Tala I Vaifanua

TUAI TATALA HOPE DIALYSIS CENTER - 2 MASINA TOTOE GALUEGA

Ua fa'afetaia le o'o mai o le ali'i foma'i Fa'apitoa o Fatuga'o ma ituaiga gasegase e ono lamatia ai, le ali'i foma'i fa'apitoa Dr. Jean Letarte. O ia o se foma'i na mae'a ana a'oa'oga fa'apitoa i lea matata tau le soifua maloloina i le tausaga e 1975 ona soso'o lea ma lona maua o ona laisene e galue i Amerika i le tausaga e 1980.

Na ia tatalaina lana pisinisi e va'aia ai e ia ana lava gasegase tau le Fatuga'o i Phoenix Arizona i Amerika i le tausaga e 1992 ma ua fa'ato'a tapunia e ia i le 2018, ina ina malaga mai e asia le avanoa i le teritori, pe mata e fiafia i ai, ina ia galue ai.

 Dr. Letarte na soifua a'e i Kanata, ae tupuga mai lona tina i Falani, ma ua mafai ona tautala, tusitusi ma malamalama lelei i gagana Falani ma le fa'aperetania.

Ua atoa le 30 tausaga o le soifua faigaluega o Dr Letarte i le togafitiga lea o gasegase tau Fatuga'o, lea e na amata mai ona galue ai i Kanata ona soso'o lea ma lona faigaluega ai i Falani i le falema'i o Necker, ma sa faigaluega i Phoenix, Arizona i le tausaga e 1989.

Ua ia mae'a tusia ma lomia ni tusitusiga fa'apitoa tau ia ituaiga o gasegase ma ua fa'aaogaina mo vasega fa'afoma'i o Fatuga'o i Iunivesite o Laval i Quebec City, lea sa ia mua'i mauaina ai lona fa'ailoga fa'afoma'i MD. O ia fo'i e avea ma polofesa fa'apitoa mo a'oa'oga o vasega fa'afoma'i a le Falema'i St France d Assise, Iunivesite o Laval i Quebec City.

Sa galue fo’i i le malo o Saudi Arabia ma isi fo'i setete o Amerika lava.

O lana pisinisi Fa'afoma'i o Fatugao muamua na ia fa'atuina Fresenius Kidney Care ma o lea ua amata fa'atauina ese lana Pisinisi o Talavai Fa'amamatoto i Phoenix, ona ua i ai lona naunauta'iga, "Ua ou o'o mai i Amerika Samoa nei, ua fiafia fa'atasi i ai i ma'ua ma lo'u to'alua, e le televave le olaga e pei o fafo, ae ua lelei lea mo ma'ua aua ua matutua fo'i, peita'i o lo'o mana'omia tele le ma'ua itu o togafitiga o gasegase tau le Fatuga'o i le tatou teritori nei."

Fa’ailoa e Dr Letarte, "O le ituaiga tau lea ou te fiafia tele i ai, masalo o le fa'asinomaga lava lea a le Atua ina ia ou sau e fa'aaoga iinei la'u taleni o le ituaiga togafitiga ina ia mautu lelei le auaunaga mo tagata tino lelei ma le aulelei o Amerika Samoa. Ou te fa'afetaia fo'i lenei avanoa, aua o se atunu'u ua matua aga tausa'afia tagata o lenei malo."

Ua ma’ea le fono a Dr Letarte ma le Komiti Fa'afoe o le Hope Dialysis Center, ma ua latou fa'ailoa mai, "E to'a ono foma'i na talanoa i ai le susuga Chris Fisher, peita'i o Dr Letarte ua ese mai ai lona agaga, e matua fiafia fo'i i le tatou malo nei, ma ua iloga e ia, ua matua mana'omia lava se foma'i fa'apitoa mo le Fatuga'o i le tatou nei malo, ona ua siisi'i pea lava i luga le aofa'i o e fa'amama toto i le atunu'u."

O se tala mai se tasi o totino o le Komiti Fa'afoe, "Mai le tala'aga o le soifua galue ma tautua o Dr Letarte, ua iloga ai e matua agava'a o ia, e le va'ava'aivale fua i nisi mea se tele e ese mai lona galue ma togafitia le soifua gagau o le atunu'u e ala i gasegase o le Fatuga'o. Ua tele fo'i atunu'u o le lalolagi ua ia galue ai, e le taumateina lona agava'a i nei ituaiga o togafitiga."

Ua i ai nei le fa'amoemoe vave lava, "o le masina o Setema poo Oketopa o lenei tausaga, ua tatau ai loa ona amata togafitia e ia gasegase Fa'amama Toto i le tatou falema'i fou Hope Dialysis Center i Vaitogi."

Ua mae'a sainia lana Konekarate mo le lua tausaga i le Hope Dialysis Center ma ua naunau o ia e fa'aaoga lona tomai fa'afoma'i e togafitia ai tatou tagata ua fa'agasegasea i le Fa'amama Toto.

Fa'amalo fo'i i le atunu'u i le lava papale, ona o le fa'atuai lava o le mae'a ona fausia lelei ina ia pasia le maota o le a fa'atuina ai lea falema'i fa'apitoa mo le fa'amamaina o toto o le mamalu o le atunu'u, o le ala lea o le tuai fo'i ona amatalia ona va'aia ai o tatou gasegase i le latou falema'i fou lea.

Ina ua fesiligia, ae fa'ailoa mai, "Ina ia mautinoa e pasia le fale mo le galuega o lo'o fia fa'aaogaina i ai, o lea e fa'atalitalia pea le mae'a lelei o le fausaga o lea fale ma faia fo'i nai fa'asa'oga o le fausaga ina ia mautinoa e pasia lelei pe a o'o ina o'o mai le pasiga o tatalia nei, ona fa'ato'a amata lea o le tautua mo le mamalu lautele o le atunu'u, ua mae'a fa'atautaia togafitiga o le fa'amama toto."

UNA'IA LAGONA FIA TAUVA I TA'ALOGA - DAVID APINERU

O le ali'i na togisilia i le Vasega 8 a le Samoa Baptist Academy i Happy Valley, David Pinoy Apineru, na malaga i Niu Sila ina ia faafiafiaina le uso o lona tina i lana taumafaiga, peita'i e le o se tasi e fiafia e tauva i ni ta'aloga.

Peita'i ua fa'ailoa mai e ia, i sana tusi i le Samoa News "Ua ou fetaui i le tama'ita'i o Valerie Adams, o ia o se tasi o lo'o ta'uta'ua ai Niu Sila i lana togi Pulu Mamafa i le Olimipeka, Commonwealth Games ma tauvaga uma lava i Niu Sila latou. O ia e fa'alua ona umia le pine auro i le Olimipeka, fa'afa ona umia le pine auro i le Commonwealth Games, ae faitau fa'afia sefulu ona ia umia pine auro ma tulaga muamua i tauvaga o ta'aloga Afeleti a Niu Sila lava ia."

"O le nofoaga e koleni fa'apitoa ai lenei tama'ita'i e saunia ai o ia ma ta'aloga fa'avaomalo mo Niu Sila o le nofoaga o koleniga mo ta'aloga i Macolin i Switzerland. O le sau ai fo'i e asiasi mai i lona aiga i Niu Sila ua ou maua ai lenei avanoa le 'au maua, e mate fa'atalofa ai ma ia, o lona a'ao fo'i lea e togi ai le pulu mamafa mo ana pine auro e tele ua ia maua."

Ina ua fesiligia David Apineru i sona lagona aua o lea ua ia maua lea avanoa matagofie, ae fa'ailoa mai e ia, "Ua fa'aosofia lo'u lagona, e tatau fo'i ona ou tula'i e va'ai po'o le a tonu lava le ta'aloga e tatau ona ou ola fa'atauva ai, e ese mai le api ma le penitala."