogaina lea i le taotoga, o mea uma lava na foa’i fuaina mai e ala i le fesoasoani tele a lea Ekalesia.

Fa’ailoa e Elder Haleck o le LDS, “O le fesoasoani e aoga tonu lava i le lautele o le atunu’u, le taumafaiga lea ia lelei ona togafitiga o latou a’ao.”

Ona sa leai fo’i se foma’i fa’apitoa e mafaia ona faia taotoga o le ivi i le LBJ, sa ave gasegase i fafo i tausaga e tele ua te’a.

E na’o le pau le sao o le falema’i mo lenei foma’i ma le faletua o le nofoaga lea e alaalata’i ai i la’ua a’o fa’atino e i la’ua le auaunaga mo tagata lautele.

O le ulua’i taotoga lea na fa’atulaga mo le aso ananafi, peita’i e matua tele le lisi o i latou e tatau ona faia ta’otoga o tulivae, ma e eseese fo’i e fuafua lava i le afaina o i ai o le tulivae o tagata talavai eseese.

Na maualuga le fa’afetai na fa’aoo e le ali’i Pule Sili a le LBJ Faumuina John Faumuina. “Fa’afetai tele i lenei Ekalesia, LDS ona o le agaga i le tautuaina o le tatou falema’i ina ia o’o atu le leleiga i o tatou tagata ua gagau ona o gasegase o ponaivi. Fa’afetai aua o se auaunaga ua matua aoga tele.Lea ua fa’asolo nei ona faia taotoga e fa’ato’a faia lava lea i le tatou falema’i talu mai ona fa’atuina. O le suiga lea o le tulivae o se tasi, ma o se mea e maofa ma fa’afetai ai, ona ua gafatia ona fa’atino ina ua foa’i mai le LDS e ala i foma’i fa’apitoa, ae maise o masini, faatasi ai ma le ali’i e fa’atautaia nei masini ina ia gaoioi e tusa ma le mana’oga o le foma’i fa’apitoa e fa’atinoa le taotoga.”

O le ali’i e va’aia toto’a le masini Brent Hintze, ae o le masini na fa’auia mai e le Kamupani a le Zimmer Biomet e fa’atupea lea e le LDS.

O le tau atoa na toe fa’aleleia atili ai le potu tipi mo lea taotoga e i le va o le $7,000 ma le $8,000.

TAGATA LISI FALE MO PISINISI A NISI - E AO INA MUA’I FAIA LAISENE PISINISI

O le vasega o i latou o lo’o ua lisia o latou fale e fa’atautaia ai pisinisi a nisi o le aufaipisinisi, ua tatau ona latou nofouta i le tulaga, e faia fo’i latou laisene pisinisi. Ua fa’amalosi nei e le Malo le faia o laisene pisinisi mo aiga uma ua latou manatu e avea o latou fale ma nofoaga e fa’atautaia ai ni pisinisi a le aufaipisinisi mai fafo pe o tagata lava fo’i o le atunu’u.

Afai o le a le usita’ia e i latou lea fa’amalosiga ua tuuina atu aloaia e le malo, o le a le toe fa’atagaina i latou e lisi atu i ni faipisinisi latou fale.

O le susuga Fa’afeu Amisone o le Matagaluega o Fefa’ataua’iga ua ia saunoa, “O i latou uma o le autova’a mai e fa’afou a latou laisene pisinisi mo le tausaga 2020, o le a lisia ai ma nofoaga o lo’o fa’atutu ai latou pisinisi, e fa’aalia manino fo’i pe lisi pe leai lea feagaiga ua mae’a fa’atulaga ma le e ona le fale o faia ai lana pisinisi.”

O le to’atele o faipisinisi nei o loo totogia latou lisi e o’o i le $2,000 i le masina, ae ua matauina, o le to’atele o nei sui e ona fale o faia ai pisinisi, e leai ni laisene pisinisi a i latou na mua’i faia a’o le’i lisia lona fale i le faipisinisi.

Afai la e leai se laisene pisinisi o le sui o lisia lona fale i le faipisinisi, e leai fo’i se lafoga o totogia i le tatou malo mai lana tupe maua o lo’o tapa mai le faipisinisi.

E tusa ai ma le fa’amatalaga a Amisone, “O le a malaga atu le sui mai le Matagaluega o le Soifua Maloloina i nofoaga uma lava o lo’o faia ai lau pisinisi e va’ai patino i le nofoaga o lo’o fa’atautaia mai ai lau pisinisi po’o talafeagai. Afai la e le’o i ai se laisene o le e ona le fale e faia ai le pisinisi mai lona fale, e le pasia lea laisene, sei loga lava ua mae’a taua’aoina le laisene pisinisi o le sui e ona le fale. O le a le fa’atagaina fo’i lea faipisinisi e fa’atautaia mai lana pisinisi i lea nofoaga.”

Fautuaga mai le Matagaluega, “Outou faipisinisi, aua le nofoa’i, ae amata loa ona fa’afou lau laisene pisinisi a’o le’i o’o mai Tesema. O nisi fo’i o au faipisinisi ta’avale laiti, va’ai fo’i lau tautua i motusia pe a o’o i le fa’aiuga o le tausaga i lona toe aso o Tesema, ae le’i fa’afouina lau laisene ave ta’avale la’u pasese, lea e avea fo’i o lau pisinisi.”

TO’AI TAUNU’U MAI FOMA’I MANU FOU IA OKETOPA 28, 2019

Ose tala fiafia ua fa’ailoa mai e le Sosiaete a le Alofa Mo Meaola, “O le a to’ai taunu’u mai le tatou foma’i manu ia Oketopa 28 ma e o’o lava ia Novema 11, o i ai lava o ia i lo tatou atunu’u mo ni fa’afesili ma le va’aiga lelei o a tatou fagafao, poo meaola tausia lelei i o tatou aiga.”

O lea ali’i foma’i manu, ua mae’a fa’ailoa mai ua i ai ona tusi pasi e fa’ailoa ai lona tomai ma agava’a e vaaia fa’aleleia tatou meaola fa’afagafao, ma ua aumaia fa’apitoa lava ona o le naunau ina ia tausia lelei nai a tatou pelega.

“O i matou o se sosaiete e fa’ato’a tau fa’aolaola, ma e mana’omia lava le fesoasoani malosi mai o le mamalu lautele o le atunu’u i ni fa’atupega e fia taua’aoina e fesaosoani i le totogia o le tatou foma’i manu ma lona malaga fa’apitoa mai. O lo ua faia lava lenei fesaosoani ona o le alofa mo meaola uma, ia tausia lelei i latou, e pei lava fo’i ona manatu le tagata soifua ia maua e ia le soifua maloloina,” o se saunoaga lea a Mona King, o le Alofa mo Meaola.

“E mafai ona e foa’i e tusa o au maila mo le Hawaiian Air, palanikeke tuai, solo ma maua fo’i sou taimi e te faigaluega ai mo le Alofa mo Meaola e aunoa ma se totogi,” o se tala fiafia lea a King, ma ua ia fa’ailoa mai ituaiga o mea ua mafai ona e foa’i ai, e o’o lava i Tupe.

Ua mafai ona fa’afeso’otai lava King ina ia faatulaga se taimi mo lau fagafao e taoto ai, faia sau foa’i tupe, poo le foa’i o au maila e malaga ai i le Hawaiian Air fa’apea ma ie palanikeke ma solo tuai e fa’aaogaina lea i taimi o taotoga o meaola i le emeli [email protected].

O le a fa’alauiloa fa’alaua’itele atu fo’i le nofoaga o le a faia ai le talavai mo meaola a’o le’i o’o mai le aso 28 Oketopa lea e to’ai taunu’u mai ai le tatou foma’i manu.