Tala I Vaifanua

17 SUISUI FA'AU'U VASEGA SUISUI AFIO'AGA O LEONE

E to'a 17 i latou ua fa'ai'u ma le manuia faiva i le ASCC - Land Grant FCR Vasega Suisui i le aso ananafi. O i latou nei sa amata mai o atoa le to'a 25 ina ua amata le vasega mo le fa masina lona umi na fa'atulaga ai. Peita'i o nisi tina ua malaga i fafo, ua le mafai ona fa'aauau le vasega ona o nisi tuatuaga fa'aleaiga ua le ma'alofia.

I lea to'a 17 o i latou na taua'aoina tusi pasi ae maise o La'au Suisui sa fa’atauina e le afioga i le faipule ia Andra Samoa mai Leone, e fesoasoani ai i lea vasega, ia agava'a e fa'atino ma fa'aaoga le latou tomai ua maua, e fa'aleleia ai o latou lotoifale, i le tamaoaiga tausi o latou aiga.

I le sauniga fa'apitoa mo lea fa'au'uga o le 'au suisui e to'a 15 tama'ita'i ma le to'alua o Ali'i, sa auai le Fesaosoani Katoliko Joseph Stowers ma le faletua, le afioga Senatoa Faiivae Iuli A. Godinet ma Ilaisa Godinet, fa'apea le mamalu o le Pulega a le ASCC Land Grant ACNR/FCR lea na oo ane uma i latou, e fa'afetaia fo'i le pulega a le afioaga i Leone, ona o le taumafaiga lenei, ua atoa i ai le 3 o vasega a lenei Polokalama Suisui ua mae'a ona faia faau'uga.

O le fa'afetai fo'i a le susuga le Fesoasoani Katoliko sa ia fa'ailoa ai, "O le sailiga o le atamai i faiva alofilima e leai se pa pupuni ma le tagata soifua, se'i vagana ua le fia silafia ele tagata ia tomai. O le avanoa fo'i ua maua e nei tina e talisapaia ai le fa'asoa mai a le tama'ita'i faia'oga fa'apitoa o lea tomai po'o le taleni, e ao ina ave i ai le fa'afetai tele. Aua e le lau maua nisi e fia fa'asoa lo latou iloa ma le taleni, e fa'aleleia ai nisi, se'i vagana o se tasi ua le manatu na'o ia lava, ae ua fa'asalafa lana taleni mo nisi ona o le agalelei ma le loto lelei. Fa'afetai la i le tama'ita'i faia'oga Diana Tarrant mo lana vaega tele i lenei aso."

E ese mai lea vasega suisui ae ua i ai se isi fa'aopoopoga, ona ua sapaia malosi e le pulega a Ali'i ma Faipule o le afio'ga o Leone le fa'amoemoe lelei, ua latou saunia fo'i se isi vaega o le pale matagofie i ao o tamaita'i ma ali'i ua agava'a i le su'isu'i, ua taua'aoina ai la'au suisui fou, e fesoasoani atili i se fa'amoemoe lelei ua amata nei i le vasega ua pasi i le matata o le Su'isu'i.

Na tula'i fo'i le afioga Senatoa Faiivae Godinet ma ia fa'ailoa, le agaga fiafia o lea afio'aga, pe afai o le a tula'i mai nei tina uma ma latou su'ia le anoanoa'i o toniga mo aiga, toniga mo Ekalesia, toniga mo a'oga a le fanau, i taimi e mana'omia ai, aua o le isi lea alagatupe fa'aalu tele ua matauina pe a o'o ina poto aiga, mafutaga a tina, ekalesia, aoga i totonu o le afio'aga, e tatau lava ona faia toniga.

"Aua tou te fa'avaivai i se mea lelei ua outou maua, ae ia tula'i mai ma fa'atino i so'o se taimi, e lelei lena, e sefe ai le tupe mo se isi mea, ae su'i e le tina la'ei o le aiga atoa. Fa'alelei atili lou taleni, aua le moe ae mataala ma faaleleia atili lau taleni ua ausia i lenei aso. O se faamoemoe ola lea i totonu o aiga ma le afio'aga. Fa'amalo le tauata'i i mea e lelei ai i tatou uma, ma fa'amatagofie atili ai lava Leone,” o saunoaga fiafia lea na fa'apa'i malu ai i le vasega fa'au'u.

 le tama'ita'i faia'oga Diana Tarrant sa tula'i ma ia fa'ailoa, o le afio'aga o Leone, o le nu'u lea ua sili ona tele vasega ua ia faatautaia ai. Ona o le naunau lava o Leone e fia maua mea lelei uma, ua fa'ailoa fo'i, i meaalofa ua saunia e i latou na tausoa fa'atasi ma ia i le fa'amoemoe e fa'atautaia le vasega ua fa'au'u nei. Fa'afetaia ai e ia le tama'ita'i Faipule Andra Samoa mo lona tau'au ma le fa'atauanau i taimi uma lava, e ao ina faia le vasega lenei.

E tolu ai lenei o fa'au'uga ua fa'atino mo le Vasega Suisui a le ASCC Land Grant ACNR/FCR. O le fa'au'uga muamua ia Me 2019 o le Aoga Suisui sa faia e le LDS i Leone, ona soso'o lea ma le fa'au'uga o le vasega suisui i le Ekalesia Katoliko i Aua, ae o lea ua toe lona tolu mai i le Katoliko i Leone, peita'i o le lona fa o le aso lea i le Ekalesia Assembly i Iliili, tua ane o le Malae Tapolo.

MAE'A FAAFOU VA'A FAGOTA I MANU'A - 9 VAIASO KONEKARATE

E 9 vaiaso o le Konekarate a le ali'i fau va'a Leoititi Maselino Ioane, lea sa fa'akonekarate e le Matagaluega o le Puipuiga o le Vaomatua ma le Gataifale [DMWR] e  toe fa'afou uma va'a fagota i Manu’a.

Na muamua fa'afouina va'a o Ofu ma Olosega, ae tomuli ai lona taimi atoa e 4 vaiaso mo va'a fagota i Ta'u, Fitiuta ma Faleasao. I Ta'u, Fitiuta ma Faleasao, e valu va'a ua mae'a ona toe fa'aleleia; ae 6 i Ofu ma Olosega.

O se saunoaga a le susuga le Fau Va'a, sa ia fa'ailoa ai lona fiafia ina ua mae'a faia lea galuega i Manu’a. "O Manu'a lava latou e fa'amoemoe tele i le gataifale ma fa'ato'aga lo latou tausiga lelei o le soifua maloloina. Ua iloga e fiafia o latou tagata i le fagota ina ia maua se fa'alumaga mo aiga i Tutuila e avea ma oso o latou malaga mai i Tutuila. Peita'i e olaola fo'i lo latou soifua naunauta'i ia fa'aleleia lo latou iloa lelei ona fagota i le afaafa loloa ma upega ina ia mafai ona fa'atau mai a latou fagotaga i le Kamupani."

O i'a e maua mai i fagotaga e matele ina fiafia tele le vasega o tautai e fagota mai i'a e fiafia i ai le atunu'u mo le latou fofoga taumafa. O i'a fo'i na e aumaia e fai ma oso o malaga masi'i mai i Tutuila nei, ae o le tele o i'a tetele e maua, e aumaia lea e fua i faleoloa tetele ma le kamupani pe afai lava ua iloga ua gafatia ona vave fa'ao'o mai. O lo'o fa'amaumauina uma nei fagotaga ma galuega toe fa'aleleia o Sa Fagota o le Manuatele e le DMWR.

E na'o le to'alua lava sa auai mo lea galuega fa'akonekarate e fa'aleleia va'a, le susuga le fauva'a ma lona soa, Leoitiiti Maselino Ioane ma Niualele Isaia.

Ina ia sami le toe fa'aleleia o latou Sa Fagota, ua fa'atulaga ai mo le sisigafu'a a Manu'atele i lenei tausaga ia Iulai 16, o le a fa'atautaia ai se latou tauvaga fagota I'a Lapo'a. Ona o lea ua mae'a mai va'a fagota o le Manu'atele, ua mafai fo'i ona soso'o le konekarate a lea ali'i fauva'a mo le toe fa'afouga o va'a fagota Alia mo le aufaiva'a. Ua fa'asolo lava e le DMWR lea lisi o va'a e tatau ona fa'afou.