Tala I Vaifanua

FA'ASOLO AOGA USCOAST GUARD I FA'AILO, AVEA'I MA FA'AFITAULI I LUGA O VA'A

O le toe aso o a'oa'oga fa'apitoa a le US Coast Guard ina ia mautu le iloa ma le oso tatau o auva'a fagota uma i mea e ao ina fai pe a o'o mai fa'aletonu a'o fagogota i le tai loloto, ma sa iloga ona aoga lea tulaga i sui faifaiva uma sa auai e utupupuina le sosia o lea fo'i aoaoga aoga mo i latou.

"O le taua o le a'oa'oga lenei, ia iloa le mea e fai, pe a fa'alogoina le leo o le alaga ua mu le va'a, pe ua magoto le va'a, po'o le i ai se tasi ua lavea pe pa'u i lalo i le sami, o mea ia e ao ina nofouta le auva'a atoa, i le tu ma le aga e fai, ia mautinoa ua toe fa'aleleia le fa'aletonu ua alia'i,” o se tala lea a Frank Thompsen.

"Ia muamua, mautinoa lou saogalemu a'o e oso atu e fa'atino se galuega lavea'i. Ina ia mafai ona e saogalemu, saogalemu atu ai ma le sui ua e taumafai e lavea'i. Pe o le gafatia fo'i ona tineia o le afi o sasao a'e, a'o tumau fo'i lou saogalemu ma le saogalemu o le sui o lo'o lua va'ava'alua i le galuega lavea'i mai le mu."

O tulafono maoti o le tineia o Mu, e ao ina o ta'ito'alua. E tatau ona pipi'i lava le sui o mulimuli mai i le o ta'imua ma le tane tinei mu i le tau'au o le sui o muamua. O le la'ua so'otaga e i ai le fa'ailo e mafai ai ona e iloa, o lo'o mana'omia e le o muamua, po'o le o mulimuli se fesoasoani, pe o lo'o lelei lava mea uma.

"Tasi le po i le tauau, ua iloa e tatau ona aga'i loa e fa'atino le galuega, lua po i le tau'au ua fa'ailoa mai o lo'o lelei mea uma, tolu po i le tauau, ua e mana'omia le fesoasoani, fa po i le tau'au, solomuli ma o ese loa mai le nofoa o sasao ai le afi."

I le a'oga na matua tofusia uma lava le 'au faifaiva ma avanoa e taumafai ai ona tineia le afi ua sasao. E amata mai lava i le taimi ua va'aia ai, ua mautinoa ua i ai le afi ua sasao i luga o le va'a.

"O le Vala'au e saunia ai tagata uma mo le mea e ao ina faia. Ia tofu paga ta'ito'alua ma la'ei vave mea faigaluega e fa'aaogaina mo lou saogalemu, pulou ma le va'aiga a tinei afi, aga'i atu i le tane kesi mo le tineia o le mu, tatala ma fa'ata'ita'i po'o lelei ma tumu le tane kesi lea. A leai saili le tane o lo'o tumu ma faata'ita'i aga'i atu loa i le afi, faaaoga le avea'i ua mae'a a'oa'oina ai, ia mautinoa o lo'o feso'ota'i oulua e to'alua i taimi uma."

O nei a'oa'oga ina ua mae'a le tineia o le afi na faia i le Pakaga o Ta'avale i le Pago Plaza ma sa fa'atinoina e le vaega fa'apitoa a le Coast Guard ma fa'aaogaina lea o le Va'a a le DMWR ina ia malaga uma ai i latou na auai, e fa'atino le tele o isi gaoioiga e tatau ona latou iloa lelei, i luga o le va'a.

Ua fa'aaogaina o le pu o le va'a, e fa'atolu ona fa'ae'e le pu, soso'o ma toe pu'upu'u, e fa'ailoa mai e ese fo'i lena fe'au. A umi le fa'ae'e le pu o le va'a pe tusa ma le 10 sekone ua fa'ailoa mai, ua magoto. O mea uma na sa matua fa'ata'ita'ia i lea folauga. Ina ua o'o i le aoauli, ona faia lea o latou fa'ailo e ala i tauasuasu. Ia iloa tatala le tauasuasu, ma iloa lelei ituaiga e fa'aaoga mo le ituaiga avea'i o fia fa'ailoa mai i nisi e maua atu ai le fesoasoani.

E tolu Kamupani Fai Vaa I'a o lo'o ua aofia i le vaega lenei, o i latou o lo'o i le va o le 40-60futu le tetele o latou va'a fagota ma e fa'aaogaina ai le faiva o le afaafa loloa ma le Upega.

TOE MANUMALO SAMOANA I LE "SPEECH FESTIVAL 2019”

I le tuavaga a a'oga maualuluga i le Speech Festival 2019 sa faia lea i le USArmy Reserve Center i Tafuna i le aso Lulu, sa iloga ona fa'aitiitia vaega e tauva ai le fanau, ma ua fa'atulaga fo'i ona tauvaga e le to'atele fanau a'oga e aofia ai.

O le auau o le Tauvaga Lauga i le gagana peretania na fa'atulaga mai e le Komiti ua fa'aigoaina, "O le Lalolagi o Fa'aaliga!" ma ua na'o le lima vaega ua tauva ai i lenei tausaga.

O a'oga e to'afitu na tauva: Leone, Tafuna, Samoana, Fagaitua, Nuuuli VocTech, Kanana Fou ma Marist Fa'asao. Ua faia lea suiga tele i lenei tausaga i le polokalama ona ua vave ona fa'ailoa mai le fa'aiuga a le Faigamalo o le a fa'aaogaina le fanau a'oga maualuluga i lenei tausaga e tapena maia le Siva ma Pese o le Fu'a 2019.

O le a’oga maualuga a Samoana sa manumalo i le 2018 ma ua toe pale fo'i le Samoana i lenei tausaga ina ua latou avea le manumalo o le 3 o vaega e fitu na tauva ai aoga 2019. Tulaga lua Tafuna High School ae tulaga tolu Leone High.

I le vaega o le Impromtu Speech, ua toe avea nei e le tama'ita'i o Yasminna Sanchez mai Samoana, tulaga lua Nuuuli VocTech High, ae tulaga tolu Fagaitua High.

O le isi vaega na tulaga muamua ai fo'i Samoa o le Oral Interpretation lea na tula'i ai le tama'ita'i o Eciladen Ulu ma fa'atino le Statued Traditions - tusia e Selina Tusitala Marsh. Na tulaga lua ai Fagaitua ae tulaga tolu Tafuna High i lea vaega.

O le isi togisilia a Samoana o le Free Style Poetry, lea sa latou fa'atinoa ma tauloto ai le solo "I Was 13", e na'o le to'alima i latou na tauva i lea sao o Samoana ma ua pale fo'i i le manumalo. Tulaga lua Leone High ae tulaga tolu Fa'asao Marist High.

I le tauvaga a le Story Telling, na manumalo ai le tumafaiga a le tama'ita'i o Faith Seiuli mai Leone High i lana fa'atinoga o le tala ia "Snow White". O Tafuna High na tulaga lua ae tulaga tolu i ai Samoana.

I le vaega o le Original Script Writing na sola ai Fagaitua High ma le mea atoa i le latou fa'atinoga o le tala tusia e le tama'ita'i o Tamali'i Faga - "D is the New A". Tulaga lua Fa'asao Marist ae tutusa ai Leone High ma Samoana High i le tulaga tolu.

 TO'ATOLU MANUIA FA'ATAUGA FUA PACIFIC INDEPENDENT DISTRIBUTORS

I le aso To'ona'i talu ai na fa'ataunu'u ai le Fa'atau Foa'i a le Pacific Independent Distributors (PID) mai faleoloa e tolu sa fa'atuataia ai le latou Fa'alauiloaga o latou Oloa ma le Se'i e faia ai, e iloa patino ai i latou e ao ina fa'atau e aunoa ma se totogi i le minute lava e tasi.

O faleoloa o le KS Mart, Kruse i Leone, ma Huang Mart , o faleoloa na sa filifilia.

O le aso Tofi ua te’a na faia ai le se'i mai ia i latou uma sa fafao a latou pepa se'i i le atigipusa i nei faleoloa, i taimi uma lava e fa'atau ai e i latou oloa lautogia mo le se'i a le PID.

Mai Leone na se'ia ai le suafa o Vince Iuli. O le KS Mart i Iliili, na se'ia ai le suafa o Luisa Sipiga ma le tama'ita'i o Renee Afia i le faleoloa o Huang Mart i Satala. O i latou nei sa o'o loa i le aso To'ona'i ona tu'uina lea i ai o le avanoa e latou te fa'atau fua ai i so'o se oloa a le PID i totonu o le faleoloa sa se'ia ai o latou suafa. E matua uiga ese le vave o le Minute, ae na matua fa'atumulia lava ta'avale la'u oloa a le tagata ia ona o le mata'alia ma le vave o le gaoioi.

Ua fa'ailoa mai, o le a toe faia fo'i lea ituaiga fa'amanuiaga i le tausaga a sau a le PID, ma o le a faia fa'apea lava ina ia toe fa'afoi atu ai se tamaoaiga fa'asili a le PID i le mamalu lautele o a latou pa'aga o tagata fa'atau i a latou oloa o lo'o tufatufaina atu e fa'atau atu i faleoloa uma i totonu o le teritori.