Tala I Vaifanua

FA’AFETAIA TBAS I LATOU UA TATALA TEUGATUPE - VAI AIGA FIAFIA

Na molita’i le fa’afetai tele a le faletupe fou o le Territorial Bank of American Samoa [TBAS] i le to’atele o a latou pa’aga fa’apisinisi, o e ua aga’i atu ma tatala a latou teugatupe i le latou lala fou fo’i i Tafuna, ae maise i latou ua loa ona fa’atuatuaina le latou galuega ma ua mae’a tatala latou teugatupe mai le tolu tausaga talu ona fa’atula’ia lenei faletupe i Amerika Samoa.

O le tama’ita’i o Salaia Gabbard, se tasi o totino o le Komiti Fa’afoe o le TBAS sa fai ma sui e saunoa fa’afetaia mo le silafia a le mamalu na autova’a atu mo lea fa’amoemoe i le latou lala fou i Tafuna i le aso Faraile na te’a nei.

“O le fa’afetai ia te outou ona ua outou mau faatuatuaina i matou i a outou tauga ‘oa. E moni o lo’o fou lava i matou, ae tu’u mai se avanoa matou te tautuaina ai outou, a tua ma ni a le tatou va feagai ai, ae ua matou maua lea avanoa sili mo outou le mamalu o le atunu’u,” o sana tala lea sa faia i le to’atele na i ai, ae maise fo’i o se latou fa’afetai le pa’au atu aua ua mae’a tapena e i latou nai ‘aiga mama mo le taeao e fa’asolo atu i le aoaolua o le aso Faraile ua te’a.

O le aso Faraile fo’i sa atoa i ai le 3 tausaga talu ona tatalaina le tautua a le TBAS.

I le taimi nei ua mafai ona talosagaina tusi siaki mo so’o se tasi, ae maise fo’i o latou Card Tala Tupe e fa’aaogaina ai ATM. Ma o lo ua galulue malosi fo’i le pulega a le tatou faletupe lenei ina ia taualoa a latou Master Card o le a taua’aoina ae le’i o’o i le fa’aiuga o lenei tausaga. Ona o fa’aletonu sa mua’i feagai ma i latou i a latou Card Tala Tupe muamua, o lo’o ua toe taumafai ai ona ia le toe fa’aletonu lea vaega o le auaunaga o soso’o mai.

O le susuga Greg Thygesen, na ia saunoa fa’apitoa e tusa o lea auaunaga, ma sa ia fa’ailoa fo’i, “Ona o lo’o fou lava le taumafaiga, o lea ua toe fa’asa’o ai nisi o mea uma sa tatau ona mua’i mataituina, ma ua toe afuafua ai le taua’aoina mai o Card Tala Tupe fou a’o le’i mae’a lenei tausaga, ma e le toe i ai ni fa’aletonu e pei ona mua’i fa’ailoa mai e le toatele na umia Card a le TBAS muamua.”

FIAFIA FANAU AOGA AUAI I LE POLOKALAMA CLOSE UP:

O  le fa’atasiga tele lona 9 a le Polokalama o le Close Up na fa’ataunu’uina lea i le aso Faraile na te’a nei i le US Army Reserve i Tafuna, na matua mafuli ai le fanau a’oga o lo’o auai i lea polokalama e fa’afesiligia tulaga tau a’afiaga o le tatou atunuu atoa, ma o a’afiaga sili ona matuia i lana tupe fa’asoa mo le fa’atautaiga o le tatou Malo.

E to’a 80 le fanau a’oga mai a’oga maualuluga a le tatou Malo, ma a’oga maualuluga tumaoti fo’i sa o mai fa’atasi ina ia soalaupule ni aiaiga o ni tulafono tau fa’aulu e fa’atutu aga’i i ni suiga lelei e tatau ona faia i le tupe fa’asoa a le Malo.

O nisi o faufautua mai fafo faapea fo’i ma i le tatou nei malo, sa latou fa’atonutonu ma fa’ailoa i le fanau a’oga nisi o maga taua e tatau ona latou manatunatu ma fa’amau i a latou tusitusiga o a latou pili tau fa’aulu i lenei fonotaga lona 9 o le Close Up i Amerika Samoa nei.