Tala I Vaifanua

MALAGA AISA PISINISI & OLOA I SAMOA

E ui ina e na’o le to’alua fanau fa’au’u mai le vasega o Pisinisi a le tatou Kolisi i lenei afa tausaga, a le’i fa’avaivai ai le latou faia’oga ta’ita’i - Dr Faofua Va’apu’u Fa’ato’afe mai le taumafaiga ia o pea le vasega i asia pisinisi tumaoti gaosi oloa i Samoa.

“O sa la’ua fa’asoa mai e sili ona aoga mo le fanau o lo’o tausailia o latou tusi pasi nei, ina ia mautinoa e i latou, o a lava a’oa’oga o lo’o a’oa’oina i le potu a’oga, e tatau ona va’ai tino i galuega fa’atautaia o pisinisi gaosi oloa, le fita o latou taumafai atili e fa’atautaia i aso ta’itasi ina ia mautinoa ua lava ma totoe oloa gaosi, ia faia le galuega e tusa ai o tulafono tausi o le soifua maloloina lautele o le a fa’aaogaina nei oloa, fa’atasi ma tulafono fo’i o fefa’ataua’iga ia mataituina, ae fa’asilisili i le fa’amoemoe o le tagata faipisinisi, ia taugofie le oloa ina ia alumia ma ia gafaria e le lautele ona fa’atau, ina ia le motusia le mo’omia o le latou oloa,” o se saunoaga lea a Fa’atoafe.

“I le malaga lea a i matou, ua moni lava le naunau o le matou pulega o vasega pisinisi, e tatau lava ona o malaga i matou e asia falegaosi oloa e fa’atau atu i maketi i fafo fa’apea fo’i le atunu’u lava ia, aua e iloa patino ai e i matou ona fa’avasega a’oa’oga ua mae’a a’oa’o ai i totonu o potu a’oga,” o se tala amata lea a le tama’ita’i o Yolanda Burgos lea e to’alua i ai tamaiti aoga na malaga.

“Pe ana fai ae le malaga, e matua misi atoa lava le agaga fa’aosofia lea ua lagona nei, aua e moni lava o le a umia le fasipepa e fa’ailo ai ua pasia uma vasega, ae o le a ea se mea e fa’aosofia ai le agaga ina ia tula’i ma fa’atino le tomai ua maua i lenei vaitau? O le tala sa’o lava ia e le’o taitai ona gafatia e Amerika Samoa ona tula’i mai ona tagatanu’u e tausia lava i tatou i pisinisi ua tatou manatu ina ia fa’atutu e fa’atinoa lea tulaga,” o se saunoaga fiafia lea a Jamie Lauama le isi tamaititi a’oga na malaga.

E le gata i le tele o la’ua a’oa’oga ua maua ma fa’amaonia nei, ae ua va’ai fo’i ma ua maua mai ai le a’oa’oga sili o le fa’atinoga, na matua iloga ona fa’afiafiaina i la’ua e maimoa i so’o se vaipanoa o le taulaga i Apia sa maua le taimi e tafafao ai ma maimoa i fa’afiafiaga matagofie a le faletalimalo o le Tusitala lea sa alaalata’i ai mo le tolu aso ina ia fa’atino lea manaoga tupito fa’aleaoaoga.

Ina ua to’ai taunu’u, sa toe fa’atasi i latou ma matua i se aiga fiafia o le fa’afetai, i matua i le sapaia o gaoioiga uma sa fa’atino e saili ai le seleni mo le malaga ia mafai ona fa’atupe, ae maise lava o le tapua’iga ma le mau fa’atuatuaina o le aumalaga ina ia masii atu ma le manuia ae toe fo’i mai fo’i ma le ta’uleleia faatasi ma le tomai lautele ua mae’a taofia mau ona o mea sa moomia a latou a’oa’oga ua mafai ona va’ai patino i ai o fa’atino mai. Mo matua, sa fa’aagaaga fo’i e le vasega o pisinisi nai meaalofa tupe e fa’atino ai le alofa fa’asamoa o fanau i matua i mea uma ao latou ola taumafai i tomai ma a’oa’oga ae maise o galuega.

SAU IA BODY BUILDING & SIISII U’AMEA MAMAFA

Na fa’atautaia le Fa’aaliga Tino Lelei mo ali’i ma tama’ita’i a le “Sau Ia Body Building” ma ua toe manumalo ai nei Aunese Tauinaola i le siamupini i lenei tausaga.

Ina ua umia e le ali’i tino lelei o Amerika Samoa lea ipu sa ia fa’aalia, ‘Sa lilo i manatu e toe maua sa’u fa’alua i le manumalo, peita’i, e tatau ona matua tinou mai uma le tupulaga aulelei ma tino lelei o Amerika Samoa e tauva, aua e matua agava’a lava ali’i ma tama’ita’i talavou o le tatou atunuu i lenei fo’i fa’agatama. Ae ou te fa’afetai i le Atua ua ou toe mauaina lenei Ipu o le manumalo. Fa’afetai tele i le Kamupani o lo’o latou fa’atupea la’u taumafaiga, le susuga Aaron Forsgren ma le Kamupani. Fa’afetai sapaia o le fa’amoemoe maualuga.”

O le susuga le Peresetene o lea Asosi, Peter Reid Jr 111, sa ia saunoa e tusa o le taumafaiga o lo’o latou o fa’atinoa nei i le atunu’u, “O le tatou atunu’u e mautinoa o lo’o to’atele lava tama ma tamaita’i tino lelei o i ai, e le fesiligia lea tulaga, peita’i, e ao ina fa’aosofia i latou e auai mai ma tauva, e le na’o tagata tino tetele ma le maualuluga e aoga i ai lenei taumafaiga, e so’o se ituaiga tino lava e matua mana’omia ona teuteuina lelei, ma ia matagofie fo’i lau taumafaiga, ona e tauva lea, ae leiloa poo oe o le a manuia lau taumafaiga i le isi tauvaga o lumana’i.”

I le aotelega o taumafaiga uma a le Tama Tino Lelei sa maua lea e Jonah Tauafa, ma o ia lea o le a malaga fa’atasi ma Tauinaola i le tauvaga a le Ikaika i Hawaii i le masina o Iuni, 2017. Fa’ailoa mai a malaga fa’apitoa mai le alii sili le “Tino Lelei” i le lalolagi Stan “The Rhino” Efferding ina ia fa’aosofia fo’i le naunau o tatou alo talavou iinei, e oso i luga o le fua ma taumafai e tauva i le “Tino Lelei” i lenei vaitau a’o talavou i latou.

O lenei ali’i na mafai ona feso’ota’i ma le tatou Asosi Teuteu Tino, le Sau Ia Body Building, ona o lo’o nonofo i la’ua ma se tama’ita’i Samoa, ma o lea tama’ita’i, o lo’o ua ia fesoasoani atili i lona to’alua i lana fo’i pitola’au tau’ave o agave’a fa’apitoa i meaa’i paleni ma le fa’avasegaina o taumafa e ao ina tausia ai le tino lelei o lona to’alua, “The Rhino.”

Peita’i, i se vaega lava o lenei taumafaiga sa galulue fa’atasi ai le Asosi Si’isi’i U’amea mamafa lea e fa’auluulu fo’i i le susuga Ed Imo, na fa’atautaia ai si’isi’iga i le Lee Auditorium i le afiafi o le aso Tofi, Aperila 13, 2017.