Tala I Vaifanua

TU'UA MAFUTAGA PELE I LONA AIGA - FA'AMASINO LYLE RICHMOND

I toe sauniga o le afioga le ali'i sa avea ma Fa'amasino Lagolago o le Vaega o Fa'amasioga mo le 20+ tausaga, Lyle Richmond sa fa'afofogaina ai nolimau o le valevale alofa o e na mafuta ma ia i le galuega a le Atua, i le la'ua Ekalesia e tapua'i ai i le Atua, le mamalu o sui o le aiga ae mai ai le faletua, o le manamea sa alofagia e ia a'o soifua, Papali'i Violet Richmond.

I na molimauina, sa fa'ailoa lava uiga masani o le tama e va'aia i le mafutaga, e le tautala, ae matua tausa'afia ona uiga, e le mailoa e se tasi se taimi e iloga mai ai sona uiga le fiafia i se tasi, o uiga tonu nei e fa'ailoa o fofoga o le tagata kerisiano.

"E ataata ma fiafia e fa'aosofia ai fo'i le fiafia o isi latou te mafuta fa'atasi. Sa faamoemoe i ai le loto o lona to'alua pele, ma avea i la'ua o nisi e fa'amoemoeina i le galuega fa'alotoifale a le Eklesia. Sa la'ua matua tautua i le ekalesia ae maise fo'i le faletua, Susuga Papali'i i le mafutaga a Tina, lea e tapenapena i mea uma o le lotoifale a le Ekalesia,” o nisi na o molimau sa fa'afofogaina.

Ona o lea tama o se tasi e alofa tele i lana manamea, o lea sa loto ai lava le susuga Papali'i Violet e fa'ato'a aumaia lava o ia i tua e tapenapena ai lona toe sauniga i le vaitau o lo'o fa'amanatuina mo Manamea ma pelega i mafutaga mamae i le lalolagi, Fepuari 14, 2019.

Na avatua o ia ma toe tofa tasi lava i lona Maota i Lepuapua i lea aso ma fa'ato'a tapena ai i lona toe sauniga mamalu i le Calvary Temple i le aso Faraile ua te’a, ona fa'ato'a lagomau lea o ia i lona Oliolisaga tumau i lona aiga i Lepuapua lava i le aoauli o lea lava aso.

Na tapena fo'i lana Ekalesia ma latou pesepese i vi'iga o le Atua e leoina ai lona Sa i lona toe afiafi i lona aiga, Matagofie fo'i upu fa'amalosi'au ma fa'amafanafana a le afioga le Fa'afeaiga Rev, Va'a Le'iataua ma ua avea lea ma fa'amafanafanaga sili mo le tina, le fanau ma le pa'ia o aiga.

ASPA - MAFUAGA O LE PALAPALA PEA O LE SUAVAI TAUMAFA

Ua tele taimi o taumafai e maua se tala e agatonu ai le va'aia ma le fa'amaonia pea o le suavai taumafa a le atunu'u o lo'o matua palapala lava, ma ua fa'asolo atu i le lua masina ae o lea fa'ato'a maua se fa'amatalaga sao e tusa o lea fa'afitauli tele.

Ua saunoa fa'apitoa mai William Spitzenberg o le ASPA, "O le fa'aletonu o le sapalai o le suavai manino i le aotelega o aiga mai Tafuna atoa se'ia o'o i Fagatogo, ona o lo ua sao le lologa po'o suavai o tafega pe a timuga i totonu o le sapalai lea e ta'i atu i paipa o le suavai taumafa a le atunu'u. E ui a ia ua taumafai e taofia le sapalai ae toe falasi mea uma ina ia toe vave mama le suavai, ae le o taofia ai fo'i le toe timuga tetele mai o le masina lava o Ianuari ma Fepuari o lenei tausaga, ae le'i uma ona falasi ia mama le suavai."

"E i ai ma le isi fa'afitauli ua alia'i mai ai ina ua taofia le suavai ae se'i falasi mai paipa vai, ua vaivai ai ma le una'i o le suavai ma ua vaivai ai le alu a le suavai i lenei vaega atoa o le motu. O nei fa'afitauli uma fo'i, ua mae'a soalaupule i ai le ASPA ma le ASEPA mo se fa'atupega o le galuega toe fa'aleleia o le sapalai suavai taumafa mama mo Tafuna se'ia pa'ia Fagatogo, o le itu lea o le motu e sili ona tele pisinisi fa'apea ma tagata olo'o alaala ai,” o se isi lea fa'apupulaga a le ali'i e pule i le vaega o le suavai taumafa a le ASPA.

"O le masani sa i ai, a lua pe tolu aso talu ona mae'a lologa, e faigofie lava le galuega toe fa'amama, e taofia le sapalai o le vai falasi atoa le pamu o sapalai atu ai le suava, ona toe fo'i lava lea o le suavai i le mama e tatau ai ona fa'aaogaina e tagata lautele. O lenei tausaga ua le aoga lea faiga ma ua faliu ai loa e matua galuea'ina le poloketi atoa, ae tatau ona atoa le tausaga o fa'atino lea galuega ona fa'ato'a fa'aleleia a'ia'i lea o le sapalai o le suavai mama i aiga uma o lo'o aofia i le itu ua fa'ailoa atu."

"Ua i ai le gaoioiga ua talosagaina e ao ina faia e aiga ta'itasi o fa'aaogaina le suavai mai paipa suavai a le ASPA, ia tunu lava le suavai ona fa'ato'a fa'aaoga ai lea mo mea'ai ma isi mea uma e inumia ai. Lona lua, e alu le tausaga atoa lea e faia ai le galuega tele ua foufou nei e amatalia, o lo'o fa'apupuna pea lava le suavai mo aiga uma. Afai fo'i ua mana'omia tele ona fa'aaogaina ni filters i gutu paipa o umukuka e gaosia ai mea taumafa, e mafai ona fa'aaoga, ma matauina fo'i, e ao ina fufulu filters nei pe a mae'a le vaiaso poo le masina talu ona fa'aaoga, epei ona fa'atonuina mai e le kamupani na gaosia nei filters."

Ua fa'amaulalo mai fo'i le pulega o le suavai i le mamalu lautele, ona o le fa'aletonu i le tautua ma le auaunaga tau le suavai taumafa, peita'i ua taumafai e fa'atino le galuega ina ia fa'aleleia atoatoa mo le atunu'u i se taimi e talafeagai ma galuega o lo'o ua fa'atulaga mo lea fa'amoemoe lelei.

O le fa'atupega o le toe galuega fou lea la'a faia i le suavai taumafa, ua mae'a fa'atupea lea e le USEPA, ma e ao fo'i ina taga'i toto'a i fanua e ao ina lisia lelei fa'afeagaiga ma aiga e ona eleele, ina ia mafai ona vave mae'a fa'atino lea poloketi aoga tele.

I le isi itu o le tautua lautele, ua iloga mai le to'atele ua maua i le influenza i lenei vaitau. Ua iloga mai e tetele fa'ama'i fo'i e a'afia ai le atunu'u, pe a le mama le suavai taumafa. O le manava tata le isi fa'ama'i e masani ona lutia ai le atunu'u pe a le mama fo'i le suavai taumafa.

Ua faailoa mai fo'i e Marion Fitisemanu sui fa'atonu o le DOH o lo ua talanoaina e i latou ma le ASPA lea tulaga, ma ua tima'ia fo'i ia vave ona fa'alauiloa le galuega o lo'o faia, ina ia nofo mautinoa le atunu'u o fa'atino tautua e tatau ai, ia mautinoa ua saogalemu le soifua maloloina lautele o tagata uma. “O le taulogologo e aoga tele.”

2 MALAGA A LE SAMOA AIRWAYS I OFU I LE VAIASO

O le tala fiafia ua maua nei e le vaega e fiafia e malaga i Ofu ma Olosega e ala i le va'alele Samoa Airways, lea ua fa'ailoa mai ua fa'atulaga nei ana malaga e lua i le vaiaso mo Ofu Manu'a. E le gata i lea, ae ua tolu malaga e fa'atutu atu i Ta'u i le vaiaso e tasi.

O malaga mo Ofu ua i ai nei i aso Lua ma aso Tofi, ae o malaga mo Fitiuta i Ta’u ua fa’atulaga i aso Gafua, aso Lulu ma le aso Faraile.

MALIU TAMAITA'I VA'ALELE MAI AUKILANI AGA'I I SAMOA

I se lipoti mai Samoa, o lo’o taua ai e faapea o le Tama'ita'i Sa Samoa sa malaga mai Aukilani Niu Sila i Samoa i le fa'aiuga o le vaiaso ua te'a, na pa'u ai i luga o le va'alele ua matapogia, ma ua fiu e toe tau fa'ate'i mai, ae ua leai lava.

Na faailoa o le toe taliu ane o ia i lona nofoa, sa pa'u ai, na taumafai fo'i le aufaigaluega a le Air New Zealand e faia le CPR ina ia toe te'i mai o ia, ae le'i toe aoga lea ia Sister Filomena Potogi.

O Sister Filomena o lo'o fa'amauina lona afio'aga na soifua a'e ai i Vaivase Samoa, ma o ia fo'i o se tasi o tama'ita'i Sa muamua lava mai Samoa na ulufale ma tautua i le Sisiters of Nazareth i Lepea.

Na ave sana fa'amalologa i Niu Sila ma o lona toe taliu mai lea ua maliu ai.