Tala I Vaifanua

FIAFIA FA'ATASI VFW POST 03391 & HAWAII; ULUA'I SAMOA TULA'I STATE COMMANDER

O le fa'aiuga o le vaiaso na te'a na fa'atasia ai le Sosaiete a Fitafita Tuai mai Hawaii, ma le Post 03391 i Amerika Samoa nei, fa'atasi ma Samoa, e patipatia le tofiga o se tasi o Vetereni Amerika Samoa, VFW State Commander, ua nofoia nei e le afioga Igafo Maria Brown-Va'a.

"O lenei tofiga, e le nofoia lava e se Vetereni Samoa talu ona fa'avae mai le Veterans Of Foreign Wars [VFW]. Peita'i ina ua malaga so'o mai lava le ali'i sa avea ma State Commander i Hawaii mo le fa'alauiloga o lenei Asosi, e so'ofa'atasi ai tautua a nisi o Vetereni sa tautua mai Tafa o Taua a'o tula'i e avea ma fitafita tiute o Vaega Au a Amerika, sa ia matauina, o lo'o i ai nisi o tatou Vetereni Samoa e agava'a telei le avea ai ma State Commander i Hawaii, lea e fa'auluulu i ai le VFW a teritori o le Pasefika."

"O le ala lea ua fesoasoani atili mai ai lava o ia, e fa'amasani a tatou Vetereni i ala o le tautua a le VFW, ituaiga taimi e tatau ona fa'aalu e faia ai tiute feso'ota'i ma isi VFW i isi setete uma lava, ma afua ai ona mautu le tofiga lenei, ua ulua'i se'ei le tatou Vetereni Tama'ita'i o Igafo Maria Brown-Va'a."

"I lona tula'i mai, ua iloga ai le moni lava o le manatu, e matua agava'a Vetereni Samoa i tofiga fa'apenei, avea ma ta'ita'i ma e iloa lelei ona faia tiute fa'ata'ita'i i vaega eseese o le Vaega Au a'o tiute i faiva fa'afitafita, se'ia o'o mai ina litaea ma ua fai fo'i tiute i nisi vaega e toe tautua ai Vetereni."

O molimau nei sa fa'afofogaina i lea fa'atasiga, ina ua amata ona tu'u avanoa le polokalama fa'asolo i sui lautogia e tatau ona saunoa. Sa auai mai fo'i ma le Nationa Commander, Fernandez ma lona Faletua lea e avea ma State Auxillary President. O le isi sui na malaga mamao mai, o le VFW State Commander mo Iowa, o se uo mamae a Igafo.

O i latou uma nei sa fa'afofogaina lafoga eseese e taualoa ai le tautua a Igafo i lona avea ma Fitafita a'o Tiute i leUS Army, silia ma le 20 tausaga, lea fo'i ua avea ma Vetereni, ae o lo'o maualuga fo'i lana tautua i le vasega o Vetereni e ala i le taumafaiga e talosaga latou penefiti, ma latou fa'amaonia fo'i le avea o nisi o fitafita sa tautua ma Fitafita Tuai po'o Vetereni i le tatou nei Teritori ma Samoa fo'i.

Saunoa, Lutena Kovana, Lemanu Peleti Mauga, "O le afioga Igafo o lo'o tula'i i le tofiga Fa'asuaga o le ma'ua itumalo. E ese mai la i lana tuatua matavela i le VFW ma le VA.”

"E fa'afetaia le soifua tautua o lenei tamali'i o le atunu'u, fa'afetai aua olo'o maua pea le malosi ma le mafaufau tonu e faia ai fa'ai'uga lelei, fa'ata'ita'i i tofiga o tutula'i ai, e tautuaina vetereni, ae maise le atunu'u.”

“E ui ina tamali'i tofiga o tula'i mai ai i le atunu'u, ae ua e le va'ai i na tulaga ona o le agaga alofa i le vasega o Vetereni uma o le atunu'u, ua e taumafai ia au lau fesoasoani ia i latou uma, o se alofa lea ua e fa'ava'ai i ai i latou inu i a latou penefiti ona o lau taumafaiga.”

Saunoa le Faipule i le Konekeresi, "E le tau sulaina le toga lelei. O le a fo'i se upu e avatu, e le avea ai le auaunaga ua mae'a ona fa'atino, pe to'ese ai fo'i sina meaitiiti mai le tofiga ua mae'a pale ma se'ei ai lenei alo o Amerika Samoa, o se Vetereni ua leva ona ia fa'aeaina le atunu'u i lana tautua."

"Lea ua tatou patipatia ona faiva, ae ua mae'a fo'i ona fa'aeaina le atunu'u i lana tautua atoatoa,” o le tala lea a Aumua Amata. “O le aso lenei o se toe fa'apine o le tautua matavela, ua fa'amauina ua faamaite mea fo'i o ia i lea ulua'i tulaga ua nofoia e se Vetereni Samoa, fa'afetai tauata'i Igafo Maria, mai le nu'u itiiti o Masausi, ua afua mai ai mea tetele.”

O le tofiga o lo'o seei ai Igafo, e toe suia i le masina o Iuni, peita'i ua fa'aalia e nisi iloga o le VFW, o lo ua mausali mai le latou fa'ai'uga, e toe fa'aauau pea le tofiga o Igafo, pe afai o le a toe loto i ai o ia.

ASIASI KOSI PISINISI AOGA MAUALULUGA KOSI PISINISI [BAOA] KOLISI

I le aso Lulu ole vaiaso ua te'a na asia ai e Kosi Pisinisi i A'oga maualuluga i le atunu’u Vaega o Kosi Pisinisi a le Kolisi Tu'ufa'atasi, ina ia mautu so latou silafia o ituaiga mataupu, ituaiga amio, ma le ituaiga tagata e mana'omia ona tau'avea Kosi Fa'apisinisi pe a ulufale i le Kolisi Tu'ufa'atasi o Amerika Samoa.

"O lenei vaega ole Kolisi e mana'omia le tagata e sau i le a'oga i aso ta'itasi, ae ua i ai lona naunauta'iga e fia iloa ala e mafai ai ona e fa'atautaia se pisinisi, fa'amaumau mea uma ae maise o tulaga o tupe ma oloa gaosia e fa'atau atu, ia iloa lelei fo'i ona soifua feso'ota'i ma tagata lautele, lea e avea ma nisi e aoga i ai lau pisinisi, ae maise ia e iloa e te galue malosi i meaa'oga, tapenaga o lou tagata ia iloa soifua tumama ma aloa'ia, aua lava ne'i upuleagaina,” o le saunoaga lea a le tama'ita'i Faia'oga Pisinisi Dr Faofua Va'apu'u-Fa'atoafe.

E sili ma le 200 fanau a'oga sa auai i le Multi Purpose Building a le Kolisi.

"E le tau fa'afefe, ae le mafai ona e pasia se fa'ailoga a le Kosi Fa'apisinisi i se C i le fa'aiuga o lou tausailiga o se fa'ailoga. Ua iloga le matati'a lena a le Kosi Fa'apisinisi i le tatou Kolisi nei. E te pasia mea uma ma le B aga'i i luga."

I le potu sa faia ai le folasaga e Professor Taua'i, sa ia fa'ailoa, "Ina ua mae'a la'u tautua i le US Air Force na ou toe taliu mai i fanua, ae ou va'aia e i ai se avanoa ou te faia'oga ai ma toe fa'amamafa nisi o mea taua e ao ina fa'aeaina ai nisi o fanau a le tatou atunu'u. Na fa'ato'a sailia ou tusi pasi i le tatou Kolisi, ma o'o lava ina avea ma Polofesa mai le tatou nei lava Kolisi. Lea ua ou faia'oga ma toe a'oa'o atu outou i tusi lava nei ua fa'aaogaina i Iunivesite ma Kolisi i fafo.”

"Mai le vasega o fanau a'oga sa soloa'i atu iinei, ua o atu i fafo ua manuia uma mai o latou taumafai. E i ai se taimi fa'atepa outou i fa'amaumauga maumaututu mai le Kosi o Pisinisi a le Kolisi, ona outou mautinoa ai lea o le fa'amaoniga o nei fa'amatalaga uma. E matou te feso'ota'i lava ma matou fanau a'oga sa amata atu iinei a latou taumafaiga, lea ua taliumai nisi ma tautua i le malo ma pisinisi iinei, ua fa'aeaina taumafaiga."

"E tali lava fua o galuega, ae o le tima'iga, ave muamua ni outou tausaga amata i le tatou nei Kolisi, fa'afaigofie i nai o outou matua le taumafaiga, fa'ato'a soloa'i atu ai i fafo a outou taumafaiga, ae ua gafatia e outou suiga o le olaga tuto'atasi o le a feagai ma outou i fafo, fa'atasi ai ma le toe taumafai i a'oa'oga."

SISI FU'A AMERIKA SAMOA & MALO TELE LOTOA MIDKIFF ELEMENTARY

E tusa ai ma se saunoaga a le ali'i Pule A'oga i  le a'oga tulaga muamua a Midkiff Leone, sa ia fa'ailoa ai, "Ou te le mailoa le aso mulimuli na i ai se fu'a ua sisia i le lotoa a lenei Laumua i Leone, aua ua fai si leva e le o i ai ni pou e sisi ai Fu'a a le Malo Teleo Amerika ae maise fo'i o le agiagia a le Malo o Amerika Samoa."

O le galuega na fa'afao i ai a'ao o le VFW Vetereni sa Tautua i Taua, sa latou tapenaina ai ni pou auina sa'o mai fafo, fa'atasi ai ma le toe galueina lelei o le Saini po'o le Fa'ailo ale Laumua - Leone Frank Midkiff Elementary.

O nei mea uma sa va'aia e le vasega o fanau a'oga i aso ta'itasi, i itula ma taimi o paganoa ai totino uma o le VFW, o latou punonou e faia lea galuega lelei.

O i latou nei, e le o nisi o i ai ni o latou alo i lenei a'oga, peita'i ona o se tasi o sui totino o le latou VFW, le sui pule o le a'oga, ua po'ia fo'i o ia i gasegase fita ma o lo'o tauivi pea o ia ma ona togafitiga, ua a'e ai se taofi o le VFW Amerika Samoa Post 03391, o le a latou fa'atinoa le mana'oga sa fa'aalia e lea tina e fia faia mo le a'oga o galue ai o ia.

O le aso Faraile ua te’a sa fa’apaia ai le galuega ua ma’ea.