Tala I Vaifanua

TO'ATOLU FANAU AOGA SUIA  AMERIKA SAMOA FA'AALIGA INTEL/ISEF:

Mai le Ofisa o le OCI a le tatou Matagaluega o Aoga (OCI/DOE) ua fa'alauiloa mai ai sui e to'atolu o le a suia fo'i Amerika Samoa i le fa'aaliga o Galuega Fa'atino Fa'asaeanisi a le Iunaite Setete lea e faia i Phoenix, Arizona ia Me 12-17, 2019.

O i latou nei e to'atolu, o sui ua latou ausia le togisilia, tulaga lua ma le tulaga tolu i galuega fa'atino fa'asaeanisi lea na mae'a i le vaiaso na te'a nei i le US Army Reserve Center i Tafuna. O le lona 36 ai lenei o fa'aaliga o galuega fa'atino fa'asaeanisi ua fa'atautaia e le OCI/DOE ma ua fa'atauva ai le fanau a'oga mai a'oga tulaga muamua ma a'oga maualuluga i le teritori.

O i latou nei e to'atolu ua fa'alauiloa mai: Da In Myung mai le South Pacific Academy na mauaina le tulaga muamua, tulaga lua Carl Daniel Balauro mai le Fa'asao Marist High ma le tulaga tolu o Gloria Park mai le Pacific Horizon School.

O isi fa'ailoga e atoa i ai le tulaga fitu, lea e mafai lava ona malaga uma le to'aono ma le to'atasi e fa'aagaaga ina nei i ai se fa'aletonu, tulaga fa ua maua e le tama'ita'i o Georgina Alofa mai le Manumalo Academy, tulaga lima Akenese Saleutogi mai Tafuna High School ma le tulaga ono Angela Chen ae tulaga fitu Victor Chen mai le Pacific Horizon.

E to'aono i latou e mafai ona malaga e suia Amerika Samoa i le faaaliga lea a le INTEL International Science and Engineering Fair [ISEF] ma o le faaaliga sili ona tele lea mo fanau a'oga e le'i ulufale i Kolisi ma Iunivesite i galuega fa'atino fa'asaeanisi.

[O le isi vasega atoa o fanau sa lautogia a latou galuega fa'atino fa'asaeanisi i lenei tausaga o le a tusia lea i le tala o le fa'aaliga atoa i le lomiga o le Samoa News, aso Gafua a sau nei.]

FA'ATASIA TUPULAGA PAGO PAGO; TA'AMILOSAGA VOLLEYBALL FEB 23-APERILA 13

Ua amatalia e le afio'aga o Pago Pago se matati'a fou ina ia mafai ona maua agaga o tupulaga talavou e mafuta fa'atasi ai, fiafia fa'atasi ma toe ta'a'alo fa'atasi ai i latou.

O le taumafaiga ua so'ofa'atasi uma ai Ekalesia o lo'o fa'atula'ia ma puipuia e le faiganu'u a Pago Pago, ma ua tofusia i latou ma 'au Volleyball, ua fa'avasegaina fo'i Kamupani latou te fesoasoani i le fa'atupega o mea e mana'omia e nei 'au Volleyball mo le ta'amilosaga ua mae'a fa'atulaga e amatalia ia Fepuari 23, se'ia o'o ia Aperila 13, 2019.

Na amatalia lava le fa'amoemoe ina ua mae'a soalaupule le pa'ia maualuga o le afio'aga e afua mai le afioga le Ma'oputasi Mauga T. Asuega ma le pulega i Ali'i ma Faipule se'ia o'o i le vasega o Fa'afeagaiga taulagi o Fata Faitaulaga uma i le afio'aga, ma latou o mai fa'atasi e molita'i le fa'amoemoe i le Atua e ala i le sauniga lotu na fa'atautaia ia Fepuari 17, 2019 lea na tu'ufa'atasia i le malumalu EFKAS i Pago Pago.

O le aso Lulu na faia ai se fa'atasiga ma le vasega o le au fa'asalalau. O le lauga fa'apitoa sa tu'uina lea i le susuga le Fa'afeagaiga Lagofa'atasi Ae o le All People's Bentecostal Church i Pago Pago.

I lana folasaga na ia saunoa toto'a ai le misiona e fia maua agaga o le fanau, ia fa'ailoa i le vasega o talavou uma, "E amanaia o latou leo ma o latou manatu i totonu o le afio'aga, ae maise o latou aiga ma le latou ekalesia. Ua tatau ona suia le faiga tuai i le faiga fou. Ia aua le toe nonofo i tatou o matua ma fa'atonu atu fanau i taimi uma, ae fa'afesiligia fo'i o latou lagona i taimi uma."

"E tolu lava vaega o lenei fa'atasiga ua me'a fa'atulaga lelei: 1/ O le tatou auva'a potopoto mai - o se amataga lelei lea; 2/ Auai fa'atasi i taimi uma, ua iloga ai ua aga'i atu ina lelei mea uma; 3/ Galulue fa'atasi o le auga lea na tatou naunau i ai!"

O lana fa'amatalaga lea sa fa'ai'u i ai sona manatu, ae le muta lona fa'ailoa mai pea o le mau autu o le fa'amoemoe, Mataio 19: 26 "E leai se mea e faigata i le Atua, E mafaia mea uma i le fa'atasi mai o le Atua ia i tatou."

Na tu'uina le avanoa i le tama'ita'i talavou Faipisinisi Ella Gurr, lea e ona le Pago Pago Trading Company, ma o ia lea sa ia fa'alauiloa pisinisi ua sapaia le fa'atupega o a'u ta'a'alo Volleyball mai Ekalesia ta'itasi i le afio'aga.

O le 'au a le Assembly of God Pago Pago lea e ta'ita'ia e Rev Dave Mageo, ua sapaia lea e le Tool Shop. O le 'au a le Baptist Church lea e ta'ita'ia e Rev Va'afuti Filipo ua fa'atupea lea e le U&H Inc. O le au ta'a'alo a le Ekalesia Metotisi i Pago Pago ua sapaia lea e le Kamupani a Nana's Inc.

O le 'au ta'a'alo a le Seventh Day Adventist i Pago Pago, ua sapaia lea e le TM Inc. O le au ta'a'alo a le Latter Day Saints lea e ta'ita'ia lea Bishop Leaoa Paulo T. Mata'utia, ua sapaia malosi lea e le Lucky Fastfoods.

O le CCJS ma latou 'au ta'a'alo lea e ta'ita'ia e Rev. Dr. Patolo Mageo ua sapaia lea e le Uptown Shopette. O le au ta'a'alo a le Ekalesia Katoliko Roma ua sapaia malosi e le Tutuila Printing ae om le au ta'a'alo a le EFKAS, lea e ta'ita'ia e Rev. Fa'afetai Richard Fa'avae ua sapaia lea e le Manu'a Inc. O le au ta'a'alo a le All People's Bentecostal Church i Pago Pago ua fa'atupea lea e le Aiga Mart Store.

Ua i ai fo'i nisi sa latou fesoasoani malosi e ala i le foa'i o le tamaoaiga e fa'atautaia ai lenei fa'amoemoe ma ua lisia ai nisi o i latou nei: Sui i le Konekeresi Aumua Amata; Le Afioga le Ma'oputasi Mauga ma le Faletua; Pulu Ae Ae; le afioga le Faipule Vesiai Poyer Samuelu; Fa'atonu o le DYWA Jonathan Fanene, lea o le a faaaogaina atoa le faleta'alo i Pago Pago e fa'atautaia ai lea liki Volleyball i le itupa o Tama'ita'i ma Ali'i ane maise fo'i o fanau iti e i lalo ane o le 18 tausaga le matutua.

I le tautalaga mulimuli a le afioga le Ma'oputasi sa ia fa'ailoa ai le fa'amoemoe atoa, "Ia maua mai agaga ma loto o le fanau talavou a le afio'aga lenei. Ia taulamua i le fai o galuega lelei, tauva fa'atausala i fa'agatama ua feso'ota'i ai ma tupulaga o isi afio'aga, alo ese i le tele o fuala'au fa'asaina o lo'o ua a'afia ai le olaga talavou o le to'atele ma ua nofosala ai nisi i le to'ese ona o soligatulafono, ae ia tatou taumafai i se olaga filemu ma le fiafia fa'atasi ma outou aiga, o e pele ia te outou. O le fa'afetai i tama uma o ekalesia ta'itasi i le afio'aga, aua o la outou lagolagosua i lenei fa'amoemoe, ua maua ai lenei fesilafa'iga taua mo le afio'aga. Peita'i o le fa'afetai e tatau mo lenei fa'amoemoe, o le fa'afetai lea ia Rev Lagofa'atasi Ae ma le tuafafine ia Ella Gurr, o oulua fo'i o talavou moni lava o Pago Pago, fa'afetai o lea ua outou fo'i mai e fa'atino galuega lelei mo outou uso a talavou i le afio'aga. Ia lalamua Pago Pago i fa'amanuiaga, ia lalamua fo'i Pago Pago i le faia o mea lelei e ta'uleleia ai le Atua ma lona finagalo.”