Tala I Vaifanua

GALUEGA FA'AMAMA & FA'AMATAGOFIE AMERIKA SAMOA - MASI & TAUSALA MAGALITA JOHNSON

I le fa'ai'uga o le vaiaso na te'a nei, sa usupo ai le Tausala Lalelei o Amerika Samoa, Magalita Johnson ma lana 'au galulue malosi, o lona aiga, uo mamae ma tupulaga o le latou afio'aga sa maua le avanoa, fa'apea fo'i ma lana Ekalesia LDS Pago West Stake e fa'amamaina le a'ai o le afio'aga o Vaitogi e afua mai le nofoaga o fa'atagi ai le Laumei se'ia pa'ia mai le Malae Kirikiti a le Pisisami, ma fa'asolo mai ai i le matafaga i tuafale o le tina matua o Poiva Reid.

"E 35 taga tutumu i le lapisi sa mafai ona aoina e le matou au galulue i le taeao o le aso To'ona'i na te'a nei. O se galuega aoga tele, ua va'aia fo'i i le taimi na fa'atino ai lea galuega, ua amata ona fa'afiafiaina nisi na maimoa e fa'amama ane latou tafafale ma ua faapena ona fa'aso'o atu le galuega i tuamaota ma ua ta'alao atoa ai le lapisi i le afio'aga. E moni lava, e va'aia loa e nisi o lo'o faia galuega fa'amama a nisi aiga tuaoi, e fa'apena loa fo'i ona galulue ane latou i latou lumafale ma tuafale. O fa'ata'ita'iga lelei fa'apea e sili ona aoga ma avatu ai se fe'au taua i le to'atele i le taimi lava e fa'atino ai,” o se tala lea a Johnson.

O lenei le poloketi sa ia ofoina e na te fa'atinoa ma una'ia malosi i le taimi e tula'i ai e avea ma Tausala Lalelei ma ua le tu'ua la e ia lea faiva, ae ua taumafai lava e fa'aauau. E ui fo'i ina tele tuatuagia o le tofi, ae fa'aavanoa lava sona taimi mo lea fa'amoemoe lelei aua sa ofo e na te fa'atino i lona tula'i mai.

O lenei galuega o se galuega fa'apa'aga ma le Ofisa o le  Siosiomaga (ASEPA), peita'i e le'i fa'atasi atu i latou i le fa'amoemoe i lea taeao.

O le tama'ita'i peresetene o le MASI Meafou Imo ma le latou fo'i vaega o sui mai le aiga fa'apea ma le susuga le Peresetene o le Pago West Stake, Adney Reid ma ana Fesoasoani ma faufautua sa o'o ane uma ma le autalavou mai lea siteki ina ia fa'atino lea galuega lelei.

"O le fa'amatagofie o le atunu'u, o le galuega fa'amama lea e faia e tagata uma ua maua le avanoa, ma o se galuega e le tau fa'atali se'ia faia se fono, ae o le taga'i loa i le mea e fa'aletonu, ma tago atu loa e fa'aleleia,” o se tala fiafia lea a Johnson ma lona agaga fa'afetai tele ia i latou uma sa latou galulue i lea taeao. Sa ia toe fa'amanatu mai, "Manatua o a'u nei, a'o oe taeao, ia faia se galuega e fa'amatagofie ai lo tatou atunu'u pele.”

PASIA FDA FA'AAOGAINA O TUI DENGVAXIA MO LE DENGUE FEVER

Ua pasia e le Food & Drug Administration (FDA) a le Malo Tele le fa'aaogaina o le vaila'au muamua mo tui puipuia e togafitia ai le Dengue Fever, ae ua faia lea mo na'o malo fa'ateritori o Amerika, lea e aofia ai Amerika Samoa, Guam, Palau ma CNMI ma Puerto Rico, lea e fa'ailoa mai e masani ona maua ai o latou tagata i lea ma'i.

O le igoa o lea vaila'au o le "Dengvaxia" na gaosia mai e Sanofi Pasteur, ma o le a fa'aaogaina fo'i na'i le fanau talavou mai tausaga e 9 se'ia o'o i le 16, ae le fa'ainumia ai fanau iti ma tagata matutua.

O i latou fo'i e fa'ainumia ai, ua na'o i latou ua fa'amaonia lava o lo ua maua i le Dengue ma i latou fo'i ua fa'amauina e fa'atasi ona maua i le Dengue. Afai e le usita'ia lea ituaiga o fa'amaumauga ua fa'ailoa mai, e le manuia le sui ua gasegase i lea togafitiga, ae o le a fa'ateleina ai le inifeti o lona tino.

Ua fa'ailoa mai o nisi o fa'amaumauga a Sanofi e tusa o lana sueseuga i lea vaila'au, ua fa'ailoa ai, e mafai ai ona togaifitia i latou ua mae'a maua i le Dengue, ae o le a fa'aletonu ai le sui e le'i maua lava i le Dengue.

Ua fa'ailoa mai fo'i sa fa'aaogaina lenei vaila'au mo le togafitiga o le Dengue i Filipaina, peita'i ua taofia nei ma ua fa'aleaogaina lea ituaiga o fuala'au mai le togafitiga o le Dengue i Filipaina, ma ua lusi fo'i le Laisene o le foma'i ma e sa latou galulue i lana falema'i ona o le fa'aletonu o lea ituaiga o fuala'au ma a'afiaga na maua ai gasegase ona ua latou inumia le Dengvaxia.

O le ali'i Foma'i o Sanofi ma sui e to'a 6 o ana tagata faigaluega ua lusi uma latou laisene e avea ai ma foma'i i Filipaina ona o a'afiaga o tagata mama'i aua sa latou inumia lea fuala'au.

E 19 atunu'u sa fa'ataga ai le fa'aaogaina o le Dengvaxia mo togafitiga o le Dengue, ma e aofia ai ma nisi o atunu'u o le Iuni a Europa, ae o le fa'atonuga sa fa'amamafa i le inumaga o lea fuala'au, ua inu ai na'o le tagata sa mautinoa e fa'atasi na maua i le Dengue, o se fa'atagaga lea mai le World Health Organization.

MANA'OMIA ONA FA'AILOA E TE MANA'O I LE PENFED CREDIT UNION

Ua fa'ailoa mai i tusitusiga fa'afeso'ota'i mai a le susuga le Pule o Galuega uma a le Faletupe o le PenFed Credit Union i Washington DC, "E mana'omia e i matou ona mautinoa le to'atele o i latou e fia tautuaina e le PenFed pe afai e ulufale atu ma fa'atu le  lala i Amerika Samoa.”

O le a i ai fa'asalalauga fa'alaua'itele o le a faia i Nusipepa ina ia fa'amautu ai so'otaga e fa'auia atu ai lou suafa.

Peita'i a'o le'i o'o i lena fa'asalalauga, ua mae'a fa'amautu tapenaga muamua i le va o le Ofisa o le USArmy Recruiter i le Laufou e avea ma ulua'i avanoa e amata tatala ai Tusi Tupe a Matua ma latou Fanau ua mae'a fa'atauto pe o le a tauto e ulufale i vaega au a le Malo tele.

Ua mautinoa nei ua mae'a fa'afeso'ota'i le fa'atutu o masini tala tupe ATM a le PenFed Credit Union i le AFFES, po'o le PX i le lotoa i Tafuna a le USArmy Reserve, ma o le a logo mai le isi taimi e mae'a ai lea fa'atulagaga.

Feso'otai i luga o le so'otaga Uepesite www.penfed.org mo nisi fa’amatalaga.