Tala I Vaifanua

TO'A 4 TAMAITI MAUA SIKOLASIPI JSA - SUMMER 2019

E to'afa i latou o fanau a'oga maualuluga ua maua avanoa e malaga ai mo le Tu'uaga umi o a'oga i le 2019 i le polokalama a le JSA[Junior Statesman Program]. O i latou nei:Talofa Fe'a mai Tafuna High; Janillicah Harmon o Leone High; Baby-Serenalia Iona o Leone High ma Leilani-Ena Stanley-Galeai o le Pacific Horizons.

O le fa'atupega o nei avanoa e nafa lea ma le Ofisa o le Initeria Insular Affairs, ma ua aofia ai le totogi o Vasega ma le totogi fo'i o pasese ma toe taliu mai i le atunu’u.

O Fe'a ma Iona e malaga i la'ua i Princeton a'o Harmon ma Stanley-Galea'i e malaga i Stanford University mo la'ua polokalama fa'atautaia i le tu'uaga umi o a'oga ia Me - Aukuso 2019.

E to'a 29 isi fanau uma o lo'o ao'oga i a'oga maualuluga ua mae'a fo'i ona tusia suafa ma ua talia fo'i mo le JSA Program i le Tu'uaga lava lea o A'oga i lenei tausaga.

O le ulufale i lea polokalama e ao lava ina ausia togi e agava'a ai mo le JSA i ana mataupu uma o tau'avea i le a'oga, ia lelei fo'i lona tomai i tulaga fa'ata'ita'i i totonu o le a'oga, ma ia ia te oe le tamaititi a'oga le naunau e silafia ma a'oa'oina i mataupu tau faigamalo.

O le totogi a'ia'i o lou auai i lenei aumalaga mo le fanau e aoaoina ai i Iunivesite, atoa ai ma le nofoaga ma mea'ai e $5,650 i le Iunivesite o Georgetown; Princeton ma Stanford. E le o aofia ai ma lou pasese i le malaga atu ma le toe fo'i mai i le tinoitupe lea.

FONOTAGA AS CIVIC ANGAGEMENT COALITION & LOIA A LE FONO:

O le afiafi o le aso Tofi na fa'atasi ai sui o le American Samoa Civil Engagement Coalition (ASCEC) ma loia a le Fono Faitulafono ina ia fa'apupula i totino uma o le ASCEC, ala o galuega a le fono, seti o tulafono o lo'o fa'aaogaina i taimi uma, ae maise ai tulaga o le toe fa'auluina o se suiga i tulafono ua mae'a fa'aaogaina e fa'atautaia ai fonotaga a le Fono Faitulafono.

Na fesiligia Loia a le fono na auai, po'o le a se ala e mafai e le tagatanu'u, ona fa'aulu se pili fou mo tauaofiaga a le fono, pe fa'aulu fo'i se suiga i se tulafono ua mae'a pasia.

Na tali le tama'ita'i loia a le Senate, Mitzie Folau, o lea avanoa e ui atu i faipule ma senetoa o itumalo ta’itasi. Sa talanoaina foi le fa'asalalau fa'alaua'itele o tauaofiaga a le fono faitulafono e le KVZK-TV, e pei ona i ai i tausaga e tele ua te’a.

O le mataupu lona tolu, o le tulaga ua leai ai ni Komiti e se'ei ai isi sui e to'afa o le Maota o Sui ina ua mae'a le tofitofiga a le Fofoga Fetalai o le Maota.

E i ai se suiga o lo’o taoto nei i le Maota o Sui, mo le suiga o tulafono a le Maota ina ia mafai ai e faipule uma ona tofu komiti e tautua ai.

"O le mana'oga maualuga lava o lo'u faipule, o le fa'ataunu'u lea o tiute na tofia a'u e lo'u itumalo ou te faia, ia fai lou leo i totonu o le maota o sui,” o se tala lea a Vesi Fautanu, faipule mai le Manu'atele, sa i ai i le fonotaga a le ASCEC.

"O le pule fai to'atasi a le Fofoga Fetalai o le tofia lea o sui o Komiti ta'itasi ma latou ta'ita'i Komiti. O le mea e ao ina faia e lo'u faipule ia maua so'u avanoa ou te saofa'i ai i se komiti aua lo'u itumalo,” o sana toe fa'apupula mai lea o lona taofi e tusa o lona sao i lona itumalo.

PAE & AULI - SUESUEGA TULAGA FUALA'AU & VAILA'AU FA'ASAINA

Ua tula'i mai le "Fa'alapotopotoga a le Pae & Le Auli" latou te faia se suesuega i le tulaga ua o'o i ai le fa'afitauli matuia o lo ua a'afia ai le atunu'u, "Fuala'au Fa'asaina ma Vaila'au O'ona i Amerika Samoa."

O lenei fa'alapotopotoga o latou totino uma lava o tina o le atunu'u, a'o i latou o ni tina sogasoga e tausailia vaifofo i tulaga o a'afiaga matuia o lo'o a'afia ai soifuaga ma'ale'ale o le tupulaga faia'e o le atunu'u, ae maise lava o le fanauiti, lea e omia i nei mea uma, ae leai se tua i ai i latou, i o latou pagatia.

O le afioga Le'iataua Leuga Turner ma Ipu Avegalio Lefiti lea o lo'o tutu malosi ai i lea fa'alapotopotoga, ma ua avea fo'i i latou ma to'omaga i nisi o fa'afitauli o lo'o alia'i ua matua'ina mai i totonu o lotoifale o aiga.

Ua latou feso'ota'i ma le Ofisa o Mataupu Tau Samoa, i le ta'ita'iga a le afioga le Ma'opu Mauga Asuega ina ia fa'afaigofie teisi lava le galuega sailiili o le a fa'atautaia nei. E ese mai lea so'otaga, ae ua latou feso'ota'i fo'i ma le fesoasoani malosi mai a le Vaega o A'oa'oga Fa'apisinisi a le ASCC, le susuga le ta'ita'i Dr Faofua Va'apu'u Fa'atoafe ma Vai Lam Yuen ina ia latou fa'atautaia ma fa'amaumau le tele o latou sailiiliga.

"Ua matou saili i ala e mafai ai ona o'o i tua i afio'aga ma pogai o mea uma, le lotoifale o aiga ta'itasi, lea la ua sulufa'i mai ai i le Ofisa o Mataupu Tau Samoa i lona fa'aao, le afioga le Ma'oputasi ina ia mafai ona galulue fa'atasi ma le vasega o Pulenu'u ma latou Leoleo Afio'aga i le fa'atinoga o lenei suesuega taua tele,” o se tala lea a Lei'ataua.

"O le fa'anaunauta'iga lea ua i ai, ia mafai ona to'omaga le Malo i se suesuega fa'apea, ia mafai ai ona latou fa'aaogaina e talosagaina ai ni fa'atupega, aumaia nisi o tagata ua i ai tomai fa'apitoa, ma toe aumaia ai ma foma'i iloga e mafai ona latou fesoasoani i le to'atele o i latou ua a'afia ona o le fa'aaoga sese o vaila'au o'ona ma fuala'au fa'asaina,” o se tala lea a Lefiti.

O se la'asaga muamua lava lea e ao ina faia i so'o se talosaga i fafo mo le aumaia o nisi e mafai ona fa'alauiloa lautele le fa'afitauli, ma soalaupule ni auala e o'o mai ai se fesoasoani, tineia ma togafitia le fa'afitauli, e tatau ona mua'i faia le suesuega lenei i lona aotelega e aofia uma ai le atunu'u.

"Pe afai e taua si au fanau ia te oe, e ao ina ia tu'ufa'atasia o tatou loto, tausaili i ala e mafai ai ona fa'ataututu atu i le sofa'i mai o fuala'au fa'asaina ma vaila'au o'ona ua a'afia ai le fanau, ma ua fa'afaigata ai lava ona faia e matua ni fa'atonuga ma talia lelei e le fanau, ma aga'i ai i luma so latou lumana'i manuia. Tutu fa'atasi e mafai ai ona maua se fesoasoani, ae le mapu ai fo'i le nofo tatalo i le Atua e fa'aali mai ia i tatou uma ala o le manuia e alagatatau mo i tatou ma o tatou aiga,” o se toe fa'amalosi lea a Lefiti.

O le amataga o lenei suesuega e faia ai Mati 23, 2019. O le Pae fo'i ma le Auli, i latou ia sa faia le suesuega aoga tele, na mafai ai ona fa'aulu le pili ma ua pasia lelei, i le tulaga o le matua o fanau e mafai ai ona fa'aipoipoina tama'ita'i Samoa, ua suia nei mai le 14 i le 18 tausaga le matutua ona fa'ato'a agava'a lea e fa'aipoipoina fa'aletulafono tama'ita'i.