Tala I Vaifanua

PO FIAFIA HAMBURG SUD & TAUALOA TAUTUA "ISABEL HUDSON"

O le afiafi o le aso Lulu, Mati 6, na fa'atasia ai pa'aga a le Samoa Pacific Shipping ma le Kamupani Va'a a le Hamburg Sud i le faletalimalo o le Tradewinds mo le latou Po Fiafia fa'aletausaga.

I lea fo'i fa'atasiga, na iloga ona matua mafuli le Pulega ma le Aufaigaluega a le Samoa Pcific Shipping lea e avea ma kamupani feso'ota'i a le Hamburg Sud i Amerika Samoa, e folasia lo latou lima mafola talimalo, a'o le fa'afiafiaina fo'i o le lautele o a latou pa'aga, ua o'o lava i le Malo, Kamupani tetele i le atunu'u, ae o latou uo mamae fo'i talu mai ona tatala o latou faitoto'a e tautuaina le mamalu lautele o Amerika Samoa.

I le fa'atasiga lea, sa fa'aaoga tatau lava e sui uma na aofia lea afiafi i se 'aiga matagofie, o mea taumafa fo'i o ma'oi lava mai le gataifale, ae maise o le fa'asoloatoa ona tatala le avanoa i so'o se mea taumafa ua mo'omia i lea taimi o le afiafi.

Na tula’i le afioga Fonoti Isabel Hudson ma fa'alauiloa le tamaita'i Fa'atonu na malaga mai le Ofisa Autu i New Jersey o le Hamburg Sud, Alice  Marlowe. O lea sui na malaga mai o le Fa'atonu o le South Seas Service, Hamburg Sud.

Sa saunoa Marlowe e fa'afetai ma fa'amalo i pa'aga uma ua fa'atasi mai i le fa'amoemoe, ma lo latou mau fa'atuatuaina o le tautua a le Hamburg Sud i le fela'ua'iga o a latou aseta i luga o le moana.

Ona faliu lea ma fa'ailoa le meaalofa na aumaia sa'o mai le Ofisa Autu o le Hamburg Sud mo le tama'ita'i o lo'o fa'atautaia le Ofisa Autu o i latou e feso'ota'i ai le latou auaunaga ma le Malo o Amerika Samoa i le Ofisa Va'a o le Samoa Pacific Shipping, ia Fonoti.

"O lenei meaalofa na fa'ao'o mai ia te a'u ina ia ou taua'aoina i a'ao o se tasi ua iloga lana tautua i le matou Ofisa Va'a i Amerika Samoa, ua atoa nei ia Mati 2019 le 15 tausaga o lana tautua. Malo le galue, fa'afetai mo le fa'amaoni, aua o le seleselega ua maua nei e le Hamburg Sud i ana fela'aua'iga o Oloa e feso'ota'i mai ai ma Amerika Samoa, e afua ona o le galuega faifaipea ma le mae'ae'a ua fa'atino lea e Isabel mo i matou uma."

Sa fa'ailoa nisi o suiga tetele o le a faia mo lenei tausaga i la latou tautua.

"O le aso 31 Mati 2019, ua muta ai nei le tautua a le Capt. Taputapu, le va'a sa la'uina mai uta ma avatu fo'i uta i fafo. Peita'i o le a le tu'usaunoa ai le tautua. Ou te fiafia e fa'alauiloa atu, e suia uma lava fela'ua'iga sa faia e le Capt Taputapu i le va'a fou ua fa'aigoaina "Capt. Paepaetele." O lea va'a o le va'a moni lava a le Hamburg Sud. O lona uiga ua fa'aleleia atili le tatou tautua i le Alamoana o le Pasefika nei,” o se fa'alauiloaga lea a Marlowe.

Na ata le tama'ita'i ma ia fa'ailoa mai, "E ui ina faigata ona fa'aleo upu fa'asamoa, ae ua ou taumafai e fa'atalofa atu ia te outou uma i la outou gagana, atoa ai ma le fa'afetai mo la outou so'otau'au mai i le tautua. Ae ua ou iloa fo'i, o le uiga o le Paepaetele, o le ma'a sili ona lapo'a, o le ma'a lea la'a folau mai e la'u uma mai ma avatu i fafo tou aseta. Fa'afetai tele,” o lana tala lea ma mae'a ai lana saunoaga matagofie.

Saunoa ia Fonoti ma ia faalauiloa le Sosaiete ma Fa'alapotopotoga ua avea ma latou pa'aga i tausaga e tele, ma o nisi fo'i taimi, ua alofagia e le Hamburg Sud a latou taumafaiga aua o nei Sosaiete ma Fa'alapotopotoga e alolofa tele ma tautua le mamalu lautele o le atunu'u.

"Fa'afetai i le Lions Club of Pago Pago, ona o a'u o le Liona! ae maise fo'i o le tele o latou tautua e faia mo Amerika Samoa ma ona tagata." Na taua'ao le ula ma le fa'afetai i le susuga le Peresetene Chris King sa auai mo le vala'aulia fa'apitoa.

"Fa'afetai Rotary Club mo le tele o a outou galuega fa'atino mo le atina'e ma le lelei o ni tautua mo le mamalu lautele o tagata Amerika Samoa ma le latou faigamalo." Na taua'ao le ula ma le fa'afetai i le susuga Will Sword ma le susuga Joe Weilemann sa auai.

"Fa'afetai Shriners Club mo le tele fo'i o a latou tautua eseese ua fa'ae'e i nisi o le mamalu lautele o le atunu'u e ala i tautuaina o gasegase o nisi o fanau talavou, ma ua iloga ona fa'afetaia lo outou tulai mai i taimi o le mana'omia, ma outou asiasiga a Foma'i fa'apitoa i le tatou falema'i tele, e va'aia ai gasegase fa'apitoa nei." O le ula ma le fa'afetai sa taua'aoina lea i le susuga Taotasi Archie Soliai sa auai mo le Kamupani I'a a le Star Kist Samoa Inc.

Ma le toe fa'alapotopotoga na fa'aleo i ai le fa'afetai o le, "Hope House” i Fatuoaiga. Na taua'ao le ula ma le fa'afetai i le tama'ita'i o Noelani Solofa sa auai.

TAGATANU'U AMERIKA NESIONALE - MALAGA SA'O MAI HAWAII I SAMOA  MANAOMIA PEMITA

Ona ua i ai isi Kamupani Va'alele ua latou tautuaina le va o Hawaii ma Samoa, ae ua matele fo'i ina fa'aaoga e i latou o umia Tusi Folau Amerika a'o i latou o Nesionale o Amerika, po'o e na soifua a'e i Amerika Samoa ae le'i talosgaina fo'i e suia latou sitiseni i le "Sitiseni Amerika!"

Ona o lo'o i ai le pemita lea e totogi mo e uma na soifua i Amerika Samoa e $10 e ulufale ai i Samoa, e ao ai ona feso'ota'i le Ofisa o le Konesula a Samoa i le teritori, sui o latou aiga, ina ia mafai ona fa'auia mai i ai o latou pepa malaga, fa'apea ma se kopi o le Tusi Folau o i latou e fia ulufale i Samoa, a'o le'i o'o ane lana faigamalaga i Hawaii mo le toe vae o lana faigamalaga i Samoa.

O iina i le Ofisa o Vaalele lea e te malaga ai i Samoa e tatau ona fa'ao'o atu i ai le kopi o lou pemita e te ulufale ai i Samoa, ma e fa'ato'a mafai ai fo'i ona e ulufale i lau va'alele e te malaga ai i Samoa.

O lona uiga e tatau ona mua'i fa'ao'o le pemita ua mae'a totogia i le Ofisa o le Konesula o Samoa i Fagatogo i le Ofisa Va'alele o e malaga ai i Samoa i Honolulu, ona fa'ato'a fa'ataga lea o le alo o Amerika Samoa e malaga sa'o ane i Honolulu i Samoa. A leai e taofia lava oe. Lona lua e fa'ao'o fo'i lea lava pemita ua mae'a taua'aoina i le Ofisa o Femala'iga i Faleolo Samoa, e iloa ai lea ua mae'a totogia lona ulufale i Samoa.

MALAGA TAUPOU MANAIA I NZ MA LE "TUIGA" MO LE FALEMATA'AGA I AUKILANI

I le atoaga o le 20 tausaga o le Taupou Manaia Dancing Group, ua vala'auina fa'apitoa ai i latou ae maise le afioga Tuifa'asisina Korina Seiuli ina ia ona tu'ufa'atasia le "TUIGA" ina ia fa'alauiloa i le latou Falemata'aga tele i Aukilani, Niu Sila.

Ua fa'atula'ia fo'i ma le isi lala o le Au Siva i lea a'ai. O lona uiga ua tolu, malo ua fa'atulaia ai le ausiva lenei, lea na amatalia i Amerika Samoa, Samoa, Orange County, Kalefonia a'o lea ua fa'atula'ia nei i Aukilani.

"O lenei ausiva ua mae'a fa'aulufale i agaga o le fanau, ia iloa ona sausaunoa fa'a-Taupou ma Manaia o Samoa, o latou la'ei ia iloga ai fo'i lo latou lea manulauti. Ia amio a'i fo'i i lo latou igoa ua fa'aigoaina ai le Ausiva. O se galuega ua fua mai, ma ua silia ma le 5,000 fanau talavou ua mae'a aoaoina lelei ai i lea agaifanua a Samoa,” o se tala lea a Tuifa'asisina.

O le aso 30 Mati, 2019 o le a faia ai le fa'afiafiaga tele i Aukilani, ma o le a sisiva ai le tatou ausiva lenei, ma o se sao fo'i lea o Amerika Samoa. Ma o le a so'ofa'atasi uma Lala nei e tolu, ma faia ai le sao tele lea e fa'aofi ane ai fo'i ma le ausiva i Aukilani, Niu SIla. O le fa'amoemoe lea e faia i le Malaeloa Community Hall i Mangere Aukilani, NZ.