Tala I Vaifanua

$150,029 FOA’I AMERIKA SAMOA MO LE MANU SAMOA

O se aotelega o le foa'i a Amerika Samoa i le sailiga tupe a le Manu Samoa sa faia i le teritori i le aso Tofi o le vaiaso ua te’a e fesoasoani i le Manu Samoa mo le Ta'amilosaga o le Ipu o le Lalolagi i le Lakapi na maua a le $150,029.

Sa saunoa le Palemia o Samoa, Tuilaepa Sailele Malielegaoi, e fa'afetaia le lima foa'i o le atunu'u, ae maise foa'i e $100,000 a le faigamalo a Amerika Samoa.

O le aso Gafua o le vaiaso lenei sa tuuina atu ai e le afioga i le kovana, Lolo Matalasi Moliga ia Tuilaepa se lipoti fa'amaumau o tupe na aoina i le sailiga tupe a le Manu Samoa, e pei ona fa’atautaia e le Ofisa o le Kovana.

Mai le taimi o le ava o le feiloa'iga na mua'i fa'asolo ai le Uilipaelo, sa maua ai le $2,651, peita'i, o le fa'asologa lona lua o le Uilipaelo mai le vasega o faatonusili na maua ai le $2,955. O le aotelega o le ma'au ma le a'ao foa'i o le atunu'u atoa sa mafai ona aoina mai e ala i le Leitiofoni, na maua ai le aotelega e $44,423, lea ua aotelega ai le aofaiga ua fa'ailoa.

Ua fa'ailoa fo'i le agaga fa'afetai o le kovana i le pa'au mai o le afioga le Palemia mo lea fa'amoemoe. "O lou auai mai i lenei fa'amoemoe, ua fa'amalosia ai fo'i loto o tagata uma o Samoa o lo’o nonofo iinei e foa'i, ae maise o le mamalu lautele o Amerika Samoa, ina ia foa'i ma lo latou loto malie ina ia sao ma uli le alo atu o le Manu Samoa i lana taumafaiga.”

"Ou te iloa lelei le agaga o tatou tagata, e fia fesoasoani, e agaga foa'i mo se fa'amoemoe lelei, pe matitiva e tatou te matitiva fesagai lava ona o le ava fatafata ma le agaga fa'aleuso moni. O le a se foa'i ua taua'aoina e i matou i lenei itu, tau ina ia silafia ua avatu ma le loto malie. O le agaga tonu o le ola feso'ota'i fa'asamoa, o se agaga e pei o upu, "O se ato fevailia'i." Po'o le a se fa'i fua e maua i lenei itu, tau ina ia silafia lelei, o mea lava o fa'atoetoe ua avatu, ona o le ola feso'ota'i ma le feva'aia'i  fa'asamoa, e le o tu'ua ni lo ae avatu ni lo."

Ua mae'a fo'i ona ave le tusi fa'afetai tele a le Kovana Sili i ona uso a ta'ita'i, le afioga le Failautusi o le Mataupu Tau Samoa, Kovana Itumalo, ae maise fa’atonusili a le faigamalo.

I lana lea tusi na ia fa'ailoa atu ai lona agaga fa'afetai, "Aua e le 'asa le faiva ma se maumau, i lagona e fai a'e ona o se fa'aiuga mai ia te ia i lea lava taeao, sa leai se leo faitio poo ni manatu na lagavale, ae ua fa'ato'ato'a le tai o finagalo ma talia lo'u fanoga. Fa'afetai i lo outou manatu mai!"

Ua faailoa fo'i e Lolo, le mafuaga ua ia manatu ai e foa'i le $100,000 mo le Manu Samoa.

"E i ai mea sa matua mana'omia e le tatou malo e fesoasoani mai ai Samoa, e le'i tali ese ai lava le Palemia ma sa vave fo'i ona ia fa'atinoa mai. O feoa'iga tau Va'alele mo le Manu'atele, e le'i atoa se masina ae ua amata ona fa'amautu mai lea manaoga ma ua tatou aeae ai nei i lea lava tautua, e le'i motusia lava."

"O le tatou Kamupani I'a, e tele le mana'omia sa i ai, ona o ni tagata faigaluega. Ana le a'apa mai fo'i Samoa i le polokalama o lo'o ua fa'amautu nei, semanu ua leai nisi e tau'avea le tele o lea mana'omia. O ala e le faigofie, ae fa'afaigofie o le agaga fa'asamoa lea o le ato fevailia'i i mea e lelei ai, ma fa'aumiumi ai manuia mo tatou faigamalo e lua."

"O ala o feso'ota'iga ma isi malo o le Pasefika ina ia latou fa'aaogaina le tatou Hawaiki Cable, o isi malo uma nei e lava ma totoe le sao o le afioga le Palemia, ina ia oso a'e isi malo fa'aatumotu nei e fa'aaoga le Hawaiki Cable, e maua ai e tatou isi alagatupe fesoasoani i le tatou tamaoaiga tausi."

"O le afioga fo'i le Palemia sa fesoasoani tele ina ia mautu le avea ai o Amerika Samoa o se totino o le  Polynesian Leaders Group, peita'i o lea ua tatou le gafatia ona talimalo ai i le fonotaga i le masina nei. O lea o le a malaga usufono ai le afioga le Sui Kovana Lemanu Peleti Mauga ma nisi. O lo'o i ai tatou mataupu e mana'omia ai ona so'ofa'atasi ai i tatou ma isi malo o le pasefika ina ia fa'alautele atili ma fa'amautu atili ai le tamaoaiga maua o Amerika Samoa."

"E mautinoa e i ai isi mataupu o lo'o fa'aolioli mai, e mana'omia ai le malosi o feso'ota'iga a le afioga Tuilaepa aua ua loa ma ua lau silafia lana tautua ma ua iloga fo'i ana mea e fa'atino i totonu o lona malo ma le vasa pasefika e ala i so'otaga fa'ata'ita'i o malo fa'aatumotu. E mafai ona tino ma o'o na mana'oga pe tatou fa'amalosia so'otaga ma o tatou uso i Samoa. E tasi lava i ta'ua, e tasi la ta gagana, o tatou o uso tuofe, e le tau talatalaina."

"Ua lagona leo o faitioga ma le agaga o'otia, e le sao lava se fa'aiuga ma ni manatu e fa'aalia e tete'e i ai, ma e talia fa'aniualeale fanoga aua o fanoga sa'i ole atunu'u, e ao ina fa'aalia. O a'u o le ta'ita'i, e taumafai i se mea e lelei ai mo nei, o a taeao ma le alua o le faigamalo a Tutuila ma Manu'a. E taumafai fo'i ae le atoa ni atu i le liu o si o'u va'a."

"O le ala fo'i lea o le fa'afetaia o uso a ta'ita'i o vaega ta'itiasi o le tatou malo, aua sa to'a le tai o finagalo i le taimi atoa o le taligamalo i lea lava taeao. Sa le lagona pe laga se leo, fa'afetai lea i le mau papale, le onosa'i fa'aleta'ita'i lelei, ma le alofa mai fo'i i se fa'aiuga ua fai atu, aua sa manatu lava i le fa'aiuga ma le fa'atamali'i ia au ma sao lelei."

"I le tupulaga talavou o le atunu'u, e alu aso ae sau aso, o outou e avea ma ta'ita'i o le lumana'i. I le taimi nei ua outou le mailoa ala ma mafuaga o nei fa'aiuga, ae sau aso alu aso, ona outou tutu lea ma tepa i tua, e moni lava, o le ta'ua agaifanua faaleuso, ia sili ona mautu ai lou alofa atu, i taimi lelei ia e manatua e fa'asoa se mea ua e maua, ae maise lava fo'i  taimi o le pagatia, ia sili ona e latalata i lou uso. O Samoa lava tatou te gape atu i ai i taimi uma o le pagatia, i sana fa'asoa fa'ale'au'au mai, i taimi o fa'aletonu fa'anatura, e muamua lava taula mai le MV Lady Naomi ma se uta o se foa'i, pe itiiti pe tele, ae ua iloa le agaga na mafua ai. Fanau aua le matau tele i le tupe, a'o le agaga moni na faia ai, ia sili ona manino lona fa'agaganaina."

ALI'I SUESUE O LE ALITITAI DR ROBERT BALARD - MAUAINA LE TITANIC

O le ali'i su'esu'e i le alititai o le sami Dr Robert Ballard, lea saia mauaina toega o le Meli La'u Pasese o le Titanic, ua i ai nei i le tatou Malo.

Ua malaga fa'apitoa mai ina ia ona faia sailiiliga mo fa'amaumauga i lo tatou gataifale i le tatou alititai. Ua aumaia o ia e le National Marine Sanctuary i lona va'a suesue o le E/V Nautilus. I lea va'a ua aumaia ai fa'apitoa masini e sailiilia ai le tatou gataifale.

Pe a mae'a le malaga mai lenei a Ballard ma lona va'a o le Nautilus, ona tu'uva'a lea e na te sailia toega o le va'alele na pa'u i le samo o le tama'ita'i o Amelia Earhart, lea na ulua'i ta'amilo i le lalolagi i lona tama'i va'alele.