Tala I Vaifanua

SOALAUPULE FAGATOGO & KOVANA - MALAE O LE TALU

Na poto le afio’aga o Fagatogo e soalaupule i se latou mau e ao ina fesiligia ai le Malo o Amerika Samoa e tusa o aiaiga o le Malae o le Talu i Fagatogo, ona o le tulaga o le fa’asimaina o se vaega o le eleele i luma o le Pavilion.

O lo’o tete’e nisi o le afioaga i le fa’asimaina o le Malae o le Talu ua lisia lea o se tasi o Measina e taua i le tala fa’asolopito o Amerika Samoa.

O le tofa Taesaliali’i Fiataugaluia Savea Lefiti sa avea ma fofoga e logo le afioaga mo se fonotaga ia autasia le fa’amoemoe e fesiligia ai le Faigamalo.

“E lelei lava mea uma, peita’i ua i ai isi mea fou ua fa’alogo atu o le a faia. O le ki o nei fale o le a tu’u atu i le pa’ia o Fa’afeagaiga ma Ali’i o le afioaga, ua tu’u mai fo’i ma le pulega o le Malae o le Talu i le afio’aga e latou te fa’aaogaina ai i so’o se taimi i so’o se fa’atasiga a aiga ma le aotelega o le afio’aga atoa,” o sana fetalaiga amata lea.

“Peita’i ua sailiili atu i fa’amaumauga, o le Malae o le Talu o lo’o ua pulea lava e le Malo. O mea ia e ao ina fa’asa’o la i le taimi nei, ia saunoa manino mai fo’i le Fa’aao o le tatou malo, ma ia fa’amaumauina lelei. Ia le toe sasi lava se mea.”

O le fono a le afioaga sa faia i Fagatogo i le afiafi o le aso Lua.

O se tasi o manatu na fa’aalia i lea fonotaga a le afio’aga, “E le’i o’o ane lava se savali a le Malo i le afioaga e tusa ai o le galuega toe fa’afou ua i ai nei, atoa ai ma le fuafuaga o le a fa’asima le isi itu o le malae.”

Na saunoa a nisi matai iloga o le afio’aga, “E sili pe a amata loa ona tu’ufa’atasia se fa’amasinoga i le va o le Malo ma le tatou nu’u. Ia fa’asainia uma pepa e fa’amau ai le tatou mau, ina ia toe ave’esea lava le sima ua mae’a taoto i le Malae, ma toe fa’afo’i mautu mai loa le malae latou i le afioaga.”

O le isi fesili sa pa’u i le maota i lea lava afiafi, “Aisea ua le tula’i mai ai le Historical Preservation e taofi le fa’asimaina o le isi vaega o le malae, e fa’amalosia ai aiaiga taoto a lana fo’i Ofisa, i le taimi na faia ai lea galuega?”

O le susuga Tualima Don Fuimaono sa ia fa’ao’o ane nisi o pepa fa’amaumau a le Malo e fa’amautu ai le aia a le malo i fanua uma lava ua mae’a mau i a’ao o le Malo ua le toe aia i ai Fagatogo, ua aofia ai le Malae o le Talu.

O le tau sa fa’atauina ai e le Malo nei eleele o Fagatogo e nao le $300 lea sa totogia lava ele malo.

Ua soalaupule le afio’aga ma le Malo, e ala i le feutaga’iga ma le afioga le Kovana Sili Lolo Moliga i le potu fono o lona Ofisa i le aso Lulu, o lea fonotaga ua taofia o latou manatu fa’aalia, se’ia mae’a ona toe fono Fagatogo i le afiafi o le aso Faraile ua te’a ma fa’ailoa aloa’ia ai o latou taofi e tusa o nisi o manatu fa’aalia o le malo na fa’ailoa ane ia i latou i lea fonotaga taua.

FA’ATAUTAIA TIUTE O LE DOH - TAPUNIA NISI O PISINISI, TAOFIA OLOA GAOSI

Ua iloga ona fa’asolo asiasiga a le Matagaluega o le Soifua Maloloina i nofoaga o lo’o gaosia ai mea taumafa vela, faleoloa ma pisinisi, ina ia mautinoa o lo’o usita’ia tulafono.

Ua fa’ailoa mai sa tapunia le Fale’aiga o le Sadies by the Sea i le aso Lua ma ua toe tatalaina ina ua toe pasia lelei.

Ua le gata i lea ua latou avea fa’amalosi fo’i pusa fagu o le Samoa Nonu Delights lea e fa’atau solo i le atunu’u, ona ua latou fa’apipi’ia i ai se leipo, o lo’o gaosia lea sua o le Nonu i totonu o Amerika Samoa.

Sa taofia le 27 o pusa o le Nonu Delights, ma faia se suesuega i ai, ua maua ane ai, o lo’o pelogia e i latou le atunuu. O a latou Leipo lea ua fa’apipi’ia e fa’ailoa ai na gaosia iinei fagu Sua Nonu nei, o lo’o fa’apipi’i i luga tonu ane lava i le leipo i le vaega o lea fa’ailo, o lo’o saunia le Nonu Delights i Apia, Samoa.

O le fa’aiuga a le Sui Fa’atonu o le DOH, ua fa’ailoa mai e tatau la ona fa’ao’o loa nei oloa i le Ofisa o le Loia sili, e fa’aauau ai iina le isi la’asaga e o’o i ai lea mataupu. O lo ua fa’aauau nei lea mataupu e le Ofisa o le Loia Sili.

POLOKALAMA “TA’IALA O ALO TAMA’ITA’I”

O le ulua’i fonotaga faale-aoaoga a i latou ua filifili e fia avea ma e fa’ao’o atu se fesoasoani ua fa’atulaga e le Polokalama o le “Taiala o Alo Tama’ita’i” lea e fa’atautaia e le Enpower Pacific Island Communities, ina ia fesoasoani ma toe fa’aleleia a’afiaga o i latou ua Fa’asauaina Fa’aleituaiga, Fa’amalosia Fa’aleituaiga, ma ia taumafai lava ina ia fa’aauau se so’otaga lelei o i latou ma o latou aiga.

Na fa’atumulia lea semina i le ulua’i aso na fa’atautaia ai lea a’oa’oga taua. O sui fo’i na malaga mai fafo, o pa’aga a le EPIC Taiala o Alo Tamaita’i, sa la’ua fa’atautaia ma fa’asoa mai manatu lelei e fa’aauupega ai le aufaigaluega ua loto i lea galuega fesoasoani ma faufautua i sui a’afia i sauaga nei.

Ua fa’avasegaina i latou e amata faia suesuega ma fa’amaumauga fa’apea ma le fa’amatalaga a le sui a’afia, o i latou na o le vaega e ta’ua o le SART.

Peitai e mae’a loa ona faia nei fa’amaumauga amata, soso’o loa ma le avanoa o le SANE, i latou nei e faia suesuega patino, e fa’ailoa tonu ai, e moni le a’afiaga ua fa’ailoa mai e le sui ua a’afia i le sauaga ogaoga.

Afai e mae’a faia galuega ale SART ona tu’u loa lea e fa’aauau le vaega a le SANE lea e aofia ai foma’i o le Maota Gasegase e faia suesuega a’ia’i, e fa’amaonia ai le solitulafono ua a’afia ai sui ua sauaina. A mae’a le suesuega a le SANE, o iina, afai ae le toe mana’o le sui e fa’aauau lana fa’amasinoga, ae ua fa’amaonia e moni uma ana fa’amatalaga i le mea na tupu, ona ave’ese loa lea o le suafa o le sui a’afia mai le fa’amasinoga, ae fai sa’o le fa’amasinoga o le sui na fa’ao’o le soligatulafono matuia lea.

Ua faia le vaega a le Ofisa o le Loia Sili; vaega a le falema’i tele i Faga’alu, ma le vaega a le Catholic Social Services. E le’i toai atu ni sui o le Matagaluega o Leoleo.

O le autu tonu o le galuega tima’i ma faufautua mo se lelei o sui ua a’afia, ua fa’ailoa mai, “Ia e matua maua le agaga moni o le alofa, ma le fa’apalepale, ma ia talitonuina i latou ua a’afia, ma ua taumafai mai e fa’amatala mea na o’o ia i latou.”

E sefulu ma le tasi vaega o le Aoaoga, e na’o le lua e a’oa’oina i nei aso e lua, tolu i le vaiaso nei, ona fa’asolosolo ai lava lea se’ia o’o i le masina o Tesema 2019, fa’ato’a mae’a ai lea a’oa’oga faapitoa.