Tala I Vaifanua

LUA NOFOAGA ELIA ELE ASPA SAPALAI SUAVAI MAMA MO TAFUNA

Talu mai le fa'afitauli lea na feagai ma le Pulega o le Eletise ma le Suavai Taumafa, ASPA, ua ulu suavai o tafega tetele i le nofoaga o lo'o pamu mai ai le suavai e sapalaia Tafuna seia pa'ia Fagatogo i le amataga o le tausaga nei, ua manatu le ASPA e eli nisi nofoaga e lua i Tafuna e fuafua e pamu mai ai le suavai taumafa.

O nofoaga e lua e le o fa'amautu tonu mai po'o fea, ae o Tafuna lava o lo'o ua i ai, ma le fa'atalia fo'i se fa'atupega o lea galuega tele, ae ua fa'ailoa mai e le CEO o le ASPA i le taimi nei, Wallon Young, "Ua fa'atupe le galuega lenei e le ASPA lava latou."

O le tele o poloketi tetele fa'apea mo le ASPA e masani ona fa'atupe mai e le Ofisa o le Enetia a le Iunaite Setete, ae fa'auia mai lea i le Ofisa o le Enetia a le tatou Malo [TEO], po'o le ASEPA fo'i e fa'atupea galuega nei mo le suavai mama.

Fa'ailoa e Young, "Ona o le tele o le afaina o le soifua maloloina o le mamalu lautele o le atunuu lea e afua mai Tafuna se'ia pa'ia Fagatogo, ua le fa'atali ai le galuega lenei mai le fa'atautaia loa i se tupe ua i lima fa'asoasoa a le ASPA, e tatau ona tele atu isi pamu o le vai e fa'atutuina i Tafuna nai lo le pamu vai lava e tasi lea e i Fagaima, e fa'amoemoe i ai le sapalai o le suavai mama."

"O le lelei, a ulufia loa le suavai palapala i lea pamu ona taofia lea, ae fa'aoso mai le sapalai mai le isi nofoaga fou lea ua eli, ae se'i fa'amama fo'i le pamu tele i Fagaima,” o le tala lea a Young.

O lo'o elia fo'i le eleele i Lauli'i mo le sailiga o se punavai e le a'afia tele i le sualua ona o le masima, ma ua taofia nei lea galuega se'ia mua'i elia punavai i Tafuna. E to'alua alii Inisinia mai fafo o lo ua fa'afaigaluega nei i le poloketi lea o le suavai mama, ae lua fo'i rigs a le ASPA ua fa'atulaga e faia le galuega lea.

O le fa'afitauli fo'i o lo'o fa'asea ai nisi ona ua le malosi le sau a le suavai i paipa tai mai i latou maota ma laoa, ua fa'ailoa mai e mafua lava ona ua tapunia nisi o punavai sa fa'aaogaina ona o le eleelea o le suavai ua fa'auia mai ai i paipa.

O fa'asea nei e lua o lo ua lutia ai pea le auaunaga o le sapalai o le suavai mama i aiga, ofisa pisinisi ma matagaluega uma fo'i o le malo mai Tafuna se'ia pa'ia Fagatogo, o le palapala o le suavai, ma le vaivai o le masau mai o le suavai i paipa i falenofo o aiga.

Fa’ailoa e le ASPA, ua fesuiaia lava e i latou punavai e fa'aaoga mai e sapalaia le vaega lea ua fa'atonuina ina ia tunu le suavai ma vaimama fa'atoa fa'aaogaina ai, Tafuna i Fagatogo, le vaega pito i toatele aiga o lo'o nonofo ai i le atunuu atoa o Amerika Samoa.

Ua fa'ailoa mai ua mae'a aveina i fafo se vaega o le suavai lea e le mama mo le sailiga ma suesuega. Ua maua mai le tala fiafia, e leai e le oni otaota fou lea ua i ai i le tatou suavai, ma e le afaina ai se tasi i mea ua aofia i le tatou suavai.

MANA'OMIA FESOASOANI LEONE TAOFIA TALEPE FALE LOTOA A'OGA

Ua fa’ailoa e le fa’atonu o Aoga, Dr Ruth Matagi-Tofiga e matua mana'omia lava e le matagaluega le fesoasoani malosi mai le afio'aga o Leone, ina ia tau taofiofia le osofa'ia o falea'oga ma fa'aleaga falea'oga.

"E talosagaina lava le mamalu o le Pulega a Ali'i ma Faipule ae maise le Malosi o le Nu'u i le Aumaga, ina ia mataituina ma tau sailia tonu i latou ua faia pea le masani ona osofa'i o falea'oga, fa'aleaga meatotino e fa'atino ai a'oa'oga a le fanau, ma ia maua tonu i latou o lo'o faia pea lea masani. O nisi o potu ua ave'esea ni mea taua o i ai, ae o nisi potu a'oga ua na'o le fa'aleagaina lava o mea uma, ae le o avea se mea,” o se tala lea a Matagi - Tofiga.

O le vaiaso ua tuana'i sa osofa'ia ai fo'i le aoga ma fa'aleagaina meaa'oga a le fanau, ae maise fo'i o masini Komipiuta e taugata ma aoga tele i aoga a le fanau ma le faia'oga fo'i latou.

I le aso Lulu fo'i na faia ai le Career Day a le fanau, sa fesiligia lava pe i ai se mea o tupu i le latou aoga, ae tali le fanau o vasega sa tima'ia e le Media, "Talepe falea'oga o matou ma fa'aleagaina uma matou Komipiuta ma api fa'apea ma tusi e fai ai matou a'oga."

Na fesiligia loa, ua outou iloa se tasi na faia lea soligatulafono? O le tali lava o le leai, ae masalomia e i latou o fanau ta'atua lae inupia ma o mai e su'e ni mea e fa'atau atu e maua ai latou pia.

O tali na, ae le mafai ona fa'amaonia fa'aletulafono lea tulaga. O le tala mai faia'oga e ona nei potu ua fa'aleagaina, "O le faigata ona o matou lava tupe lea e faaalu ina ia aumaia ai le tele o mea ua fa'aleagaina e faia ai lesona mo le fanau.”

175 ATUNU'U AUAI AUTA'A'ALO OLIMIPEKA FA'APITOA - SPECIAL OLYMPICS

E to'a 18 le aumalaga lea ua malaga atu nei i Abu Dhabi mo le Ta'aloga Olimipeka Fa'apitoa, lea e matua masani ai Amerika Samoa ona maua mai a latou pine Auro, SIliva ma Apamemea. Ua toe 7 aso ona amatalia lea o le fa'amoemoe.

Ua fa'ailoa mai e 175 atunu'u ua mae'a lesitala 'au taa'alo i le Special Olympics.

Ua fa'ailoa fo'i e nisi e masani ona malaga i nei tauaofiaga muamua, "E o'o atu loa le fanau, e le tau va'aia e matou nei le 'au malaga, e va'ai uma lava e le au faigaluega ale Olimipeka fa'apitoa, e o ane lava i latou e fa'avasega ane latou taimi o ta'aloga ma faufautua fo'i i taimi e tauva ai i latou i ta'aloga ua fa'atulaga e tauva ai. O le lelei ia ona tausia o le fanau e sui ua fa'afaigaluega e le Special Olympics. O le to'atele fo'i o i latou o faigaluega ai, e faigaluega e le totogia po'o volenitia."

O le aumalaga a Amerika Samoa o lo'o aofia ai ma le foma'i fa'apitoa ma o lo'o malaga ma sui o le Sosaiete i lona laulauatofi, fa'apea ma matua fo'i o nisi o le fanau.

O le sui na mauaina le pine auro i le Olimipeka Fa'apitoa ua te'a atu, o le tama o Justin Lutu, o lo ua toe malaga fo'i i lenei tausaga. O ia e tauva i tu'uga tamo'e.

O le 'au ta'a'alo a tama'ita'i ta'ito'afitu Football lea ua masi'i fa'atasi i lenei tausaga, ae to'atolu ia Justin Lutu le 'au tamomo'e i tu'uga afeleti.

I le taimi nei ua fa'atalia mai le 'au malaga lenei e le tama'ita'i o Tafa Tua-Tupuola i Abu Dhabi ma e o atu loa malaga sa'o lava i le a'ai o Al-Ain, o i'ina o le a fa'atasi i ai e fa'amasani i le tau o lea atunu’u. E tatala taaloga ia Mati 14.

O lenei tausaga o le latou 'autu ua tu'uina mai "The Determined" po'o le "Fai ma le Loto!" Alu i ai Team Amerika Samoa, "Fai ma le Loto!"